سەرۆك بارزانی، پیرۆزباهییا جەژنا چلێ هاڤینێ ل كوردێن ئێزدی كر و هەڤدەم هیڤیدارە ل جەژن و هەلكەفتێن ئایینیدا دەمەكێ خوەش و ئارام ببەنە سەر.
دەقێ پەیاما پیرۆزباهییا سەرۆك بارزانی:
ب هەلكەفتا جەژنا چلێ هاڤینێ یا خوشك و برایێن ئێزیدی پیرۆزباهییەكا گەرم ل جڤاتا رۆحانی و هەمی ئێزیدیێن كوردستانێ و جیهانێ دكەم.
هیڤیدارم خوشك و برایێن ئێزیدی هەمی جەژن و هەلكەفتێن ئایینی د ئارامی و تەناهیێ دا ببەنە سەر.جەژنا هەوە پیرۆز بیت و بمینن ب خێر و خۆشی.

نێچیرڤان بارزانی، سەرۆكێ هەرێما كوردستانێ ب هەلكەفتا جەژنا چلێ هاڤینێ، پەیامەكا پیرۆزباهی ئاراستەی ئێزدیێن كوردستانێ و ئیراقێ و ل هەر جهەكێ ل جیهانێ كر و هیڤییا جەژنا ئارام بۆ خواست.
دەقێ پەیاما سەرۆكێ هەرێما كوردستانێ
جەژنا چلێ هاڤینێ ب گەرمی و ژدل ل هەموو هەڤوەلاتی یێن مە یێن ئێزدی ل كوردستانێ و ئیراقێ و ل هەر دەرا جیهانێ بن پیرۆز دكەم، هیڤیا جەژنەكا ئارام و تەنا بۆ وان هەمووا دخوازم.
دیسا هەموو خوشك و برایێن خۆ یێن ئێزدی پشتڕاست دكەم كو وەك هەردەم دێ پشتەڤان و پارێزەرێن مافێن وان بین و كوردستان دێ هەر مینیت وەلاتێ پێكڤەژیانێ بۆ هەموو پێكهاتێن خۆ.جەژنا هەمووا پیرۆز بیت، هەر سال ب خێر و خۆشی.

مەسرور بارزانی، سەرۆكێ حوكمەتا هەرێما كوردستانێ پیرۆزباهییا جەژنا چلێ هاڤینێ ل كوردێن ئێزدی كر، هەڤدەم پشتەڤانییا حوكمەتا هەرێما كوردستانێ بۆ ماف و داخوازیێن رەوا ئێزدییان دوپاتكر.
دەقێ پەیاما سەرۆكێ حوكمەتا هەرێمێ:
جەژنا چلێ هاڤینێ ل تەڤایا خوشك و برایێن ئێزیدی یێن كوردستانێ و جیهانێ و ڕێزداران میرێ ئێزیدییان و بابە شێخ و جڤاتا ڕوحانی پیرۆز دكەم. هیڤیدارم ب خێر و خۆشی ڕۆژێن جەژنێ ببورینن.
ئومێدا پاشەڕۆژەكا باشتر بۆ خوشك و برایێن ئێزدی دخوازم و پشتەڤانییا حوكمەتا هەرێما كوردستانێ بۆ ماف و داخوازیێن رەوا یێن وان دوپات دكەینەڤە. هەردەم د خۆشێی دا بن.

فراكسیۆنا پارتی دیموكراتی كوردستان ل جڤاتا نوونەرێن ئیراقێ، دوپاتی ل سەر پێدڤییا بەرهنگاربوونا هزركرنا شۆڤینیستی كر، هەڤدەم داخواز ژ حوكمەتا فیدرال كر قەرەبوویا كەسوكارێن ئەنفالا بارزانییان بكەت.
فراكسیۆنا پارتی ل جڤاتا نوونەرێن ئیراقێ بەیاننامەیەك بەلاڤكر و تێدا هاتیە» هەلكەفتا سالڤەگەڕا 42 یا ڤێ كۆمكوژیێ دكەین، كو رژێما ئیراقێ یا بەرێ بەرانبەر ز زێدەتر ژ هەشت هزار هەڤوەلاتیێن بێتاوان یێن بارزانی ئەنجامدای، ئەڤ كۆمكوژییە ئێك ژ درەندەترین تاوانێن دژی مرۆڤایەتیێیە د دیرۆكێدا».
د بەیاننامەیێدا ئاماژە ب وێ چەندێ ژی هاتیە كرن» ب رێز ڤە ل پێشبەری گیانێ وان شەهیدان د راوەستین، كو تاكە تاوانا وان ئەوبوو رۆلێن گەلێ سەربلندێ كوردستانێ بوون، كو بۆ بەرگریكرنێ ژ دۆزا دادپەروەرانەیا خوە سەرهلدابوون، چیرۆكا تراژیدی و پر ئازار یا وان هەتا نوكە ژی د ویژدانا هەر كوردەكیدا ب زیندی مایە».
فراكسیۆنا پارتی ل جڤاتا نوونەرێن ئیراقێ داخواز ژ حوكمەتا فیدرالی كر قەرەبوویا كەسوكارێن ئەنفالا بارزانییان بكەت، هەروەسا دوپاتی ل سەر پێدڤییا بەهنگاربوونا هزركرنا شۆڤینیستی كر و دا دیاركرن كو ئەو جۆرە هزركرنە گەفە ل ئاسایش و ئارامییا وەلاتی.
هەروەسا فراكسیۆنا پارتی دوپاتی ل سەر پێدڤییا لێپرسینێ ژ هەر كەسەكی كر كو بزاڤا تێكدانا دەستكەفت و پێشەفتنێن هەرێما كوردستانێ دكەت.

بەرپرسەكێ نڤیسینگەها رزگاركرنا رەڤاندیێن كوردێن ئێزدی راگەهاند: زێدەتر ژ دو هزار و 500 ئێزدی د بێ سەر و شوونن، هەروەسا دبێژیت: رەوشا ژیانا وان هەمبەركرن ب سالا 2014 كو داعشێ هێرش كریە سەر، گوهۆڕینەكا بەرچاڤ ب سەردا نەهاتیە.
خەیری بۆزانی، سەرپەرشتێ دۆسێیا رزگاركرنا رەڤاندییان ل نڤیسنگەها رزگاركرنا رەڤاندیێن كوردێن ئێزدی گوت» هەموو سالان هەلكەفتا جینۆسایدا كوردێن ئێزدی دكەین و هەموو دەمان ژی دبێژین دوماهی ب جینۆسایدێ نەهاتیە و یا بەردەوامە، چونكە هەتا نوكە زێدەتر ژ دو هزار و 500 كوردێن ئێزدی د بێ سەر و شوونن».
خەیری بۆزانی گوت ژی» هێشتا پترییا ئاوارەیێن ئێزدی ل كەمپاندا دژین، شنگال نەهاتیە ئاڤەدانكرن و هیچ خزمەتگوزارییەك پێشكێشی قەزا شنگالێ نەهاتیە كرن، لەما جینۆسایدێ ب بەردەوام دزانین و دبێژین، رەوشا ئێزدییان جوداهییەكا مەزن ل گەل سالا 2014 نینە كو داعشێ هێرش كریە سەر».
نێزیكی 11 سالان ب سەر جینۆسایدا كوردێن ئێزدی دەرباز دبن. ل دووڤ گۆتنا سەرپەرشتێ دۆسێیا رزگاركرنا رەڤاندییان ل نڤیسینگەها رزگاركرنا رەڤاندیێن كوردێن ئێزدی» پترییا ئەوێن كەفتینە دەستێ داعشێ، ژن و زارۆك بوون».
نڤیسینگەها رزگاركرنا رەڤاندیێن كوردێن ئێزدی سەر ب نڤیسینگەها نێچیرڤان بارزانی، سەرۆكێ هەرێما كوردستانێیە و هەر ژ سالا 2014 كار دكەت بۆ رزگاركرنا ئێزدیێن كەفتینە دەستێ داعشێ.
خەیری بۆزانی باس ل وێ چەندێ كر» ل سالا 2014 هەتا 2018 پڕۆسەیا رزگاركرنا رەڤاندییێن كوردێن ئێزدی ب لەز بڕێڤەدچوو، بەلێ پشتی وێ چەندێ ژن و زارۆكێن چەكدارێن بەرێ یێن داعشێ ل كۆمپا (هۆل) ل حەسەكە ل سووریێ هاتینە كۆمڤەكرن، مخابن هێزێن سووریا دیموكرات (هەسەدە) هاریكار نەبوون بۆ وێ چەندێ ئێزدیێن د ناڤ ژن و زارۆكێن چەكدارێن بەرێ یێن داعشێ رزگار بكەن».
وەزارەتا كۆچ و كۆچبەرێن ئیراقێ هەتا نوكە هەژمارەكا مەزن ژ هەڤوەلاتیێن ئیراقی ژ كۆمپا هۆلێ زڤراندینە. خەیری بۆزانی داخواز ژ حوكمەتا ئیراقێ دكەت خوە ب بەرپرسیار بزانیت و بزاڤێ بۆ رزگاركرنا وان بدەت یێن كەفتینە دەستێ داعشێ.
قەزا شنگالێ ژ روویێ كارگێریڤە سەر ب پارێزگەها نەینەوا ڤەیە. ل دووڤ گۆتنا سەرپەرشتێ دۆسێیا رزگاركرنا رەڤاندییان ل نڤیسینگەها رزگاركرنا رەڤاندیێن كوردێن ئێزدی» هەتا نوكە ئیراق و حوكمەتا خوەجهییا نەینەوا وەكو پێدڤی بزاڤا لێگەریانێ و رزگاركرنا رەڤاندیێن ئێزدیین نەكریە».
خویاكر ژی» حوكمەتا ئیراقێ بۆ كاروبارێن رەڤاندیێن ئێزدی دو لژنەیێن پێكئیناین، بەلێ تنێ وەك لژنە ماینە و هەتا نوكە هیچ پێنگاڤەك نەهاڤیتییە، لەوما دوبارە داخوازێ ژێ دكەین هاریكارییا وی خەلكی بكەن كو بزڤرنە جهێن خوە».
حوكمەتا هەرێما كوردستانێ و حوكمەتا ئیراقێ ل مەها 10 سالا 2020 رێككەفتنەك بۆ ئاساییكرنا رەوسا شنگالێ ئیمزا كربوو. سەرپەرشتێ دۆسێیا رزگاركرنا رەڤاندیێن ئێزدی دبێژیت» هەكە ئەو رێككەفتنە هاتبا بجهئینان دا 50% ژ كێشەیێن شنگالێ چارەسەر بن و رەوشا ژیانا ئێزدییان دا هێتە گوهۆڕین، بەلێ مخابن بەغدا د پرسا بجهئینانا خالێن رێككەفتنێ گەلەك خەمساریێ دكەت».
ل 3/8/2014، رێكخراوا تیرۆرستییا داعشێ هێرشەكا بەرفرهە ل سەر شنگالێ و دەوروبەرێن وێ ئەنجامدا. د هێرشێدا 11 هزار و 417 كوردێن ئێزدی هاتنە رەڤاندن، هاتنە كۆمكۆژكرن و بێسەروشوونكرن و پشتی هێرشێ ژی هەژمارەكا مەزن ئاوارەی هەرێما كوردستانێ بوون.