رەمەزان زەكەریا:
ڕێڤەبەرێ پۆلیسێن دارستان و ژینگەهێ ل ئاكرێ ڕاگەهاند، ژ بەر گرنگیدانا حوكمەتا هەرێما كوردستانێ و دەركەفتنا ڕێنومایێن نوو بۆ پاراستنا ژینگەهێ و سروشتی، چیایێن سنۆرێ ئاكرێ ژیاینەڤە و دبێژیت: ئەم پێشبینی دكەین ڕێژەیا گیانەوەرێن كووڤی ژی بەرەڤ زێدەبوونێ بچیت.
عەقید سەعد خالد عادل، ڕێڤەبەرێ پۆلیسێن دارستان و ژینگەهێ ل ئاكرێ بۆ ئەڤرۆ گۆت: «حوكمەتا هەرێما كوردستانێ گرنگییەكا مەزن ددەتە پاراستنا ژینگەهێ و گیانەوەرێن كووڤی، مەفرەزەیێن جێگیر و گەڕۆك بەردەوام چاڤدێرییا دارستانان دكەن، بۆ ڕێگریكرنێ ل داربڕینێ و نێچیركرنێ، ئەڤێ چەندێ ژی وەكریە كو دەستكارییا سروشتی ب ڕێژەیەكا بەرچاڤ كێم ببیت».
ناڤبری گۆت ژی: «هشیارییا وەلاتییان بلند بوویە و دزانن، داربڕین و نێچیركرنا نەیاسایی سزایێن دارایی و زیندانكرنا گران ل سەر هەنە، لەو خۆ ژێ دوور دكەن».
زێدەتر گۆت: «نوكە ڕێژەیا داران ل چیایان زێدە بوویە، پێشتر گیانەوەرێن كووڤی كێم ببوون، بەلێ چاڤدێرییا بەردەوام وەكریە گیانەوەرێن كووڤی ژی زێدە ببنەڤە، ژ بەركو ئارمانجا مە پاراستن و ئاڤەدانكرنا ژینگەها كوردستانێ یە».
نيشاندان