ب دووماهی هاتنا یاریێن گەڕا 15ێ‌ ژ هەڤڕكیێن خولا ستێرێن ئیراقێ‌ یا فوتبۆلێ‌ هەرسێ‌ یانەیێن كوردستانی سەركەفتنێن باش و گرنگ ئینان و نەورۆز ب خالەكا گرنگ ژ بەغدا ڤەگەریا، ژلایێ‌ خوەڤە یانەیا زەورا جهێ‌ خوە ل سەرێ‌ لیستێ‌ پاراست.
ئەلهۆیێن چیا نێجیرا خوە ل بیرێن نەفتا میسان كر
تیما فوتبۆلا یانەیا دهۆك بەردەوامە ل سەر سەركەفتنێن خوە د خولێ‌ دا و گەهشتە سەركەفتنا خوە یا هەشتێ‌ پشتی ب دو گۆلێن پاقژ یانەیا نەفت میسان خوسارەت كری، د یارییا واندا ئەوا ل یاریگەها نەفتێ‌ هاتیە كرن، هەردو گۆلێن دهۆكێ‌ ژلایێ‌ پیشەكارێ‌ وێ‌ یێ‌ نوو مارلۆن دوسانتۆس و پیتەر گۆرگیس د خولەكێن 13 و 15ێ‌ یێن دەستپێكا یاریێ‌ دا، بڤێ‌ ئەنجامی ئەلهۆیێن چیا جهێ‌ خوە ل رێزا پێنجێ‌ پاراست ب كۆمكرنا 27 خالان ژ ئەنجامێن هەشت سەركەفتن، سێ‌ وەكهەڤییانە، لێ‌ چار خوسارەتی هەنە، بڕیارە ل ئەینییا بهێت تیما دهۆكێ‌ بمینتە ل بەسرا و یارییا خوە یا گەڕا 16ێ‌ ببیتە مێڤانا یانەیا مینا ئەوا دێ‌ ل دەمژمێر پێنجێ‌ مەغرەب ل یاریگەها فەیحا هێتە كرن.
پاشەنگ سەرێ‌ لیستا گۆلكەرێ‌ تیما خوەیە
بۆ زانین هەشت یاریزانان پشكداری د تۆمار كرنا 20 گۆلان دا كرینە بۆ یانەیا دهۆكێ‌ و بڤی ڕەنگی، پاشەنگ عەبدوللا شەش گۆل، پیتەر گۆرگیس پێنج گۆل، هەر ئێك ژ كەریم دەرویش و شەرقی ئەلبەحری دو گۆل هەنە، هەروەسان هەر ئێك ژ بەیار ئەبۆ بەكر، یانیك زاكێری، و كێلبرت كۆمسۆن و مارلۆن دۆسانتۆس گۆلەك تۆماركرینە، گۆلەك بۆ یاریزانەكێ‌ یانەیەكا دی هاتییە هژمارتن، پشتی ب شاشی ڤە گۆل ل سەر تیما خوە كر.
كاپتنێ‌ تیما دهۆكێ‌ كەیفخوەشە و ڕژدن بۆ بەردەوامییا سەركەفتنان
د كۆنگرەیێ‌ رۆژنامەڤانی یێ‌ پشتی یاریێ‌ دا كاپتن و ستێرێ‌ یانەیا دهۆك هارۆن ئەحمەد كەیفخوەشیا خوە ب دەستڤە ئینانا یێ‌ خالان دیار كر و گۆت: مە یارییەكا ب هێز بەرانبەر یانەیەكا خودان شیان دكر ئەوێن دناڤ ئەرد و جەماوەرێ‌ خوە دا بوون، بۆ مە گرنگە سێ‌ خالێن یاریێ‌، هەموو یاریزانان ئاستەكێ‌ مەزن نیشان دا و ئەڤە ژی ڤەدگەڕیت بۆ شارەزاهییا كادرێ‌ راهێنانێ‌، ئەم سۆزێ‌ ددەین و ڕژدین ژبۆ بەردەوامییا سەركەفتنان.

ئامارێن پیتەری بۆ دهۆكیان دلخوەشكەرن
ستێرێ‌ یانەیا دهۆك و هێلا ناڤین پیتەر گۆرگیس د ماوەیێ‌ 10 یاریان دا پێنج گۆل كرینە و دو ئەسێست هەنە كو دبیتە ئێك ژ باشترین یاریزانێن د خولا ستێرێن ئیراقێ‌ دا ل هێلا خوە دیسان وەكو یاریزانەكێ‌ ڕەڤەندا ئیراقی ئەوێن ل وەلاتێ‌ ئۆرۆپا دژین.
ب گۆلا ئەمجەدی پێلێن خابووری ل سەر نەفتا بەسرا داگیركرن
ژلایێ‌ خوەڤە تیما یانەیا زاخۆ شیان سەركەفتنەكا ژ هەژی و گرنگ ل سەر خودانێن ئەردی یانەیا نەفت ئەلبەسرا ب سێ‌ گۆلان بەرانبەر گۆلەكێ‌ د یارییا واندا ئەوا ل یاریگەها فەیحا ل باژێرێ‌ بەسرا هاتیە كرن، هەرچەندە د نیڤا ئێكێ‌ دا كوڕێن خابۆری ب گۆلەكێ‌ یا پێشكەڤتی بوو، لێ‌ د نیڤا دویێ‌ دا یارییەكا ئاگرین و پری گۆل و توند و ئالۆزی ژلایێ‌ یانەیا نەفتێ‌ ڤە هاتە دیتن گۆلێن زاخۆ ژلایێ‌ پیشەكارێ‌ وێ‌ یێ‌ بەرازیلی گۆستاڤۆ هێنریك د خولەكێن 39 و 79ێ‌ و گۆلا سەركەفتنێ‌ ب سەركێشیا كاپتن و ستێرا وێ‌ ئەمجەد عتۆانی بوو ئەوێ‌ ب لێدانا پەنەلتی یێ‌ سەركەفتی بوو د خولەكا 90+4 ئانكو گۆلا كۆژەك و یا سەركەفتنێ‌، بڤێ‌ ئەنجامی تیما زاخۆ ب كۆمكرنا 28 خالان پیێشڤە هاتە ڕێزا سێیێ‌ ژ ڤەرێژا هەشت سەركەفتن، چار وەكهەڤیان و سێ‌ خوسارەتی هەنە، یارییا بهێت یا كوڕێن خابووری دێ‌ بیتە مێڤانا نەفت میسان ئەوا دێ‌ ل دەمژمێر 2:30 پشتی نیڤرۆ ل یاریگەها فەیحا هێتە كرن.
حەفت یاریزانان پشكداری د گۆلێن زاخۆ دا كرینە
پشتی تۆماركرنا گۆلێن ڤێ‌ گەڕێ‌ هەردو ستێرێن یانەیا زاخۆ یێ‌ بەرازیلی گۆستاڤۆ هێنریك نەهـ گۆل سەرێ‌ لیستا گۆلكەرێن تیما خوە دهێت، یاریزانێ‌ هەلبژارتیێ‌ ئیراقێ‌ ئەمجەد عتوان ب تۆماركرنا هەشت گۆلان رێزا دویێ‌ دهێت، دیسان هەر ئێك، ناسر محەمەدو چار گۆل، هەر ئێك ژ ئەیۆب نناحی گۆلەك، محەمەد عەلی عەبۆد گۆلەك و موسێس گۆلەك، مەحمود فائیز گۆلەك تۆماركرینە.
ڕاهێنەرێ‌ زاخۆ گیانێ‌ ب كۆم و ئارمانجا سەركەفتنان گەهاندینە سێ‌ خالان
د كۆنگرەیێ‌ رۆژنامەڤانی یێ‌ پشتی یاریێ‌ ڕاهێنەرێ‌ قەتەری یێ‌ یانەیا زاخۆ تەلال ئەلبلۆشی پیرۆزباهییا پشتەڤانێن یانەیا خوە كر و گۆت: سۆپاسییا هەموو یاریزانان دكەم ئەوێن ب گیانێ‌ كۆم و شەڕەكێ‌ بەردەوام كرین هەتا ئەم گەهشتینە ئارمانجا خوە ئەو ژی سێ‌ خالێن یاریێ‌ بوون، هەرچەندە بەری و پشتی یاریێ‌ كەڤتینە لبن گڤاشتنان لێ‌ سەركەفتنەكا ژ هەژی و پێشڤەچوونەكا باشتر هاتیە بۆ یاریێن بهێت دڤێت پاراستنا سەركەفتنان بكەین.

رێزبەندییا گۆلكەرێن خولێ‌
ب دووماهی هاتنا یاریێن گەڕا 15ێ‌، ستیرێ‌ یانەیا شورتە موهەنەد عەلی ب تۆماركرنا 10 گۆلان سەرێ‌ لیستا گۆلكەران دهێت، گۆستاڤۆ هێنریك هێرشبەرێ‌ زاخۆ ب نەهـ گۆلان رێزا دویێ‌، هەڤالێ‌ وی ئەمجەد عتوان ژ یانەیا زاخۆ و عەلا عەباس یاریزانێ‌ جەوییە هەر ئێك ب هەشت گۆلان رێزێن سێیێ‌ و چارێ‌ دهێن، هەر ئێك ژ شێركۆ كەریم یاریزانێ‌ هەولێرێ‌، عەلی یۆسف ژ زەورا، پاشەنگ عەبدوللا ژ دهۆكێ‌ و یۆسف بن سودە ژ هەولێرێ‌ رێزێن پێنجێ‌ هەتا هەشتێ‌ ل دووڤ ئێك دهێن.
هەولێرێ‌ كۆلێن خوە ژ كەرخێ‌ دەركرن
پشتی د گەڕا بۆری دا تووشی خوسارەتیێ‌ بووی، تیما یانەیا هەولێرێ‌ كۆلێن خوە ژ یانەیا كەرخێ‌ دەركرن و ب چار گۆلان بەرانبەر دو گۆلان سەركەفتنەكا باش ئینا ولڤینەك ئێخستە ل سەر رێزبەندیا خوە د خولێ‌ دا، هەرچار گۆلێن كەلهە و منارە ژلایێ‌ یاریزانێن وێ‌ سەفین مەنسۆر دۆ گۆل خولەكێن 14 و 29ێ‌ و ئیڤان خالد 67ێ‌ و یۆسڤ بن سودە ل 84ێ‌، ئەڤێ‌ سەركەفتنێ‌ دو ڕێزبەندییا پێشڤە ئینا ژ 11ێ‌ بۆ رێزا نەهێ‌ ب كۆمكرنا 22 خالان، یارییا گەرا 16ێ‌ هەولێر دێ‌ ل پێنچ شەمبییا بهێت مێڤاندارییا كەربەلا كەت.
نەورۆزێ‌ سەركەفتنێن نەفتێ‌ ڕاوەستاندن
ژلایێ‌ خوەڤە یانەیا نەورۆز شیا ب وەكهەڤییەكا گرنگ ژ باژێرێ‌ بەغدا ڤەگەڕیتە سلێمانیێ‌ پشتی ب گۆلەكێ‌ هەردو تیم وەكهەڤ بووین د یارییا واندا ئەوا هەتا خولەكا 77 تیما نەفتێ‌ یا پێشكەفتی بوو لێ‌ هێرشبەرێ‌ نەورۆزێ‌ ئاسۆ رۆستەم شیا گۆلا وەكهەڤیێ‌ بینت و رێزبەندییا خوە ل 15ێ‌ پارێزیت ب كۆمكرنا 18 خالان، ل ئەینییا بهێت نەورۆز دێ‌ بیتە مێڤانا شورتە.
ژ ئەنجامێن یاریێن دی بڤی رەنگی بوون
جەوییە چنە-1 ئەلقاسم، كەربەلا چنە-1 ئەلشورتە، دیالا چنە-چنە ئەلكەرمە، ئەلنەجەف 3-2 مینا، زەورا3-2 حدود، كارەبا 1-2 تەلەبە.
رێزبەندییا گشتی پشتی بۆرینا 15 گەڕان ژ خولا ستێرێن ئیراقێ‌. 1- زەورا 31 خال.
2- ئەلشورتە 30 خال.
3- زاخۆ 28 خال.
4- جەوییە 28 خال.
5- دهۆك 27 خال.
6- تەلەبە 27 خال.
7- نەفت 24 خال.
8- نەفت ئەلمیسان 22 خال.
9- هەولێر 22 خال.
10- نەجەف 21 خال.
11- ئەلقاسم 21 خال.
12- ئەلكەرمە 20 خال.
13- مینا 19 خال.
14- كارەبا 18 خال.
15- نەورۆز 18 خال.
16- كەربەلا 15 خال.
17- نەفت ئەلبەسرا 14 خال.
18- ئەلكەرخ 12 خال.
19- حدود شەش خال.
20- دیالا پێنج خال.

بڕیارە ئەڤرۆ نەهـ یاریێن مایین ژ هەڤڕكیێن گەڕا حەفتێ‌ ژ گەڕا ئێكێ‌ یا قارەمانییا یانەیێن ئۆرۆپا قارەمانێن خولا چامپیۆنز لیگ ب ئەنجامدانا چەند یاریێن ئاگرین و شەڕێ‌ مان و نەمانێ‌ د ناڤ هەڤڕكییان دا دێ‌ هێنە كرن.
پاریس سانجیرمان- مانچستەر ستی
یارییەكا ئاگرین و شەڕێ‌ سەركەفتنێ‌ یە بۆ خوە پاراستن ژ دووركەفتنێ‌، ئەوا بڕیارە ئەڤ ئەڤ یارییە ل دەمژمێر 11ی شەڤ یاریگەها پارك دی پرێنس ل پاریسا پایتەختێ‌ فرەنسا هێتە كرن، یانەیا مانچستەر ستی بتنێ‌ هەشت خال هەنە ل رێزا 22ێ‌ دهێت ئانكو د مەترسیێ‌ دایە بەری ب دووماهی هاتنا قۆناغا ئێكێ‌ ب دو گەڕان، د بەرانبەردا كاودانێن پاریس سانجێرمان ژی د باش نینن ئەوێن رێزا 25ێ‌ دهێت ب كۆمكرنا حەفت خالان، هەلوەستێ‌ هەردو یانەیێن مەزن باش نینە و پێدڤی ب سێ‌ خالانە بۆ باشتكرنا رێزبەندییا خوە.
ریال مەدرید- رێدبۆل سالزبۆرگ
ژلایێ‌ خوەڤە تیما یانەیا ریال مەدرید یا ئسپانی دێ‌ ل یاریگەها خوە سانیاگۆ بیرنابیۆ مێڤاندارییا رێدبۆل سالزبۆرگ یا ئەلمانی كەت، یانەیا شاهان ل جهەكێ‌ نە ژ هەژی سەنگ و دەستكەفتێن وێ‌ نە ئەوا 15 جاران ناسناڤێ‌ چامپیۆنزێ‌ بدەستڤە ئینایی، د نوكەدا ب كۆمكرنا نەهـ خالان ڕێزا 20ێ‌ دهێت، لێ‌ هەكە ب سەركەفتی دەلیڤەیا ڤەگەڕیان بۆ رێزێن هەشتێ‌ ئەوێن ئێكسەر دێ‌ دەربازبنە قۆناغا 16 گەشتر لێهێت، د بەرانبەردا یانەیا ئەلمانی خودانا سێ‌ خالانە رێزا 32ێ‌ دهێت دووماهی دەلیڤەیە ئەڤرۆ خوە قۆرتالبكەت لێ‌ بەرانبەر یانەكا خودان سەربۆر و ستێر دبیت یا بزەحمەت بیت، یاری دەمژمێر 11 شەڤ هێتە كرن.
فاینۆرد- بایرن میونخ
یانەیا بایرن میونخ یا ئەلمانی چاڤەڕێ‌ سێ‌ خالێن یارییا ئەڤ شەڤە نە ئەوا دێ‌ ل دەمژمێر 11 شەڤ هێتە كرن، بایرن ل رێزا 10ێ‌ دهێت ب كۆمكرنا 12 خالان، یانەیا فاینۆرد 10 خال كۆمكرینە رێزا 18ێ‌ دهێت، ئانكو هیڤیێن وێ‌ ژی ماینە بۆ هەڤڕكیێ‌، لێ‌ یانەیا باڤاری گەشبینە بۆ سەركەفتنێ‌ پێخەمەت مسۆگەركرنا دەربازبوونێ‌.
یانەیێن ئیتالی بەرانبەر دەلیڤەیێن ب هێزكرنا هیڤییان
هەر ژ یاریێن ئەڤ شەڤە یێن دەمژمێر بهێنە كرن، یانەیا ئینتەر میلان یا ئیتالی دێ‌ بیتە مێڤانا سپارتا براگا یا چیكی، ئینتەر بەرانبەر دەلیڤەیا دووماهیێ‌ بۆ دەربازبوونێ‌ یە، ژلایێ‌ خوەڤە میلانا ئیتالی دێ‌ مێڤاندارییا جیرۆنا یا ئسپانی كەت د یارییە پێشبینیێن جودا بۆ هەبن.
ئارسنال بەرانبەر ئاستەنگا دینامۆ زاكراب
یارییەكا دی ژ چارچووڤەیێ‌ هەڤڕكیێن چامپیۆنزێ‌ دەمژمێر 11 شەڤێ‌ یانەیا ئارسنال یا ئنگلتەرا دێ‌ ل یاریگەها خوە مێڤاندارییا یانەیا دینامۆ زاكراب یا ئوكرانی كەت، یانەیا تۆپ هاڤێژ باش دزانیت دینامۆ شیانێن گوهۆڕینا ئەنجامان هەیە دێ‌ بزاڤێ كەت خوە ژ سۆپرایزا پارێزین و دەربازبوونا خوە مسۆگەر بكەت.
ژ یاریێن دی یێن ئەڤ شەڤە
سێلتیك یا ئسكوتلەندی دێ‌ ل یاریگەها خوە مێڤاندارییا یۆنگ بۆیز یا سویسری كەت دەمژمێر 11 شەڤ هێتە كرن، سپۆرتینگ لەشبۆنە یا پۆرتۆگالی مێڤاندارییا لایپزیك كەت، ستاد برێس یا فرەنسی دێ‌ بیتە مێڤانا شاختار دۆنێتسك یا ئوكراینی، هەردو یاری دەمژمێر8:45 شەڤ هێنە كرن. لیستا گشتی یا رێزبەندییا یانەیان
1- لیڤەرپۆل 18 خال.
2- بەرشەلۆنا 15 خال.
3- ئارسنال 13 خال.
4- بایرن لیڤەركۆزن 13 خال.
5- ئاستۆن ڤێلا 13 خال.
6- ئینتەر میلان 13 خال.
7- ستاد برێست 13 خال.
8- لیل 13 خال.
9- بوروسیا دۆرتمۆند 12 خال.
10- بایرن میۆنخ 12 خال.
11- ئەتلەتیكۆ مەدرید 12 خال.
12- میلان 12 خال.
13- ئەتلانتا 11 خال.
14- یۆڤانتۆس 11 خال.
15- بەنفیكا 10 خال.
16- مۆناكۆ 10 خال.
17- سپۆرتینگ لەشبۆنە 10 خال.
18- فاینۆرد رۆتردام 10 خال.
19- كلۆب پرۆچ 10 خال.
20- ریال مەدرید نەهـ خال.
21- سێلتیك نەهـ خال.
22- مانچستەر ستی هەشت خال.
23- ئایندهۆڤن هەشت خال.
24- دینامۆ زاكراب هەشت خال.
25- پاریس سانجێرمان حەفت خال.
26- شتۆتگارد حەفت خال.
27- شاختار دۆنێتسك چار خال.
28- سپارتا پراگا چار خال.
29- شتۆرم گراتسا سێ‌ خال.
30- جێرۆنا سێ‌ خال.
31- سرڤینیا زڤیزدا سێ‌ خال.
32- رێدبۆل سالزبۆرگ سێ‌ خال.
33- پۆلۆنیا دو خال.
34- لایپزیك چنە خال.
35- سلۆڤان براتیسلاڤا چنە خال.
36- یۆنگ بۆیز چنە خال.
لیستەیا گشتی بۆ هەر 36 یانەیان هاتیە دانان
هەر 36 یانەیێن پشكدار ل سەر چار ئاستێن جودا و دووڤ پلەكرنا وەرزێ‌ بۆری هاتبوونە بەلاڤكرن ئەوا پۆلینكرن ژلایێ‌ فیدراسیۆنا فوتبۆلا ئۆرۆپا هاتیە دانان، یاریێن وان ب شێوەیێ‌ خول ئێك قۆناغ دهێنە كرن، هەر تیمەك دێ‌ هەشت یارییان كەت، چار یاری د ناڤ ئەردێ‌ خوە دا و چار ژ دەرڤەیی یاریگەهێ‌، ل دووماهیێ‌ دێ‌ رێزبەندی بۆ هەر36 تیمان د ئێك لیستە دا هێتە دانان، ئەو تیمێن ل رێزا ئێكێ‌ هەتا هەشتێ‌ ئێكسەر دێ‌ دەربازبنە قۆناغا 16ێ‌، ئەو یانەیێن رێزا نەهێ‌ هەتا 24ێ‌ دێ‌ یاریێن خوە ب شێوەیێ‌ دو گەڕ ئەنجامدەن ژبۆ دەربازبوونا هەشت تیمێن دی بۆ قۆناغا 16ێ‌، لێ‌ ئەو یانەیێن رێزا 25 هەتا 36ێ‌ دێ‌ ژ قارەمانیێ‌ هێنە دوورئێخستن.