ئەمیر ئەترووشی

بەرپرسێ‌ مەكتەبا ناوەندیا پارتی دیموكراتی كوردستان د پەیڤەكێ‌ دا ل فێستیڤالا خانی دا دیار كر، پێدڤیە د رۆژا دەنگدانێ‌ دا پێشمەرگێن قارەمان و خوینا شەهیدان ژبیر نەكەن و بێژینە بەغدا و هەموو دونیایێ‌ كوردستان بەرزترینە و پێدڤیە ئەم هەمی ب هێز ڤە پشكداریێ‌ د ژیانا سیاسی یا بەغدا دا بكەین و گۆت: پێدڤیە راگەهاندكار و رەوشەنبیر د ڤێ‌ قوناغێ‌ دا كوورتر هزر بكەن و كوورتر بەرهەمدار بن و ئایندەكێ‌ گەشتر بۆ نڤشێ‌ نوو ب خولقینن.

د ناڤا فێستیڤالێ‌ دا د سالار عوسمان، بەرپرسێ‌ مەكتەبا ناوەندیا پارتی دیموكراتی كوردستان د فێستیڤالا خانی دا ئاماژە ب وێ‌ یەكێ‌ كر، ئەڤ تایتلێ‌ ل بەرامبەری من كو نڤێسایە (كوردستان و راگەهاندنا سەردەم) تایتلەكێ‌ زۆر مەزن و كاریگەرە و ئەو پانێلێن ل ڤێ‌ فێستیڤالێ‌ دهێنە پێشكێشكرن زۆر د گرنگن و پانێلستێن وان ژی خودان علم و مەعریفتن و ئەكادمیێن زۆر پێشچاڤ یێن وەلاتێ‌ مەنە.
ئەڤە ژی دەقێ‌ پەیڤا د سالار عوسمان، بەرپرسێ‌ مەكتەبا ناوەندیا پارتی دیموكراتی كوردستان:
نڤیسكار و رۆژنامەڤان و هونەرمەند و ئەدیب و چالاكڤانێن هێژا و هەمی ئەو كەسێن ل رێیێن دوور و باژێرێن دی هاتینە دهۆكا داسنیا، ب ناڤێ‌ بەرشێ‌ رەوشەنبیری و راگەهاندنا پارتی ب خێرهاتنەكا گەرم ل هەوە دكەین و ئۆمێدەوارین د سێیەمین فێستیڤالا خانی دا بشێین زەمینێ‌ خۆش بكەین بۆ گفتۆگۆیێ‌ ل سەر درۆشمێ‌ ئەڤێ‌ فێستیڤالێ‌ (كوردستان راگەهاندنا سەردەم).

دهۆك خودانا ئێكەمین فێستیڤالا رەوشەنبیریا كوردی یە

دهۆك هەردەم هەمی رەنگێن جوان كۆم دكەت و بوویە خودانا ئێكەمین فێستیڤالا رەوشەنبیریا كوردی و پێدڤیە ئەم هەردەم ڤی دەستكەفتی ژبێر نەكەین و بوو نڤشێ نوو ژی بێژین. نوكە ژی ئەم د ڤێ‌ فێستیڤالێ‌ دا و د كەش و هەوایێ‌ هەلبژارتنان داینە، هەلبژارتنەكە كو مە هەمیان دئێخیتە بەر بەرپرسیارەتیێ‌، كا دێ‌ چاوا بەرەڤ بەغدا برێكەڤین و چاوا خەلكێ‌ مە د رۆژا دەنگدانێ‌ دا پێشمەرگێن قارەمان و خوینا شەهیدان ژبیر نەكەن و بێژینە بەغدا و هەموو دونیایێ‌ كوردستان بەرزترینە و پێدڤیە ئەم هەمی ب هێز ڤە پشكداریێ‌ د ژیانا سیاسی یا بەغدا دا بكەین.

كۆمەكا رۆخسار و كەساتیێن هێژا و هزرێن جودا جودا ژ باژێركێن دی یێن كوردستانێ‌ دهێنە دیتن

د رۆژەكێ‌ دا ئەم فێستیڤالا سیێ‌ یا خانی دكەین كو كوردستان یا پڕە ژ ململانێیا سیاسی و ناڤخۆیی و دەرەكی و هەرێمی و پرە ژ بوویەر و روودانێن مەزن، لەوما پێدڤیە راگەهاندكار و رەوشەنبیر د ڤێ‌ قوناغێ‌ دا كوورتر هزر بكەن و كوورتر بەرهەمدار بن و ئایندەكێ‌ گەشتر بۆ نڤشێ‌ نوو ب خولقینن. د ڤێ‌ فێستیڤالێ‌ دا كۆمەكا رۆخسار و كەساتیێن هێژا و هزرێن جودا و جودا ژ باژێركێن دی یێن كوردستانێ‌ دهێنە دیتن و ئەڤ رۆخسارە هێزێ‌ ب مە د بەخشن و پارتی ژی هەر هوسا هاتیە دیتن كو سەیوانەك بیت بۆ ڤان هەمی رۆخسارێن جوان و پڕ مەعریفەت بۆ هندێ‌ تابلویەكا مەزن یا نشتیمان و نەتەوەیی ب خۆلقینیت.

تایتلێ فێستیڤالێ
تایتلەكێ‌ زۆر مەزن و كاریگەرە

ئەڤ تایتلێ‌ ل بەرامبەری من كو نڤێسایە (كوردستان و راگەهاندنا سەردەم) تایتلەكێ‌ زۆر مەزن و كاریگەرە و ئەو پانێلێن ل ڤێ‌ فێستیڤالێ‌ دهێنە پێشكێشكرن زۆر د گرنگن و پانێلستێن وان ژی خودان علم و مەعریفتن و ئەكادمیێن زۆر پێشچاڤ یێن وەلاتێ‌ مەنە. فێستیڤالا خانی ب تێگەهشتنەكا زۆر ئەڤ تایتلە هەلبژارتیە ب تێگەهشتنەكا كوور ژی پانلێن وێ‌ دراشتینە و خواستینە گوه بدەنە ئەكادمیا و راسپاردەیان دروست بكەن، واتە نوكە ئەم ل ناڤا مەتبەخا راسپاردێن فێستیڤالا خانی یا سیێ‌ داینە كا دێ‌ چاوا ڤێ‌ فێستیڤالێ‌ ب دووماهی ئینین و مە كردار ژ پانێلێستین ڤێ‌ فێستیڤالێ‌ دڤێن و پشتی هینگی سەرۆكایەتی و پەرلەمان و حۆكمەت هەموو بهێنە سەرخەت و بزانن كا كوردستان و راگەهاندنا سەردەم د چ قوناغەكێ‌ دانە.

پێدڤیە ئەكادیمیێن مە گۆتنێن رژد و كوور و بریارێن چارەنڤیسار بدەن

ب دەنگەكێ‌ بلند ئەم دبێژین راگەهاندن د رەوشەكا خراب دایە، راگەهاندنێ‌ كێشە و ئاریشێن كوور هەنە، هەرچەندە پێشكەفتنەكا مەزن ژی بخۆڤە دیتیە و مە خەبات بۆ ڤێ‌ ئازادی كریە و خوین بۆ رشتیە، لێ‌ پێدڤیە بزانین كو ئازادی ژی دڤێت د چوارچوڤێ‌ بەهایێن نشتیمانی دا بن و د چوارچوڤەكی دا بیت كو كێشەیێن جڤاكی پەیدا نەكەت، شەرێ‌ برایان پەیدا نەكەت، پێكڤە ژیانی و نەتەوە ئایینەكا بپارێزن و كۆمبكەت و مافێ‌ ژن و ئافرەتان زارۆیان بپارێزیت، لێ‌ مخابن هندەك ژ دەزگەهێن راگەهاندنێ‌ ژ بەر ناڤی و نیشانێ‌ ئازادیێ‌ پەنایێ‌ و هێرشێ‌ دكەن سەر بەهایێن نشتیمانی و نەتەوە و ئایینی و پیرۆزیان و ژیانا سیاسی و ئێكرێزیا گەلێ‌ كورستانێ‌، لەوما پێدڤیە د ڤێ‌ فێستیڤالێ‌ دا ئەم هێلەكێ‌ دیاربكەین كا ئەو چ ئازادیی د خزمەتا كوردستانێ‌ دا و چ ئازادیە دژی كوردستانێ‌ دهێتە بكارئینان. ژبەر ڤێ‌ چەندێ‌ دڤێت ئەم ب دەنگێ‌ بلند هزر بكەین و ب ووژدانا كوردستانێ‌ بریاری بدەین، پێدڤیە ئەكادیمیێن مە گۆتنێن رژد و كوور و بریارێن چارەنڤیسار بدەن.
بێگومان ئەڤ گفتۆگۆیێن ل پانێلێن ڤێ‌ فێستیڤالێ‌ دهێنە كرن دێ‌ بنە كۆمەكا راسپاردەیان و دێ‌ گەهینینە دامەزرا و سەرۆكاتییێن هەرێما كوردستانێ‌ و ب تایبەت سەندیكا رۆژنامەڤانێن كوردستانێ‌ و لایەنێ‌ پەیوەندیدارە د ڤێ‌ هاوكێشێ‌ دا.

ل كوردستانێ‌ مە نێزیكی سێ‌ هزار دەزگایێن راگەهاندنێ‌ و پلاتفۆرم هەنە

ل كوردستانێ‌ مە نێزیكی سێ‌ هزار دەزگایێن راگەهاندنێ‌ و پلاتفۆرم هەنە و ئەگەر بەراوردا خوە ل گەل دەوروبەران بكەین، دڤێت هەلویست ل سەر ڤان هەر سێ‌ هزار دەزگەه و پلاتفۆما بهێنە وەرگرتن كا ئایا ئەڤ هەموو دەزگەه و پلاتفۆرمە مە كیڤە دبەن و دێ‌ چاوا نڤشێ‌ نوو پەروەردەكەن و ئەڤ بابەتە هەمی جهێن راوەستیانێ‌ و گەنگەشێ‌ نە و ئۆمێدەوارم ئەڤ فێستیڤالە دەرئەنجامێن باشی ژێ‌ دەربكەت و د ئاستێ‌ پرسیار و بەرسڤان دا بیت.
د ڤێ‌ فێستیڤالێ‌ دا ئەم سۆپاسیا بەرهەڤكارێن ڤێ‌ فێستیڤالێ‌ دكەین و هەموو پانێلست و لیژنان دكەین كو ئەڤ فێستیڤالە ب رێڤەبری و هێز ب مە بەخشی و ئەو مێهڤانێن ل رێیێن دوور هاتین و ژ هەموویێ‌ گرنگتر بانگەشەیەكا هێمن و ئارام وسەركەفتی بهێتە دیتن و ل رۆژا 11/11 ئەم هەموو بەرەڤ سندوقێن دەنگدانێ‌ بچین و دەنگ ب لیستا 275 یا پارتی دیموكراتی كوردستان بدەین.

ئەمیر ئەترووشی

بەرپرسێ‌ ناڤەندا خانی یا رەوشەنبیری و راگەهاندنێ د پەیڤەكێ‌ دا ل فێستیڤالا سێیێ‌ یا خانی دیار كر، ئەڤ دەستكەفتێن ئەڤرۆ مە ل كوردستانێ‌ هەین هەردەم د دەزگەهێن مە یێن راگەهاندنێ‌ دا دهێنە نیشادان و ئەم نوكە یێ‌ بەرەڤ پرۆسەیا هەلبژارتنان دچین و پێ‌ نەڤێت كو رۆلێ‌ راگەهاندنێ‌ د ڤێ‌ پرۆسێ‌ دا گەلەك یێ‌ كاریگەرە بۆ گوهۆرینا رەئیا جادێ‌ و خەلكی بۆ لایێ‌ خوە براكێشیت و گۆت: ئەنجامدانا ڤێ‌ فێستیڤالێ‌ بۆ گوهۆرینا ئالاڤێن راگەهاندنێ‌ یە بەرەڤ راگەهاندنا سەردەم.

ئیحسان ئامێدیی زێدەتر د پەیڤا خوە دا دیار كر، د پەنەلێن فێستڤالێ‌ دا مە پێنچ تەوەرێن میدیایی هەنە، پەیاما راگەهاندنا كوردی، راگەهاندنا كوردی دەلیڤە و ئاستەنگ، رۆلێ‌ راگەهاندنێ‌ د ئاڤاكرنا هشیاریا نەتەوەیی دا، جڤاك و سۆسیال میدیا، و كورد و جیهانا ژیریا چێكری. ل سەر ڤان تەوەران 16 بسپۆر و شارەزا دێ‌ بابەتێن خۆ پێشكێشكەن و گەنگەشەكەن، هیڤیا مە ئەوە بابەتێن ب مفا بن. مە ل بەر بوو ل بهارێ‌ سێیەمین فێستیڤالا خانی یا روشنبیری ئەنجام بدەین، لێ‌ ژ بەر بارودوخێ‌ ئالۆزێ‌ دەڤەرێ‌ و رەوشا سەختا ژیانێ‌، مە فێستەڤال پاش ئیخست بۆ ڤی دەمی، هیڤیدارین دەمێن خوش و ب مفا دگەل هەمی برگەیێن فێستیڤالێ‌ ببنە سەر.
دەقێ‌ پەیڤا ئیحسان ئامێدی بەرپرسێ‌ ‌ناڤەندا خانی یا روشەنبیری و راگەهاندنێ‌:
پەنالیستێن بەرێز، روشنبیر و میدیاكارێن هێژا مێهڤانێن خوشتڤی … ئامادەبوویێن هێژا
«ب ناڤێ‌ ناڤەندا خانی یا روشەنبیری و راگەهاندنێ‌ و هەمی سازیێن وێ‌ ب گەرمی ب خێرهاتنێ‌ ل هەوەیێن هێژا و بەرێز دكەین.. بخێرهاتن و سەرچاڤان بۆ سێیەمین فێستیڤالا خانی یا روشەنبیری ل ژێر ناڤێ‌ كوردستان و راگەهاندنا سەردەم.
دهۆك بۆ ڤێ‌ فێستیڤالێ‌ یا بەختەوەرە
بەرێزان… ئەڤرۆ دهۆك بەختەوەرە كو ناڤەندا خانی یا رەوشنبیری و راگەهاندنێ‌ ب ئامادەبوونا هەوە یێن بەرێز سێیەمین فێستیڤالا خۆ ل هولا كونفرانسان، ل زانكۆیا دهۆك، ل باژێرێ‌ دهۆكێ‌ دگێریت. كوردستان وەلاتێ‌ كوردان و هەمی پێكهاتێن وێ‌ یێن جڤاكی یە، ڤی وەلاتی ب مللەت و هێزێن خویێن سیاسی و جڤاكی ڤە پەیاما خۆ یا بەردەوام هەیە، كو پەیاما ئاشتی و ئازادی و دیموكراتیێ‌ یە، ب رێك و ئامراز و شێوازێن جورا و جور پەیاما خۆ دگەهینیت و خۆ دگونجینیت دگەل پێشڤەچونێن زانستی و تەكنولوژی یێن سەردەم.
زانست و تەكنولوژیا وەكو روبارەكێ‌ خورت رۆژ بۆ رۆژێ‌ خورتر لێدهێت و رێیا خۆ ڤەدكەت
راگەهاندن (میدیا) كار و ئامرازێن گەهاندنا پەیامێ‌ نە، پەیام چو بیت و ژ كێ‌ بیت و بۆ كێ‌ بیت، مەرەم ژێ‌ پەیام ژ هنارتی بگەهیتە وەرگری، ب ئارمانجا پێدانا زانیاریان و روشنبیركرنێ‌ و هشیاركرنێ‌ و چێكرنا بوچوونێ‌ و رایێ‌. ل ڤی سەردەمی، زانست و تەكنولوژیا وەكو روبارەكێ‌ خورت رۆژ بۆ روژێ‌ خورتر لێدهێت و رێیا خۆ ڤەدكەت و خوش دكەت و باندورا خۆ ل سەر هەمی بیاڤێن ژیانێ‌ دا دكەت، كارتێكرنا راستەوخو ل سەر هەمی ئالاڤێن میدیایێ‌ دكەت و وەرار و گوهۆرینێ تێدا دكەت و نویاتیێ‌ چێدكەت و دەرگەهی لبەر تاكی ڤەدكەت كو هەبوونا خۆ نیشابدەت و پەیاما خۆ بگەهینیت ب تایبەتی د بیاڤێ‌ سوشیال میدیایێ‌ دا، لەورا پێدڤی دكەت خۆ لێزان و بسپور بكەین و سەرەدەرییەكا گونجای دگەلدا بكەین.
ئامیرێن گەهاندنێ‌ و وەرگرتنێ‌ بەرپرسیاریەكا سنجی و جڤاكی و مرۆڤی چێدكەت
ل ڤی سەر دەمی كو ئامیرێن گەهاندنێ‌ و وەرگرتنێ‌ ل بەر دەستێ‌ هەمیانە و رۆلەكێ‌ كارا دبینن بۆ گەهاندنا پەیامێ‌ و و ئازراندنا بابەتان و چێكرنا رایێ‌، كارتێكرن ل رەوشت و تیتال و رەفتارا مرۆڤان ژی دكەت، بەرپرسیاریەكا سنجی و جڤاكی و مرۆڤی چێدكەت كو زێدەگاڤی نەهێنە كرن و رێز ل بەهایێن مرۆڤی بهێنە گرتن.
هەلبەت دەستپێك مروڤە و ژ پێدڤیێن میدیا یا سەردەم مرۆڤێن سەردەم و هزرێن سەردەم، مرۆڤێن بسپۆر و لێزانن و هشیار، بزانن قوناغ چو دخوازیت و چو پێدڤی یە بهێتەكرن، و ب چ شێواز سەرەدەری دگەل دا بهێتەكرن، ئەڤجا شیانێن دراڤی و زانستی و تەكنولۆژی و پلان و بەرنامە. میدیا سەردەم ب ئالاڤ و كارێن خۆ ڤە پەیام كورتتر و بلەزتر و جوانتر كاریگەرتر كر، د هەمان دەمدا كێشە و ئاسەتنگێن خۆ هەنە.. ژ بەركو میدیا یا سەردەم و ب تایبەتی سوشیال میدیا رۆلەكێ‌ باش دبینن بۆ چێكرن و گوهۆرینا رایا تەڤایی و گۆتارا جڤاكی و سیاسی و گوهۆرینا رەفتاران، مە ب پێدڤی دیت سێیەمین فێستیڤالا مە ل ژێر دروشمێ‌ كوردستان و راگەهاندنا سەردەم بیت.
16 بسپۆر و شارەزا دێ‌ بابەتێن خۆ پێشكێشكەن و گەنگەشەكەن
د پەنەلێن فێستەڤالێ‌ دا مە پێنچ تەوەرێن میدیایی هەنە، پەیاما راگەهاندنا كوردی، راگەهاندنا كوردی دەلیڤە و ئاستەنگ، رۆلێ‌ راگەهاندنێ‌ د ئاڤاكرنا هشیاریا نەتەوەیی دا، جڤاك و سوسیال میدیا، و كورد و جیهانا ژیری چێكری. ل سەر ڤان تەوەران 16 بسپۆر و شارەزا دێ‌ بابەتێن خۆ پێشكێشكەن و گەنگەشەكەن، هیڤیا مە ئەوە بابەتێن ب مفا بن.
هیڤیدارین دەمێن خۆش و ب مفا دگەل هەمی برگەیێن فێستیڤالێ‌ ببنە سەر.

شاكر ئەتروشی،
سندس سالح سلێڤانەیی:

بەرهەڤبوونا بەرێز(سەربەست لەزگین) ئەندامێ‌ مەكتەبا سیاسیا پارتی دیمۆكراتی كوردستان و بەرپرسێ‌ مەكتەبا رێكخستنا پارتی ل دهۆكێ‌ و هەر دو هاریكارێن وی (سەباح بەیتوللا و د. ڤیان سلێمان) و (د. سالار عوسمان) بەرپرسێ‌ بەشێ‌ رەوشەنبیری و راگەهاندنا پارتی و بەرپرسێن لقێن ئیك و هەژدە یێن پارتی و (ئیحسان ئامێدی) بەرپرسێ‌ ناڤەندا خانی یا رەوشەنبیری و راگەهاندنێ‌ و هژمارەكا رێڤەبەر و بەرپرس و نوونەرێن دامودەزگەهێن حزبی و ئیداری و لەشكری ل دەڤەرێ‌ و و هژمارەكا زۆر ئەدیب و نڤیسكار و رۆژنامەڤان و رەوشەنبیرێن هەر چار پارچەیێن كوردستانێ‌، ناڤەندا خانی یا رەوشەنبیری و راگەهاندنێ‌ ل دهۆكێ‌، ل ژێر درۆشمێ‌ (كوردستان و راگەهاندنا سەردەم) دوهی 5/10/2025 دەست ب گێڕانا رێورسمێن (فێستیڤالا خانی 3 ) كر و هەتا ئەڤرۆ ئێڤاری دێ‌ یا بەردەوام بیت.
بەرنامەیێ‌ فێستیڤالێ‌ ل دەمژمێر نەه و نیڤی سپێدی ل هۆلا كونفرانسان ل سەرۆكاتیا زانكۆیا دهۆكێ‌ ب پێشوازیكرنا مێهڤانان دەسنپێكر و ل دەمژمێر دەه رێزگرتن دەقیقەكێ‌ بۆ خوینا پاقژا شەهیدان و سەروەرێ‌ وان بارزانیێ‌ نەمر راوەستیان، د دووڤدا یەرێز (ئیحسان ئامێدی) سەرۆكێ‌ فێستیڤالێ‌ د پەیڤەكێ‌ بخێرهاتنا هەموو مێهڤان و پشكدارێن فێستیڤالێ‌ كر و تێدا گۆت: خۆشحالین ئەڤرۆ ل گەل هەوە ڤێ‌ فیستیڤالێ‌ دگێڕین، هەلبەت مە ل بەر بوو دوەرزێ‌ بهارێ‌ دا ڤێ‌ قیستەڤالێ‌ بگێڕین، لێ‌ كاودانان دەلیڤە نەدا، ب تایبەت ژی شەڕێ‌ ئیسرائیلێ‌ لەورا بۆ ئەڤرۆ هاتە پاشخستن و د رۆشمێ‌ مە دڤێ‌ قیستیڤالێ‌ دا یێ‌ دیارە كو ئەو ژی (كوردستان و راگەهاندنا سەردەم) و هیڤیا من ئەوە ئەم بشیێن خواندنەكا نوو بدەینە رەوشا مەدیایێ‌ ل كوردستانێ‌ و خوە ل گەل پێشكەفتنا نوكە بگونجینین، ب تایبەت ژی هەبوونا ئالاڤێن نوو یێن راگەهاندنێ‌، هەروەسا ژیریا چێكری.
د دووڤدا پەیڤا بەرێز (د.عەلی تەتەر) پارێزگەرێ‌ دهۆكێ‌، ژلایێ‌ نوونەرێ‌ وی بەرێز (ماجد سەید سالح) جێگرێ‌ پارێزگەری هاتە خواندن و تێدا گۆت: ئەم ب ناڤێ‌ بەرێز (د.عەلی تەتەر) پارێزگەرێ‌ دهۆكێ‌، هەروەسا كارگێڕیا پارێزگەهێ‌ پیرۆزباهیەكا گەرم ل ناڤەندا خانی یا رەوشەنبیری و راگەهاندنێ‌ دكەین ب هەلكەفتا گێڕانا ڤێ‌ فیستیڤالێ‌ و دوپات دكەین كو ئەم وەك حكومەتا هەرێما كوردستانێ‌ و كلرگێڕیا پارێزگەهێ‌ دێ‌ بەردەوام پشتەڤان و پالپشتێن هەر جۆرە چالاكیەكا رەوشەنبیری و هونەری بین.
پاشان بەرێز (د. سالار عوسمان) بەرپرسێ‌ بەشێ‌ رەوشەنبیری و راگەهاندنا پارتی دیمۆكراتی كوردستان، پەیڤەك خواند و تێدا گۆت: گرنگیا فیستیڤالا خانی 3 ل دهۆكێ‌ گرنگیەكا تایبەت ل دەف مە وەكو بەشێ‌ رەوشەنبیری و راگەهاندنا پارتی هەیە و ئەم پالپشت و پشتەڤانین و دەستخۆشیێ‌ ل وان بەڕێزان دكەین یێن خوە ماندی كرین و ئەڤ قیستیڤالە رێكخستین و هەلبژارتنا ڤی درۆشمی (كوردستان و راگەهاندنا سەردەم) گرنگیەكا تایبەت و پڕی ڕامان ل دەف مە هەیە و داخوازا سەركەفتنێ‌ بۆ دكەین.
د دووڤدا فلمەكێ‌ دكیۆمەنتاری ل دۆر كار و چالاكیێن ناڤەندا خانی و سازیێن ب سەرڤە هاتە نیشادان، پاشان ئاهەنگەكا هونەری ب پشكداریا هونەرمەندان (عابد دهۆكی و رۆژ كۆبانی) هاتە گێڕان، پاشان ب رێكا سكرینەكا دجیتالی پەرتووكێن ناڤەندا خانی چاپكرین، ل گەل رۆژنامە و گۆڤاران هاتنە نیشادان.
پاشان د پەنەلێ‌ ئێكێ‌ دا سێ‌ سمینار هاتنە پێشكێشكرن، ئەو ژی ئەڤە بوون:
هندرین ئەحمەد، سمینارا وی ل ژێر ناڤێ‌ (پەیاما راگەهاندنا كوردی ژ ئالیێ‌ سیاسی ڤە).
د. زوبەیدا سەید سالح، سمینارا وێ‌ ل ژێر ناڤێ‌ (بەرپرسیارییا جڤاكی یا راگەهاندنا كوردی).
دەنیز دارگول، ژ باكۆرێ‌ كوردستانێ‌، سمینارا وێ‌ ل ژێر ناڤێ‌ (پەیاما راگەهاندنا كورد/ئالیێ‌ كلتۆری).
د پەنەلێ‌ دویێ‌ دا سێ‌ سمینار دی هاتە پێشكێشكرن، ئەو ژی ئەڤە بوون:
زەردەشت ئەحمەد رەشید، بەرپرسێ‌ پشكا دەنگوباسان ل دەزگەهێ‌ كوردستان تیڤی و ئەحمەد زاویتەیی، رێڤەبەرێ‌ گشتی یێ‌ كەنالێ‌ كوردستان 24 و فەهمی بالایی، بەرپرسێ‌ پشكا بەرنامەیان ل كەنالێ‌ وار تیڤی.
دپەنەلێ‌ سێیێ‌ ژی كو ل دەمژمێر چاری ئێڤاری بوو، چار سمینارێن دی هاتنە پێشكێشكرن، كو ئەو ژی ئەڤە بوون.
لال لالش، ژباكۆرێ‌ كوردستانێ‌ (سمینار ب رێكا ڤیدیۆیێ‌) هاتە پێشكێشكرن و د. ئبتیسام ئسماعیل قادر، ژ باشۆرێ‌ كوردستانێ‌ و د. رزوان بادینی، ژ رۆژئاڤایێ‌ كوردستانێ‌ و هۆشەنگ تاجر، ژ رۆژهەلاتێ‌ كوردستانێ‌ و ل دووماهیێ‌ دانوستاندن دناڤیەرا بەرهەڤبوویان و پەنەلێستان هاتەكرن.
بەرنامەیێ‌ ئەڤرۆ6/ 5 رۆژا دویێ‌ و دووماهیێ‌ یێ‌ فێستیڤالێ‌ دێ‌ بڤی رەنگی بیت:
دەستپێكرن ل دەمژمێر دەهی سپێدێ‌، هەر دێ‌ ل هۆلا كونفرانسان ل سەرۆكاتیا زانكۆیا دهۆكێ‌ بیت، دپەنەلێ‌ چارێ‌ دا سێ‌ سمینار دێ‌ هێنە پێشكێشكرن، كو ئەو ژی بڤی رەنگی نە:
ئازاد حەمە ئەمین، سمینارا وی ل ژێر ناڤێ‌ (رۆلێ‌ یاسایێ‌ د كونترۆلكرنا سۆشیال مەدیا نەرێنی دا).
د. سادق سەركەتی، سمینارا وی ل ژێر ناڤێ‌ (باندۆرا سۆشیال مەدیایێ‌ ل سەر جیهانێ‌)
د. مەهدی شەعبان، سمینارا وی ل ژێر ناڤێ‌ ( ئاسۆیێن سۆشیال مەدیایێ‌ یێن پاشەرۆژێ‌)
دپەنەلێ‌ پێنجێ‌ ژی دا سێ‌ سمینار دی دێ‌ هێنە پێشكێشكرن، كو ئەو ژی بڤی رەنگی نە:
د. شێرزاد سەبری، سمینارا وی ل ژێر ناڤێ‌ (زمانێ‌ كوردی زارێ‌ بەهدینی)
د. جیهان عەبدولعەزیر ئەحمەد، سمینارا وێ‌ ل ژێرناڤی (بیاڤێن مفا وەرگرتنێ‌).
هەكار هەركی، سمینارا وی ل ژێر ناڤێ‌ (راگەهاندن).
ل دەمژمێر دوازدەی نیڤرۆ ژی دێ‌ خەلات ل سەر هەموو پەنەلێستان هێنە بەلاڤكرن، د دووڤدا راسپاردەیێن فێستیڤالێ‌ دێ‌ هێنە خواندن، ل دەمژمێر چاری ئێڤاری ژی دێ‌ سەرەدانا جهێن گەشتیاری و كلتۆری ل زاخۆ هێتەكرن و ب هەماهەنگی ل گەل ئیدارەیا سەربەخۆیا زاحۆ دێ‌ ئاهەنگەكا هونەری هێتە گێڕان و بڤی رەنگی دێ‌ فێستیڤال ب دووماهی هێت.

بەرهەڤكرن، ئەمیر ئەترووشی:

جێگرێ‌ پارێزگارێ‌ دهۆكێ‌ د فێستیڤالا سیێ‌ یا خانی دا دیار كر، ئەڤرۆ ئەلەمێنتێن پێشكەفتیتر و زیرەكیا دەستكرد دەركەفتیە و سۆشیال میدیا وەلێ‌ هاتیە بوویە شیرەكێ‌ دوو دەڤ و پتریا ئەو دوسەیێن نوكە ل دادگەهان هەین یێن سۆشیال میدیایێ‌ نە و گۆت: من دڤێت بێژم ئەگەر ئەم ب راگەهاندنا سەردەم را نەگەهین و نە رێكئێخین و یاسایێ‌ بۆ نەدانین، دێ‌ كۆنترۆلا وێ‌ گەلەك یا ب زەحمەت بیت و ب تایبەت نوكە زیرەكیا دەستكرد یا مەترسیدارە ئەگەر نەهێتە كونترۆلكرن.

ماجد سەید سالح، جێگرێ‌ پارێزگارێ‌ دهۆكێ‌ دیار كر، پشتی شۆرشا ئەیلولێ‌ دەستپێكری، بەلاڤوك و رۆژنامە و گوڤار ب رەنگەكێ‌ بەربەلاڤ دەركەفتن و پتر تاكێ‌ كوردستانی هەست ب لایەنێ‌ خۆ رەوشەنبیركرنێ‌ كر و هەتا سەردەمێ‌ شۆرشا گولانێ‌ و هەتا نوكە ئالاڤ و ئامراز و ئەلەمێنتێن راگەهاندنێ‌ دهێنە گوهۆرین و حوكمەتا هەرێمێ‌ ژی ئەڤ هەمی ئالاڤ و ئامراز ئینانە هەرێما كوردستانێ‌ و دانانە بەر دەستێن راگەهاندنكار و تاكێ‌ كوردستانێ‌.
دەقێ‌ پەیڤا ماجد سەید سالح، جێگرێ‌ پارێزگارێ‌ دهۆكێ‌ د فێستیڤالا سێیێ یا خانی دا ل هۆلا كونفرانسان:

هوون هەموو گەلەك بخێر بێهن سەرسەر و سەرچاڤان ب تایبەت ئەوێن ژ دەرڤەیی دهۆكێ هاتین، ل هەولێر و سلێمانیێ و هەموو دەڤەرێن دی یێن كوردستانێ. ئەڤرۆ سێیەمین فێستیڤالا خانی ل باژێرێ دهۆكێ دهێتە گرێدان، دەستخۆشیێ ل ناڤەندا خانی و سەرۆكێ ناڤەندا خانی دكەم كو خوە ماندووكری بۆ ئەنجامدانا ئەڤێ فێستیڤالێ.
ئەڤ فێستیڤالە و هەر فێستیڤالەكا دی یا ژ ڤی رەنگی بهێتە گێران وەكو ئیدارا پارێزگەها دهۆكێ و حوكمەتا هەرێما كوردستانێ ئەم پالپشت و پشتەڤانین. ئەڤە وەكو مە ئاماژە پێكری فێستیڤالا سی یە، بەلێ سالانە چەندین فێستیڤالێن دژی دهێنە گێران. ل هەیڤا 11 یا ئەڤ سالە دێ فلمە فێستیڤالا دهۆك یا نێڤدەولەتی ل دهۆكێ هێتە گێران. مەرەم ژێ ئەوە كو حوكمەتا هەرێما كوردستانێ پالپشت و پشتەڤانە بۆ هەر چالاكیەكا رەوشەنبیری.
ئەو بنەمایێ حوكمەتا هەرێما كوردستانێ ل سەر هاتیە دامەزراندن یا هەمەلایەنە، هەموو چین و توێژێن گەلێ مە خوە تێدا دبینن. باشترە بێژین هەموو ئایین و نەتەوە، هەموو جوگرافیا كوردستانێ خوە تێدا دبینن. ئەڤ چالاكیە ژی ل هەموو هەرێما كوردستانێ بێ جوداهی دهێنە گێران. ژ هەژی گۆتنێ یە ناڤ و یشانێ ڤێ فێستیڤالێ كوردستان و راگەهاندنا سەردەمە.
هەردەم خەلكێ كوردستانێ هەول دایە پاشڤەنەمینیت د راگەهاندنێ دا. هەر ژ دەمێ 1898ێ دەمێ ئێكەم رۆژناما كوردی دەركەفتی هەتا نوكە سەرەرای وان هەموو ئاستەنگ و ئالوزیان و دوژمن و نەیارێن گەلێ كورد نەخاسمە د بیاڤێ رەوشەنبیری دا دژاتیا خەلكێ كوردستانێ كری، كاروانێ رەوشەنبیری و راگەهاندنێ نەراوەستیایە، نەخاسمە پشتی شۆرشا ئەیلولێ‌ دەستپێكری، بەلاڤوك و رۆژنامە و گوڤار ب رەنگەكێ‌ بەرەلاڤ دەركەفتن و پتر تاكێ‌ كوردستانی هەست ب لایەنێ‌ خۆ رەوشەنبیركرنێ‌ كر و هەتا سەردەمێ‌ شۆرشا گولانێ‌ و هەتا نوكە ئالاڤ و ئامراز و ئەلەمێنتێن راگەهاندنێ‌ دهێنە گوهۆرین و حوكمەتا هەرێمێ‌ ژی ئەڤ هەمی ئالاڤ و ئامراز ئینانە هەرێما كوردستانێ‌ و دانانە بەر دەستێن راگەهاندنكار و تاكێ‌ كوردستانێ‌.
ئەڤرۆ ئەلەمێنتێن پێشكەفتیتر و زیرەكیا دەستكرد دەركەفتیە و سشیال میدیا وەلێ‌ هاتیە بوویە شیرەكێ‌ دوو دەڤ و پتریا ئەو دوسەیێن ل دادگەهان هەین یێن سۆشیال میدیایێ‌ نە و گۆت: رەنگە ئێدی دزی و كوشتن و تالانكرن بەرەڤ كێمبوونێ‌ ڤە چوو بیت، لێ‌ پتریا دوسەیان ل دادگەهان سۆشیال میدیا نە و من دڤێت بێژم ئەگەر ئەم ب راگەهاندنا سەردەم را نەگەهین و نە رێكئێخین و یاسایێ‌ بۆنە دانین، دێ‌ كۆنترۆلا وێ‌ گەلەك یا ب زەحمەت بیت و ب تایبەت نوكە زیرەكیا دەستكرد یا مەترسیدارە ئەگەر نەهێتە كونترۆلكرن.