ب نوونەراتیا جەنابێ سەرۆك مەسعود بارزانی سەربەست لەزگین، ئەندامێ مەكتەبا سیاسی یا پارتی و بەرپرسێ مەكتەبا رێكخستنا پارێزگەها دهۆكێ دوهی 7/10/2025 پشكداری د رێوڕەسمێن ڤەشارتنا تەرمێ پێشمەرگێ ئیلۆنێ‌ ”غازی حەجی مەلۆ” و برازایێ وی ”د. سەلیم عەلی حەجی مەلۆ” دا ل گۆڕستانا گوندێ دزێ یێ سەر ب ناوچەداریا ئەترووشێ‌ ڤە كر.
سەربەست لەزگین، د رێوڕەسمێن ڤەشارتنێ دا پەیڤەك پێشكێشكر و بەحسێ خەبات و تێكۆشینا غازی حەجی مەلۆ كر و گۆت: «خودێ ژێ رازی یێ ژ هەمی كوردستانێ چووی، چونكی هەمی دەما ل گەل دۆزا گەلێ خۆ بوو، هەمی ژیانا خۆ ژی ل دەربەدەریێ بۆراند ژ پێخەمەت دۆزا كوردی و رۆژەكێ ژی خۆ بۆ دوژمنێت كورد و كوردستانێ نەچەماند».
بەرپرسێ مەكتەبا رێكخستنا پارێزگەها دهۆكێ د پەیڤا خۆ دا بەحسێ خەباتا پرۆفیسۆر د. سەلیم ژی كر و گۆت: «كەسەكێ ئەكادیمی و زانا مە ژ دەست دا و ئێك بوو، ژ وان كەسان، كو زانكۆیا دهـۆكێ پێشئێخستین لەوما ژ دەستدانا ڤان جۆرە كەسایەتیان خسارەتەكا مەزنە».
هەروەسا بەحسێ رۆلێ مالباتا وانا ژی كر و گۆت: «ڤێ‌ مالباتا خەباتكەر رۆلەكێ گرنگ و كاریگەر د ناڤ بزاڤا رزگاریخوازا كوردستانێ ب گشتی و دەڤەرا بەهـدینان ب تایبەت دا هەبوویە و رۆلێ‌ وان بلند هەلسەنگاند».

زاخۆ، دلۆڤان هالۆ:

حكومەتا ئیراقێ د بزاڤان دكەت ب دروستكرنا هێلەكا نوو یا شەمەندەفرێ ئیراقێ و هەرێما كوردستانێ و توركیا پێكڤە گرێ بدەت.
وەزارەتا ڤەگوهاستن و گەهاندنێ یا حكومەتا ئیراقێ بەلاڤكریە، كو ل دەمەكێ نێزیك ئەم دێ دو هێلێن شەمەندەفرێ دروست كەین، ئێك ژ وان هێلان یا بەندەرێ فاو ب فیشخابوور هەتا دگەهیتە زاخۆ، ئارمانج ژ ڤی پڕۆژەی پێكڤە گرێدانا ئیراقێ‌ و هەرێما كوردستانێ یە ب وەلاتێ توركیاڤە و هنارتنا كەلوپەلان و كارێن بازرگانیە.
ل گورەی زانیارییان، درێژاهیا ڤێ هێلا شەمەندەفرێ هزار و 175 كیلۆمەترن، كو ب شێوەیەكێ پێشكەفتی و سەردەمانە دێ هێتە دروستكرن.

دهۆك، لەزگین جۆقی:

دەزگەهێ خێرخوازیێ بارزانی دەست ب گەهاندنا خزمەتێن مرۆڤایەتیێ بۆ زیارەتكاران ل جەژنا جەمایێ ل پەرستگەها لالشێ‌ دكەت بۆ دەمێ حەفت رۆژان دێ خزمەتێن ساخلەمیێ و كارێن خێرخوازی ل پەرستگەها لالشێ‌ ئەنجام دەت.
دەزگەهێ خێرخوازیێ بارزانی ل شێخان راگەهاند، كلینیكەكا ساخلەمیێ ل گەل كەلوپەلێن نۆشداری هاتینە دابینكرن بۆ پەرسگەها لالشێ‌ بۆ دەمێ حەفت رۆژان و دێ خزمەتێن ساخلەمیێ پێشكیشی زیارەتكارێن پەرسگەها لالشێ‌ كەت و چەند ترۆمبێل بۆ كارێن هاتنوچوونێ هاتینە دابینكرن و خزمەتا كەسێن دەرڤەی وەلاتی دێ هێتە كرن بۆ مانا وان ل پەرسگەها لالشێ‌ و ستافەكێ باش یێ ساخلەمیێ هاتیە دابینكرن كو دێ خزمەتێن ساخلەمیێ پێشكێشی خەلكی د ناڤ پەرسگەها لالشێ‌ دا كەن.

زنار تۆڤی:

گوژمەكێ پارەیێ گەنمێ جۆتیارێن دهۆكێ گەهشت، دوهی پارەیێ گەنمێ جۆتیارێن شێخان هاتە بەلاڤكرن.
نازم محەمەد، رێڤەبەرێ بازرگانییا دەخلودانی ل پارێزگەها دهۆكێ بۆ ئەڤرۆ دیار كر، 12 ملیار دینار، پارەیێ گەنمێ جۆتیارێن دهۆكێ گەهشتینە و ل فەیدییێ دەست ب بەلاڤكرنێ هاتییە كرن، دوهی ل سایلۆیا شێخان ژی دەست ب بەلاڤكرنێ هاتە كرن.
ناڤهاتی دیار ژی كر، هێشتا 71 ملیار دینارێن پارەیێ گەنمێ جۆتیارێن سنۆرێ پارێزگەها دهۆكێ ل دەف حكومەتا ئیراقێ ماینە، هەر دەمێ گوژمەكێ دیتر یێ پارەیان بگەهیت، دێ دەست ب بەلاڤكرنێ هێتە كرن.

ئامێدیێ، مەحمود نهێلی:

ب پشكداریا هەژمارەكا زۆر ژ مەسیحیێن دەڤەرێ شانەدێرا مار خنانا یا بەرنیاس ب شانەدێرا سەركەڤری ل دێرا دێرەلۆكێ‌ دوهی 7/10/2019 ب رێڤەچوو و هەژمارەكا خەلكێ موسلمان ژی پیشكداری تێدا كر.
وەردە ئێك ژ كەساتیێن گوندێن مەسیحییان ل دەڤەرا نێروە و خەلكێ گوندێ باشێ بۆ رۆژناما ئەڤرۆ دیار كر، ئەڤە شانەدێرا مار خنانا یا دبێژنێ شانەدێرا سەركەڤری، دكەڤن دا ل دەڤەرا وان، هەموو سالان ل حەفتێ چریا ئێكێ دهاتە گێڕان و گۆت: «هەموو گوندێن دەڤەرا مە یێن مەسیحیان ل جهەكێ د ناڤبەرا ڤان گوندان دا، كو د گۆتنێ سەركەڤری، كۆم دبوون و ئەڤ رێوڕەسمە ساخ دكر».
ناڤهاتی دیار ژی كر، ژ لایێ ئایینی ڤە، ئەڤە كارەكێ فەرزە و هەر خێزانەك پێدڤیە سەرەك دابا و ل وێرێ بۆ خوە لاڤا دكرن، كو ژ نەخوشی و ئاریشەیێن وێ سالێ قورتال ببان، دیسا ژ لایێ جڤاكی ژی ڤە ڤێ رێورەسمێ رۆلێ خوە هەیە و دبیتە ئەگەرێ پتر نێزیكبوونا خەلكی، ب تایبەتی ژی د ناڤبەرا موسلمان و مەسیحیان دا و كارتێكرنەكا باش ل سەر پێكڤەژیانێ هەیە».
گۆتژی: «نوكە ژی هەر ب هەمان رەنگێ بەرێ ئەم رێورەسمێن ڤێ شانەدێرێ ب تمامی دگێڕین، ب تنێ جه هاتیە گوهۆڕین، د بەرێ‌ دا جهەك د ناڤبەرا گوندێن مەسیحیان دا هاتبوو دەستنیشانكرن بۆ گێڕانا رێوڕەسمێن ڤێ شانەدێرێ، لێ نوكە ئەڤ شانەدێرە ل دێرەلۆكێ دهێتە گێڕان».

زنار تۆڤی:

پەیڤدارێ‌ دەستەیا وەبەرهێنانێ‌ ل هەرێما كوردستانێ‌ دبیژیت: د كابینا نەهێ‌ یا حكومەتا هەرێما كوردستانێ‌ دا، ب رێیا پرۆژێن وەبەرهێنانێ‌ مە نێزیكی 140 هزار دەلیڤێن كاری بۆ خەلكێ‌ پەیدا كرینە و گۆت: ب شێوێ‌ راستەوخۆ و نە راستەوخۆ نێزیكی 140 هزار دەلیڤێن كاری د وان پرۆژان دا د هەموو سێكتەران دا پەیدا بووینە.

بەرگەشت ئاكرەیی، پەیڤدارێ‌ دەستەیا وەبەرهینانێ‌ ل حكومەتا هەرێما كوردستانێ‌ گۆت ژی: حكومەتا هەرێما كوردستانێ‌ گرنگییەكا زۆر ب پەیداكرنا دەلیڤێن كاری بۆ خەلكێ‌ هەرێمێ‌ دایە، ب رێیا ئەنجامدانا پرۆژان د هەموو سێكتەران دا ل هەرێما كوردستانێ‌، وەكو پیشەسازی، چاندن، گەشتوگوزار، بازرگانی و كەرتێن دیتر، مە دەلیڤێن كاری بۆ خەلكێ‌ خۆ پەیدا كرینە، بەردەوام ژی ئەڤ رێژە د زیدەبوونێ‌ دایە، چونكی ئارمانجا حكومەتا هەرێما كوردستانێ‌ ئەوە، دەلیڤێن كاری بۆ خەلكێ‌ پەیدا بكەت.
ناڤهاتی دیار كر ژی: د كابینا نەهێ‌ دا، ب شێوێ‌ راستەوخۆ و نە راستەوخۆ نێزیكی 140 هزار دەلیڤێن كاری د وان پرۆژان دا د هەموو سێكتەران دا پەیدا بووینە، ژبەركو گەلەك پرۆژێن وەبەرهینانێ‌ ل هەرێما كوردستانێ‌ هاتینە ئەنجامدان، هەروەسا پێدڤییە هەر پرۆژەكێ‌ بهێتە ئەنجامدان ژی ٧٥% ێ‌« كرێكارین وی پرۆژەیی د ناڤخۆیی بن و ٢٥% ێ‌« ژی بیانی بن، د گەلەك پرۆژان دا پتر ژ رێژا 75 ژ سەدێ‌ كریكارێن ناڤخۆیینە، دێ‌ د بەردەوام ژی بین، بۆ هندێ‌ پترین دەلیڤێن كاری ل هەرێما كوردستانێ‌ بۆ گەنجێن خۆ پەیدا بكەین.