دوهی 19/4/2026 و د رێورەسمەكێ فەرمی دا پرۆسەیا گوهۆڕینا پۆستێ سەرپەرشتێ كۆمەلگەها دەرگەهێ‌ نێڤدەولەتی یێ‌ سەرزێری هاتە ئەنجامدان.
ب بەرهەڤبوونا نوونەرێ‌ پارێزگارێ دهۆكێ وارشین سەلمان، دەڤەردارێ‌ ئامێدیێ و رێڤەبەرێ ناوچەداریا كانی ماسێ و سالح مەلا حەمدی و رێڤەبەرێ گۆمركا زاخۆ حەمید عەلی و نوونەرێ لقێ 18 یێ پارتی ل ئامێدیێ‌، سالح قومری و ب ئامادەبوونا فەرماندێن لەشكەری و بەرپرسێن فەرمانگەهێن میری ل دەڤەرێ، رێورەسمێن دەست ب كاربوونا یونس مەلا رەمەزان، وەكو سەرپەرشتێ نوو یێ كۆمەلگەها دەرگەهێ نێڤدەولەتیێ سەرزێری هاتنە گێڕان.

د. عەلی تەتەر، پارێزگارێ دهۆكێ دوهی 19/4/2026 د چارچوڤێ بەرنامێ حكومەتا هەرێما كوردستانێ دا و بەردەوامییا پێشكێشكرنا پڕۆژەیێن خزمەتگوزاری، دو پڕۆژەیێن خزمەتگوزاری، رەوانە قووناغا بجهئینانێ‌ كرن.
پارێزگارێ‌ دهۆكێ‌، پڕۆژەیێ‌ باشكرنا سیستەمێ رێیا ڤەكری یا ئاڤا بارانان و ئاڤا گران یا نهالا 43ێ‌ لسەر ب ڕووبارێ هشكەڕۆ ل سەنتەرێ‌ باژێڕێ‌ دهۆكێ‌، ل تاخێ‌ مالتایێ، رەوانەی بجهئینانێ‌ كر.
دیسا ل ناوچەداریا دارەتوو یا سەر ب دەڤەرداریا بەردەڕەشێ‌ ڤە ژی پڕۆژەیێ كۆنكریتكرن و ڕێكخستنا ڕێكا گوندێ زەنگەنان ب درێژاهیا دو كیلۆمەتر و 25 مەتران ب گوژمێ 464 ملیۆن دیناران ڕەوانەی قووناغا بجهـئینانێ كر.

هەولێر، قائید میرۆ:

پەیڤدارێ حەج و عومرەیا هەرێما كوردستانێ ئاشكرا كر، بڕیار هاتیەدان پرۆسەیا حەجا ئەڤ سالە ب رێیا هشكاتی بهێتە ئەنجامدان.
كاروان ستونی، پەیڤدارێ حەج و عومرەیا هەرێما كوردستانێ بۆ رۆژناما ئەڤرۆ دیاركر، ب مەرەما بەرژەوەندیا گشتی و گەرەنتیكرنا پرۆسەیا حەجێ بۆ وەلاتیێن هەرێما كوردستانێ بڕیار هاتیەدان، پرۆسەیا ئەڤ سالە یا حەجێ ب رێیا هشكاتی بهێتە ئەنجامدان و گۆت: «مە رێككەفتن ل گەل دەستەیا حەج و عومرەیا ئیراقێ كریە، چونكی حەجیێن ئیراقێ ژی دێ ب رێیا هشكاتی فەریزا حەجێ ئەنجامدەن».
گۆت ژی: «ل دەستپێكا مەها گولانێ‌ گەشتێن حەجێ بۆ وەلاتێ سعودیێ دێ دەست پێ‌ كەن و ل رۆژێن بهێن ب هەماهەنگی ل گەل حوكمەتا ئیراقێ دێ چاوانیا شێوازێ دەستپێكرنا گەشتێن حەجێ دیار كەین، وەزارەتا ئەوقافا هەرێما كوردستانێ دێ هەموو بزاڤەكێ كەت مینا سالا بۆری حەجی بهێنە قەرەبووكرن، پشتی خەملاندن بۆ قەرەبووكرنێ ژ لایێ‌ دەستەیا بلندا حەج و عومرەیا ئیراقێ ڤە دهێتە كرن».

ئامێدیێ‌، مەحمود نهێلی:

هەژمارەكا هەلبژێر و نوونەرێن گوندێن دەڤەرا نێروە و رێكان و نهێلێ ل نێزیك زالگەها گەلیێ بالندا ل سنۆرێ ناوچەدارییا شێلادزێ خرڤەبوون و داخوازكرن رێیا گوندێن وان بهێتە ڤەكرن.
لوقمان نێروەیی، ئێك ژ رێكخەرێن وێ خرڤەبوونێ بۆ رۆژناما ئەڤرۆ دیار كر، ئەو ل باژێرێ دهۆكێ هاتینە و ل ڤێرێ خرڤەبووینە بۆ وێ یەكێ دەنگێ وان بگەهیتە سەرۆك مەسعود بارزانی و گۆت: «مەرەما مە ژ ڤێ خرڤەبوونێ، ئەوە ئەم نوونەرێن گوندێن دەڤەرێینە و مە دڤێت رێكا گوندێن مە ژی، كو پتر ژ 150 گوندانە بهێتە ڤەكرن و خەلكێ مە ژی بچنە سەر گوندێن خوە».
لوقمان گۆت ژی: «گوندێن مە جهێ چاندنێ نە، هەروەسا گوندێن سنۆری نە و جهێ بازرگانیێ نە، هەكە خەلكێ مە بچنە سەر گوندێن خۆ، ئێدی چاڤ ل حكومەتێ ژی نابیت و هەر ئێك دێ ب كارێ خوە ڤە مژویل بیت».
ناڤهاتی زێدەتر گۆت: «ئەڤ خەباتا مە كری ژ بۆ ئازادیێ بوو یە و مە بەرهەمێ وێ نەدیت، ژ بەر كو هەتا نوكە ژی گوندێن مە د داگیركرینە و نەهاتینە ئازادكرن».
ئێك ژ ولاتیێن وان گوندان كو مەسیحی بوو دیار كر، ئەڤە نێزیكی 30 بۆ 40 سالایە وی گوندێ خوە نەدییتە و گۆت: ئەم هاتینە ڤێرێ دا رێیا گوندێن مە ژی بهێتە ڤەكرن و ئەم ژی بچینە سەر گوندێن خوە، نێزیكی شەش گوندێن مەسیحیان ل دەڤەرێ هەنە و هەتا نوكە ژ بەر شەری و پەكەكێ ئەم نەشیاینە بچینە سەر گوندێن خۆ».

ئامێدیێ، مەحمود نهێلی:

ب پشكداریا هەژمارەكا زۆر ژ مەسیحیێن دەڤەرێ، شانەدێرا مار عەودیشۆ ل دێرا گوندێ دێرێ یێ گرێدایی كوانێ ل دەڤەردارییا ئامێدیێ، دوهی 19/4/2026 هاتە گێڕان و هەژمارەكا خەلكێ موسلمان ژی پیشكداری تێدا كر.
قەشە خوری فلیب، قەشێ دەڤەرا ئامێدیێ بۆ رۆژناما ئەڤرۆ دیار كر، شانەدێرا مار عەودیشۆ دكەڤن دا و هەتا نوكە ل دەڤەرا وان و ل گوندێ دێرێ‌ ل مەها نیسانێ‌ دهێتە گێڕان و گۆت: «گەلەك برایێن مە یێن موسلمان ژی پشكداریێ‌ د گەل مە دا دكەن، یسا ژ لایێ ئایینی ڤە، ئەڤە كارەكێ فەرزە».
گۆت ژی: «نوكە ژی هەر ب هەمان رەنگێ بەرێ، ئەم رێورەسمێن ڤێ شانەدێرێ ب تمامی دگێڕین، د شانەدێرا ئەڤ سالە دا، ژ بەر كو سەقایێ نەخوەش بوو و بارانێن زۆر هاتینە، گەلەك كەسان پشكداری نەكریە و ل چاڤ سالێن بۆری پشكداری كێمترە».

رەمەزان زەكەریا:

د چارچوڤێ كارێن بەردەوام یێن ڕێڤەبەریا سەخبیری و پاراستنا ڕێك و پران ل ئاكرێ، تیمێن هونەری كار ل سەر چێكرن و پڕكرنا كۆرك و چالێن ل سەر رێكێن ستراتیژی یێن دەڤەرێ دكەن، ب مەرەما پاراستنا گیانێ شۆفێران و ئاسانكاریا هاتنوچوونێ.
ئەندازیار محسن میرانی، رێڤەبەرێ سەخبێری و پاراستنا رێك و پران ل ئاكرێ بۆ ئەڤرۆ گۆت: «تیمێن سەخبیریێ دەست ب هەوەكا بلەز كریە بۆ چێكرنا هەموو ئەو كۆرك و چالێن ل سەر ڕێكا سەرەكی یا جۆتسایدێ ئاكرێ بۆ قەندیل پەیدابووین، داكو رێك ب شێوەیەكێ ستاندارد بهێتە چاككرن».
ناڤبری گۆت ژی: «تیمێن كارگەها ئەسفەلتێ ئاسنگەران بەردەوامی دا كارێ سەخبێریكرنا ڕێكا سەرەكی یا بەردەڕەشێ‌ بۆ كەلەكێ‌ ل سنۆرێ‌ دەڤەرداریا بەردەڕەشێ‌، دیسا زێدەباری رێكێن سەرەكی تیمێن سەخبیریێ كار ل سەر رێكێن بۆ ڕوڤیا و ڕێكا لاوەكی یا خەلیلكان بۆ شەرمن ژی دكەن».