دهۆك، لەزگین جۆقی:

رێڤەبەرێ نەخۆشخانەیا ئومێد یا نەخۆشیێن پەنجەشێرێ ل پارێزگەها دهۆكێ راگەهاند كو حكومەتا هەرێما كوردستانێ چەندین ئامیر بۆ چارەسەرییا نەخۆشێن پەنجەشێرێ دابینكرینە و دبێژیت: ئەڤ ئامیرێ‌ نوكە هاتیە دابینكرن، یێ‌ گران بهایە و كارێ وی تەزاندنا چەرمێ پرچێ یە، ب تنێ بو وان نەخۆشانە ئەوێن چارەسەریا كیمیایی وەردگرن، دا كو پشتی چارەسەریێ پرچا وان نەوەریێت.
د. چەكدار ئەحمەد داود، رێڤەبەرێ نەخۆشخانەیا ئومێد یا نەخۆشیێن پەنجەشێرێ بۆ رۆژناما ئەڤرۆ دیار كر كو ئەڤ ئامیرە ب ناڤێ (سكالپ كۆلەر)، یێ تایبەتە ب تەزاندنا چەرمێ سەری، دەمێ نەخۆش چارەسەریا كیمیایی وەردگریت، كارتێكرنێ ل مییێ پرچێ ناكەت و ناوەرینیت و گۆت: «ئەڤ خزمەتە بی بەرانبەر بۆ نەخۆشان دێ هێتە كرن و حكومەتا هەرێما كوردستانێ پشتەڤانی ل چارەسەرییا نەخۆشان دكەت».
گۆت ژی: «ئەڤە ئامیرەكێ نوو یە، دێ پتر خزمەتا نەخۆشان كەین، بهایێ ڤان جۆرە ئامیرێن نوشداری گەلەكێ گرانە، لێ حكومەتا هەرێما كوردستانێ سێ ئامیرە دابینكرن و هەرسێ‌ دێ كەڤنە د خزمەتا نەخۆشان دا و پێدڤی ناكەت نەخۆش قەستا جهەكێ دی بۆ چارەسەریێ بكەت، نەخۆش ل دهۆكێ دێ هەموو خزمەتان بێ بەرانبەر وەرگریت».

دهۆك، دلۆڤان ئاكرەیی:

سەرۆكێ دەستەیا وەبەرهێنانێ ل هەرێما كوردستانێ دیاركر، كاركرن د هەمی پڕۆژەیێن وەبەرهێنانێ دا (ناڤخۆیی و بیانی) بەردەوامە و چو پڕۆژە نەهاتینە راوەستاندن و وان پلانێن نوو بۆ راكێشانا وەبەرهێنەرێن بیانی هەنە.
دكتۆر مەحەمەد شوكری، سەرۆكێ دەستەیا وەبەرهێنانێ ل حكومەتا هەرێما كوردستانێ بۆ رۆژنامەیا ئەڤرۆ گۆت: «سەرەرای وان ئالۆزیێن ل دەڤەرێ هەین، پڕۆژەیێن وەبەرهێنانێ ل هەرێما كوردستانێ رانەوەسیاینە، ئەو وەبەرهێنەرێن ناڤخۆیی و بیانی، یێن مۆلەتێن فەرمی هەین، د بەردەوامن ل سەر كارێن خۆ و مە رێ نەدایە، رەوشا سیاسی كاریگەریێ‌ ل سەر وان دروست بكەت».
ناڤبری گۆت ژی: «هەرچەندە رەوشێ كاریگەرییا گشتی ل سەر ئاستێ رۆژهەلاتا ناڤین و جیهانێ هەبوویە، بەلێ حكومەتا هەرێمێ كار دكەت، د داهاتی دا ب پلان و بەرنامەیێن نوو، وەبەرهێنەرێن بیانی یێن زێدەتر راكێشیتە هەرێمێ‌، دا كو پڕۆژەیێن ستراتیژی د هەمی سێكتەرێن جودا دا بهێنە ئەنجامدان».

هەولێر، قائید میرۆ:

پەیڤدارێ وەزارەتا چاندنا هەرێما كوردستانێ دیاركر، حوكمەتا ئیراقێ رێژەیەكا كێم یا بەرهەمێ گەنمێ جۆتیارێن هەرێما كوردستانێ دیاركریە بۆ ئەڤ سالە و دبێژیت: ئەڤا هەمبەر هەرێما كوردستانێ دهێتە كرن، غەدرە ل جۆتیارێن هەرێما كوردستانێ دهێتە كرن.
هیوا عەلی، پەیڤدارێ وەزارەتا چاندنێ بۆ رۆژناما ئەڤرۆ دیاركر، پێشبینی دهێتە كرن، ئەڤ سالە بەرهەمێ گەنمێ هەرێما كوردستانێ بگەهیتە نێزیكی دو ملیۆن تەنان، بەلێ دەمێ حوكمەتا ئیراقێ سالانە پلانا وەرگرتنا گەنمی د چوارچوڤێ بودجەیا ئاسایشا خوارنێ دا رادگەهینیت، نێزیكی چار ملیۆن تەنێن گەنمی وەر دگریت و گۆت: «مخابن ئەڤ سالە ژی رێژەیەكا كێم بۆ وەرگرتنا گەنمێ هەرێما كوردستانێ هاتیە دیاركرن».
پەیڤدارێ وەزارەتا چاندنێ گۆت ژی: «ئەڤ سالە غەدر ل جۆتیارێن هەرێما كوردستانێ هاتیە كرن و سالا بۆری ژی غەدر ل جۆتیارێن هەرێمێ هاتبوو كرن، چونكی سالا بۆری مە تێبینی ل سەر وەرگرتنا پشكا هەرێما كوردستانێ هەبوون، دیاركرنا 292 هزار تەنێن گەنمی بۆ ئەڤ سالە لسەر بنەمایێن نەزانستی بوویە و پێدڤی بوو پشكا هەرێما كوردستانێ گەلەك زێدەتربا».

زاخۆ، دلۆڤان هالۆ:

سەرۆكاتیا زانكۆیا زاخۆ دیاركر كو د چارچوڤێ ستراتیژیەتا زانكۆیا زاخۆ دا ژ بۆ زێدەكرنا هەماهەنگیێ ل گەل ڕێكخراوێن جڤاكێ مەدەنی و سەنتەرێن ڤەكۆلینان، ژ بۆ پشتەڤانیكرنا پڕۆژەیێن داهێنەرانە یێن قوتابیان، زانكۆیا زاخۆ و كۆمەلا زانا بۆ چاڤدێریا زانستی ڕێككەفتنەكا تێكگەهشتنێ ئیمزاكر.
سەرۆكاتیا زانكۆیا زاخۆ خویا ژی كر كو ژ ئارمانجێن سەرەكی یێن ڤێ ڕێككەفتنێ پشتەڤانیكرنا داهێنانێ یە بۆ وان هزار و پڕۆژەیێن داهێنەرانە یێن ژ لایێ قوتابیان ڤە دهێنە پێشكێشكرن، و پێكڤە كاركرن د بیاڤێن ڤەكۆلینێن زانستی و لێكگوهارتنا شارەزاییان دا د ناڤبەرا مامۆستا و بسپۆرێن هەردو لایان دا، دیسا گەشەپێدانا شیانان ب ڕێكا سەنتەرێ پێداگۆجی ب هەڤكاری ل گەل كۆمەلێ، و خولێن ڕاهێنانێ یێن پێشكەفتی بۆ قوتابیان بهێنە ڤەكرن.
زانكۆیا زاخۆ ئەو چەندە ژی ئاشكرا كر كو ئیمزاكرنا ڤێ ڕێككەفتنێ نیشانا وێ چەندێ یە كو زانكۆیا زاخۆ یا بەردەوامە د ڤەكرنا دەرگەهێن خوە دا بۆ ڕێكخراوێن نە حكومی یێن تایبەت ب داهێنان و زانستێ ڤە، ب مەرەما دروستكرنا ژینگەهەكا زانستی یا سەردەمیانە كو د بەرژەوەندیا گشتی و پێشخستنا ئاستێ زانستی یێ دەڤەرێ دا بیت.

رەمەزان زەكەریا:

د چارچوڤێ پشتەڤانیكرنا كەرتێ چاندنێ و زێدەكرنا رێژەیا كەسكاتیێ ل دەڤەرێ، حكومەتا هەرێما كوردستانێ ب هەماهەنگی ل گەل ڕێكخراوەكا نێڤدەولەتی دەست بجهئینانا پڕۆژەیەكێ چاندنێ ل ئاكرێ كر.
دیار حسێن، نوونەرێ ڕێكخراوا هیۆمەن ئەپیلا یا بەریتانی بۆ ئەڤرۆ گۆت: «حكومەتا هەرێما كوردستانێ ب هەڤكاری ل گەل ڕێكخراوا هیۆمەن ئەپیلا یا بەریتانی ڕێژەیەكا زۆر یا شتلێن دار زەیتوونان، بێ بەرانبەر ل سەر جۆتیارێن دەڤەرا ئاكرێ بەلاڤكرن، ئەڤە پێنگاڤەكە بۆ گەشەپێدانا بەرهەمێ ناڤخۆیی و پشتەڤانیكرنا ئابووریا خێزانێن جۆتیاران».
ناڤبری گۆت ژی: «ئارمانجا مە ژ پڕۆژەی پشتەڤانیكرنا راستەوخۆ یا جۆتیاران و بهێزكرنا كەرتێ چاندنێ یە ل دەڤەرێ، زێدەباری زێدەكرنا رێژەیا كەسكاتیێ، پڕۆژە د پاشەرۆژێ دا دێ بیتە ژێدەرەكێ داهاتی بۆ جۆتیاران و باشتركرنا ئابووریا وان».
دیار زێدەتر گۆت: «د ڤێ قووناغێ دا نەه هزار شتلێن دار زەیتوونان هاتینە دابینكرن و ل سەر جۆتیاران هاتنە بەلاڤكرن، ژ بەركو گونجایا سەقا و ئاخا دەڤەرا ئاكرێ یا گونجایە بۆ زەتۆنان، لەو شتلێن زەیتۆنان هاتنە هەلبژارتن».

ئامێدیێ‌، مەحمود نهێلی

چەندین سالە حەفت گوندێن دەڤەرا زێبارێ‌ ل سنوورێ‌ ناوچەدارییا شێلادزێ‌ ژ ئەنجامێ‌ خرابیا پارچەیەكا رێیێ‌ دناڤبەرا گوندێن وان و ناوچەدارییا شێلادزێ‌ دا دنالن و دیار دكەن، رێیا وان هەموو چالە و كورن و نەشێن هاتن و چونێ‌ بكەن و داخواز دكەن ئەڤ رێیە بهێنە چێكرن.

ئێك ژ وەلاتیێن ناوچەدارییا شێلادزێ‌ كو مالا وان دكەڤیتە نێزیكێ‌ وێ‌ رێكێ‌ دبێژیت: ئەڤە ل سالا 2007 تا نوكە ئەڤ رێیە هاتیە چێكرن و ل ڤی جهی هاتیە ڤەكرن و نەهاتیە قێركرن و نەژی هاتیە زڤت كرن و گۆت «ل وێ‌ سالێ‌ تا نوكە ئەم دناڤ توزێ‌ داینە و رۆژانە توزا ڤێ‌ جادەیێ‌ كو رێیەكا سەرەكی یا حەفت گوندان و جهێن گەشتیاری یە ب سەر مە دا دهێتە خار.
ئەنەس موحەمەد ئێكە ژ ئاكنجێن ڤان گوندان بۆ رۆژناما ئەڤرۆ دیاركر، ئەڤ رێیا گوندێن وان گەیەك یا بێ‌ سەروبەرە و گۆت: هەكە مە كارەكی گەلەك فەر نەبیت ئەم نەشێن ل سەر ڤێ‌ رێیێ‌ هاتن و چونێ‌ بكەین، ژ بەر كو ئەڤ رێیە نەهاتیە چێكرن و گەلەك جاران دبیتە ئەگەرێ‌ خراب بوونا ترۆمبێلین مە و ئاشكرا كر، ژ بەر كو ئەڤ گوندە دكەڤنە لایێ‌ نزاری و دبیتە جهێن گەشتیاری رۆژانە ب سەدان ترۆمبێل و وەلاتی یێن ڤێ‌ دەڤەرێ‌ قەستا ڤان گوندان و سەر رووباری دكەن ژ بەر وێ‌ یەكێ‌ چێكرنا ڤێ‌ جادەیێن ئێكێن ژ كارێن گەلەك فەرە.
ئەندازیار سەربەست حسێن سەرۆكێ‌ باژێرڤانیا شێلادزێ‌ دیار كر، راستە سال بۆ سالێ‌ ئەڤ جادەیە پتر خراب دبیت و ژ ناڤ دچیت و ژبەر وێ‌ یەكی ژی سالانە ئەڤ جادەیە دهێتە نووەنكرن كو دورێن ئێك كیلومەتر ب تنێ‌ مایە و یا دی هەموو هاتیە چێكرن، رێكێن ڤان گۆندان زۆر جوان دروست بووینە، ب تنێ‌ ئەڤ پارەچەیە مایە و گۆت: د ڤان رۆژان دا ئەو دێ‌ دەست ب نووژەنكرنا ڤێ‌ رێیێ‌ كەن تا كو پرۆژە بۆ باژێرڤانیا دهێن چێكرنا ڤێ‌ جادەیێ‌ ژی دێ‌ بێتە ئێكێ‌ ژ وان پرۆژەیان و دێ‌ كەڤیتە خزمەتا خەلكێ‌ ڤێ‌ دەڤەرێ‌ دا.