ب، سهرجان مەحمود:
نوونەرێ رێڤەبەریا خوەسەر ل شامێ دیار کر، شامێ چەند خال وەکو پێشنیاز ژ بۆ رێککەفتنەکێ داینە هەسەدێ و هەتا نها هەسەدێ ب فەرمی بەرسڤا سووریێ نەدایە، لێ کوردان دڤێت ل سووریێ ببنە هەڤپشکێ دەستهەلاتێ و وەسا دێ گەلەک پرس ژی هێنە چارەسەر کرن.
عەبدولکەریم عومەر نوونەرێ رێڤەبەریا خوەسەر ل شامێ دیار کر، هەتا نها ژی هەڤدیتن د ناڤبەرا شامێ و هەسەدێ دا هەنە، ڤێ دووماهیێ شامێ چەندین خال وەکو پێشنیاز ژ بۆ رێککەفتنێ ئاراستەی هەسەدێ کرینە و نها شام چاڤەرێی بەرسڤا هەسەدێ یە، بەرپرسێن هەسەدێ ژی دیار کرینە ئەو کار ل سەر وێ پێشنیازێ دکەن و پشتی ئەو خواندنەکا تەمام بۆ وان خالان بکەن دێ ب فەرمی بەرسڤا شامێ دەن، لێ هەتا نها بەرسڤا شامێ نەهاتیە دان و گۆت: (گرنگە یێن نها سووریێ برێڤە دبەن ڤێ راستیێ باش بزانن کو کوردان دڤێت ببنە هەڤپشکێ دەستهەلاتێ ل سووریێ، کورد وەلاتیێن سووریێ نە و ب سالانە ژی ل سەر ئاخا خوە دژین، دڤێت ئەو یەک ژ ئالیێ دەستهەلاتا شامێ ڤە ب فەرمی بهێتە قەبوول کرن، نابیت سەرەدەریەکا جوداتر ل گەل کوردان بهێتە کرن، کورد ل سووریێ هەڤپشکن و کوردان دڤێت ل گەل عەرەبان و هەموو پێکهاتەیێن دی پێکڤە سووریێ برێڤە ببەن و ئەو یەک مافێ رەوا یێ گەلێ کوردە ل سووریێ).
نوونەرێ رێڤەریا خوەسەر ل شامێ ئەو یەک ژی دیار کر، دەستێوەردانێن دەرەکی ئاستەنگیێ ل هەمبەر رێککەفتنا شامێ و کوردان دروست دکەت، ب تایبەتی ژی فشارێن تورکیا، هەکە ئەم بەرێ خوە بدەینە رەوشا نها دیار دبیت کو براستی ژی تورکیا رۆلەک گەلەک خراب ل سووریێ دگێریت و تورکیا رێ نادەت و ناهێلیت کورد و شام پرسێن هەی چارەسەر بکەن، وەزیرێ دەرڤە یێ تورکیا رۆژانە ب جهێ سووریێ داخویانیان ددەت، بەرپرسێن سووریێ وەکو تورکیا دژبەریا کوردان ناکەن، ئەو یەک ژی رەوشەک گەلەک خرابە و دڤێت تورکیا ژی دەست ژ سیاسەتا خوە یا شاش ل هەمبەر کوردان و رێڤەبەریا خوەسەر بەردەت، تورکیا دشێت ببیتە پشکەک ژ چارەسەریێ و گۆت: (مخابن نها تورکیا رۆلەک گەلەک خراب دگێریت، لێ ئەمریکا، فرەنسا، ئەلمانیا و هندەک وەلاتێن دی هاریکارن دا کو رێڤەبەریا خوەسەر و شام پرسێن هەی د ناڤبەرا خوە دا چارەسەر بکەن، چونکی هەر کەس دزانیت هەتا پرسا کوردی ل سووریێ نەهێتە چارەسەرکرن و کورد نەگەهنە مافێن خوە رەوشا سووریێ ژی ئارام نابیت).
ناڤهاتی د دووماهیا داخویانیا خوە دا ئەو یەک ژی دیار کر، کورد مەترسی نینن بۆ چو وەلاتەکێ، بەلکو کورد داخوازا مافێن خوە یێن رەوا دکەن، ژ بەر ڤێ یەکێ ژی گرنگە تورکیا، شام و هەموو ئالیێن دی گوهداریا کوردان بکەن و پرسێن هەی ژی ب دانوستاندنان چارەسەر بکەن.
نيشاندان