دهۆك، لەزگین جۆقی:

سەرۆكێ بۆردا كۆنگرەیێ ساخلەمیێ یێ‌ میزۆپۆتامیا دیار كر، ئامادەبوونا سەرۆك بارزانی د ناڤ كۆنگرەیێ مێزوپۆتامیا دا گرنگیدانەكا گەلەك مەزنە بۆ كۆنگرەی و دبێژیت: مە هان ددەت پتر خزمەتا جڤاكێ‌ خۆ بكەین، ئەڤ سالە ژ هەمی سالێن بۆری پتر نۆشدار و پرۆفیسۆرێن كورد ل هەمی پارچەیێن كوردستانێ، ئانكو پتر ژ دو هزار و 500 نۆشدار د كۆنگرەی دا پێشكداربوون.
دكتۆر حسێن بێكتاش، سەرۆكێ بۆردا كۆنگرەیێ ساخلەمیێ یێ‌ میزۆپۆتامیا راگەهاند، پرۆفیسۆرێن كورد ل هەر چار پارچەیێن كوردستانێ د ناڤ كۆنگرەیێ میزۆپۆتامیا دا پشكداربوون، ئەڤە وێ دگەهینیت، كو كورد گەهشتینە ئاستەكێ بلند د وارێ زانین و زانستی دا و گۆت: «دكتۆرێن كورد ژ كازاخستان و ئەرمەنستان و جۆرجیا، دیسا ژ 10 دەولەتێن ئورۆپا پشكداربوون، ئارمانجا مە ئەوە، ب زانین و زانستێ نوو یێ‌ نۆشداری خزمەتا خەلكێ خۆ بكەین».
ناڤهاتی گۆتژی: «د ناڤ كۆنگرەی دا 160 ڤەكۆلین ژ لایێ نۆشدارێن كورد ل هەر چار پارچێن كوردستانێ هاتنە پێشكیشكرن، هەر زانستەكێ نوو د وارێ نۆشداری دا هەبیت، نۆشدارێن كورد دناڤ كۆنگرەی دا بەحس دكەن، ئارمانجا مە ئەوە، پتر خزمەتا جڤاكێ‌ خۆ بكەین».

ئامێدیێ، مەحمود نهێلی:

ژ ئەگەرێ سەرمایێ و نەبوونا سۆتەمەنیێ و زێدەبوونا خواستا وەلاتیان ل سەر كارەبێ، كارەبا نیشتیمانی ل دەڤەرا ئامێدیێ كێم بوویە، ئەڤە ژی بوویە ئەگەر موەلیدە گەلەك كار بكەن و بهایێ كارەبا موەلیدە ژی زێدە ببیت، ژ بەر وێ یەكێ وەلاتیان دلگرانیا خوە نیشادایە و داخواز دكەن بها بهێتە كێمكرن.
وەلاتی دلشاد یوسف ئاكنجی ل دێرەلۆكێ دیاركر، بهایێ موەلیدێ بوویە بارگرانی ل سەر وەلاتیان و هەیڤ بۆ هەیڤێ بها گرانتر لێ دهێت و گۆت: «كێمیا كارەبا نیشتیمانی ل دەڤەرێ بوویە ئەگەرێ زێدە هەلكرنا موەلیدەیان، ژ بەر وێ یەكێ ژی بها زۆر هاتیە، لەو ئەم دخوازین هاریكارییا وەلاتیان بهێتە كرن و ل سەر وان بهێتە سڤككرن».
وەلاتیەكی دی بناڤێ لزگین ئاكجی یێ دەڤەرا ئامێدیێ، دیار كر، ئەڤ بهایێ ڤێ هەیڤێ هاتیە دیاركرن گەلەكە و نوكە كار ژی یێ كێمە و هەكە سەرتراشەك كرێیا دوكانێ و ل گەل یا كارەبا موەلیدێ و ل گەل یا نیشتیمانی و كرێیا خانی بدەت، سەرێ هەیڤێ چ بۆ نامینیت ل زارۆكێن خوە ب مەزێخیت و گۆت: «ئەم دخوازین پێداچوونەك د ڤی بهای دا بهێتە كرن و بها بهێتە كێمكرن یان ژی حكومەت پشكەكێ ب ستوویێ خوە ڤە بگریت یان ژی بكەتە قەر ل گەل هەیڤێن بهارێ و هاڤینێ بهێتە زڤڕاندن».

دهۆك، لەزگین جۆقی:

رێڤەبەرێ نەخۆشخانەیا ئومێد یا چارەسەریا نەخۆشیێن پەنجەشێرێ ل پارێزگەها دهۆكێ بۆ رۆژناما ئەڤرۆ دیاركر، حكومەتا هەرێما كوردستانێ گوژمێ پتر ژ 28 ملیار دیناران بۆ چارەسەریا نەخۆشێن پەنجەشێرێ ل دهۆكێ مەزاختینە.
د. چەكدار ئەحمەد، رێڤەبەرێ نەخۆشخانەیا ئومێد یا چارەسەریا نەخۆشیێن پەنجەشێرێ ل پارێزگەها دهۆكێ ئاشكرا ژی كر، ل سەر ئەركێ حكومەتا هەرێما كوردستانێ، ب گوژمێ 28 ملیار دیناران، نشتەرگەری و دەرمان و پێدڤیێن چارەسەریێ‌ بۆ نەخۆشێن پەنجەشێرێ هاتینە دابینكرن، داكو ژیانا نەخۆشان ژ مرنێ بهێتە قۆرتالكرن و نەخۆش پێدڤی دەرڤەی وەلاتی نەبن و گۆت: «د ناڤ پارێزگەها دهۆكێ دا خزمەت بۆ نەخۆشان دهێنە دابینكرن و ئەم هەمی خزمەتێن ساخلەمیێ پێشكێشی نەخۆشێن پەنجەشێرێ‌ دكەین».

دهۆك، دلۆڤان ئاكرەیی:

پەیڤدارێ رێڤەبەرییا گشتیا گەشتوگوزارێ‌ ل پارێزگەها دهۆكێ دیاركر، ژ بەر هەلكەفتێ وێ یا جوگرافی و دیرۆكا وێ یا زەنگین، دهۆك دێ بیتە سەنتەرێ پلانێن نوو یێن حكومەتا هەرێما كوردستانێ بۆ گەشەپێدانا كەرتێ گەشتوگوزارێ و پاراستنا شوونوارێن دێرین و دبێژیت: بۆ ڤێ مەرەمێ‌ پلانەكا گشتگیر بۆ هەمی دەڤەران هاتیە ئامادەكرن، ب رەنگەكی، نە ب تنێ د وەرزێ هاڤینێ دا، بەلكو د وەرزێن زڤستان و پاییزێ ژی دا زۆرترین گەشتیار قەستا دەڤەرێن چیایی بكەن.
شەمال جەعفەر، پەیڤدارێ رێڤەبەریا گشتیا گەشتوگوزارا پارێزگەها دهۆكێ بۆ رۆژنامەیا ئەڤرۆ خویا كر، بۆ جارا ئێكێ ل سەر ئاستێ هەرێما كوردستانێ و ئیراقێ، كار بۆ دروستكرنا مەزنترین «پاركا شوونواری» دهێتە كرن، كو دیرۆكا دەڤەرێ ب شێوازەكێ مۆدێرن بۆ گەشتیار و ڤەكۆلەران دیار بكەت و گۆت: «كارێن نووژەنكرنێ ل كەلها ئامێدیێ، شوونوارێن ئاكرێ، و ئەشكەفتا «چارستوین» بەردەوامن، ئەڤ پڕۆژە ب هەماهەنگی ل گەل رێكخراوێن نێڤدەولەتی دهێنە ئەنجامدان بۆ پاراستنا سیمایێ دیرۆكا دەڤەرێ».
ناڤهاتی گۆتژی: «حكومەت دخوازیت ب رێیا پێشئێخستنا ڤی كەرتی، ژێدەرێن داهاتی هەمەجۆر بكەت و دەرفەتێن كاری یێن زێدەتر بۆ گەنجێن دەڤەرێ پەیدا بكەت».

زاخۆ، دلۆڤان هالۆ:

فەرهاد مەحموود، دەڤەردارێ باتیفا بۆ ڕۆژناما ئەڤرۆ دیاركر كو ب ئامادەبوونا خانم زەكیا سەید سالح، بریكارا وەزارەتا كار و كاروبارێن جڤاكی و رزا نایفن رێڤەبەرێ گشتی یێ‌ چاڤدێری و گەشەپێدانا جڤاكی ل پارێزگەها دهۆكێ، رێڤەبەریا چاڤدێری و گەشەپێدانا جڤاكی ل دەڤەرداریا باتیفا هاتە ڤەكرن.
دەڤەردارێ باتیفا، ئاماژە ب وێ چەندێ كر كو ب ڤەكرنا ڤێ ڕێڤەبەریێ دێ خزمەتەكا زێدەتر یا دەڤەرێ هێتە كرن، دێ كاروبارێن وەلاتیان ئاسانتر لێ هێن و گۆت: «بەری نوكە باتیفا ڤالاتیەك د ڤی بیاڤی دا هەبوو، لێ ڕۆلێ ڕێڤەبەریا جڤاكی یا زاخۆ ناهێتە ژبیركرن، كو د دەمێ بۆری دا ل دووڤ شیانان خزمەتا ڤێ دەڤەرێ دكر».

هەولێر، قائید میرۆ

بەرپرسەكێ وەزارەتا كارەبێ ئاماژەكر، ئەڤە دووماهی زڤستانە دێ ئاریشا كارەبێ چارەسەر ببیت و گۆت ژی: هەتا دووماهیا ئەڤ سالە دێ پڕۆژێ رۆناهی بگەهیتە هەموو دەڤەرێن هەرێما كوردستانێ و كەسێن زێدەگاڤیێ ژی دكەنە سەر تۆڕێن كارەبی دێ ل گۆرەی قانوونێ بهێنە سزادان.

ئەردەلان دۆسكی، رێڤەبەرێ گشتیێ دیوانا وەزارەتا كارەبێ بۆ رۆژناما ئەڤرۆ دیار كر «ل گۆرەی پێشنیا مە ئەڤ سالە، دووماهی زڤستانە كو ئاریشا كارەبێ هەیە و دووماهیا ئەڤ سالە دگەل تەمام بوونا پڕۆژێ رۆناهی دێ ئاریشا كارەبێ ژی ب دووماهی بهێت، مینا وەلاتێن پێشكەفتی دێ بینە خوەدیێ كارەبا 24 دەمژمێری، كارەبا تنێ بۆ وەرزێ زڤستانێ نەهاتیە دابین كرن، بەرۆڤاژی كارەبا بۆ هەر چوار وەرزێن سالێ یە، بەلێ هندەك جاران ئاریشەیێن تەكنیكی بۆ كارەبێ پەیدادبن و ل زۆربەیا وەلاتێن جیهانێ ژی ئاریشەیێن تەكنیكی بۆ كارەبێ پەیدا دبن.
زێدەتر گۆت: تیمێن مە بەردەوام د كاردانە بۆ چارەسەركرنا ئاریشەیێن تەكنیكی یێن كارەبێ، رێژەیەكا زۆرا باش ل هەموو دەڤەران مفاداربووینە ل پڕۆژێ رۆناهی ئەم یێ پێش پلانێن خوە كەفتی و ئەو جهێن مای ژی كار یێ تێدا دهێتەكرن بۆ ڤێ چەندێ كارەبا دەمژمێری بۆ بهێتە دابین كرن، هەر دەستپێكا كابینا نەهێ ئیرادەیا حوكمەتا هەرێما كوردستانێ ئەڤەبوویە كارەبا بەردەوام بۆ وەلاتیان بهێتە دابین كرن.
ئەردەلان دۆسكی ئاماژە كر «مخابن رێژەیەكا كارەبێ ب هەروە ‌دچیت ئەو ژی ب رێیا زێدەگاڤیێن سەر تۆڕێن كارەبا نیشتیمانی، ل گۆرەی قانوون و رێنمایان هەر كەسەكێ زێدەگاڤیێ بكەتە سەر تۆڕێن كارەبێ دێ بهێتە سزادان ل هەموو دەڤەران مە تیمێن كارەبێ هەنە و دووڤچوونا تۆڕێن كارەبێ دكەن، هەر كەسەكێ زێدەگاڤی كارەبێ راكێشیت ئەڤە دێ كارەب بهێتە بڕێن و لێپرسین دگەل بهێتەكرن.
خویاژی كر، چەند جۆرێن زێدەگاڤیان هەنە لسەر تۆڕێن كارەبێ، بەلێ یا ژ هەمیێ خراپتر و مەترسیدارتر ئەڤە خەلكەكی دەرڤەی پیڤەری كارەبا راكێشایە و چو شێوەیەكی كریار كارەبێ نادەت، هەر كەسە و لایەنەك زێدەگاڤیێ بكەتە سەر تۆڕێن كارەبێ دێ ژلایێ تیمێن حوكمەتێ دوڤچوون بۆ بهێتەكرن و پشتی پشتڕاست بوونێ دێ پێڕابوونێن قانوونی هەمبەر هێنە وەرگرتن.

زاخۆ، دلۆڤان هالۆ:

شارەزایەكێ ئابووری دیاركر، ژبلی كەرتێ نەفتێ د نوكە دا هەرێما كوردستانێ بزاڤا هەمەجۆركرنا ژێدەرێن داهاتی دكەت.

بێوار حسێن زێباری، شارەزایێ ئابووری و نڤیسەرێ پەرتووكا ئابووریا كوردستانێ بۆ ڕۆژناما ئەڤرۆ دیار كر، ئابووریا هەرێما كوردستانێ ب شێوەیەكێ سەرەكی پشتبەستنێ ل سەر كەرتێ نەفتێ دكەت، لێ د ڤان چەند سالێن دووماهیێ دا پێكولا هەمەجۆركرنا ژێدەرێن داهاتی دكەت.
ناڤهاتی ئاماژە ب وێ چەندێ ژی كر كو پێكولا هەمەجۆركرنا ژێدەرێن داهاتی ژ لایێ ئابووریا هەرێما كوردستانێ ڤە ژ بۆ مەرەما باشتركرنا بارێ ئابووری یێ كوردستانێ و ڕەوشا خەلكێ، و ڕزگاركرن ژ وان قەیران و كاودانێن دكەڤنە بەرامبەر حكومەت و خەلكێ.
شارەزایێ ئابووری ئاشكرا ژی كر كو كەرتێ نەفتێ د نوكە دا ل پتریا وەلاتێن جیهانێ گرنگیەكا مەزن پێ دهێتە دان و بوویە ژێدەرەكێ سەرەكی یێ بڕێڤەبڕنا بارێ ئابووری یێ خەلكێ، ئەڤە ستوونا سەرەكی یا ئابووری یا هەرێمێ یە و پتریا داهاتێ حكومەتێ ژ فرۆتنا نەفتێ دهێت، هەرچەندە كێشە ل سەر هنارتنا نەفتێ ل گەل حكومەتا ئیراقێ هەبووینە، لێ هێشتا وەكو ژێدەرێ ئێكێ یێ بۆدجەی دمینیت، و د نوكە دا زێدەتر گرنگی پێ هاتیە دان و وەكو بەرێ نەمایە، وەلاتێن زلهێز ژی هاتینە سەر خەت و بارێ وان باشتر بوویە ژ بەرێ».
گۆت ژی:»دڤێ كابینێ دا زێدەتر كار هاتیە كرن بۆ كەرتێ چاندن و پیسەسازیێ و بوویە ئەگەر كو پشت بەستن ل سەر كەرتێ نەفتێ كێمتر ببیت.
زێدەتر ژی گۆت:»دەستپێكرنا ڕەوانەكرنا بەرهەمێن ناڤخۆیی وەكو هنار و هنگڤین و سێڤان ژ لایێ حكومەتا هەرێما كوردستانێ ڤە بۆ بازاڕێن جیهانێ، هەر دیسان ئاڤاكرنا كارگەهێن خوارن و ڤەخوارنێ و چیمەنتۆیێ و ئاسنی گەلەك كارگەهێن دی بۆ دابینكرنا پێدڤیێن ناڤخۆ پێنگاڤەكا مەزن یا زێدەكرنا داهاتیە، ژ لایەكێ دی ڤە كوردستان ب سەقایێ خۆ یێ هین و سروشتێ خۆ یێ جوان دهێتە نیاسین، ئەڤ كەرتە سالانە ب ملیۆنان گەشتیاران ژ ناڤەڕاست و باشوورێ ئیراقێ و وەلاتێن جیران رادكێشیتە هەرێمێ كو ئەڤ چەندە دبیتە ئەگەرێ لێڤەگەڕەكا باش یا دارایی بۆ بازاڕی، و ب تایبەت د ڤێ كابینێ دا گرنگیەكا زێدەتر ب جهێن گەشتیاری هاتیە دان، و هژمارا سەرەدانكەران بۆ وان جهان ژی زێدەبوویە».