قەیس وەیس:

ڤەڕێژا ئەنجامێن یاریێن هەرچار یانەیێن كوردستانی ب دو سەركەڤتن، خوسارەتیەك و وەكهەڤییەك ئیناینە پشتی ب دووماهی هاتنا یاریێن گەڕا 17ێ‌ ژ هەڤڕكیێن خولا ستێرێن ئیراقێ‌ یا فوتبۆلێ‌، خوسارەتییا زاخۆ یا گرنگ سۆپرایزا نە چاڤەڕێ‌ كریبوو و جەوییە پێشڤە هاتە سەرێ‌ لیستێ‌.
ئەلهۆیێن چیا وەكهەڤبوو
تیما فوتبۆلا یانەیا دهۆك ب گۆلەكێ‌ دگەل یانەیا كارەبا یا بەغدایی وەكهەڤ بوو د یارییا واندا ئەوا ل ئەینییا بۆری ل یاریگەها یانەیا نەجەف هاتیە كرن، هەرچەندە گۆلا پێشكەڤتنێ‌ تیما كارەبا د خولەكا 63ێ‌ ژلایێ‌ یاریزانێ‌ خوە ئەحمەد عاید ئینابوو، لێ‌ مفا وەرگرتن ژ ڤەگەڕیانا ڤارێ‌ تیما دهۆكێ‌ شیا پەنەلتییەكێ‌ دبەرژوەندیا خوە دا وەربگریت ئەوا ستێرا تیمێ‌ پیتەر گۆرگیس شیایی ب سەركەڤتیانە لێدانا پەنەلتیێ‌ بجهبینت دخولەكا 88ێ‌ دا گۆلا وەكهەڤیێ‌ ئینا، هەربۆزانین یاریزانێ‌ دهۆكێ‌ مونزر ئەلعلێوی ب كارتا سۆر هاتبوو دوورئێخستن.
بڤێ‌ ئەنجامێ‌ ڕێزەكێ‌ پاشڤەچوو یا 10ێ‌ ب كۆمكرنا 26 خالان ژ حەفت سەركەڤتن، چار وەكهەڤی و پێنچ خوسارەتییان، یاریزانێن دهۆكێ‌ 19 گۆل كرینە د بەرانبەر دا 14 گۆل ل سەر هاتینە تۆماركرن.
عەبدولغەنی شەهەد:
دوورئێخستنا یاریزانێ‌ مە ب كارتا سۆر كارتیكرن ل سەر تیمێ‌ كر
د كۆنگرەیێ‌ رۆژنامەڤانی یێ‌ پشتی یاریێ‌ دا عەبدولغەنی شەهەد ڕاهێنەرێ‌ تیما یانەیا دهۆكێ‌ گۆت: تیما مە یا باش نەبوو د نیڤا ئێكێ‌ دا تایبەت د چارێكا دووماهیێ‌ دا، دنیڤا دویێ‌ ئاستێ‌ تیما باشبوو، د یاریێن هوسا دا ئەو تیما گەلەك دەلیڤەیان بەرزە دكەت دێ‌ باجا گران دەت، دوورئێخستنا یاریزانێ‌ مە ب كارتا سۆر كارتیكرن ل سەر ئاستێ‌ تیما مە كر كو مە ب كێمترییا یاریزانەكی یاری دكر، لێ‌ ڕژدییا یاریزانان و گڤاشتنێن بەردەوام بوو ئەگەر گۆلا وەكهەڤیێ‌ بهێت و ئەم نێزیكی سەركەڤتنێ‌ ژی بووین، ئەڤە یارییا دویێ‌ یە ئەم دەلیڤەیان ژ دەست دەین، بدیتنا من دڤێ‌ یاریێ‌ و یا بۆری دا مە چار خال ژ دەستدان.
زاخۆ توشی خوسارەتیەكا مەزن و نە چاڤەڕێ‌ كری
تیما یانەیا زاخۆ خوسارەتیەكا مەزن و نە چاڤەڕێ‌ كری بەرانبەر یانەیا زەورا یا بەغدایی تۆماركر ب چار گۆلان بەرانبەر دو گۆلان، د یارییا واندا ئەوا ل پێنچ شەمبییا بۆری یاریگەها كەرخ ل بەغدا هاتیە كرن، هەرچەندە دنیڤا ئێكێ‌ دا یاری بێ‌ گۆل ب دووماهی هاتبوو، لێ‌ د چارێكەكا یاریێ‌ دا چار گۆل ل سەر زاخۆ هاتنە تۆماركرن د خولەكێن، 48، 49، 58 و 63ێ‌، پشتی ڤان گۆلان یاریزانێن زاخۆ بزاڤكرن ڤەگەرێنە دناڤ یاریێ‌ دا و دو گۆل ئینان ژلایێ‌ یاریزانێن خوە ئالیۆ ئادەم دخولەكا 80ێ‌، و شڤان جەمیل دخولەكا 89ێ‌ لێ‌ یاری ب خوسارەتیەكا گران بۆ كوڕێن خابۆری ب دووماهی هات، ژلایەكێ‌ دووڤە كارگێرییا یانەیا زاخۆ ب فەرمی دوورئێخستنا ڕاهێنەرێ‌ خوە یێ‌ قەتەری ویسام ڕزق ڕاگەهاند.
ئەڤێ‌ خوسارەتیێ‌ تیما زاخۆ رێزا حەفتێ‌ ژ دەستدا ئەوا دنوكەدا ل ڕێزا هەشتێ‌ دهێت ب كۆمكرینا 27 خالان ژ حەفت سەركەڤتن، شەش وەكهەڤیان و پێنچ خوسارەتی هەنە، یاریزانێن وێ‌ 25 گۆل تۆماركرینە لێ‌ 19 گۆل ل سەر گۆلپارێزێ‌ وان هاتیە تۆماركرن.
محەمەد نۆمی: تووشی خوسارەتیەكا گران بووین
د كۆنگرەیێ‌ رۆژنامەڤانی دا محەمەد نۆمی هاریكارێ‌ ڕاهێنەرێ‌ زاخۆ گۆت: ئەم تووشی خوسارەتیەكا نە چاڤەڕێ‌ كری و گران بووین بەرانبەر زەورا، داخوازا لێبۆرینێ‌ ژ جەماوەرێ‌ یانەیێ‌ دكەین و سۆز ددەین بۆ یارییا بهێت قەرەبوو بكەین، ئەگەرێن ڤێ‌ خوسارەتیێ‌ ژی ڤەدگەڕینمە گەشتێن بەردەوام یێن تیما مە ژ باكۆر بۆ باشۆر و ناڤەڕاستا ئیراقێ‌ كو كارتیكرنا نەرێنی ل سەر دەرۆنێ‌ یاریزانان و چەستەیی وان كرییە، هەروەسان ئەو ئاستێ‌ مە ژ یاریزانێن خوە دڤییان هندەك ژ وان پێشكێش نەكربوو، مە یاریەگا گرنگ و ب هێز هەیە د كۆپا كەنداڤی دا ل سێشەمبییا بهێت دێ‌ بەرانبەر ئەلقادسیە ل وەلاتێ‌ كویتێ‌ كەین، ب هیڤییا وێ‌ یەكێ‌ بشێن گرنژینێ‌ بۆ جەماوەرێ‌ زاخۆ ڤەگەڕینن.
هەولێرێ‌ ڕیمۆنتادا ئینا
تیما فوتبۆلا یانەیا هەولێرێ‌ تا خولەكا 52ێ‌ ب گۆلەكێ‌ بەرانبەر یانەیا نەفت یا بەغدایی یا خوسارەت بوو، د یارییا واندا ئەوا بێ‌ جەماوەر ل یاریگەها شەهید فرانسۆ حەریری هاتیە كرن، د خولەكا 53ێ‌ دا گۆلا وەكهەڤیێ‌ ژلایێ‌ هارۆن زوبێدی ڤە هاتە تۆماركرن، یاری بۆ دەمێ‌ زێدەكری چوو، د خولەكێن 90+2 و 90+8 شیا ڕیمۆنتادا بینت و ب سەركەڤن ئەوا ژلایێ‌ یاریزانێن وێ‌ موستەفا قابیل و شیرزۆد تیمرۆڤ هاتینە تۆماركرن.
نەورۆزێ‌ سەركەڤتنا خوە ل دهۆكێ‌ دوبارەكر
تیما یانەیا نەورۆز سەركەڤتنەكا گرنگ ل سەر یانەیا مووسل ئینا ب دو گۆلان بێ‌ بەرانبەر كو دبیتە سەركەڤتنا دویێ‌ د دو گەڕێن جودا ل یاریگەها دهۆكێ‌ دئینیت، سەركەڤتنا ئێكێ‌ د گەڕا ئێكێ‌ دا بوو ل 13ێ‌ چریا دویێ‌ یا سالا بۆری بوو، بڤی سەركەڤتنێ‌ تیما كوردستانێ‌ پێنگاڤەكا باش یا پێشڤەچوونێ‌ هاڤێژیت ئەوا هاتییە ڕێزا 14ێ‌ ب كۆمكرینا 19 خالان ژ شەش سەركەڤتن، ئێك وەكهەڤی و 10 خوسارەتیان.
ژ ئەنجامێن یاریێن دی یێن ڤێ‌ گەڕێ‌
ئەلغراف چنە-1 شورتە، دیالا 1-چنە ئەلكەرخ، نەجەف 1-1 ئەلقاسم، ئەلگەرمە 1-1 تەلەبە، ئەمانەت بەغدا چنە-چنە مینا، جەوییە 2-1 نەفت میسان.
هەلوەستێ‌ گشتی پشتی ب دووماهی هاتنا یاریێن گەڕا 17ێ
‌ 1- جەوییە 37 خال.
2- شورتە 35 خال و كێمترییا یارییەكێ‌.
3- ئەلگەرمە 34 خال.
4- هەولێر 34 خال.
5- تەلەبە 31 خال.
6- زەورا 31 خال و كێمترییا یارییەكێ‌.
7- كەرخ 28 خال.
8- زاخۆ 27 خال.
9- دیالا 27 خال.
10- دهۆك 25 خال.
11- ئەلغراف 23 خال.
12- ئەمانەت بەغدا 21 خال.
13- نەفت 21 خال.
14- نەورۆز 19 خال.
15- مووسل 18 خال.
16- مینا 18 خال.
17- نەفت میسان 13 خال.
18- كارەبا 11 خال.
19- نەجەف هەشت خال.
20- ئەلقاسم دو خال.
ئەو 10 گۆلكەرێن پێشیێ‌ یێن خولێ‌ بڤی شێوەیی نە
1- شیرزود تیمیرۆڤ (13) گۆل، یانەیا هەولێر.
2- كینجسلی كۆكۆ (11) گۆل، یانەیا ئەلغراف.
3- عەلا ئەلدالی (10) گۆل، یانەیا مووسل.
4- لیۆنێل ئەباتی (10) گۆل، یانەیا شورتە.
5- پیتەر گۆرگیس (9) گۆل، یانەیا دهۆك.
6- یونس حەمۆد (9) گۆل، یانەیا كەرخ.
7- حەسەن عەبدولكەریم (7) گۆل، یانەیا زەورا.
8- مەحمەد خالد كۆفی (6) گۆل، یانەیا كەرخ.
9- داوودا دیمی، (6) گۆل یانەیا نەفت میسان.
10- ئیچیتا دیپۆتی (6) گۆل، یانەیا زاخۆ.
یاریێن گەڕا 18ێ‌ و بەری دووماهییا قووناغا ئێكێ‌ یا خولێ‌
رۆژا ئەینی 13- 2- 2026
مینا- ئەلغراف، دەمژمێر سێ‌ ئێڤاری
جەوییە- نەورۆز، دەمژمێر سێیێ‌ ئێڤاری
دهۆك- مووسل، دەمژمێر 5:30 مەغرەب.
كەرخ- تەلەبە، دەمژمێر 5:30 مەغرەب.
شەمبی 14-2- 2025
هەولێر- زاخۆ، دەمژمێر سێ‌ ئێڤاری.
نەفت میسان- ئەلقاسم، دەمژمێر سێ‌ ئێڤاری
دیالا- ئەلگەرمە، دەمژمێر 5:30 مەغرەب.
نەجەف- كارەبا، دەمژمێر 5:30 مەغرەب.
دڤێ‌ گەرێ‌ دا هەردو یاریێن دناڤبەرا نەفت دگەل شورتە و یارییا زەورا دگەل ئەمانەت بەغدا بۆ دەمەكێ‌ دی هاتنە پاشئێخستن ژبەر پشكدارییا هەردو یانەیێن شورتە و زورا د كۆپا ئاسیایێ‌ دا.

رەمەزان زەكەریا

د داخۆیانیەكێ دا سكرتێرێ یانەیا بەردەڕەش ئاشكراكر ئەڤرۆ تیما وان یارییەكا گرنگ هەیە بەرانبەر مێڤانا خوە بازیان ژ چارچووڤەیێ‌ گەڕا نەهێ‌ یا خولا پلا ئێك یا كوردستانێ‌ ل دەمژمێر 2:30 پشتی نیڤرۆ هێتە كرن.
زەهدی عەبدولقادر بۆ رۆژناما ئەڤرۆ گۆت: تیما مە ل رێزا شەشێ دهێت ب 11 خالان، هیڤیێن دەربازبوونێ‌ بۆ نایاب بەردەستن ژبەركو چار یانە دێ‌ دەربازبن،دناڤبەرا مە و تیمێن پێشییا مە خالێن كێم هەنە، هەڤڕكی یا ب هێزە و دەلیڤە ل بەردەستە بۆ باشتكرنا ڕێزبەندییا خوە.
ناڤبری گۆت ژی: هەرچەندە گڤاشتنێن دەروونی كارتێكرنەكا ئێكجار مەزن ل سەر ئەنجام و ئاستێ تەكنیكی یێ یاریزانان هەیەكو نەشێن ب درێژاهییا خولێ ئاستەكێ جێگیر نیشان بدەن، سەرەرای هەموو ئاستەنگان، مە هیڤی و باوەریەكا مەزن ب شیانێن یاریزانێن خۆ هەیە، ئارمانجا مە یا سەرەكی بشێین ب ئەنجامێن باش و ب پلانەكا تۆكمە، دیرۆكەكا نوو بۆ وەرزشا دەڤەرێ بنڤیسین بۆ ڤێ یەكێ ژی.

دهێتە پێشبینكرن د هاڤینا ئەڤ سالە دا گرێبەستا نێزیكی 125 یاریزانێن پیشەكار دخولا فوتبۆلا سعۆدیێ‌ دا ب دووماهی بهێن ژ وانا ستێرێن جیهانی كرێستیانۆ رۆنالدو، فابیۆ، دانێلۆ بێرێرا، بریدراگ رایكۆڤێچ، مۆسا دیبای، كو دهێتە پێشبینیكرن چوونا وان ببیتە پیڤەلەرزە ب خولا سعۆدیێ‌ بكەڤیت.
رۆژنامەیا ماركا یا ئسپانی ڕاگەهاند دێ‌ گرێبەستا 125 یاریزانان د هاڤینا ئەڤسالە دا دگەل یانەیێن وان د خولا سعۆدیێ‌ دا ب دووماهی هێن، ل دووڤ پێشبنییان پرانییا وان گرێبەستنێن خوە نوو ناكەن ئەڤچەندە ژی ژبەر ناكۆكیێن دناڤبەرا یانە و یاریزانان دا پەیدابووینە و دیسان ب هەبوونا گرێبەستێن دەرڤەیی خولا سعۆدیێ‌، هەروەسان لدووڤ بەندێن گرێبەستێ‌ بتنێ‌ ئێك وەرز ژ وانا دو وەرز بوون و ب دووماهی هێن.
پشتی چوونا یاریزانێ‌ فرەنسی ویانەیا هیلال كالیدۆ كۆلیبالی، دەنگۆیێ‌ چوونا ستێرێن نەسرێ‌ كریستیانۆ رۆنالدۆ، مارسیلۆ برۆزۆڤێچ، سادیۆ مانی، ئینیگۆ مارتینێز، هەروەسان فابیۆ، دانێلۆ بێرێرا، بریدراگ رایكۆڤێچ، مۆسا دیبای بەرهەڤییا خوە دیاركرینە گرێبەستا خوە نوو نەكەن.
رۆژنامەیێ‌ دیاركر ل وەرزێ‌ بۆری هەر ئێك ژ یاریزان یێ‌ كرواتی ئیڤان راكیتچ، یێ‌ بەرازیلی رۆبێرتۆ فێرمینۆ، یێ‌ غانی بیێر ئۆباماینگ، یێ‌ ئنگلتەرایێ‌ جوردان هندرسۆن، یێ‌ پۆرتۆگالی جواو كانسێلۆ و یێ‌ فرەنسی نگۆلۆ كانتی و یێ‌ بەرازیلی نیمار خولا سعۆدیێ‌ بجهـ هێلابوون، ئەوا شرۆڤەكارێن وەرزشی دیاركرینە دبیت كارتیكرنێ‌ لسەر خولا سعۆدیێ‌ بكەت.

چاڤەڕێ‌ دهێتە كرن ئەڤرۆ كۆمەكا یاریێن ژ چارچووڤەیێ‌ هەڤڕكیێن خولێن جودا یێن جیهانی بهێنە كرن، ژ گرنگترین خولێن ئۆرۆپا دا بڤی ڕەنگی دێ‌ هێنە كرن.
خولا ئسپانیا – گەڕا(23)ێ‌
ڤالێنسیا- ڕیال مەدرید،ئەتلەتیكۆ مەدرید- ریال پیتس، دەمژمێر 10 شەڤ.
خولا ئنگلتەرا- گەڕا (25)ێ‌
برایتۆن- كریستال پالاس، دەمژمێر پێنجی مەغرەب.
لیڤەرپۆل- مانچستەر ستی،خولا ئیتالیا- گەڕا (24)ێ‌
ساسۆلۆ- ئینتەر میلان،
دەمژمێر هەشتی شەڤ.
یۆڤانتۆس- لاتسیۆ،
دەمژمێر 10ی شەڤ.
خولا ئەلمانیا- گەڕا (21)ێ‌
كۆلن- لایبزیگ،بایرن میۆنخ- هۆڤێنهایم، دەمژمێر 7:30 شەڤ.
خولا فرەنسا- گەڕا(21)ێ‌
نێس- مۆناكۆ، دەمژمێر پێنجێ‌ مەغرەب.
پاریس سانجێرمان- مارسێلیا، دەمژمێر 10:45 شەڤ.