كۆڤان حەسەن كوڕێ‌ باژێرێ‌ ئاكرێ‌ و یاریزانێ‌ هەلبژارتیێ‌ ئیراقێ‌ بۆ یاریێن مەیدانێ‌ یا خودان پیدڤیێن تایبەت هەلگرێ‌ میدالییا زێری یا ئۆلمپیادا جیهانی ل بەرازیلێ‌ دوبارە ڤەگەڕیا هەڤڕكیێن قارەمانییان پشتی دووركەڤتنەكا درێژی بۆ ماوەیێ‌ سێ‌ سالان و بڕیارە ئەڤرۆ ب كەڤیتە د هەڤڕكیێن قارەمانییا خولا یاریێن رۆژئاڤا ئاسیا كو بڕیارە هەتا هەشتێ‌ ڤێ‌ مەهێ‌ پایتەختێ‌ عومان مەسقەت مێڤاندارییا وێ‌ بكەت.
ل دور ڤێ‌ یەكێ‌ قارەمانێ‌ كوردستانی و جیهانی د داخویانیەكا تایبەت دا بۆ رۆژنامەیا ئەڤرۆ گۆت: پشتی دووركەڤتنەكا درێژە كو نێزیكی سێ‌ سالان ژبەر خواندنێ‌ و هنگاڤتنێ‌ نەچاركریم، ب خوەشحالی ڤە دوبارە ڤەگەریایمە دناڤا هەڤڕكیێن نێڤدەولەتی دا و دێ‌ وەكو یاریزانێ‌ هەلبژارتیێ‌ ئیراقێ‌ پشكداریێ‌ د یاریێن مەیدانی دا كەم كو یا من تایبەتە ب یاریێن هاڤێتنا رۆمی، پارسەنگی، ئەوا دهێتە پێشبینیكرن زێدەتری هزار وەرزشڤان ژ 12 وەلاتان دێ‌ هەڤڕكیێ ل سەر دەهـ یاریێن جودا یێن پارائۆلمپی كەن، ئەڤ قارەمانییە درێژەپێدانە بۆ بەرهەڤیێن وەلاتان بەر ب قارەمانیێن ئاسیایی و جیهانی.
هەروەسان ناڤهاتی گۆت: وەكو كوردەك من بەرهەڤیێن خوە باش كرینە، سەرباری دووركەڤتنا من ژ هەڤڕكییان و سەقایێ‌ یاریێن نێڤدەولەتی لێ‌ گەشبینم پێنگاڤا من یا ئێكێ‌ گەلەك یا باش بیت و بشێم ئێكەم دەستكەڤت دڤێ‌ قارەمانیێ‌ دابینم، دێ‌ بهێنفرەهـ بم، ژبەركو كاروانێ‌ من بۆ ئەڤ سالە درێژە و ب بەرنامە هاتییە دانان كو بشێم چەند ناسناڤ و دەستكەڤتێن دی ببمە و یا هەژیتر بشێم ئالایێ‌ پیرۆز یێ‌ كوردستانێ‌ ژی بلند بكەم كو ئەڤە بۆ من گەلەك گرنگە، ب هیڤییا وێ‌ یەكێ‌ بشێم ئەڤان ئارمانجا بجه بینم.
بۆ زانین یاریزانێ‌ ناڤهاتی كوردێ‌ ئێكانیەد ناڤ پێكهاتیێ‌ هەلبژارتیێ‌ ئیراقێ‌ بۆ یاریێن مەیدانێ‌ دا و شیایە زێدەتر122 میدالیێن رەنگین د قارەمانیێن جودا یێن نێڤدەولەتی، ئەرەبی و جیهانی بدەستڤە بینت ژوانا دەستكەفتا ئۆلۆمپیادا ریۆ دی جانیرۆ یا 2016ێ‌ ل بەرازیل میدالیا زێری بۆ هاڤێتنا رۆمی كو ژدووراتیا 41م و 82سم تۆماربكەت و میدالیێن زێری و زیڤی د قارەمانیێن نێڤدەولەتی، ل لندن، چیك، قەتەر و ئیماراتێ‌.

د نوونترین کۆمبوونا خوە دا فدراسیۆنا فوتبۆلا کوردستانێ چەند بڕیار و ڕاسپاردە بۆ دەمێ دهاتی دانە دیارکر و ژ گرنگترین ئەوان بڕیارا، دەستنیشانکرنا رۆژا ٢٥ێ ئادارا بهێت وەکو دەستپێک بۆ وەرزێ نوو یا خولا پلا دو هاتە دانان ئەوا دێ ب شێوەیێ چار کۆمان بیت ل دووڤ پێگەهێ جۆگرافی ئانکو ل هەر پارێزگەهەکێ کۆمەک دێ هێتە کرن.
ژلایەکێ دووڤە پشتی نەشتەرگەرییا ڕاهێنەرێ بەرنیاس یێ پارێزگەهێ و هەلبژارتیێ کوردستانێ سلێمان رەمەزان لێبۆرین خواست کو نەشێت بەردەوامبیت دگەل هەلبژارتیێ ناڤهاتی، فدراسیۆنێ بریاردا سەمیر بابو ل جهێ سلێمان رەمەزانی بهێتە دانان.
هەر ژ بڕیارێن فدراسیۆنێ بۆ وەرزێ ئەڤ سالە کۆپا کوردستانێ نە هێتە ئەنجامدان ئەڤچەندە ژی ژبەر بارەدوخێ دارایی یێ پرانییا یانەیێن کوردستانێ، لێ بڕیارا دەستپێکرنا وەرزێ نووب ۆ خولا ل بن ١٩ سالی کو ل ئێکێ نیسانا بهێت دەستپێبکەت وپشکدارییا یانەیان یا ئارەزوومەندانەیە یێن خولێن پلا، نایاب، ئێک و دو، ژلایەکێ دووڤە بۆ جارا ئێکێ یە بڕیار هاتیە دان ب دروستکرنا هەلبژارتیێن پارێزگەهـ و ئیدارەیێن سەربەخۆ بۆ تیمێن یاریزانێن دێرین- یێن ل سەر ٤٠ سالییێ دا- و دانانا قارەمانییەکێ ب پشکدارییا نەهـ هەلبژارتیان ل ئێکێ ئەیارا بهێت دەستپێبکەت.
هەر درێژاهییا بڕیارێن خوە دا یانەیا سەیدسادق ب فەرمی ژ خولا پلا ئێک بۆ پلا دو هاتە پەسەندکرن هەروەسان چار یانەیێن دی ژی ل دووڤ سیستەمێ خولێ ئەوێن ل دووماهیێ دێ داکەڤنە هەمان پلە، دیسان دانانا تاقیکرنێن کۆپەر بۆ دادڤانان هاتە ئێکلاکرن کو دێ ل ١٣ێ ڤێ مەهێ بیت.

د داخویانیەكێ دا سەرۆكێ یانەیا شێخان ئاشكرا كر بارودۆخێ دارایی یێ‌ نە باشكو نوكە یێ‌ یانە تێدا دەرباز دكەت كارتیكرن ل سەر تیما مە یا فوتبۆلێ‌ د خولا پلا دو دا كرییە و ئەو ئاستەنگێن دبنە ڕێگر ل هەمبەر ب دەستڤەئینانا ئەنجامێن باش هەموو خرابیا رەوشا ئابووریە.
زێدەتر فازل فاخر بۆ رۆژناما ئەڤرۆ گۆت: د قووناغا ئێكێ دا ئاستێ تیما مە یا فوتبۆلێ‌ یێ خراب بوو، لێ بۆ قووناغا دویێ مە یاریزانێن باش ئیناینە د ناڤ رێزێن یانەیێ دا، ئەڤ چەندە ژی بوویە ئەگەر كو ئاستێ تیما مە یێ وەرزشی پێشكەفتنەكا مەزن بخۆڤە ببینیت.
سەرۆكێ یانەیێ دیاركر: د قووناغا ئێكێ دا ئاستێ یانەیا سۆران نە ل ئاستێ پێدڤی بوو، لێ بۆ قووناغا دوێ پلان هاتیە گوهۆڕین و یاریزانێن باش ئینابوون. وەك ئاست یانەیا شێخان گەلەك باشتر بۆ ژ یانەیا سۆران، بەلێ ئەنجام د بەرژەوەندیا وان دا نەبوو، چونكی سۆران شیا گۆلێ تۆمار بكەت و سەركەفتنێ ب دەستڤە بینیت.
فازل فاخر گۆت: قەیرانا دارایی كاریگەریەكا ئێكسەر ل سەر دەروون و ئاستێ یاریزانان هەبوویە، ئەڤە مەها دویێ‌ یە هێشتا مووچەیێ مەها 12 ب دروستی نەهاتیە دابەشكرن، سەرەرای وێ چەندێ كو سۆز ب یانەیێ هاتینە دان پشتەڤانی لێ بهێتەكرن، لێ هێشتا وەكۆ پێدڤی نەهاتیە ئەنجامدان.
ناڤهاتی ئاشكراكر: هیڤی خوازین كو ل یاریێن بهێت دا شێخان بزڤریتە سەر رێكا سەركەفتنان و ئەو ئاستێ بلند كو د قووناغا دویێ دا نیشان بدەن، بكەنە ئەنجامێن دلخۆشكەر بۆ جەماوەرێ یانەیێ.