قەیس وەیس:

بڕیارە ئەڤرۆ پێنچ یاریێن مایی ژ هەڤڕكیێن گەڕا 16ێ‌ یا خولێ‌ ستێرێن ئیراقێ‌ یا فوتبۆلێ‌ ل چەند یاریگەهێن جودا بهێنە كرن، دهۆك ل باژێرێ‌ نەجەفە و زاخۆ دناڤ ئەرد و جەماوەرێ‌ خوە دایە د دو ئەركێن جودا بۆ سەركەڤتنێ‌.

دهۆك بەرانبەر خودانا دووماهییا لیستێ‌ یە
تیما فوتبۆلا یانەیا دهۆك دێ‌ ل یاریگەها نەجەف بیتە مێڤانا یانەیا ئەلقاسم ئەوا دێ‌ ل دەمژمێر سێیێ‌ ئێڤاری هێتە كرن، ئەلهۆیێن چیا 22 خال كۆمكرینە ژ دەرئەنجامێ‌ شەش سەركەڤتن، چار وەكهەڤی و پێنچ خوسارەتی ژی هەنە ئەوا د نوكە ل ڕێزا 11ێ‌ دهێت، یاریزانێن وێ‌ 15 گۆل تۆماركرینە لێ‌ 13 گۆل ژی ل سەر تیمێ‌ هاتینە تۆماركرن، ژلایێ‌ خوەڤە یانەیا ئەلقاسم یا ل دووماهییا ڕێزبەندییا خولێ‌ بتنێ‌ ئێك خال هەیە ئەوژی وەكهەڤییە و 14 خوسارەتی هەنە و هیچ سەركەڤتن نیننە، 36 گۆل ل سەر هاتینە تۆماركرن بتنێ‌ چار گۆل ئیناینە.
چەكێ‌ دهۆكییان و قاسم كینە
تیما یانەیا دهۆك ئەوا ئاست و ئەنجامێن باش ب سەركێشیا ڕاهێنەرێ‌ خوە عەبدولغەنی شەهد دئینیت ب پێكهاتییەكێ‌ بەرچاڤ و خودان شیان دهێنە دیتن، ل دووڤ پێشبینییان بۆ یارییا ئەڤرۆ پێكهاتیێ‌ ئەلهۆیێن چیا دێ‌بڤی شێوەیی بیت، عەلی یاسین گۆلپارێز، ل هێلا بەرەڤانیێ‌ خادم رەسۆل جۆهێر كو ئێك ژ باشترین یاریزانێن پیشەكارە، دیسان حەمۆد مشعان، یێ‌ سۆری خالد كردغلی، سیابەند عەگید، ئەحمەد عادل، هارۆن ئەحمەد، حەسەن عیماد، كەریم دەرویش، پیتەر گۆرگیس و جونیۆر سامبۆ، دگەل پشت بەستن د هندەك یارییان دا مونتەزر محەمەد، ئەندرێ ئالان، لیۆناردۆ دی ئۆلیڤێرا، عەلا عەباس.
ژلایێ‌ خوەڤە یانەیا ئەلقاسم ئەوا د پشتی ڤەكربوونا دەرگەهێن ڤەگوهاستنان و ڕاگرتنا دورپێچا ئینانا یاریزانان ژلایی فیفایێ‌ ڤە 10 یاریزان دماوەیێ‌ بۆریدا ئیناینە دگەل ئیمزاكرنا گرێبەستێ‌ دگەل ڕاهێنەر حەمزە هادی، سێ‌ پیشەكار ئەوژی كرێست جونیۆر، سێدرك و مازۆنكا، ئانكو تیما خوە یا نووكری و ڕێكئێخستنی.
ئامارێن د بەرژەوەندییا دهۆكێ‌ دا
ل دووڤ ئامارێن نە فەرمی یێن یاریێن دناڤبەرا هەردو یانەیان دا شەش یاری بووینە، یانەیا دهۆكێ‌ شیاشیە د چار یارییان دا ب سەركەڤیت و ئەلقاسم یارییەكێ‌ ب سەركەڤت بوو و ئێك یاری ژی ب وەكهەڤی ب دووماهی هات بوو، یاریزانێن یانەیا دهۆك شیابوون 12 گۆلان بینن د بەرانبەر دا ئەلقاسم چار گۆل ئیناینە.
عەبدولغەنی شەهد هۆشداری دا یاریزانان
د كۆنگرەیێ‌ رۆژنامەڤانی یێ‌ بەری ئەنجامدانا یاریێ‌ عەبدولغەنی شەهەد ڕاهێنەرێ‌ یانەیا دهۆك گۆت: یارییا ئەڤرۆ ب سانەهی نابیت بەرانبەر تیمەكێ‌ خوە ڕێكئێخستیە، دڤێت یاریزانێن مە ئاهەگی هەبیت و سستاهیێ‌ د ناڤ یاریگەهێ‌ دا نەكەت، ڕاستە تیما ئەلقاسم یا ل دووماهیێ، لێ‌ دناڤ ئەرد و جەماوەرێ‌ وێ‌ دایە دڤێت هەر ژ دەستپێكێ‌ هەتا دووماهییا یاریێ‌ ب مۆرالەكا بلند و هەڤڕكی بۆ سەركەڤتنێ‌ بەردەوامبن ئەم ڕێزێ‌ ل هەر یانەیەكێ‌ دگرین.
زاخۆ ب پشتگەرمییا جەماوەرێ‌ خوە دێ‌ جەنگیت
ژلایێ‌ خوەڤە بڕیارە ئەڤرۆ ل یاریگەها خوە و ل پێشچاڤێن جەماوەرێ‌ خوە مێڤاندارییا یانەیا مینا یا بەسرایی ل دەمژمێر 5:30 مەغرەب بكەت د یارییەكا بهێز دا بۆ كوڕێن خابۆری ئەوێن ب كۆمكرنا 26 خالان ل ڕێزا هەشتێ‌ دهێت ژ حەفت سەركەڤتن، پێنچ وەكهەڤی و سێ‌ خوسارەتی هەنە، یاریزانێن زاخۆییان 20 گۆل تۆماركرینە لێ‌ 10 گۆل ژی ل سەر هاتینە تۆماركرن، د بەرانبەر دا یانەیا مێڤان 16 خال هەنە ل ڕێزا 15ێ‌ دهێت ب چار سەركەڤتن و چار وەكهەڤییان.
ویسام ڕزق پشت گەرمی ب مۆرالا یاریزانێن خوە كرییە
د كۆنگرەیێ‌ رۆژنامەڤانی یێ‌ بەری یارییا هەردو تیمان یێ‌ قەتەری ویسام ڕزق ڕاهێنەرێ‌ یانەیا زاخۆ گۆت: هەموو یاریێن خولێ‌ ب سانەهی نینن تایبەت بۆ یانەیێن وەكو مە هەر سێ‌ رۆژا گەشتەكێ‌ ژ باكۆر بۆ باشۆر یان ناڤەڕاست بكەت، ئەڤە ژی گڤاشتن ل سەر ئاست و دەرۆنێ‌ یاریزانان دكەت، یارییی ئەڤرۆ ژی ئێك ژ وان هەڤڕكیێن ب زەحمەت، تیما مینا ئاستەكێ‌ مەزن نیشان ددەت و یاریزانێن باش هەنە، لێ‌ تیما مە ژی ل سەر ڕێیەكا دورست ب ڕێڤە دچیت، مە یاریزانێن خودان شیان هەنە ب مۆرالا بلند دێ‌ گەهنە ئارمانجا مە و ژبیر نەكەین مە جەماوەرەكێ‌ دلسۆز و وەفادار هەیە دخۆشی و نەخۆشیان دا دگەل مەنە، ب هیڤینە ئەو پلانا مە دانایی ب گەهینە.
ژ یاریێن دی یێن ئەڤرۆ
بڕیارە ئەڤرۆ ل دەمژمێر سێیێ ئێڤار یانەیا مووسل ل یاریگەها یانەیا دهۆك مێڤاندارییا یانەیا جەوییە یا بەغدایی بكەت، ژلایێ‌ خوەڤە یانەیا كارەبا دێ‌ ل یاریگەها میسان بیتە مێڤانا یانەیا نەفت میسان، یانەیا كارەبا ئەوا بەری دو رۆژان ستێرێ‌ دهۆكێ‌ یانیك زاكێری گرێبەستا وێ‌ ئیمزاكری دێ‌ پشت گەرمیێ‌ پێ‌ كەت، ژلایەكێ‌ دووڤە یانەیا نەفت دێ‌ یانەیا زەورا ل یاریگەها كەرخێ‌ مێڤان كەت.
دەلیڤەیا دهۆكێ‌ بۆ سەركەڤتنێ‌ بەردەستە و مینا ئاستەنگە بۆ زاخۆ
لدور هەردو یاریێن یانەیێن بەهدینان وەحید رەشید شرۆڤەكارێ‌ وەرزشی ل پارێزگەها دهۆكێ‌ بۆچوونا خوە بۆ رۆژنامەیا ئەڤرۆ دیار كر، هەرچەندە هەكە سەحكەینە ڕێزبەندیێ‌ دێ‌ جوداهییەكا مەزن یا خالان و ڕێزبەندیێ‌ دناڤبەرا هەردو یانەیان دا بینن، دهۆك یا هەڤڕكیێ‌ بۆ ڕێزێن پێشیێ دكەت و ئەلقاسم یا هەڤڕكیێ‌ بۆ مانا خوە دكەت و ب تنێ‌ ئێك خال هەیە، هەرچەندە خول گەلەك یا مایی و دەلیڤە بۆ ئەلقاسم ماییە ڤەگەڕیتە دناڤ مانا خوە و ئینانا كۆمەكا یاریزانان ژی ئەڤ ئارمانجە دیاركرییە.
هەروەسان ناڤهاتی گۆت: تیما دهۆكێ‌ پێكهاتییەكێ‌ ڕێكخستی و باش هەیە و ڕاهێنەر ژی خودان سەربۆر و شارەزایە دزانیت چەوا سەرەدەریێ‌ بكەت، دبیت دەلیڤەیا سەركەڤتنێ‌ پتر بۆ یانەیا دهۆكێ‌ هەبیت لێ‌ د تەپاپێی دا گەلەك جاران كاودانێن یاریێ‌ و بەرهەڤییا یاریزانان ئەنجام و پێشبینییا د گوهۆڕن، لەوما ژی دبینم یاری دێ‌ ئاستەكێ‌ باش هەبیت.
لدۆر یارییا زاخۆ و مینا گۆت: تیما زاخۆ ژی یا پێنگاڤێن باش دهاڤێژیت و پتر خوە نێزیكی ڕێزبەندیا پێشیێ‌ دكەت لەوما ژی دێ‌ هەموو بزاڤان كەت دناڤ ئەرد و جەماوەرێ‌ خوە دا بەردەوامیێ‌ بدەتە ڤان ئەنجامان، پشت گەرمییا وێ‌ ب جەماوەرێ‌ خوەیە، هەروەسان ئەو پێكهاتیێ‌ زاخۆ هەیی دبیت جوداهیێ‌ پەیدابكەت، ژبیر نەكەین یانەیا مینا ژی ب شێوازەكێ‌ تایبەت یاریێ‌ دكەت و گەلەك جاران دبیتە سۆپرایزا یاریێ‌، لەوما ژی دبینم دێ‌ تیما بەسرایی بیتە ئاستەنگ بۆ زاخۆییان هەتا بشێن سەركەڤتنێ‌ بینن یان ئەنجامەكێ‌ باش.

هەر ژ دەستپێكا ڤەكرنا ڤەگوهاستنێن زڤستانێ‌ دا ناڤێ ستێرێ‌ یانەیا دهۆك هارۆن ئەحمەد كەڤتیە ل بەر گەنگەشەیا جەماوەرێ‌ وەرزشی یێ‌ دهۆكێ‌ دا و هەبوونا دو ئۆفەرێن یانەیێن كەنداڤی، ئەوا بڕیارە گرێبەستا وی ل هاڤینا ئەڤ سالە دگەل ئەلهۆیێن چیا ب دووماهی بهێت.
ل دووڤ ژێدەرێن رۆژنامەڤانی هەر ئێك ژ یانەیان شەباب یا سعۆدیێ‌ و ئەلقادسیە یا كوێتێ‌ ب ڕژدی هاتینە دانۆستاندنان دگەل یاریزان و ستێرێ‌ یانەیا دهۆكێ‌ هارۆن ئەحمەد ژبۆ ئیمزاكرنا گرێبەستا ئێك ژ یانەیەكێ‌ ب ئۆفەرێن گران، لێ‌ ژێدەرێن نێزیك ژ هارۆنی دیاركرینە كو ئەو پتر حەز دكەت دگەل یانەیا خوە بەردەوامبیت، بابەتێ‌ ئێكلاكرنا مانا وی یان چوون بۆ یانەیا كەنداڤی دبیت هەتا پێنجێ‌ ڤێ‌ مەهێ‌ ئێكلا بیت.

فدراسیۆنا فوتبۆلا ئۆرۆپا پشككێشان بۆ 16 یانەیێن دەربازبووینە قووناغا پاشكۆ یا هەڤڕكیێ‌ بۆ پلێتا دەربازبوونا بەر ب قووناغا 16ێ‌ بكەن، ئەوا پێشتر هەشت یانەیێن ڕێزێن پێشیێ‌ دەربازبوونا خوە بۆ ڤێ‌ قووناغێ‌ مسۆگەر كری و دێ‌ چاڤەڕێ‌ یانەیێن ژ قووناغا پاشكۆ دهێن، بۆ زانین شێوازێ‌ یاریێن وان هاتن و چوونە، ئەو یانەیێن د قووناغا پاشكۆ بڤی شێوەیی نە.
یاریێن چوونێ‌ 17- 2- 2025
بەنفیكا (پۆرتۆگال) – ریال مەدرید( ئیسانیا)
مۆناكۆ(فرەنسا) – پاریس سانجێرمان (فرەنسا)
گالاتا سارایی(توركیا)- یۆڤانتۆس(ئیتالیا)
بۆرۆسیا دۆرتمۆند(ئەلمانیا)- ئەتالانتا( ئیتالیا)
یاریێن هاتنێ‌ 18-2- 2026
كارباچ(ئازەربێجان)- نیۆكاسل یۆنایتد(ئنگلتەرا)
كلۆب برۆچ(بەلجیكا)- ئەتلەتیكۆ مەدرید(ئسپانیا)
بۆدۆ-كلیمێنت(نەرویچ)- ئینتەر میلان( ئیتالیا)
ئۆلمپیاكۆس(یۆنانستان)- بایرن لیڤەركۆزن(ئەلمانیا)
یاریێن چوونێ‌ و دەبازبوونێ‌
بڕیارە یارییا دویێ‌ ژ چارچووڤەیێ‌ پاشكۆ د حەفتییا دووڤدا بهێتە كرن، ئەو یانەیێن ل 17ێ‌ ڤێ‌ هەمێ‌ یاری كربن دێ‌ ل 25ێ‌ ڤێ‌ مەهێ‌ یاریێن خوە كەن، ئەو یانەیێن یاریێن خوە ل 18ێ‌ ڤێ‌ مەهێ‌ ئەنجامدابن دێ‌ ل 24ێ‌ ڤێ‌ مەهێ‌ یاریێن خوە كەن، دناڤا لیستێ‌ دا ئەو یانەیێن لایێ‌ راستێ‌ دێ‌ یارییا ئێكێ‌ ل یاریگەها خوە كەن، یارییا دویێ‌ ژ دەرڤەیی یاریگەها خوە كەن.
یانەیێن ئێكسەر دەربازبووین
پشتی ب دووماهی هاتنا یاریێن قووناغا كۆمێ‌ هەشت یانەیێن ڕێزا پێشیێ‌ دەربازبوونا خوە یا ئێكسەر بۆ قووناغا 16ێ‌ مسۆگەر كرییە و ل دووڤ ڕێزبەندییا ئێكێ‌ هەتا هەشتێ‌ بڤی شێوەی بووینە، ئارسنال(ئنگلتەرا)، بایرن میۆنخ(ئەلمانیا)، لیڤەرپۆل(ئنگلتەرا)، تۆتنهام(ئنگلتەرا)، بەرشەلۆنا(ئیسپانیا)، چێلسی(ئنگلتەرا)، سپۆرتینگ لەشبۆنە(پۆرتۆگال)، مانچستەر ستی(ئنگلتەرا).
شێوازێ‌ هەڤڕكییان و دەربازبوونێ‌
بۆ سالا دویێ‌ یە ل دووڤ ئێك فدراسیۆنا فوتبۆلا ئۆرۆپا سیستەمێ‌ قارەمانیێ‌ بڤی شێوەی دانایە كو 36 یانە ب ئێك كۆم شێوازێ‌ خول دانایە، هەر یانەیەك دێ‌ هەشت یارییان دگەل یانەیێن جودا كەت، چار یاری دناڤ ئەردێ‌ خوە دا و چار ژ دەرڤەیی یاریگەها خوە، هەشت یانەیێن ئێكێ‌ دەربازبنە قۆناغا 16ێ‌، ئەو یانەیێن ژ ڕێزا نەهێ‌ هەتا 24ێ‌ هاتین دێ‌ هەڤڕكیێ‌ بۆ هەشت پلێتێن مایی یێن دەربازبوونێ‌ بۆ قۆناغا 16ێ‌ ب شێوەیێ‌ هاتن و چوون كەن، ئەو یانەیێن د رێزا 25ێ‌ هەتا 36ێ‌ هاتین ژ هەڤڕكییان هاتینە دوورئێخستن.