ئەندامەکێ پەرلەمانێ تورکیا دیار دکەت، سیاسەتا تورکیا ل هەمبەر رۆژئاڤایێ کوردستانێ گەلەک شاشە، تورکیا بوویە پشکەک ژ سیاسەتا بریتانیا و ئەمریکا ل سووریێ و بێی مەرج پشتەڤانیێ ل دەستهەلاتا ئەحمەد شەرعی دکەت و ئەو یەک د بەرژەوەندیا تورکیا دا نینە.
جەنگیز چاندار ئەندامێ پەرلەمانێ تورکیا سەر ب فراکسیۆنا دەم پارتیێ دیار کر، هەتا نها ژ بۆ قووناغا ئاشتیێ ل تورکیا ژ ئالیێ دەولەتێ ڤە ب کریاری چو نەهاتیە کرن، نها تورکیا ب هەموو هێزا خوە دڤێت کورد ل سووریێ نەگەهنە مافێن خوە، ئەمریکا و بریتانیا ژ بۆ بەرژەوەندیێن خوە پشتەڤانیێ ل دەستهەلاتا ئەحمەد شەرعی دکەن، تورکیا ژی بێی مەرج پشتەڤانیێ ل دەستهەلاتا نها یا شامێ دکەت، بەرپرسێن تورکیا دڤێت بزانن پشتەڤانیا وان یا بێی مەرج ژ بۆ شامێ دێ بیتە ئەگەرێ روودانا کارەساتێن گەلەک مەزن بۆ تورکیا و گۆت: (ئەحمەد شەرع دڤێت ب پشتەڤانیا ئەمریکا، بریتانیا و هندەک وەلاتێن عەرەبی دەستهەلاتەکا توندرەو ل سووریێ ئاڤا بکەت، لێ ئەو یەک ب چو رەنگەکێ یا سەرکەفتی نابیت، مە دیت کا چاوا نەشیان ل پارێزگەها سوەیدا سەرکەفتی بن و گەلەک کەسێن سڤیل هاتنە کوشتن، نها د ئاستێ نێڤدەولەتی دا پشتەڤانیا بۆ ئەحمەد شەرعی گەلەک کێم بوویە).
ئەندامێ پەرلەمانێ تورکیا سەبارەت ب قووناغا ئاشتیێ و سیاسەتا تورکیا ل هەمبەر کوردێن رۆژئاڤایێ کوردستانێ ژی دیار کر، داخویانیێن ئەردۆغانی و هاکان فیدانی ل دۆر مافێن کوردان ل سووریێ گەلەک شاشن، تورکیا ب هەموو رەنگەکێ کار دکەت دا کورد ل سووریێ نەگەهنە مافێن خوە، گەفان ل کوردان دکەن و دبێژن دڤێت کورد چەکێ خوە دانێن، د رەوشەکا وەسا ئالۆز دا کو ل سوەیدا چەکدارێن توندرەو یێن سەر ب ئەحمەد شەرعی خەلکێ سڤیل کوشتن کورد دێ چاوا دەست ژ چەکێن خوە بەردەن، ئەو یەک ناهێتە قەبوول کرن، هەکە تورکیا ل سەر سیاسەتا خوە یا شاش بەردەوام بیت و ئالۆزیان ل رۆژئاڤایێ کوردستانێ دروست بکەت ئەو یەک دێ بیتە ئەگەرێ ژناڤچوونا قووناغا ئاشتیێ ل تورکیا ژی.
ناڤهاتی ئەو یەک ژی دیار کر، هەکە تورکیا کار بۆ ژناڤچوونا رێڤەبەریا خوەسەر بکەت و ل گەل شامێ ئێرشی کوردێن سووریێ بکەت ئەو یەک دێ بیتە ئەگەرێ ژناڤچوونا قووناغا ئاشتیێ، ژ بەر ڤێ یەکێ ژی دڤێت ئەردۆغان و بەرپرسێن دی یێن تورکیا هزرا هەر تشتەکێ بکەن، کورد ل سووریێ بووینە هێزەکا مەزن و کاریگەر، ئێدی کورد قەبوول ناکەن وەکو بەرێ بێی ناسنامە و بێی ماف ل سووریێ بژین، گەفێن تورکیا یێن ل سەر کوردێن سووریێ گەلەک مەترسیدارن و ئەو یەک دێ ئەنجامێن خوە یێن گەلەک خراب بۆ تورکیا هەبن.
نيشاندان