هەولێر، قائید میرۆ:

پەیڤدارێ رێڤەبەریا گشتیا حەج و عومرا هەرێما كوردستانێ ئاشكرا كر، ئەڤ سالە نێزیكی 90 هزار كەسان ناڤێن خوە بۆ فەریزا حەجێ تۆماركرینە و ل نێزیك پشككێشان بۆ ناڤێن وان دێ‌ هێتە كرن و ئەڤێ بەری نوكە فەریزا حەجی ئەنجام دابیت ناڤێ وی ناچیتە د پشككێشانێ دا.
كاروان ستونی، پەیڤدارێ حەج و عومرا هەرێما كوردستانێ بۆ رۆژناما ئەڤرۆ دیاركر، بەرهەڤیێن ئەنجامدانا پشككێشانێ‌ بۆ ناڤێن حەجیێن سالا بهێت 2026 بەر ب دوماهیێ دچن و گۆت: «ئەگەر ئاستەنگ پەیدا نەبن، ڤێ حەفتیێ پشككێشان بۆ ناڤێن وان وەلاتیان دێ‌ هێتە كرن، یێن سالا بهێن فەریزا حەجێ ئەنجام ددەن، ژ بۆی ئەنجامدانا فەریزا حەجێ 89 هزار وەلاتیان ناڤێن خوە تۆماركرینە و ل گورەی مەرجێن هاتینە دیاركرن، پشككێشان بۆ ناڤێن وانا دێ‌ هێتە كرن».
كاروان ستونی گۆتژی: «ئەڤ سالە بۆ جارا ئێكێ تۆماركرنا ناڤێن وان كەسان یێن دخوازن بچنە حەجێ ب شێوەیێ ئەلكترۆنی هاتینە تۆماركرن، نێزیكی 90 هزار كەسان ناڤێ خۆ ژ بۆی ئەنجامدانا فەریزا حەجێ تۆماركریە، لەوڕا ژی مەرجەك هاتیە زێدەكرن، ئەو ژی هەر كەسەكێ بەری نوكە فەریزا حەجێ ئەنجام دابیت، دوبارە ناڤێ وی ناچیتە د پشككێشانێ دا، چونكی هژمارا وان كەسێن ناڤێن خوە تۆماركرین گەلەكە و مە دڤێت دەلیڤێ بدەینە وان یێن هەتا نوكە نەچووین».

‌ئامێدیێ، مەحمود نهێلی:

د بەردەوامیا چێكرنا پڕۆژەیێن خزمەتگوزاری ل ناوچەدارییا چەمانكی یا سەر ب دەڤەردارییا ئامێدیێ ڤە، دەست ب چێكرنا چەند پڕۆژەیێن خزمەتگوزاری هاتیە كرن، ژ وان ژی: پڕۆژەیێ چێكرنا رێكێن ناڤخوەیی ل وێ ناوچەداریێ.
ئیسماعیل حەمید، رێڤەبەرێ ناوچەداریا چەمانكێ بۆ رۆژناما ئەڤرۆ دیاركر، نوكە هەژمارەكا پڕۆژێن خزمەتگوزاری دهێنە بجهئینان، ژ وان پڕۆژەیان ژی: چێكرنا جادەیێن ناڤخوەیی ل چەمانكێ و گوت: «ئەڤ پڕۆژەیە ژ چێكرنا جادەیێن ناڤخۆ یێن سەنتەرێ ناوچەداریێ و دەوروبەران پێك دهێت».
ناڤهاتی ئاشكرا ژی كر، پڕۆژە ب دووماهی هاتیە و جادە هاتینە قێركرن، ب چێكرنا ڤان جادەیان هەم دێ هاتنوچوونا وەلاتیان خوەشتر لێ هێت، هەم ژی دێ جوانیەكا دیتر دەتە باژێری و گۆت: «د بەرنامەیێ‌ مە دایە چەندین پڕۆژەیێن دیترێن خزمەتگوزاری ل ناوچەداریا چەمانكێ‌ بهێنە بجهئینان، مینا: پڕۆژەیێن جادەیێن دەرڤە و چێكرنا پاركەكا گشتی».

رەمەزان زەكەریا:

هەژمارەكا پڕۆژەیان ل سەنتەرێ ناوچەداریا گردەسێن د قووناغا بجهئینانێ دانە و د دەمەكێ نێزیك دا دێ تەمام بن و كەڤنە د خزمەتا ولاتیان دا.
ئەندازیار فوئاد مەحمود، سەرۆكێ باژێرڤانیا گردەسێن بۆ ئەڤرۆ گۆت: «ب گوژمێ 600 ملیۆن دیناران هەژمارەكا پڕۆژەیان ل سەنتەرێ ناوچەداریا گردەسێن د قووناغا بجهئینانێ دانە، ژ وان ژی: قێركرنا جادەیا 20 مەتری ب درێژاهیا 1200مەتران و جادەیا 15 مەتری ب درێژاهیا 700 مەتران، د نوكە دا قووناغا فەرشكرنا بەرێ شكەستی ل سەنتەرێ ناوچەداریێ ب دووماهی هاتیە و قووناغا قێركرنێ ڤان نێزیكان دێ دەست پێكەت و پڕۆژە دێ كەڤیتە د خزمەتا وەلاتیان دا».
گۆتژی: «ئەڤ پڕۆژە ل سەر بودجا تایبەتا پارێزگەها دهۆكێ دهێتە بجهئینان، كابینەیا نەهێ یا حكومەتا هەرێما كوردستانێ ب سەرۆكاتیا مەسرور بارزانی بەردەوام پشتەڤان بوویە بۆ بجهئینانا پڕۆژەیێن خزمەتگوزاری ل گردەسێن».

دهۆك، لەزگین جۆقی:

رێڤەبەریا گشتی یا رێك و پران و ئاڤەدانكرن و ئاكنجیبوونێ ل پارێزگەها دهۆكێ دیاركر، پێخەمەت پاراستنا جادە و نەهێلانا راكرنا بارێ زێدە ژ لایێ ترومبێلێن بارهەلگر ڤە، باری شەش ملیۆن و 639 ترۆمبێلێن بارهەلگر هاتیە رێكخستن.
رێدیر سلێمان خەمۆ، جێگرێ رێڤەبەرێ گشتی یێ‌ رێك و پران و ئاڤەدانكرن و ئاكنجیبوونێ ل پارێزگەها دهۆكێ گۆت: «میزانێن كێشانا ترومبێلان ل سەر جادەیان هاتینە دانان، ب تایبەت بۆ كیشانا بارێ ترومبێلێن بارهەلگر، داكو ژ بارێ خۆ زێدەتر رانەكەن و جادە تێك نەچن، چونكو گەلەك جاران بارێ زێدە دبیتە ئەگەرێ تێكچوونا جادەیان، نوكە ئەم بارێ‌ وان ترومبێلان رێك دئێخین، یێن باران ڤەدگوهێزن، ب مەرەما پاراستنا رێكان، هەتا نوكە بارێ‌ شەش ملیۆن و 639 ترومبێلێن بارهەلگر هاتیە رێكخستن».