زاخۆ، دلۆڤان هالۆ:
شیرەتکارەکا پەروەردەیا زاڕۆكان، دیار کر کو خوارنا نینۆکان ل دەف زاڕۆکان ڕەفتارەکا خۆیەتیە و گۆت؛ دژیێ 3-12 سالیێ دا ئەف ڕەفتارە ژ ئەگەرێ فشارا دەروونی و سترێسێ ل دەف زاڕۆکان پەیدا دبیت و پێدڤیە زارۆک بهێتە چارەسەرکرن.
بەفرین حوریە، شیرەتکارا پەروەردەیا زاڕۆكان د دیدارەکێ دا بۆ ڕۆژنامەیا ئەڤرۆ دیار کر کو پێدڤیە دایك ل دەستپێکێ ژێدەر و ئەگەرێن سەرەکی یێن خۆارنا نینوکان ل دەف زاڕۆکی بزانیت، کا کەنگی و ب چ شێوە زاڕۆکێ وێ تووشی ڤێ ڕەفتارێ بوویە.
شیرەتکارێ گۆت؛ بۆ نموونە دبیت بەری سێ هەیڤان زاڕۆکەکێ دی د ڤێ خێزانێ دا ژ دایك بوویە و ڤێ چەندێ کارتێکرن ل زاڕۆکی کرییە کو هەست پێ بکەت سۆز و گرنگیا دایکێ بۆ وی کێم بوویە و ئەڤ چەندە بوویە ئەگەرێ سەرهەلدانا ڤێ ڕەفتارێ ل دەف زاڕۆکی.
بەفرین ئەو چەندە ژی دیار کر، هەروەسا پێدڤیە دایك ئەگەر و جهـ و دەمێ ڤێ رەفتارێ ل دەف زاڕۆکی بزانیت، کا کەنگی و ل کیڤە و د چ ڕەوشەکێ دا ڤێ ڕەفتارێ ئەنجام ددەت و گۆت؛ دبیت ل دەمێ سەحکرنا تێلەفزیونێ ڤێ ڕەفتارێ بکەت یان ژی ل دەمێ داخوازیەكێ ژ دایكا خۆ دکەت و دایکا وی بۆ بـجهـ نەئینابیت و بڤێ چەندێ تۆرە بوویە و ئەو ڕەفتارە ئەنجام دایە.
بەفرینێ دیار کر کو پێدڤیه دایك زاڕۆکێ خۆ ئاگەهدار بکەت ژ کارتێکرنا خوارنا نینۆکان، باشترین ڕێك ژی ئەوە کو دایك زاڕۆکێ خۆ دانیتە بەرامبەر خۆدیکێ و بێژیتێ سەحکە خۆ دەمێ تو نینۆکێن خۆ دخوی چەند کرێتە.
شیرەتکارا پەروەردەیا زارۆکان د بەردەوامیا ئاخفەنێن خۆدا دیار کر کو دڤێت دایك زاڕۆکێ خۆ مژوول بکەت ب ئەنجامدانا کارەکێ بچووك و ب ساناهی، یان ژی یاریەکا زاڕۆکان بکەتە د دەستی دا و پێدڤیە دایك ل دەف چ کەسا نەبێژیته زاڕۆکی نینۆکێن خۆ نەخۆ، و بەحسێ ڤێ ڕەفتارا وی ژی بۆ کەسێ نەکەت و گۆت؛ چونکی دێ هەست ب بێ بهاییێ کەت و هەکە ڕۆژەکێ یان دەمەکێ زاڕۆکی ئەڤ ڕەفتارە نەکر، بڤێ چەندێ وی پال بدەت کو ئەڤرۆ ئەڤ کارە نەکریە و شیایە ڤێ ڕەفتارا خۆ کۆنترۆل بکەت، داکو ئێدی ڤێ ڕەفتارێ ب ئێکجاری بهێلیت.
نيشاندان