قەیس وەیس:
بڕیارە ئەڤ سێ یاریێن مایی ژ هەڤڕگیێن گەڕا 37ێ و بەری دووماهیێ ژ خولا ستێرێن ئیراقێ یا فوتبۆلێ بهێنە كرن، یانەیا دهۆك دێ كلاسكۆیەكا كوردستانی بەرانبەر نەورۆز مێڤان كەت و هەولێر چاڤ ل سێ خالێن دینە.
ئەلهۆیێن چیا پێدڤی ب پشتەڤانێن خوەیە
چاڤەڕێ دهێتە كرن ئەڤرۆ ل دەمژمێر 9:30 شەڤ تیما یانەیا دهۆك مێڤاندارییا یانەیا نەورۆز بكەت كو دهێتە هژمارتن ئێك ژ كلاسیكۆیێن كوردستانی د خولا ستێرێن ئیراقێ دا، تیما ئەلهۆیێن چیان د دەمەكێ هەستیار دا دەرباز دكەت و نەشیاییە د ماوەیێ حەفت یاریێن بۆری دا چو سەركەڤتنان بینت، دووماهی یارییا خوە بەرانبەر هەولێرێ ئەوا كلاسیكۆیەكا دی یا كوردستانی تووشی خوسارەتیێ ببوو ب2-1 گۆلان، كو دبیتە خوسارەتییا 12 د خولێ دا بەرانبەر 15 سەركەڤتن و نەهـ وەكهەڤییان ل ڕێزا هەشتێ ب كۆمكرنا 54 خالان، ژلایێ خوەڤە یانەیا نەورۆز خودانا 49 خالانە ل رێزا 11ێ دهێت، بۆ ڤێ یاریێ و ژبۆ ڤەگەڕاندنا مۆرالا یاریزانان و ئەنجامێن سەركەڤتنان ئەلهۆیێن چیا پێدڤی ب پشتەڤانییا جەماوەرێ خوە یە.
ئەمیر ئەزرەڤشان: دڤێت قەرەبوویا خالان بكەین
د كۆنگرەیەكێ رۆژنامەڤانی دا ئەوا پشتی یارییا چارشەمبییا بۆری بەرانبەر هەولێری ئەمیر ئەزرەڤشان ڕاهێنەرێ یانەیا دهۆك گۆت: بۆ هەر یارییەكێ ئەم ئاستەكێ گەلەك باش نیشان دەین لێ مخابن ل دووماهیێ ب ئەنجامەكێ نە چاڤەڕێ كری و خراب دەرگەڤین، خوسارەتییا بەرانبەر هەولێرێ دادڤان ئەگەر بوو شاشیێن بەردەوام دژی تیما مە دكرن، دێ هەموو بزاڤان كەین بەرانبەر یانەیا نەورۆز ئەم قەرەبوویا خالان بكەین و ڤەگەڕینە سەركەڤتنان.
هێشتا پیتەر گۆلكەرێ دهۆكێ یە
تیما دهۆكێ خوانا دەهـ یاریزانێن پشكداری د تۆمار كرنا 38 گۆلان دا هەیە سەرجەمێ 39 گۆلان و بڤی ڕەنگی، سەرباری نە پشكدارییا پیتەر گۆرگیس بۆ ماوەیێ پێنچ یارییە هەتا نوكە خودانێ هەشت گۆلانە، دووڤدا پاشەنگ عەبدوللا حەفت گۆل، كەریم دەرویش شەش گۆل، ئیبراهیم غازی سێ گۆل، هەر ئێك ژ و شەرقی ئەلبەحری و مارلۆن دۆسانتۆس، یانیك زاكێری و لۆكاس هێنریك و سیابەند عەگید، هەر ئێك دو گۆل هەنە، هەروەسان هەر ئێك ژ بەیار ئەبۆ بەكر، كێلبرت كۆمسۆن، موسیس، زانا عەلی گۆلەك تۆماركرینە، ژلایەكێ دووڤە گۆلەك بۆ یاریزانەكێ یانەیەكا دی هاتییە هژمارتن، پشتی ب شاشی ڤە گۆل ل سەر تیما خوە كر..
هەولێرییان چاڤ ل ڕێزا نەهێ نە
پشتی ئەنجامدانا یارییا خوە یا پاشئێخستی بەرانبەر یانەیا دهۆكێ و شیایی كلاسیكۆیا كوردستانی ب سەركەڤتن ب دەستڤە بینت ب دو گۆلان بەرانبەر گۆلەكێ ئەوا ل چارشەمبییا بۆری ل یاریگەها شەهید فرانسۆ حەریری هاتیە كرن، بڕیارە ئەڤرۆ ل دەمژمێر حەفتی مەغرەبییەكا درەنگ هەر دناڤ ئەرد و جەماوەرێ خوە دا یانەیا هەولێر دێ مێڤاندارییا یانەیا كەرخ یا بەغدایی كەت، تیما كەلهە و منارە ل ڕێزا 10ێ ب 50 خالان دهێت، ژلایێ خوەڤە یانەیا كەرخ رێزا 14ێ دهێت ب كۆمكرنا 43 خالان، هەر ژ یاریێن ئەڤرۆ رۆژا ئێكشەمبی یانەیا تەلەبە خودانا رێزا چارێ ب 57 خالان دێ مێڤاندارییا یانەیا ئەلقاسم كەت ئەوا ب51 خالان رێزا نەهێ دهێت، ئەڤ یارییە ژی دێ ل دەمژمێر حەفتی مەغرەب هێتە كرن.
ناسناڤ هاتە ڕادەستكرن
پشتی ب دووماهی هاتنا یارییا تیما یانەیا شورتە بەرانبەر یانەیا حدود ئەوا ب سەركەڤتنا شورتە ب دووماهی هاتی ل چارشەمبییا بۆری، فدراسیۆنا فوتبۆلا ئیراقێ كاسا ناسناڤێ خولا ستێرێن ئیراقێ پێشكێكشی یانەیا شورتە كر ئەوا ب فەرمی بوویە قارەمانا وەرزێ 2024-2025 كو دبیتە ناسناڤێ هەشتێ د دیرۆكا خوە دا، ئەوا یانەیا زەورا 14 جاران دەستڤە ئینایی، هەروەسان جەوییە حەفت جاران، تەلەبە پێنچ ناسناڤ، هەولێر چار ناسناڤ، رەشید سێ ناسناڤ دەستڤە ئیناینە، هەر ئێك ژ یانەیێن دهۆك، جەیش، نەفت وەسەت، مینا، سەلاحەدین ئێك ناسناڤێ خولا ئیراقێ ب دەستڤەئینانە.
دو یانە داكەڤتینە پلا نایابا ئیراقێ
هەردو یانەیێن حدود خودانا رێزا 19ێ ب 23 خالان و كەربەلا خودانا رێزا 20ێ و دووماهیێ ب 22 خالان بەری ب دووماهی هاتنا خولێ ب چار گەڕان داكەڤتنە پلا نایاب، یانەیا نەفت ئەلبەسرا خودانا 29 خالان رێزا 18ێ دێ دو یاریێن پاشكۆ دگەل یانەیا خودا ڕێزا سێیێ یا خولا نایابا ئیراقێ كەت ژبۆ مانا خوە د خولێ دا.
نيشاندان