ئامێدیێ‌، مەحمود نهێلی

ل سنوورێ‌ دەڤەرداریا ئامێدیێ‌ ئەڤ سالە زێدەتر ژ 900 دونەمێن ئەردی بۆ مەبەستا چاندنا كونجیان هاتینە بكار ئینان و پتریا وان ژی ل سنوورێ‌ ناوچەدارییا دێرەلۆك دهێنە چاندن، ئەڤە ژی داهاتەكێ‌ باش بۆ جوتیاران بەرهەم دئینیت و جوتیار ژی دبێژن بەرهەمێ‌ كونجیان ل ڤێ‌ دەڤەرێ‌ گەلەك یێ‌ باش و ب داهاتە.

رەمەزان رەشاڤەیی ئێكە ژ جوتیارێن دەڤەرێ‌ دبێژیت: هەموو سالان ئەز ب كارێ‌ چاندنا كونجیان رادبم و گۆت: كونجیا دەڤەرا مە هەموو سالان یا باشە، لێ‌ هندەك سالان ل گەل سالێن دیتر جوداهی یا هەی و گۆت: ل دەڤەرا مە گەلەك جۆرێن كونجیان دهێنە چاندن، لێ‌ كونجیا هەرە سەركەفتی یا كوردیە و ئەوا د بەرێ‌ دا دهاتە چاندن.
ناڤهاتی دیار كر، نوكە وەرزێ‌ چاندنا كونجیانە و هەكە ساڤا بوون ئەڤە كەڤنە بەر بارانێ‌ دەمێ‌ درینا وانا، ئەو كونجیێن دادقوتن، دبەنە سیكێ‌ بۆ فروتنێ‌ و هندەك جوتیار ژی ب تنێ‌ كونجیا بۆ خوە دچینن و دكەنە تەحین و گۆت: بهایێ‌ كونجیا دەڤەرا وان گەلەك باش بوویە و ل سالێن بووری كیلویا كونجیێ‌ دناڤبەرا 6 بۆ 8 هزار دیناران دا بوویە.
جوتیارەكی دی ب ناڤێ‌ فایق شەعبان بۆ رۆژناما ئەڤرۆ دیار كر، دنوكە دا هاریكاریا جوتیاران ناهێتە كرن، بۆ وێ‌ یەكێ‌ دەمێ‌ جوتیار دەست ب كارێ‌ چاندنێ‌ دكەت، زیان نەگەهنێ‌ وەك دابینكرنا كیمیایێ‌ و هەروەسا گازویلێ‌ و چێكرنا جویێن ئاڤدانێ‌ و گۆت: هیڤیا مە ئەوە هاریكاریا جوتیاری بهێتە كرن داكو بەرهەمێ‌ جوتیاری ژی باشتر بیت ژ بەر كو گەلەك ژ جوتیارێن دەڤەرێ‌ ب تنێ‌ داهاتێ‌ وان ل سەر چاندنێ‌ یە ب تایبەتی ژی برنج و كونجیان.
دەربارێ‌ چاندنا كونجیێ‌ ژی ناڤهاتی دیار كر، پشتی زەڤی دهێتە كێلان دهێتە روبساندن و هەروەسا دهێتە توڤ كرن و پشتی دەرباز بوونا چل رۆژان دێ‌ بەرئاڤا ئێكێ‌ دەنێ‌ و پاشان پشتی دەربازبوونا 15 رۆژان سێ‌ تا چار جاران دهێتە ئاڤ دان و گۆت: پشتی كونجی دگەهن، دێ‌ هێتە هەلكێشان و پاشان دێ‌ كەنە كەپرۆك و پشتی هشك دبیت دێ‌ هێنە داقوتان و دێ‌ دەنە بای بۆ وێ‌ یەكێ‌ كونجی پاقژ ببیت و پاشان دێ‌ بەنە ئاشی بۆ چێكرنا تەحینێ‌ و گۆت: هندەك كەس كونجیێ‌ بو خوە دكەن ب تنێ‌ دكەنە تەحین و هندەك كەس ژی بو فرۆتنێ‌ كونجیان دچینن و گەلەك كارێن دی و خارن و شریناهی ب كونجیێ‌ دهێنە چێكرن.
ل سەر ڤێ‌ یەكێ‌ ئەندازیار عسمەت ئیبراهیم بەرپرسێ‌ هوبا چاندنا دێرەلۆك بۆ رۆژناما ئەڤرۆ خویاكر، ل سنوورێ‌ وانا چاندنا كونجیان سال بۆ سالێ‌ پتر لێ‌ دهێت و ژ بەر كو بەرهەمێ‌ وێ‌ یێ‌ باشە و تاما وێ‌ ژی یا خوەشە و گۆت : ئەڤ سالە خوشبەختنانە دورێن 800 بۆ 900 دونەمێن ئەردی هاتینە بەرهەڤكرن بۆ چاندنا كونجیان و نوكە دەست ب چاندنا وان هاتیە كرن .
و دیار كر، چەمێن وانا سیستەمەك یێ‌ هەی و دبیتە دو كەرت، كەرتەك بۆ چاندنا كونجیان دهێتە ب كار ئینان و كەرتەك ژی بۆ چاندنا برنجی یە و گۆت: ئەو ئەردێ‌ مایی ژی بۆ چاندنا بەرهەمێن دیتر هاتبوو ب كار ئینان.
ناڤهاتی داخواز ژ هەموو جوتیارێن دەڤەرێ‌ كر، پتر گرنگیێ‌ ب چاندنێ‌ و بەرهەمێ‌ نافخویی بدەن، ژ بەر كو نوكە پتر هاولاتی ژی گرنگیێ‌ ب بەرهەمێن نافخوەیی ددەت و ئاشكرا كر، كونجیا دەڤەرا ئامێدیێ‌ بۆ تەحینێ‌ ژ پلا ئێكێ‌ نە.

رمەزان زەكەریا

گوندێ باقوسپێ ل دەڤەرا گردەسێن دكەڤیتە سەر روبارێ خازر و بێی ئاڤا ڤەخوارنێ نە، ل دەڤەرا گردەسێن گوندەكێ پتر ژ ٢٠٠ مال ژبوی ئاڤا ڤەخوارنێ دنالن، ژێدەرێ ئاڤا ڤەخوارنا وان پیسبوویە و وەلاتیێن وان تووشی نەخۆشیا گولچیسكا بوینە كێمبوون و پیسبوونا ئاڤێ ل گوندێ باقسپێ خەلكێ وێ بێ رەوش و حال كرینە.

سەفەر یوسف وەلاتیەكێ گوندێ باقوسپێ یە بۆ ئەڤرۆ گۆت: پتر ژ ١٠ گوندان پیساتیا وان دهێتە سەر ئاڤێ و ژێدەرێ ئاڤا ڤەخوارنا مە ئەڤەیە و مە چو بیر ل گوندی نینن، داخوازا مە ژ حوكمەتێ ئەوە بۆ مە بیرەكێ لێبدەن، ئەڤ ئاڤە هاڤینێ هەر نینە و زڤستانێ ژی گەل باران هاتن شێلی دبیت و ١٥ رۆژا گوندی ئاڤ نینە، داخوازا مە ئەوە چارەسەریەكێ ل ڤێ ئاڤێ بكەن و ئەم ناچارین ڤەخۆین، مە چ ئاڤێن دیتر نینن و چو بیر نینن، ب تنێ ئەڤەیە ڤەخۆی ئەڤە و نە ڤەخۆی هەر ئەڤەیە.
خانم ئسماعیل وەلاتیەكێ دن یێ گوندیە بۆ ئەڤرۆ گۆت: كێشەیا مە ئاڤ و جادەی نوكە بركا گوندی یا سەر بەردایە و گلێش دكەڤیتە تێدا و كرم و مشك و مار و دووپشك ئاڤا وان یا پیسە، رۆژێ ئێك دەمژمێر دێ هێت و ئەڤ گوندێ هوسا یێ مەزن هەر رۆژەكێ نە ئێكێ دەمژمێرەك دهێت.
شەعبان سەعیەدین وەلاتیەكێ دن یێ گوندیە بۆ ئەڤرۆ گۆت: سێ نەخۆش نوكە ل مالا من ژ ئەگەرێ ئاڤێ تووشی نەخۆشیا گولچیسكا بووینە، باوەركەی چ مال نینە ل ڤی گوندی كو نەخۆشەكێ گولچیسكا تێدا نەبیت، ژبەر ڤێ ئاڤا پیس تووش بووینە وەرزێ زڤستانێ ژی هندەك جارا ١٥ رۆژا ئاڤ ناهێت، چونكی شێلی دبیت و گرێدایە ب كارەبا نیشتیمانی ڤە.