دهۆك، لەزگین جۆقی:

پرۆسەیا دەنگدانا تایبەت و ئاوارەیان دوهی 9/11/2025 و ل دەمژمێر 7:00ی سپێدێ‌ ل سنۆرێ‌ پارێزگەها دهۆكێ‌ دەستپێكر و هەتا 6:00ی ئێڤاری یا بەردەوامبوو، پرۆسە ب رەنگەكێ‌ گەلەك رێك و پێك و سەركەفتیانە هاتە ئەنجامدان و رێژەیا پشكداریێ‌ ژی د دەنگدانا تایبەت دا گەهشتە 98%.
سەربەست لەزگین، بەرپرسێ مەكتەبا رێكخستنا پارتی ل پارێزگەها دهۆكێ‌ دوهی 9/11/2025 ل ئێك ژ بنگەهێن دەنگدانا تایبەت ل دهۆكێ‌ دەنگێ‌ خۆ دا و د داخویانیەكێ‌ دا بۆ دەزگەهێن راگەهاندنێ‌ گۆت: «پرۆسەیا دەنگدانێ ل دهۆكێ گەلەك باش هاتە ئەنجامدان، هەردەم خەلكێ دهۆكێ و زاخۆ پشكداریەكا مەزن د هەلبژارتنان دا دكەن، لێ مخابن یاسایا هەلبژارتنێن ئیراقێ‌ غەدرەكا مەزن ل مە كریە، ب تایبەت د وارێ كۆرسیێن پەرلەمانێ ئیراقێ دا، ل دووڤ دەنگدەر و هەژمارا ئاكنجیێن دهۆكێ غەدر هاتیە كرن».
سەربەست لەزگین گۆتژی: «خەلكێ مە گەلەك باش پشكداریێ دكەن و دەنگێن خۆ ددەن، پێدڤیە هەژمارا نوونەرێن دهۆكێ ل پەرلەمانێ‌ ئیراقێ زێدەبیت بۆ پاراستنا مافێن خەلكی».
دیسا خالد عەباس، بەرپرسێ ئۆفیسا پارێزگەها دهۆكێ یا كۆمسیۆنا هەلبژارتنێن ئیراقێ‌ دوهی 9/11/2025 سەرەدانا بنگەهێن دەنگدانێ‌ ل دهۆكێ‌ كر و بۆ دەزگەهێن راگەهاندنێ‌ دیار كر كو پرۆسەیا دەنگدانێ‌ ب باشی و رێك و پێكی هاتە ئەنجامدان و گۆت: «بۆ هەلبژارتنێن پەرلەمانێ عێراقێ رۆژا 11/11/2025ێ هندەك رێنمایێن نوو هاتینە دەرئێخستن و بۆ ئێكەم جار بابەتێ بوویە هاتیە لادان بۆ دەنگدانێ، دیسا دەنگدەر ب تنێ دشێن كارتا خۆ یا دەنگدانێ ل گەل خۆ ببەن و پێدڤی ب چو بەلگەنامەیێن دی نابن».

زاخۆ، دلۆڤان هالۆ:

ل سەر ڕاسپاردەیا مەسرور بارزانی، سەرۆكێ حكومەتا هەرێما كوردستانێ و ب چاڤدێرییا گوهدار شێخۆ، سەرپەرشتێ ئیدارەیا سەربخوە یا زاخۆ، ب گوژمێ 24 ملیار و 530 ملیۆن دیناران بەرێ بنیاتی بۆ چەندین پڕۆژەیێن خزمەتگوزاری ل ئیدارا سەربخوە یا زاخۆ هاتە دانان.
ئەو پڕۆژە ژ چێكرنا جادە و سۆلینێن ئاڤڕێژ ل تاخێ بارزان و چێكرنا جادەیێن تاخێ ئەیلۆل و پێشمەرگە، چێكرنا جادە و سۆلینێن ئاڤڕێژ ل تاخێ تلكەبەرێ، دیسا دانانا هێمایێن هاتنوچوونێ بۆ جۆتسایدێ ئیبراهیم خەلیل هەتا باتێلێ، چێكرنا ئۆڤەرپاس و ئەندەرپاسێن جاددەیا خەبات و گۆندكی پێك دهێن.
گوهدار شێخۆ گۆت: «ب راسپاردەیا مەسرور بارزانی، سەرۆكێ حكومەتا هەرێما كوردستانێ، كاروانێ ئاڤەدانیێ د هەموو وارەكی دا ل سنۆرێ ئیدارەیا سەربخوە یا زاخۆ بەردەوامە».

ئامێدیێ، مەحمود نهێلی:

ب بەرهەڤبوونا كەسوكارێن سەربلندێن شەهیدان و بەهرام عریف یاسین، بەرپرسێ لقێ 18 یێ‌ پارتی ل ئامێدیێ‌ و وارشین سەلمان، دەڤەردارێ ئامێدیێ و هەژمارەكا بەرپرسێن میری و حزبی و پلەدارێن لەشكری و جەماوەرێ دەڤەرێ، د ڕێورەسمەكێ دا ل كەمپا سیریێ، پەردە ل سەر مونۆمێنتا 22 شەهیدێن شەڕێ ئازادی و كەرامەتێ دژی تیرۆرستێن داعشێ‌ هاتە لادان، پشتی ژ لایێ دكتۆر بەیار سەفەر چیچۆ ڤە هاتیە نووژەنكرن.
د رێورەسمان دا چەند پەیڤ هاتنە خواندن، ژ وان ژی بەرپرسێ لقێ 18 یێ‌ پارتی د پەیڤا خۆ دا بەحس ل نیشتیمانپەروەری و جانفیدایا خەلكێ دەڤەرێ كر و گۆت: «ئازادی و دەستكەفتێن ئەڤرۆ بەرهەمێ خوینا شەهیدانە و پێدڤییە ئەو دەستكەفت بهێنە پاراستن، ب سیاسەتا حەكیمانە یا جەنابێ سەرۆك بارزانی و قارەمانیا پێشمەرگەیێ كوردستانێ، پیلانێن نەیاران دژی قەوارێ هەرێمێ هاتینە ژناڤبرن و ئەڤرۆ حكومەتا هەرێما كوردستانێ ب سەرۆكاتیا «مەسرور بارزانی» بەردەوامە ل سەر ئاڤەدانیێ و دابینكرنا باشترین خزمەتگوزارییان بۆ وەلاتییان ب گشتی و كەسوكارێن سەربلندێن شەهیدان ب تایبەتی».
نوونەرێ كەسوكارێن سەربلندێن شەهیدان پەیڤەك پێشكێش كر و سوپاسیا ئامادەبوویان كر و وەفاداریا خوە بۆ خوینا شەهیدان و دلسۆزیا خوە بۆ ڕێبازا پیرۆزا بارزانی و پارتی دوپاتكر.

رەمەزان زەكەریا:

فەرمانگەها میدیا و زانیاری یا حكومەتا هەرێما كوردستانێ ئاشكراكر، د بیاڤێ‌ كەرتێ گەشتیاری دا، كابینەیا نەهێ یا حكومەتا هەرێما كوردستانێ پێنگاڤێن باش بۆ بهێزكرنا ژێرخانا ئابووریا گەشتیاری هاڤێتینە.
فەرمانگەها میدیا و زانیاری ئاشكرا ژی كریە كو د دەمێ بۆری دا، كابینەیا نەهێ یا حكومەتا هەرێما كوردستانێ 80 پڕۆژەیێن نوو یێن گەشتیاری ب گوژمێ حەفت ملیار و 555 ملیۆن و 305 دۆلاران بجهئیناینە.
دیسا خویا ژی كریە كو هەرێما كوردستانێ پتر ژ سێ هزار جهێن گەشتیاری و بنگەه هەنە وەك هۆتێل و مۆتێل و رێستۆرانت و كافیتریایێن گەشتیاری و كۆمەلگەهێن گەشتیاری و جهێن سروشتی یێن گەشتیاری.
ژ بەر گەشەكرنا كەرتێ گەشتیاری و دروستكرنا ژێرخانەكا ب هێز، كو بوویە هۆكارێ راكێشانا گەشتیاران، سالانە پتر ژ حەفت بۆ هەشت ملیۆن گەشتیاران سەردانا كوردستانێ دكەن.