ژ ئەگەرێ وان گرژی و ئالۆزیێن ل چەند رۆژێن بۆری، دەڤەر ڤەگرتی، فرۆكخانە هاتینە دائێخستن و گەشتێن ئەسمانی ب هەموو شێوەیەكی هاتینە راگرتن، كو ب سەدان هەڤوەلاتیێن كوردستانێ ل وەلاتێن دەوروبەر یێن ئاسێ بووین و نەشیاینە بزڤرن، بەلێ ب فەرمانا مەسرور بارزانی، سەرۆكێ حوكمەتا هەرێما كوردستانێ كێشەیا زێدتر ژ 13 هزار هەڤوەلاتییان بۆ زڤرینێ هاتە چارەسەركرن.
فەرمانگەها میدیا و پێزانینان ل حوكمەتا هەرێما كوردستانێ راگەهاند» پشتی وان گرژی و ئالۆزیێن دەمێ حەفتییەكێیە دەڤەر ڤەگرتی و هێلێن ئەسمانی راوەستیاین، حوكمەتا هەرێما كوردستانێ ب فەرمانا مەسرور بارزانی، سەرۆكێ حوكمەتا هەرێما كوردستانێ، پێرابوونێن زڤراندنا هەڤوەلاتیێن هەرێما كوردستانێ ژ دەرڤە ب شێوەیەكێ ب لەز و هوور دەستپێكر».
فەرمانگەها میدیا و پێزانینان ل حوكمەتا هەرێما كوردستانێ دیاركر ژی» وەزارەتا ناڤخوە ل حوكمەتا هەرێمێ و فەرمانگەها هەڤبەندیێن دەرڤە و وەزارەتا ئەوقافێ و كاروبارێن ئایینی ب هەماهەنگی، بۆ چارەسەرییا كێشەیێ ل گەل وەلاتێن پەیوەندیدار كەفتنە كاری، د ڤی چارچۆڤەیدا پشتی راگەهاندن و پشتڕاستكرنا هەوەلاتییان كو دێ ب سلامەتی هێنە زڤراندن، هێلەكا گەرم و پاشی ژی فۆرمەك بۆ داگرتنێ هاتە راگەهاندن و ب هەماهەنگی ل گەل وەلاتێ توركیا، ڤیزا سێ رۆژی بۆ هاتە دابینكرن، ب وێ چەندێ ژی كێشەیا 13 هزار هەڤوەلاتییان هاتە چارەسەركرن و دشێن بزڤرنە وەلاتی، كو پشكەك ژێ زڤرینە و پرۆسە یا بەردەوامە».
سەبارەت وان هەوەلاتیێن هەرێما كوردستانێ كو ل وەلاتێ ئیرانێ بوون، فەرمانگەها میدیا و پێزانینان راگەهاند» هەتا نوكە پێنج هزار كەس یێن زڤرین».
ئەوژی بەرچاڤكر» حوكمەتا هەرێما كوردستانێ هەڤوەلاتییان پشتڕاست دكەت كو هێلێن گەرم ل بەردەستن و د رەوشا پێدڤیدا دودل نەبن د پەیوەندیێدا بۆ هاریكارییا وان».

مەسرور بارزانی سەرۆكێ حوكمەتا هەرێما كوردستانێ د پەیامەكێدا بۆ كاردینال مار لویس رۆفائێل ساكۆ، سەرۆكێ كەنیسەیا كلدانی ل جیهانێ، سەرەخوەشی ل مالبات و كەسوكارێن مەتران مار پۆلس سابت حەبیب، مەترانێ ئەپرەشییا ئەلقوشی یا كلدانی كر.
سەرۆكێ حوكمەتا هەرێما كوردستانێ د پەیاما سەرەخوەشیێ دا دبێژیت» بۆ مالئاڤاهیكرنا (مەتران مار پۆلس سابت حەبیب) مەترانێ ئەپرەشییا ئەلقوشێ یا كلدانی، سەرەخوەشییا خوە ئاراستەی مالباتا وی و هەوەیێن بەرێز و كەنیسەیا كلدانی و كریستییانێن كوردستانێ دكەین».
گوت ژی» مەترانێ مالئاڤاهی كری، ل گەل دەزگەهێن حوكمەتا هەرێما كوردستانێ، رۆلەكێ گرنگ د خزمەتكرنا وان كریستییانێن ئاوارە هەبوو كو ژ دەستێ تیرۆرستێن داعشێ پەنا بۆ كوردستانێ ئینابوو، خودایێ مەزن گیانێ وی شاد بكەت و هەدارێ ب مالبات و كەسوكارێن وی ببەخشیت».

جێگرێ سەرۆكێ جڤاتا نوونەرێن ئیراقێ راگەهاند: د كۆمبوونێن رۆژێن بۆری دا دەربارەی هنارتنا مووچەیێن فەرمانبەرێن هەرێما كوردستانێ ب باشی برێڤەچوون، بەلێ ژ ئەگەرێ دەست ژكاركێشانا ئەندامێن دادگەها فیدرالییا ئیراقی د شیاندا نەبوو ئەو بڕیار بهێتە دان.
شاخەوان عەبدوللا، جێگرێ سەرۆكێ جڤاتا نوونەرێن ئیراقێ د كۆنفرانسەكێ رۆژنامەڤانیدا گوت» ل چەند رۆژێن بۆری ل دۆر پرسا مووچەیێن فەرمانبەرێن هەرێما كوردستانێ، مە چەندین كۆمبوون ل گەل سەرۆك وەزیرێن ئیراقێ و ئالیێن پەیوەندیدار ئەنجامدان» .
شاخەوان عەبدوللا گوت ژی» كۆمبوون گەلەك د ئەرێنی و باش بوون، هەتا هەلوەستێ دادوەران ژی ب ئاراستەیا چارەسەركرن و بڕیارادانێ ل بەرەیێ هنارتنا مووچەیان بوون، نڤیسارا مەسرور بارزانی، سەرۆكێ حوكمەتا هەرێما كوردستانێ د ناڤ كۆمبوونێدا هاتە خواندن كو ل رۆژا 12/6/2025 ئاراستەی دادگەها فیدرالییا ئیراقێ كربوو، وێ نڤیسارا سەرۆكێ حوكمەتا هەرێما كوردستانێ هیچ بەهانەیەك بۆ دادگەها فیدرالی و ئالیێن سیاسی نەهێلابوو، هەتا حوكمەتا ئیراقێ ژی تاكو پێگیرییا تمام ب دستووری و قانوونێ و قانوونا بودجەی بیت، مخابن ناكۆكی د ناڤبەرا هەردو دەستهەلاتێن دادوەری وەكر، دو بابەتێن گەلەك گرنگ هەبوون ئێك ژ وان دەركرنا فەرمانا سالاری (ئەمر وەلائی) بۆ هنارتنا مووچەیێن فەرمانبەرێن هەرێما كوردستانێ، ژ ئەگەرێ دەست ژ كارڤەكێشانا دادوەران، بەلێ مخابن ژ ئەگەرێ وێ كێشەیا روودای د شیاندا نەبوو كۆمبوونا رۆژا پێنجشەمبی یا دادگەها فیدرالییا ئیراقێ بهێتە ئەنجامدان و بڕیارێ ل دۆر هنارتنا مووچەیێن فەرمانبەرێن هەرێما كوردستانێ بدەت و پێشبینیێ دكەین وی بابەتی دەمەكێ دی دڤێت تاكو دهێتە چارەسەركرن».
ژ هەر 9 ئەندامێن سەرەكی یێن دادگەها فیدرالییا ئیراقێ، شەش ئەندامان ل گەل سێ ئەندامێن یەدەك ب بڕیارەكا ژ نشكەكێڤە دەست ژ كاری ڤەكێشا د دەمەكیدا بڕیار بوو رۆا پێنجشەمبییا بۆری 19/6/2025 ل دۆر كێشەیا مووچەیێن فەرمانبەرێن هەرێما كوردستانێ و شایستەیێن دارایی یێن هەرێما كوردستانێ فەرمانەكا سالاری دەربكەت.

وەزارەتا رەوشەنبیری و لاوان ل حوكمەتا هەرێما كوردستانێ راگەهاند: ل روودانێن نوكە یێن شەڕێ دەڤەرێ نابیت راگەهاندن و میدیا و پەیچ دەنگوباسێن بێ ژێدەر و نەدروست بەلاڤ بكەن، هەروەسا دیاركر: ئەوێ دەنگوباسێ بێ بنەما و ترسێ بۆ تێكدانا ئاسایشا كوردستانێ بەلاڤ بكەت دێ روو ب روویێ لێپرسینا قانوونی بیت.
وەزارەتا رەوشەنبیری و لاوان ل حوكمەتا هەرێما كوردستانێ د نڤیسارەكێدا بۆ رایا گشتی و دەزگەهێن راگەهاندنێ دبێژیت» دەڤەر ب رەوشەكا هەستیاردا دەرباز دبیت، راگەهاندن ئامرازەكێ كاریگەرە و میدیا كوردی دشێت رۆلێ گرنگ د پاراستنا ئاسایشا جڤاكی و پێگەهێ بێلایەنانەیێ هەرێما كوردستانێ ژ روودانێن دەڤەرێ بگێریت».
وەزارەتا رەوشەنبیری و لاوان ئاماژە ب وێ چەندێ ژی كریە» ئاگەهدارییا هەموو كەنالێن راگەهاندنێ و میدیا و پەیچان و بكارئێنەرێن سۆشیال میدیایێ دكەین كو پێدڤییە رەوشا جڤاكی و دەروونی یا خەلكی ل بەرچاڤ بهێتە وەرگرتن، هیچ جۆرە دەنگوباسەكێ بێ ژێدەر و نەدروست ل دۆر پێشهاتان بەلاڤ نەكەن».
دیاركر ژی» نابیت بەلاڤكرنا دەنگوباسان لایەنگیری تێدا بیت».
هەروەسا دبێژیت» نابیت هەموو جۆرە دەنگوباس ل دۆر ئەمنییەتا كوردستانێ بهێنە بەلاڤكرن، بەلكو دڤێت ژ ژێدەرێن فەرمی بهێنە وەرگرتن».
وەزارەتا رەوشەنبیری و لاوان دوپاتكر ژی» دڤێت هەموو ئالییەك بەرپرسیارانە رەفتارێ بكەن، هەر دەزگەهەكێ راگەهاندنێ یان سۆشیال میدیایەك دەنگوباسێن بێ بنەما و ترسێ بۆ تێكدانا ئاسایشا هەرێما كوردستانێ بەلاڤ بكەت دێ روو ب روویێ لێپرسینا قانوونی بیت».

ئەندامەكێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان ئاشكراكر كو دەست ژ كار ڤەكێشانا ئەندامێن دداگەها فیدرالییا ئیراقێ ژ بەر بابەتێ خۆر عەبدوللا بوو.
شێروان دوبەردانی، ئەندامێ جڤاتا نوونەرێ ئیراقێ ژ فراكسیۆنا پارتی دیموكراتی كوردستان د داخۆیانییەكا رۆژنامەڤانیدا گوت» دادگەها فیدرالییا ئیراقێ هاتە هەلوەشاندن، شەش ئەندامێن بەردەوام و سێ ئەندامێن یەدەك دەست ژ كاری ڤەكێشا، نوكە سێ دادوەر یێن ماین كو ب وێ هەژمارێ نیساب ئێدی تمام نابیت و نەشێن هیچ بڕیارەكێ بدەن».
دوبەردانی رۆهنكر ژی» دڤێت بەردەوام حەفت كەس بەرهەڤ بن، نوكە نەشێن فەرمانا سالاری ژی بۆ هنارتنا مووچەیێن فەرمانبەرێن هەرێما كوردستانێ دەربكەن، لەوما گرفتا مووچەی د ناڤبەرا هەردو حوكمەتێن هەرێما كوردستانێ و بەغدایێ دێ مینیت».
وی پەرلەمانتاری ئاشكرا كر ژی كو ئەگەرێ دەست ژ كار ڤەكێشانا دادوەرێن دادگەها فیدرالییا ئیراقێ، پەیوەندی ب بابەتێ خۆر عەبدوللا ڤە ل بەسرایێ هەبوو».
جهێ ئاماژێیە ل ڤێ دووماهیێ حوكمەتا فیدرالییا ئیراقێ ژ ئالییەكی و حوكمەتا خوەجهییا پارێزگەها بەسرایێ رێككەفتنەك ل گەل وەلاتێ كوێتێ ل دۆر رووبەرەكێ ئاڤی كریە كو یا ناڤدارە ب دەڤەرا خۆر عەبدوللا، ئەڤە ژی ل دەف هندەك میلیشیێن ئیراقێ ب ژدەستڤەبەردانا ئاخا ئیراقێ بۆ كوێتێ هاتە هەژمارتن.
هەڤدەم رائید مالكی، ئەندامێ لژنەیا قانوونی ل جڤاتا نوونەرێن ئیراقێ راگەهاند» 9 ئەندامێن دادگەها فیدرالییا ئیراقێ كو شەش ئەندامێن بەردەوام و سێ ئەندامێن یەدەك، دەست ژ كار ڤەكێشانا خوە پێشكێشكرییە ژ ئەگەرێ فشارا حوكمەتێ ل سەر دادگەهێ سەبارەت بابەتێ خۆر عەبدوللا».
ناڤبری د بەیاننامەیەكا رۆژنامەڤانیدا دیاركر ژی» حوكمەتا ئیراقێ و ئالیێن دی دخوازن دادگەها فیدرالی ببیتە ئامرازەك د دەستێ واندا بۆ بجهئینانا هەر چ تشتێ ب گونجای دزانن ب بەهانەیا پاراستنا بەرژەوەندیێن خوە یێن بلند».
ئاماژەكر ژی» سەركردەیێن شیعی یێن دەستهەلاتدار شكەستنا خوە یا سەلماندی د ئاڤاكرنا دەولەتەكا دەزگەهان دا كو رێز ل سەروەرییا قانوونێ و دستووری بگریت».
هەروەسا رۆهنكر» دێ راوێژ ل گەل هەموو پەرلەمانتاران هێتە كرن، بۆ وێ چەندێ هەلوەستەكێ ئێكگرتی ل سەر ڤێ پرسێ وەرگرن».
ب گۆڕەی ئاژانسا دەنگوباسێن كوێتی كو ل ناڤەڕاستا مەها نیسانا بۆری بەلاڤكربوو، سەرۆككۆمار و سەرۆك وەزیرێن ئیراقێ دو تانەیێن جودا پێشكێشی دادگەها فیدرالییا ئیراقێ كربوون و داخوازا بەرۆڤاژیكرنا بڕیارا وێ كر، قانوونا پەسەندكرنا رێككەفتنا خۆر عەبدوللا ل گەل كوێتێ ب نە گونجای هەژمارت. تانەدان ل سەر بنەمایێ دستوورێ ئیراقێ و رێككەفتنا ڤیەننا ل سالا 1966 دامەزراندیە.

وەزیرێ داد یێ پێشتر ل هەرێما كوردستانێ باس ل دەست ژ كار ڤەكێشانا ئەندامێن دادگەها فیدرالییا ئیراقێ دكەت و دبێژیت: ئەڤ دادگەهە ل بن فشارا سیاسی هاتە هەلوەشاندن و ئەستەمە بشێت جهێ ئەندامێن خوە پڕبكەت.
شێروان حەیدەری، قانوونزان و وەزیرێ داد یێ پێشتر ل هەرێما كوردستانێ گوت» نوكە ب دەست ژ كارڤەكێشانا شەش ئەندامێن بەردەوام یێن دادگەها فیدرالی و سێ ئەندامێن یەدەك، ئەو دەزگەهە ب هەوەشاندنێ دهێتە هەژمارتن، چونكە نەشێت روونشتنێن خوە بكەت و ب ساناهی ئەندامێن خوە پڕ ناكەت، مخابن ب جۆرەكی شكۆیێ وێ دادگەهێ هاتە شكاندن، كو چو جاران ب ساناهی ناهێتە دروستكرن».
شێروان حەیدەری زێدەتر گوت» وان شەش ئەندامێن دادگەها فیدرالییا ئیراقێ هەلوەستێ خوە هەبوو و بێی ئەگەر دەست ژ كاری نە ڤەكێشایە، بابەتێ دەست ژ كارڤەكێشانا وان پەیوەندی ب پرسا خۆر عەبدوللا ڤە هەبوو و ناكۆكییا هەڤپەیمانییا چارچۆڤەیێ هەماهەنگیێ و فەرمانا سالاری هەیە، بناغەیێ ڤێ دادگەهێ یێ شاش بوو و ل سەر بنەمایێ دستووری دروست نەبوویە و ل دووڤ بڕیارا (پۆل برێمەر) ی هاتبوو دامەزراندن و ئەو راستڤەكرنا ل سەر قانوونا وێ هاتییە كرن ل سالا 2023 یا قانوونی و دستووری نەبوو، ئەو چەندە بوو گەهشتییە ئەڤرۆ».
وەزیرێ پێشتر یێ داد ل هەرێما كوردستانێ رۆهنكر ژی» ئەڤێ دەست ژ كار ڤەكێشانا ئەندامێن دادگەها فیدرالییا ئیراقی دێ كاریگەرییا خراب ل سەر ئیراقێ هەبیت و دێ بیتە ئەگەر ب چاڤەكێ دی ل دەزگەهێ ماین بهێتە نێرین، وەك جڤاتا نوونەران و حوكمەتێ و سەرۆكۆماری، ژ ئالییەكی دیڤە گرۆپێن میلیشیا فشار ل سەر دادگەهێ هەبوو و ئەندامێن دادگەهێ ژ ئەگەرێ فشارێ دەست ژ كاری ڤەكێشایە».