دیدار، هۆشەنگ تاجر:

سیاسەتمەدارەکێ باکورێ کوردستانێ دیار دکەت، ژ بەر گوهۆڕینێن ل دەڤەرێ ئەڤ هەلبژارتنە ژ بۆ ئیراقێ و هەرێما کوردستانێ گەلەک گرنگن و هەکە کورد پشتی هەلبژارتنان پێکڤە کار بکەن دێ پڕانیا پرسێن هەی ل گەل بەغدا هێنە چارەسەرکرن.

زانا سەزەن سیاسەتمەدارێ باکورێ کوردستانێ د دیدارەکا تایبەت دا بۆ رۆژنامەیا ئەڤرۆ دیار کر، ئەڤ هەلبژارتنە د دەمەکێ دا دهێنە کرن کو هەم ل رۆژهەلاتا ناڤین گوهۆڕینێن مەزن روو داینە و دێ کاریگەریا خوە ل ئیراقێ کەن و هەم ژی ئاریشەیێن گەلەک مەزن د ناڤبەرا بەغدا و هەولێرێ دا هەنە، بەغدا هەتا نها ژی وەکو هەرێمەکا فیدرالی سەرەدەریێ ل گەل کوردستانێ ناکەت و گەلەک ئاریشە دروست بووینە، ب تایبەتی ژی ئاریشەیا مووچەیان کو کاریگەریا خوە ل سەر ژیانا خەلکی کریە و گۆت: (بێگومان خالا هەری گرنگ دستوورە کو هەتا نها ژی بەغدا پێگری پێ نەکریە و دڤێت کورد ب تایبەتی ژی پارتی و ئێکەتی پشتی هەلبژارتنان دەست ب دیالۆگێ بکەن و ب هێزەکا مەزنڤە بەرێ خوە بدەنە بەغدا و ل گەل بەغدا دانوستاندنان بکەن، هەکە کورد د ناڤا خوە دا ئێکگرتی بن دێ بەغدا ژی نەچار بیت هەلوەستێ خوە ل هەمبەر هەرێما کوردستانێ بگوهۆڕیت، چونکی دڤێت کورد رێ نەدەن بەغدا وەکو سیستەمەک ناڤەندی سەرەدەریێ ل گەل هەرێما کوردستانێ بکەت).
ناڤهاتی د پشکەکا دی یا ئاخڤتنا خوە دا ئەو یەک ژی دیار کر، کو پرۆسەیا هەلبژارتنان ل هەرێما کوردستانێ هەتا نها ب رەنگەکێ باش برێڤە دچیت و ب تایبەتی ژی پارتی دیموکراتی کوردستان ب رەنگەکێ رێکخستی و باش هەوا پرۆپگاندا هەلبژارتنان برێڤە دبەت و ئەو یەک ژی نیشا ددەت دێ ل هەرێما کوردستانێ رێژەیەکا گەلەک باش یا وەلاتیان پشکداریێ د هەلبژارتنان دا کەن و گۆت: (ئەز پێشبینی دکەم پارتی دیموکراتی کوردستان وەکو جارێن بۆری دیسان دێ سەرکەفتنەکا مەزن بدەستڤە ئینیت و بێگومان ئەو یەک ژ بۆ هەرێما کوردستانێ گەلەک یا گرنگە، وەکو من گۆتی هیڤیدارم پشتی هەلبژارتنان هێزێن کوردی ب تایبەتی ژی پارتی و ئێکەتی دەست ب دانوستاندنان بکەن و ب رەنگەکێ بهێز بچنە بەغدا و دڤێت وەسا بکەن بەغدا هەلوەستێ خوە ل هەمبەر هەرێما کوردستانێ بگوهۆڕیت، ئەو یەک گەلەک یا گرنگە).
سیاسەتمەدارێ باکورێ کوردستانێ ئەو یەک ژی دیار کر، کو ئەڤ هەلبژارتنە ژ بۆ دەڤەرێن دەرڤەیی ئیدارا هەرێما کوردستانێ وەکو ریفراندۆمەکێ نە، دڤێت هەموو هێزێن کوردی ب تایبەتی ژی پارتی گرنگیەکا گەلەک مەزن بدەتە دەڤەرێن کوردستانی یێن دەرڤەیی ئیدارا هەرێما کوردستانێ، چونکی سەرکەفتنا کوردان ل وان دەڤەران دێ کاریگەریا خوە ل سەر چارەنڤیسێ وان دەڤەران کەت و گۆت: (سەرکەفتنا پارتی دیموکراتی کوردستان د ڤان هەلبژارتنان دا گەلەک گرنگە، چونکی پارتی هێزەکا مەزنە و هەکە ڤێجارێ سەرکەفتنەکا مەزنتر بدەستڤە بینیت دێ شێت دەستکەفتیێن مەزنتر بۆ کوردان بدەستڤە بینیت، ژ بەر ڤێ یەکێ ژی ب سەرکەفتنا پارتی دێ پێگەهێ کوردان ژی ل بەغدا بهێزتر لێ هێت).
زانا سەزەن د دووماهیا ئاخڤتنا خوە دا دیار کر، دڤێت پشتی هەلبژارتنان کورد بەرەیەکێ ئاڤا بکەن و ب ئێک گۆتار بچنە بەغدا، نابیت کورد رێ بدەن هەلوەستێ چەند سالێن بۆری یێن بەغدا ل گەل هەرێما کوردستانێ بەردەوام بیت، هەکە کورد بهێز بن دێ شێن بەغدا نەچار کەن دەست ژ سیاسەتا خوە ل هەمبەر کوردان بەردەت.

مەحمود نهێلی

كەوێ میرو خالد بەرگارەی بەربژارا ژمارە 4 ل سەر لیستا 275 یا پارتی دیموكراتی كوردستان ل بازنێ دهوكێ دیار كر، ئەم دێ هەر كار ب درووشمێ پارتییا خوە كەین كو ئەو ژی ئارامی، ئاڤەدانی و سازانە، دا كو جارەكا دی خەلكێ مە چ نەخوەشی و دەردەسەریان نەبینیت، ب ڤان درۆشمان ئەم دێ شێین مللەتێ خوە پارێزین.

كەوێ میرو د دیدارەكی دا بۆ رۆژناما ئەڤرۆ گۆت: ژ بەر كو ئەز ژی ئێك بوویمە ژ ڤی‌ جڤاكی و مە گەلەك نەخوەشی و دەردەسەی و نەهامەتی دیتینە، ئەز رووبەر و گەلەك تەحەدیاتێن ژیانێ بوویمە ل سەر دەستێ رژێما عیراقێ یا بەری، ب تنێ ل مالا مە دا مە چار شەهید داینە ژ پێخمەت ئازایا ڤی وەلاتی ژ بەر وێ یەكی ژی هەكە ئەز ب دەنگێن هەوە و باوەریا خەلكێ مە چوومە بەغدا و جڤاتا نوونەرێن ئیراقێ، دێ هەموو بزاڤا كەین مافێن گەلێ مە بهێنە پاراستن و ئێدی ئەو نەخوشیێن هندە سالە خەلكێ مە تێدا بۆراندی ب داوی بهێن.
كەوێ دیار كر، زێدەباری وێ یەكێ حكۆمەتا ئیراقێ زۆرداریەكا گەلەك مەزن ژ خەلكێ هەرێما كوردستانێ كریە، لێ ژبلی ئەندامێن پارتی، مە نەدیتیە ئەندامێن چ حزبێن دی خوە ل گەلێن هەرێما كوردستانێ كریە خودان، ژ بەر وێ یەكێ ژی ئەز وەك كچا شەهیدەكی دەڤەرا ئامێدیێ و پارێزگەها دهوكێ یا ل گەل هەڤكارێن مە یێن پارتی ل پەرلەمانێ عیراقێ یا پێدڤی دێ ئەنجام دەین ژ پێخەمەت ب دەست ڤە ئینانا مافێن گەلێ كورد ب تایبەتی ژی بابەتێ قەرەبۆكرنا ئەنفال بوویان و شەهیدێن ب دەستێ حكۆمەتا ئیراقێ یا بەرێ ژیانا خوە كریە قوربانی ئازادیا كوردستانێ و زیندانیێن سیاسی و دێ بزاڤا كەین دەستوورێ ئیراقێ بهێتە بجئینان.
و گۆت ژی: ئەم ژلایێ پارتیەكێ ڤە هاتینە بەربژاركرن و ئەو ژی پارتی دیمۆكراتی كوردستانە و پەیرەو و پرۆگرامێ خوە هەیە و ب درووشمێ هەڤپشکی، هەڤسەنگی، لهەڤکرن و مە پشكداری هەلبژارتنان دا كریە ، پارتی هەردەم پشتەڤانە ژ بو ئازراندنا وان كەیسان یێن بەرژەوەندییا خەلكی تێدابن، من دڤیت ئەو كارێ ئەم ل پەرلەمانی ئەنجام ددەین ئەو بن یێن د خزمەتا خەلكێ كوردستانێ و دەڤەرا ئامێدیێ دا.
كەوێ‌ زێدەتر دبێژیت: ئەم دشێین بۆ خەلكێ خوه ل بەغدا گەلەك كاران ‌ بكەین، ئەم نە ب تنێ دێ بۆ هندێ كار كەین مووچەیێن فەرمانبەرێن مە د دەمێ خۆ دا بهێنە هنارتن، بەلكو دێ كار كەین مووچەیێن فەرمانبەرێن مە ل گەل فەرمانبەرێن ئیراقێ بهێنە هاوتاكرن. دەما چەندین سالانە ئیراق مافێ فەرمانبەر و مووچەخۆرێن مە دخۆت، مە دڤێت ل پەرلەمانی ببینە دەنگێ خەلكێ خوە.
ناڤهاتیێ بەحسی ژیانا خوە كر و گۆت: ئەز كچا شەهیدی مە و ل بچووكاتیا خوە هاتینە بێ بەهر كرن ژ دلوڤانیا بابێ و من د مالا خوە چوار شەهید هەنە، زێدەباری ل گوندێ مە هەژمارەكا زۆر یا شەهید و ئەنفال بوویان هەنە و مالباتا مە هەموو ژیانا خوە تەرخانكریە ژ بۆ ڤێ ئازادیا ئەڤرۆ ئەم تێدا و مە د ژیانا خوە دا گەلەك شەڕ و نەخۆشی دیتینە، لەورا من سۆز دایە ، هندی ئەز بشێم خزمەتا خەلكی بكەم و ئەم دێ هەر كار ب درووشمێ پارتییا خوە كەین كو ئەو ژی ئارامی، ئاڤەدانی و سازانە دا كو جارەكا دی خەلكێ مە چ نەخوەشی و دەردەسەرییان نەبینیت.
كەوێ میرو خالد بەرگارەی ل سالا 1980 ژ دایكبوویە و باوەرناما بكالوریوس د زانستێن مرۆڤایەتیێ دا هەیە و بسپوری هەیە د بوارێ كارگێری و ئابوری و ئاڤەدانیێ دا هەیە و زمانێن كوردی و عەرەبی و ئینگلیزی باش دزانیت و نوكە بەربژارا هەژمارە 4 ل سەر لیستا 275 یا پارتی دیموكراتی كوردستان بازنێ دهۆكێ.