نەرمین ڕێکانی:
چارەسەرکارەکێ دەروونی بۆ ڕۆژنامەیا ئەڤرۆ دیار کر کو زێدە بکارئینانا سوشیال مەدیایێ کارتێکرنەکا نەرێنی ل ساخلەمیا مرۆڤی دکەت، و باشترە مە سنورەک ژ بو بکارئینانا سوشیالێ هەبیت، داكو بشێین لسەر كاریگەریێن نەرێنی زال ببین.
محەمەد سالح ، چارەسەرکارێ دەروونی بۆ روژنامەیا ئەڤرۆ دیار کر، سوشیال میدیا و ئەنترنێت ژ رێکێن گەهاندنا پێزانینانە ژ بۆ بەردەستێن مە و بووینە سەنتەرێ گرنگیێ، نوکە د هەر مالەکێ دا هێلێن ئەنترنێتێ و چەندین ئەکاونتێن سوشیال میدیایێ هەنە و گۆت:(لێ بکارئینانا زێدە و بۆراندنا دەمی ب دەمژمێران و کونترۆل نەکرنا دەمی ل سەر بکارئینانێ، ئالۆدەبوون بۆ مرۆڤی دروست دبیت).
چارەسەرکارێ دەروونی گۆتژی:( سوشیال میدیایێ تشتێن دویر گەلەک نێزیك و بساناهی ئێخستینە، راستە ئەڤێ چەندێ مفایێن مەزن هەنە، بەلێ پا زێدە بکارئینانا وێ ژلایێ جڤاکی ڤە ب شێوەیەکێ شاش چەندین زیان و خرابی پەیداکرینە و کارتێکرنەکا نەرێنی ل پەیوەندیێن جڤاکی و حێزانی کریە، هەروەسا کارتێکرنەکا نەرێنی ل تاکەکەسی ژی کریە ژلایێ لەشی و دەروونیڤە).
محەمەد سالح بەحس ل وان جورە کارتێکرنان کر ئەوێن سوشیال میدیا ل مروڤی دکەت و گۆت:( مەژیێ مرۆڤی و شیانێن داهێنانێ لاواز دکەت، هەروەسا دبیتە ئەگەرێ چاڤلێکرن و دژایەتیکرنێ و خۆ هەڤبەرکرن دگەل کەسێن د سوشیالێ دا پەیدا دبن، بلندبوونا ئاستێ نە ئارامیێ و دودلیێ ژ ئەگەرێ زێدە بکارئینانا سوشیال میدیایێ، هەستکرن ب تنێبوونێ و خەمۆکیێ ژ ئەگەرێ ئەوا تو دخوینی و دبینی، پەیدابوونا ئاریشەیێن خێزانی).
لدور هەمان بابەت، لازم محەمەد ئەمین چالاکڤان د بوارێ سوشیال میدیایێ دا دیار کر، زێدە بکارئینانا سۆشیال میدیایێ كارتێکرنەکا نەرێنی ل سەر دەروونێ مرۆڤی درست دكەت و گۆت:( ئەڤ دیاردەیە وەكی خوارنەکا نەساخلەمە، ئانكو کا چاوا خوارنا بێ توخیب زیانێ دگەهینیتە مرۆڤی، وەسا بكارئینانا سوشیالێ یا زێدە زیانێ دگەهینیتە دەروون و ساخلەمییا مرۆڤی، ئەڤجا باشترە مە سنورەک ژ بو بکارئینانا سوشیال میدیایێ هەبیت، داكو بشێین ل سەر كاریگەریێن نەرێنی زال ببین).
نيشاندان