قەیس وەیس:
بڕیارە سوبەهی پێنج شەمبی دەست ب هەڤڕكیێن گەڕا 31ێ یا خولا ستێرێن ئیراقێ یا فوتبۆلێ ب ئەنجامدان دو یارییان، ئەلهۆیێن چیا دێ بزاڤێ كەن ل بەسرا نێچیرا خوە بگرن، زاخۆ دێ بزاڤێن دەرمانكرنا برینێن خوە یێن خوسارەتیان ب سەرپەرشتییا ڕاهێنەرێ خوە یێ نوو كەت.
ئەلهۆیێن چیا نێچیرا خوە یا 14ێ د خولێ دا گرتیە
تیما فوتبۆلا یانەیا دهۆك بەردەوامی دا ئەنجامێن خوە یێن باش پشتی شیایی سەركەفتنەكا گرنگ ژ باژێرێ بەسرا بهێت ب گۆلەكیً بێ بەرانبەر ب سەركەڤیت ل سەر خودانێن ئەردی یانەیا نەفت ئەلبەسرا، د یارییا واندا ئەوا ل پێنچ شەمبییا بۆری ل یاریگەها مینا هاتییە كرن، گۆلا دهۆكێ ژلایێ یاریزانێ وێ پاشەنگ عەبدوللا د خولەكا 75ێ دا تۆمار كر، ئەڤ سەركەفتنە دبیتە یا 10 ل سەر تیما مێڤاندارا و یا 14ێ د خولێ دا بەرانبەر پێنچ خوسارەتی و دو وەكهەڤییان و ب كۆمكرنا 47 خالان پێشڤە هاتە رێزا شەشێ.
یاریێن دهۆكێ یێن پاشئێخستی
ژبەركو تیما فوتبۆلا یانەیا دهۆكێ موژیلی یاریێن كۆپا كەنداڤی بوو و شیابوو ب سەرفەرازی ناسناڤێ كۆپایێ ب دەستڤە بینت، د دەمێ قارەمانیێ دا فدراسیۆنا فوتبۆلا ئیراقێ دەلیڤە دابوو دهۆكێ یاریێن وێ بهێنە پاشئێخستن بوخاترا ئەڤێ قارەمانیێ كو سەرجەمێ و بوونە شەش یاری و ب ڤی رەِنگی، بەرانبەر تەلەبە ل بەغدا، دگەل شورتە ل دهۆكێ، بەرانبەر هەولێرێ ل هەولێرا پایتەخت، دگەل نەفت میسان ل دهۆكێ و دێ بیتە مێڤانا یانەیا دیالا و یارییا شەشێ مێڤاندارییا یانەیا مینا یە بەسرایی بكەت.
یاریزانێن دهۆكێ 32 گۆل تۆمار كرینە
تیما دهۆكێ خوانا دەهـ یاریزانێن پشكداری د تۆمار كرنا 32 گۆلان دا هەیە سەرجەمێ 33 گۆلان و بڤی ڕەنگی، پیتەر گۆرگیس حەفت گۆل، پاشەنگ عەبدوللا حەفت گۆل، كەریم دەرویش پێنچ گۆل، هەر ئێك ژ و شەرقی ئەلبەحری و مارلۆن دۆسانتۆس، یانیك زاكێری و ئیبراهیم غازی هەر ئێك دو گۆل هەنە، هەروەسان هەر ئێك ژ بەیار ئەبۆ بەكر، كێلبرت كۆمسۆن، سیابەند عەگید، زانا عەلی و لۆكاس هێنریك گۆلەك تۆماركرینە، گۆلەك بۆ یاریزانەكێ یانەیەكا دی هاتییە هژمارتن، پشتی ب شاشی ڤە گۆل ل سەر تیما خوە كر.
هارۆن ئەحمەد: بەردەوامین بۆ پێشڤەچوونێ و ڕژدین هیچ خالەكێ ژ دەست نەدەین
د دیدارەكێ دا هارۆن ئەحمەد كاپتن و ستێرا تیما فوتبۆلا یانەیا دهۆك بۆ رۆژنامەیا ئەڤرۆ دیار كر ئەو د ڕژدن بەردەوامیێ ب دەنە ئاست و ئەنجامێن خوە یێن باش و گۆت: پێنەڤێت هەر یارییەكا ئەم دكەین ب سانەهی نابیت ژبەركو خولا ستێرێن ئیراقێ سۆپرایز و ئاستێن جودا هەنە، سەركەفتنا دگەل نەفت بەسرا گرنگییا خوە هەیە ژبۆ بەردەوامی دان بەر ب پێشڤەچوونێ و ڕژدین یا د شیان دا بیت هیچ خالەكێ ژ دەست نە دەین، هەموو یاریزان ب گیانێ تیمێ و ل دووڤ پلانێن كادرێ ڕاهێنانێ و پشتەڤانییا كارگێرییا یانەیێ و جەماوەرێ مە یێ دلسۆز گەشبینین ل سەر ئەنجامێن باشتر.
كوڕێن خابووری ب خالەكێ ڕازیبوون
ب سەرپەرشتییا ڕاهێنەرێ خوە یێ نوو عەبدولغەنی شەهەد تیما فوتبۆلا یانەیا زاخۆ ب خالەكێ دگەل مێڤانا خوە یانەیا زەورا یا بەغدایی ڕازیبوون، پشتی یارییا وان بێ گۆل وەكهەڤبووین، ئەوا ل یاریگەها زاخۆ یا نێڤدەولەتی بێ بەرهەڤبوونا جەماوەرێ زاخۆ دەرئەنجامێ سزایێن فدراسیۆنا فوتبۆلا ئیراقێ ل سەر یانەیا زاخۆ.
بڤێ ئەنجامێ تیما زاخۆ جهێ خوە ل رێزا سێیێ ب كۆمكرنا 54 خالان پاراست ژ 15 سەركەفتن، نەهـ وەكهەڤی و سێ خوسارەتییان، د بەرانبەر دا یانەیا زەورایێ ژی سەرێ لیستا خولێ پاراست ب كۆمكرنا 65 خالان، ئەوا یانەیا شورتە ب62 خالان ڕێزا دویێ دهێت، دیدارێن دناڤبەرا هەردو یانەیان دا زەورا شیایە 16 سەركەفتنان بینت زاخۆ چار سەركەفتن ئیناینە و یارییا ڤێ گەڕێ بۆ وەكهەڤییا نەهێ د ناڤبەرا واندا.
گۆلكەرێن زاخۆییان كینە؟
پیشەكارێ یانەیا زاخۆ یێ بەرازیلی گۆستاڤۆ هێنریك ل سەرێ لیستا گۆلكەرێن تیما خوە دهێت ب تۆماركرنا 16 گۆلان، هەڤالێ وی و یاریزانێ هەلبژارتیێ ئیراقێ ئەمجەد عتوان ب تۆماركرنا 13 گۆلان رێزا دویێ دهێت، ناسر محەمەدو پێنج گۆل، ئەحمەد یاسین دو گۆل، دیبیۆتی ئۆگۆنا سێ گۆل، هەر ئێك ژ ئەیۆب نناحی گۆلەك، محەمەد عەلی عەبۆد گۆلەك و موسێس گۆلەك، مەحمود فائیز، پاتریك مارسێلۆ هەر ئێك گۆلەك تۆماركرینە كو سەرجەمێ گۆلێن زاخۆ بووینە.
هەولێرێ دووماهی ب زنجیرا خوسارەتییان ئینا
تیما یانەیا هەولێرێ ڕادەیەك بۆ ئەنجامێن خوە یێن خراب دانا، پشتی دگەل خودانێن ئەردی یانەیا كەربەلا سەركەفتنەكا باش ئینایی ب دو گۆلان بێ بەرانبەر د یارییا واندا ئەوا ل یاریگەها كەربەلا هاتییە كرن، هەردو گۆلێن تیما پایتەختێ كوردستانێ ژلایێ یاریزانان گەیلان لوقمان و مستەفا قابیل تۆمار كرن، ئەڤێ ئەنجامی تیما هەولێرێ پێشڤە برە رێزا 14ێ ب كۆمكرنا 38 خالان.
سەمیر سەدیق هاریكارێ ڕاهێنەرێ هەولێرێ كەیفخوەشییا خوە دیار كر ب سەركەفتنا ڤێ جارێ و گۆت: پێخوەشحالین ئەڤجارە ئەم شیایین ددەمەكێ هەستیار دا سەركەفتنێ بینن، هەموو یاریزانان یارییەكا مەزن و شەڕی بۆ سێ خالان كر، ئەڤ ئەنجامە ڤەگەڕیانە بۆ ئاست و ئەنجامێن خوە یێ جاران، ئێدی دڤێت نەهێلین هیچ خالەكێ ژ دەست نەدەین و خوە ژ مەترسییا داكەفتنێ دووربێخین، ئەو رێزبەندیا نوكە ژی ب دلێ مە نینە دڤێت هێشتا پێشكەڤین.
فدراسیۆنا فوتبۆلا ئیراقێ ژڤانێ یاریێن گەڕا 32ێ دیاركر
ب فەرمی لژنەیا بەریكانەیا لالیگا یا فدراسیۆنا فوتبۆلا ئیراقێ یاریێن گەڕا 32ێ ژ خولێ دیار كرن، یانەیا دهۆك دێ سێ شەمبییا بهێت ل پایتەختێ ئیراقێ بەغدا بیتە مێڤانا یانەیا نەفت، دووڤدا ل 10ێ هەمان مەهـ ئانكو رۆژا شەمبیێ دێ یارییا خوە یا ئێكێ ئەوێن زنجیرەیا یاریێن پاشئێخستی ل یاریگەها ئەلمەدینە ل پایتەختێ ئیراقێ بەرانبەر یانەیا تەلەبە كەت.
هەر د یاریێن حەفتییا 32ێ دا ل چارشەمبییا بهێت، تیما زاخۆ دێ ل بەغدا بیتە مێڤانا كارەبا، هەولێر دێ مێڤاندارییا نەفت میسان كەت، حدود بەرانبەر نەفت بەسرا بیت و ئەلقاسم و ئەلگەرمە ل یاریگەها نەجەف هەڤڕكیێ بۆ سێ خالان كەن، رۆژا پێنچ شەمبیێ نەوۆز دێ بیتە مێڤانا نەجەف، هەروەسان مینا و جەوییە ل مینا، زەورا و دیالا ل یاریگەها زەورا و شورتە و كەرخ ل یاریگەها شورتە.
نيشاندان