بێوار حەمدی:

شێوەكار (ئەنوەر قاسم) د دیدارەكێ‌ دا بۆ رۆژنامەیا ئەڤرۆ گۆت: چێكرنا كەڤالان حەزا من یا زارۆكینیێ‌ بوو، ئەز نوكە پتر وێنەیێن سروشی چێدكەم، ژبەركو د ئۆلا مە یا ئێزدیان دا رۆژ هێمایەكێ‌ گەلەك جوان و پیرۆزە و مەرەم ژ چێكرنا كەڤالان ئەوە رۆژەك بهێت بشێم پێشانگەهەكێ‌ ڤەكەم و كلتۆر و پیرۆزیێن ئێزدیان د وێ‌ پێشانگەهێ‌ دا نیشابدەم.
هەروەسا گۆت: ژبەركو ئۆلامە یا كەڤنارە و تشتێن گەلەك جوان و سەرنجڕاكێش دناڤدا هەنە دێ‌ یێ‌ بەردەوامبم، بۆ زانین داخواز بۆ من دهاتن من وێنە ل سەر دیواران چێدكرن، پاشان من بزاڤكرن ئەو جهێن ڤالا دناڤ كەمپێ‌ دا ل شنگالێ‌ ب تایبەت ژی كەرەڤانان ئەز وێنەیان ل سەر چێكەم و ئەڤ چەندە بوو جهێ‌ دلخۆشیا ئاكنجیێن كەمپێ‌ و دەستخۆشی ل من دكرن.

سۆلین سلێمان:

سترانبێژ(شڤان دۆسكی) د دیدارەكێ‌ دا بۆ رۆژنامەیا ئەڤرۆ گۆت: ئەز ژدایكبوویێ‌ سالا (1990) مە و دژیەكێ‌ بچووكدا من دڤیا ببمە سترانبێژ و پشتی ل (2005) دەلیڤە هاتی من دەستپێكر و هەتا نوكە یێ‌ بەردەوامم و هیڤیا من ئەوە ل دووف شیانێن خوە ئەز ژی بشێم خزمەتا ستران و مۆزیكا كوردی بكەم.
هەروەسا گۆت: ل سالا (2017) كلیپا منا ئێكێ‌، كو سترانەكا فولكلۆری بوو ب ناڤێ‌( وێلی وێلی) ب شێوێ‌ دوقۆلی ل گەل (رۆژبین دۆسكی) هاتە بەلاڤكرن، وێ‌ سترانێ‌ كارڤەندانەكا باش هەبوو و پتری ملیۆن بینەران د یوتیۆپی دا دیتنن و سترانگۆتن بتنێ‌ بۆ من حەزەكە، هەتا نوكە پتری (15) سترانێن من ژ پەیڤێن من ب خوەنە، نوكە ئاوازان ژی چێدكەم و دچمە ئاهەنگان ژی و وەكو هەر سترانبێژەكی مە ژی پلانێن خوە هەنە و دێ‌ بزاڤێ‌ كەین بۆ پاشەرۆژێ‌ ستران و كلیپێن باشتر چێكەین.

هەرهین محەمەد:

رێژین سلێمان، بێژەرا دەنگوباسێن سیاسی ل دهۆك تیڤی، د دیدارەكێ‌ بۆ رۆژنامەیا ئەڤرۆ گۆت: من هەموو جوانیا خوە یا روحی پێشكێشی راگەهاندنێ‌ كریە و راگەهاندنێ‌ ژی ژیانەكا پری ڤیان دایە من و ل گەل ئەوێ‌ ژیانێ‌ گەلەك یا كەیفخۆشم، چونكو راگەهاندن ئارەزویا من بوویە و دهۆك تیڤی هیڤی و ئارەزویێن من كرنە راستی و بجه ئینان، بەلێ‌ دبینم راگەهاندن نابیتە دەرگەهەك مرۆڤ خوە پێ‌ بەرنیاس بكەت، چونكو هندی راگەهاندنە مرۆڤ یێ دناڤ چار دیوارێن كاری دا و دكارێن سەركەفتی دا مرۆڤ چو جاران پێش ناكەڤیت و بتنێ‌ مفای دگەهینتە دەوروبەران و ئەو كەسێن ل تورا جڤاكیا سناپی ژی دگەل من هەموو هەڤال و نیاسێن منن و كەسێن بهانە لنك من و مادێ‌ چاوان خۆ ل سەر وان بەرنیاسكەم و ئەو هەموو ئەون كو بەری نوكە ژی ئەز دنیاسیم.
هەروەسا گۆت: من باوەری ب خوە هەیە د هەركارەكێ‌ راگەهاندنێ دا نەبتنێ‌ بێژەریێ‌، چونكو هەكە مرۆڤی حەز هەبیت دێ‌ شیان ژی هەبن و كەنالێن ئاسمانی ژی هەبووینە داخواز ژ من كرینە كو ل نك وان وەكو بێژەر، یان پەیامنێر كاربكەم، بەلێ‌ بۆ من دهۆك تیڤی خۆشترە ژ هەرجهەكێ‌ دی.

بێوار حەمدی:

دلشاد محەمەد، پەیامنێرێ‌ دیجیتال مەدیایا شێخان پرێس، د دیدارەكێ‌ دا بۆ رۆژنامەیا ئەڤرۆ گۆت: نوكە راگەهاندنا دیجیتالی بوویە پشكەك ژ ژیانا مەیا رۆژانە و گرنگی و كارتێكرنا وێ‌ دگەلەك بۆاران دا دیاردبیت.
هەروەسا گۆت: هەر چەندە دیجیتال مەدیا بوویە رێكەكا بلەز و ب ساناهی ژبۆ بەلاڤكرن و وەرگرتنا پێزانینان ل سەرانسەری جیهانێ‌، لێ‌ كارتێكرنێن نەرێنی ژی هەنە، وەكو (راگەهاندنا پێزانینێن نە دروست، پرۆپاگندە، نوچەیێن بێ‌ بنەما، نە پاراستنا نهێنیان) و ب دیتنا من یا دروست نینە روودانێن كوشتنێ‌ و هەستیار بهێنە بەلاڤكرن، ژبەركو ئەو نووچە زیانێ‌ دگەهینە دەروونێ‌ خەلكی و كارتێكرنێ‌ ل ژیانا وان دكەن، لەورا ژی ئەو كەسێ‌ مایكێ‌ دهەلگریت پێدڤیە ب دروستی و پاقژی كارێ‌ خوە بكەت، هەروەسا وەك زمانێ‌ كوردی ژی دڤێت ب دروستی دەرحەق دەركەڤیت.

دلڤین رەشید:

شێوەكار (عادل حەسەن) د دیدارەكێ‌ دا بۆ رۆژناما ئەڤرۆ دیاركركو ئەو خەلكێ‌ دەڤەرا شنگالێ‌ یە و نوكە قوتابیە ل پشكا شێوەكاری ل پەیمانگەها هونەرێن جوان و ژبەر حەزا وی بۆ هونەری ب گشتی و شێوەكاری ب تایبەتی پێنگاڤ بەرەڤ بۆارێ‌ ئەكادمی هاڤیتینە، داكو بشێت ب ڤێ‌ رێكێ‌ بەرەف ئارمانجا خۆڤە بچیت و خزمەتا مللەتێ‌ خۆ بكەت.
ناڤهاتی گۆت: پتریا هزرێن هونەرێ‌ بۆخۆ ژ هەبوونێ‌ و خەیالێ‌ پەیدا دكەم، چونكی ب ڤێ‌ رێكی مرۆڤ پتر دشێت دەربڕینی ژ ئازادیا هزر و بیرو و بووچونێن خۆ دكەم وەك هونەرمەندەكی شێوەكاری، ژبەركو ئەڤ جۆرێ‌ هونەری چارەسەریا دەرونێ‌ مرۆڤی دكەت و یا گرنگە هونەرمەند ب رێكا بنەماێن سەرەكی وان جۆرە كەڤالان چێكەت داكو دیمەنەكی جوان ژێ‌ پەیدا ببیت، چنكو چێكرنا كەڤالێن ئاشۆپی یا ب زەحمەتە، نوكە ئەز وی زانستێ‌ هونەرێ‌ شێوەكاری پێشكێشی گەنج و لاوێن دەڤەرا خۆ دكەم، ب تایبەت ژی ئەوێن حەزا هونەری هەین، وان ب شێوازەكی ئەكادیمی فێری ڤی جۆرێ‌ هونەری دكەم و دخوازم ل پاشەرۆژی پێشانگەهێن تایبەت ڤەكەم.