سەرۆکێ پارتا کۆماریا گەل دیار کر، قۆناغا نها ل تورکیا وەکو پێدڤی پێشڤە ناچیت و ئاکپارتیێ دڤێت گەلەک تشتان ژ بۆ بەرژەوەندیێن خوە بکار بینیت، لێ وەکو پارتا کۆماری ئەو بەرهەڤن پرسا کوردی ل پەرلەمانێ تورکیا چارەسەر بکەن.

ئۆزگور ئۆزەل سەرۆکێ گشتی یێ پارتا کۆماریا گەل د داخویانیەکێ دا بۆ دەزگەهێن راگەهاندنا تورکیا دیار کر، وەکو پارتا کۆماری ئەو بەرهەڤن پرسا کوردی ل پەرلەمانێ تورکیا چارەسەر بکەن، نها ل تورکیا قۆناغەکا نوو بۆ ئاشتیێ و چارەسەرکرنا پرسا کوردی دەستپێکریە، لێ وەکو دیار ئەردۆغان هەتا نها یا پێدڤی بۆ قۆناغا نها نەکریە، وەسا دیارە ئەردۆغان و پارتا وی دخوازن بابەتێ پرسا کوردی ژ بۆ بەرژەوەندیێن خوە بکار بینن و ژ بەر ڤێ یەکێ ژی هەتا نها ب کریاری گەلەک تشت نەهاتینە کرن و کورد ژی ژ رەوشا نها رازی نینن.
ناڤهاتی ئەو یەک ژی دیار کر، وەکو پارتا کۆماری وان بەری نها لیژنەیەک ژ بۆ چاوانیا چارەسەرکرنا پرسا کوردی ل تورکیا ئاڤا کرینە و لیژنەیێ هەتا نها گەلەک کارێن باش ژی کرینە، لێ دڤێت ژ بۆ چارەسەرکرنا پرسا کوردی هەموو هێزێن سیاسی یێن ل تورکیا خوەدان پرۆژە بن، دڤێت هەموو پێکڤە کار ژ بۆ چارەسەرکرنا پرسا کوردی بکەن و بێگومان دڤێت جهێ چارەسەرکرنا پرسا کوردی ژی پەرلەمانێ تورکیا بیت و گۆت: (بەری نها ژی دەستهەلاتا ئاکپارتیێ دیار کر وان پرۆژەیەک ژ بۆ چارەسەرکرنا پرسا کوردی ئامادە کرینە و هندەک تشت ژی هاتنە کرن، لێ هەتا نها ژی پرسا کوردی ل تورکیا نەهاتیە چارەسەرکرن، ژ بەر ڤێ یەکێ وەکو پارتا کۆماریا گەل ئەم دبێژین دڤێت پرسا کوردی ل پەرلەمانێ تورکیا بهێتە چارەسەرکرن و دڤێت ژ بۆ چارەسەرکرنا پرسا کوردی ژی پرۆژەیەکێ مەزن و باش هەبیت، لێ هەتا نها ئاکپارتی خوەدان پرۆژە نینە و ژ بەر ڤێ یەکێ ژی هەرچەندە بەحسێ دەستپێکرنا قۆناغەکا نوو ل تورکیا دهێتە کرن، لێ کورد دلگرانن، چونکی ب کریاری چو نەهاتیە کرن).
چاڤدێرێن سیاسی ل تورکیا ژی وەسا دبینن پارتا کۆماری بابەتێ پرسا کوردی بۆ بەرژەوەندیێن خوە بکار دئینیت، چونکی د هەلبژارتنێن بۆری دا رێژەیەکا مەزن ل کوردان ل باژێرێن مەزن یێن تورکیا پشتەڤانی ل بەربژارێن پارتا کۆماری کرن و ژ بەر ڤێ یەکێ ژی پارتا کۆماری نها بەحسێ چارەسەرکرنا پرسا کوردی دکەت، ئانکۆ ئارمانجا پارتا کۆماری پتر کۆمکرنا دەنگێن کوردانە، چونکی پارتا کۆماری هەتا نها ژی پشتەڤانیێ ل پەروەردا ب زمانێ کوردی ناکەت و نەڤێت زمانێ کوردی ل تورکیا ببیتە زمانێ فەرمی یێ پەروەردێ و ژ بەر ڤێ یەکێ ژی کورد ژ سیاسەتا پارتا کۆماری رازی نینن.

عەباس ئیراقچی وەزیرێ دەرڤە یێ ئیرانێ دیار کر، دانوستاندنێن ل گەل ئەمریکا هەتا نها بەردەوامن و ئیرانێ دڤێت پرسێن هەی ب رێیا دانوستاندنان ل گەل ئەمریکا چارەسەر بکەت، لێ دڤێت ئەمریکا دەست ژ هندەک داخوازیێن خوە یێن زێدە بەردەت، چونکی هندەک داخوازیێن ئەمریکا ل دۆر بەرنامێ ئەتۆمی یێ ئیرانێ گەلەک ژ راستیێ دوورن و ئیران وان تشتان قەبوول ناکەت، د هەڤدیتنان دا وەکو شاندێ ئیرانێ وان ئەو یەک ب رەنگەکێ ئاشکرا دیار کرینە کو هەکە ئەمریکا دڤێت رێککەفتنەکا باش بهێتە کرن دڤێت ئەمریکا رێزێ ل ئیرادە و داخوازیێن گەلێ ئیرانێ بگریت.
ناڤهاتی ئەو یەک ژی دیار کر، ئیرانێ نەڤێت چەکێ ئەتۆمی دروست بکەت، بەلکو بەرنامێ ئەتۆمی یێ ئیرانێ بۆ مەرەمێن ئاشتیانە یە و پتر ژی بۆ خزمەتگوزاریێ یە، ژ بۆ کو دانوستاندن بگەهنە ئەنجامەک باش ژی دڤێت بەری هەر تشتەکێ سزایێن ل سەر ئیرانێ بهێنە راکرن.

سەرۆکێ ئۆکرانیایێ دیار کر، وان دڤێت ئاگربەستێ راگەهینن و ل گەل رۆسیا ب رێیا دانوستاندنان پرسێن هەی چارەسەر بکەن، لێ ژ بۆ ئاگربەستێ و دانوستاندنێن ل گەل رۆسیا ژی ئۆکرانیا پێدڤیا وێ ب پشتەڤانیا زێدەتر ژ جاران یا وەلاتێن ئێکەتیا ئۆرۆپا هەیە، چونکی نابیت رێ بدەین رۆسیا بهێز کەڤیت، دەمێ رۆسیا بهێز بیت دێ بیتە مەترسی ل سەر وەلاتێن دی یێن ئێکەتیا ئۆرۆپا، ژ بەر ڤێ یەکێ ژی گرنگە هەموو وەلاتێن ئێکەتیا ئۆرۆپا پتر ژ جاران هاریکاریا ئۆکرانیایێ بکەن.
زیلێنسکی ئەو یەک ژی دیار کر، وی دڤێت جارەکا دی ل گەل سەرۆکێ ئەمریکا کۆمبیت، ئەو یەک گرنگە، لێ دڤێت ئەمریکا ژی باش بزانیت ئاگربەستەکا کو د بەرژەوەندیا رۆسیایێ دا بیت دێ بیتە ئەگەرێ ئالۆزیێن زێدەتر بۆ هەموو جیهانێ، چونکی پۆتینی ئارمانجێن دی هەنە و دڤێت رێگری ل رۆسیا بهێتە کرن، ژ بەر ڤێ یەکێ ژی بهێزبوونا ئۆکرانیایێ گەلەک گرنگە.

سەرۆكێ كەنیسەیا كلدانی ل ئیراقێ و جیهانێ د رێوڕەسمێ بڕێڤەچوونا رۆژا لاڤایا نیشتمانی ل هەولێرێ راگەهاند: زۆر سوپاس بۆ هەرێما كوردستانێ بۆ رێكخستنا ڤێ هەلكەفتێ.
لویس ساكۆ، سەرۆكێ كەنیسەیا كلدانی ل ئیراقێ و جیهانێ گۆت ژی» سوپاس بۆ هەرێما كوردستانێ ژبۆ بۆچوونا وێ یا ژێرانە بۆ بەرجەستەكرنا دیموكراسیەت و دەستهەلات و فەرمانرەواییا شارستانی ئەوا هەی، هەروەسا رێزگرتن ل بهایێن و نیشتمانی و پێكڤەژیانێ، هەروەسا بەرپرسێن حوكمەتا هەرێما كوردستانێ، بەردەوام ل گەل روودانێن خەمگین و نیگەرانییان بوون».
كاردینال (لویس ساكۆ) دوپاتكر ژی» نابیت ژبیر بكەین كو هەرێما كوردستانێ هزاران ئاوارەیێن مەسیحی حەواندبوون، هەروەسا نوكە ل دەڤەرێ شەڕ و ناكۆكییا هەی، كو مەرك و وێرانكارییان پەیدا دكەت، ئەڤە ژی بەسە كو بنێرینە غەزە، كو ئەڤ جۆرە روودانە جوداكاریێ دروست دكەن، هەروەسا هەڤكێشە و پارسەنگییا هێزێ بەلاڤ دكەن، بۆ سەر ئاسایش و ئارامییا دەڤەرێ»
باس ل وێ چەندێ ژی كر» ئەڤ رەوشە دخوازیت دانوستاندنێن زێدەتر هەبن بۆ كاركرنا هەڤپشك كو پشتڕاستبوونا چارەسەركرنا كێشەیان بدەت و ب ئاراستەیا پێشكەفتن و خوەشگوزەرانی و ئاسایشێ پێنگاڤان ب هاڤێژین، پێدڤییە قانوونێن نوو هەبن كو یەكسانیێ د ناڤبەرا پێكهاتەیاندا ب خوەڤە بگریت، هاندانا ئاڤەدانیێ و گەشەپێدانێ بدەن».
كاردینال (لویس ساكۆ) رۆهنكر ژی» هندەك قانوونێن كەڤن یێن هەین كار پێ دهێتە كرن، بەلێ ئەم یێن د سەردەمەكێ ب لەزدا، ب هەمان شێوە ئەو پاشگەرایەتییا هەی، نە موسلمان، نە جوهی و نە مەسیحی بخوەڤە ناگریت، كێشە د ژ ئایینان نینە، بەلكو كێشە د كارئینانا ئاییناندا یا هەی، ژ پێخەمەت ئارمانجێن سیاسی و ئابووری».
هەڤدەم دیاركر ژی» خودایێ مەزن ئەم یێن دروستكرین، بۆ وێ چەندێ خوشك و برابین و ب ئاشتی و خوەشی بژین، نەك هەڤدو بكوژین، هەتا نوكە ژی د جیهانا مە یا ئەڤرۆ دا ئاشتی یا پێدڤی و گرنگە، ل ڤێ دەڤەرێ گەلەك مللەت ئازاران دبەن ژئەگەرێ شەڕ و ململانێ».
ل دوماهیێ گۆت» مە پاپا فرەنسیس ژ دەستدا كو كەسایەتییەكێ نایاب بوو، هەروەسا ئەو دەنگەك بوو بۆ روو ب رووبوونا شەڕی و دانوستاندنێن ئاشتیێ».