دوهی چارشەمبی 23/4/2025، ب دەستپێشخەری و بەرهەڤبوونا سەرۆك مەسعود بارزانی و نێچیرڤان بارزانی، سەرۆكێ هەرێما كوردستانێ و مەسرور بارزانی، سەرۆكێ حوكمەتا هەرێما كوردستانێ، هەروەسا هەژمارەكا مەزن ژ بەرپرسێن بلند و سەركردەیێن ئیراقێ و هەرێما كوردستانێ و جیهانێ، پەرلەمانتارێن وەلاتێن جیهانێ و نوونەرێن حوكمەتان ژ ئەمریكا و ئۆرۆپا و رۆژهەلاتا ناڤین، ل بن درووشمێ ( بەر ب ئێكبوونێ د باوەریێدا)، رۆژا لاڤایا نیشتمانی ل هەولێرا پایتەختێ هەرێما كوردستانێ ب رێڤەچوو.
د رێوڕەسمیدا سەرۆك بارزانی پەیڤەكا گرنگ پێشكێشكر و راگەهاند: ئەڤە جارا ئێكێیە كۆمبوونەكا ب ڤی شێوەی ل هەرێما كوردستانێ دهێتە رێكخستن و مەبەست ژێ ئەوە كو جیهان ئاشنا ببیت ب وی كەلتوورێ زەنگین یێ ل كوردستانێ هەی و ژ گەڤندا ئەو كەلتوورە ل كوردستانێ هەبوو، ئەو ژی كەلتوورێ پێكڤەژیانێ و هەڤدو قەبوولكرنێ و ئازادییا رادەربڕینێ و ئایینی و مەزهەبی.
سەرۆك بارزانی ئاماژە ب وێ چەندێ ژی كر» خودێ پەرستی خالەكا هەڤپشكە بۆ كۆمكرنا ئایینێن جودا، حەق ناهێتە جوداكرن، گەلەك رێك بۆ گەهشتن ب حەقیێ یێن هەین و هەموو ئایینێن پیرۆز كو راستییا وەحدانییەتا خودای قەبوولە، هەموو ل دووڤ وێ راستیێدا د گەریێن و پێدڤییە رێز ل هەموویان بهێتە گرتن، جەوهەرێ دینی ژی ئەخلاقە».
د پشكەكا دی یا پەیڤا خوە دا سەرۆك بارزانی ئاماژە ب وێ چەندێ كر: ل دەستپێكا دەستهەلتا مەشیخەتا بارزان ب رێبەرییا عەبدولسەلامێ بارزانی و شێخ ئەحمەدێ بارزانی، رێزگرتن ل ئایینێن جودا و هەڤدو قەبوولكرن پشكەكا سەرەكییا بیروباوەرێن مە بوو.
ئەڤە ژی دەقێ پەیڤا سەرۆك بارزانی یە:
بەری دەست ب پەیڤا خوە بكەم، دخوازم جارەكادی رابگەهینم، هەڤپشكێ هەموو مرۆڤدۆستانین ل جیهانێ بۆ ژ دەستدانا مرۆڤەكێ مەزن یێ ئاشتیخواز و مرۆڤدۆست، ئەوژی قەداسەتا پاپای.
ئەڤە جارا ئێكێیە كۆمبوونەكا ب ڤی شێوەی ل كوردستانێ دهێتە رێكخستن و مەبەست ژێ ئەوە كو جیهان ئاشنا ببیت ب وی كەلتوورێ زەنگین ئەوێ ل كوردستانێ هەی و ژ گەڤندا ئەو كەلتوورە ل كوردستانێ هەبوو، ئەوژی كەلتوورێ پێكڤەژیان و هەڤدوقەبوولكرنێ و ئازادییا رادەربڕینێ و ئایینی و مەزهەبی.
ئەو كەلتوورەیە كو ئەم شانازیێ پێ دكەین و داكۆكیێ ژی دكەین كو دێ بەردەوام بیت ل سەر وێ رێكێ. هیڤیدارم كو ئەڤ كۆمبوونە هاریكار بیت بۆ وێ چەندێ ئەو برایەتییە و ئەو پێكڤەژیانا ل كوردستانێ هەی ب هێزتر و بەرفرەهتر ببیت.
خودێ پەرستی خالەكا هەڤپشكە بۆ كۆمكرنا ئایینێن جودا، حەق ناهێتە جوداكرن، گەلەك رێك بۆ گەهشتن ب حەقێیە یێن هەین و هەموو ئایینێن پیرۆز كو راستییا وەحدانییەتا خودای قەبوولە، هەموو ل دووڤ وێ راستیێ د گەریێن و پێدڤییە رێز ل هەموویان بهێتە گرتن، جەوهەرێ ئایینی ژی ئەخلاقە.
رۆمی دبێژیت» حەق وەكو گۆپیتگا چیایە، چەندین رێك بۆ گەهشتن ب گۆپیتگێ یێن هەین، بەلێ ئارمانج ئێكە، ئەوژی گەهشتن ب حەقیێ.
ل دەستپێكا دەستهەلاتا مەشیخەتا بارزان ب رێبەرییا شێخ عەبدولسەلامێ بارزانی و شێخ ئەحمەدێ بارزانی، رێزگرتن ل ئایینێن جودا و هەڤدو قەبوولكرن پشكەكا سەرەكییا بیر و باوەرێن مە بوو، ئەڤە ژی پشتبەستنە ب فەرموودەیا خودایێ مەزن كو ل قورئانا پیرۆز دبێژیت : بسم الله رحمن الرحیم (ێا أَیُّهَا النَّاسُ إِنَّا خَڵقْنَاكُم مِّن ذكَرٍ ۆأُنثیٰ ۆجَعَلْنَاكُمْ شُعُوبًا ۆقَبَائِڵ لِتَعَارَفُوا إِنَّ أَكْرَمَكُمْ عِندَ اللَّهِ أَتْقَاكُمْ).
ئەڤە ئایەتەكا قورئانا پیرۆزە و رێنیشاندەرە بۆ وێ چەندێ چاوان ئەم ل سەر وێ بیروباوەرێ بەردەوام بین كو ئەوژی پێكڤەژیانە و هەڤدو قەبوولكرنە.
ب درێژییا دیرۆكێ، دەمێ هێرش ل سەر كوردستانێ دهاتە كرن، زۆرداران هیچ فەرق و جوداهییەك د ناڤبەرا موسلمانان و مەسیحی و ئێزدییان نەدكر و هەموو گوندێن وان د سوتن، هەموو د هاتنە دەربەدەركرن، هەموو د هاتنە كۆمكوژكرن، بن ئاخكرن. ل دوماهیێ ژی ل شەڕێ داعشێ كو جوداهی نەكر د ناڤبەرا موسلمانان و مەسیحی و ئێزدییان و تاوانێن گەلەك مەزن ئەنجامدان. د بەرانبەر وێ چەندێ دا پێشمەرگەیێن قەهرەمان ب گیانفیداییەكا بێ وێنە بەرگری ژ هەموویان كر و ئەفسانەیا داعشێ شكاند، بەلێ ب باجەكا گەلەك گەلەك مەزن ئەوژی نێزیكی 12 هزار شەهید و برینداران.
بلا ئەڤە دەستپێكەك بیت بۆ ژ نوكە و وێڤە كو ئەڤ جۆرە كۆمبوونە بهێنە ئەنجامدان، بۆ وێ چەندێ ئەم هەموو بزانین بەری هەموو تشتەكی، ئەم هەموو بەندێن خودای نە و د مرۆڤایەتیێدا ئەم هەموو خوشك و برایێن هەڤدوینە. ب هەڤدو قەبوولكرنێ، ب ڤیانێ، دشێین ب خوەشی ئەم هەموو پێكڤە بژین، بەلێ ب زۆرداری، نە زۆردار دشێت ئارام بیت، نە یێن زۆرلێكری دشێن ئارام ببن.
راسپاردە و شیرەتێن هەموو پێغەمبەران ژی ئەو بوو كو دەستێ برایەتیێ بۆ هەڤدو درێژ بكەن، شیرەتتا پێكڤەژیانێ كریە.
ئێدی ل دوماهیێ ئەز داخواز ژ خودایێ مەزن دكەم كو هیدایەتا هەموو ئالییەكی بدەت، ئاشتی ل دەڤەرێ و ل هەموو جیهانێ بەرقەرار بیت.
دخوازم دەمەكێ خوەش ل كوردستانێ ببۆرینن و ئەم شانازیێ دكەین و جارەكادی ب خێرهاتنەكا گەرم ل هەوە هەموویان دكەم. سوپاسییا وان هەموو بەرێزان ژی دكەم كو ئەڤ كۆمبوونە رێكخستی.

سەرۆكێ هەرێما كوردستانێ دوپاتكر: كوردستان هەردەم دێ نیشتمانێ فرەهی، پێكڤەژیان، هەڤدوقەبوولكرن، لێبۆرین، د هەڤدوگەهشتنێ و ئاشتیێ، مینیت.
دوهی چارشەمبی 23/4/2025، نێچیرڤان بارزانی، سەرۆكێ هەرێما كوردستانێ د رێوڕەسمێ رۆژا لاڤایا نیشتمانی ل هەولێرێ، پەیڤەك پێشكێش كر و تێدا گۆت» هیڤیدارین ئەڤ رۆژە ببیتە نەریتەكێ سالانە كو كەلتوورێ ئێكگرتنێ، لێبۆرینێ، هەڤدوقەبوولكرنێ و پێكڤەژیانا ئاشتییانە ب هێز بكەت و هاریكار و پشكدار بیت د بەفرەهتركرنا پرێن باوەریێ د ناڤبەرا جڤاكیدا. هەروەسا ببیتە دەنگێ هەموو ئەوێن باوەری ب ئاشتیێ هەی، وەك هەڤپشك و بەرپرسیارەتی.
سەرۆكێ هەرێما كوردستانێ رۆژا لاڤایا نیشتمانی ل كوردستانێ ب پێنگاڤەكا جدی بۆ زێدەتر چەسپاندنا كەلتوورێ هەڤدوتێكگەهشتنێ و رێز ل هەڤدوگرتنێ هەژمارت و باس ل وێ چەندێ كر» هەروەسا پەیامەكە ژ كوردستانێ بۆ جیهانێ كو دبێژیت، فرەهی گەف نینە، بەلكو ژێدەرێ زەنگینیێیە و جڤاك دشێن ب ئارامی، پێكڤە بژین دەمێ ل سەر باوەریێ و ڤەكرنێ، دهێتە ئاڤاكرن».
سەرۆكێ هەرێما كوردستانێ دیاركر ژی» ب درێژییا سالان، هەرێما كوردستانێ سەلماند كو نموونەیەكا واقعییە ژ رێزگرتنێ ل فرەهیێ و پاراستنا ئازادیێن ئایینی و دروستكرنا ژینگەهەكا ئارام بۆ هەموو پێكهاتەیێن جودا ژ هەر ئایین و نەتەوەیەكی بن».
هەروەسا دوپاتكر» كوردستان بۆ هەردەم ب نیشتمانێ فرەهیێ، پێكڤەژیانێ، هەڤدوقەبوولكرنێ، لێبۆرینێ، هەڤدوگەهشتنێ و ئاشتیێ دێ مینیت».
بەرچاڤكر ژی» ل دەستپێكا سالێن دو هزارێ، مخابن پێلەكا توندوتیژیێ بەرامبەر هەڤوەلاتیێن مەسیحی و خەلكێ سوننی ل جهێن دی یێن ئیراقێ دەستپێكر، ئەو هاتن ل هەرێما كوردستانێ ئاكنجیبوو. ل ڤێرێ ل هەرێما كوردستانێ ل لاندكا لێبۆرینێ و پێكڤەژیانێ، پێشوازی لێهاتە كرن و هاتنە حەواندن».
گۆت ژی» هەموو ئەو كارە ل سەر فەرمانا راستەوخوەیا سەرۆك مەسعود بارزانی هاتنە ئەنجامدان. وەلێهات هەرێما كوردستانێ پێشوازی ل زێدەتر ژ دو ملیۆن ئاوارە و پانەبەران بكەت. رێژەیا ئاكنجیێن هەرێما كوردستانێ زێدەتر ژ 33% زێدەكر. نوكە ژی نێزیكی ئێك ملیۆن ئاوارە و پەنابەر یێن هەین».
دیاركر ژی» خوەشبەختانە نە وی دەمی و نە نوكە هیچ كێشە و روودانەكا ئەمنی و جڤاكی روونەدایە، نوكە ژی ئەوێن زڤرینە جهێن خوە، بیرئینانێن خوەش ل هەرێما كوردستانێ یێن هەین و بەردەوام ب سەرەدان دهێنە ڤێرێ».
نێچیرڤان بارزانی د پەیڤا خوە دا رۆهنكر ژی» ب هێزكرنا ئاشتیێ ژێدەرێ وێ ژ باوەرییا ب هێز ب بهایێ مرۆڤی و ب رێزگرتنێ ل شكۆیا مرۆڤایەتیێ بێی جوداهی، ئەڤ بهایە دەمێ تمام جهگیر دبن كو ژ سیاسەتێن گشتی، پەروەردە، دادپەروەری و هاریكارییا د ناڤبەرا ئایین و كەلتووراندا، پشتەڤانی هەبیت و ب باوەری كار بۆ بهێتە كرن. ئەم ژی ل هەرێما كوردستانێ، ب جدی و بێ راوەستییان، دێ كاری بۆ كەین» .
سەرۆكێ هەرێما كوردستانێ راگەهاند ژی» هەڤخەمییا خوە دیاردكەین بۆ وەغەركرنا قەداسەتا پاپا فرەنسیسی كو نمووینەیەك بوو ژ ڤەكرنا راستەقینە، ئەم هەموو لاڤایان بۆ دكەین و
گیانێ وی شاد بیت».
نێچیرڤان بارزانی باسێ سەرەدانا پاپایێ ڤاتیكانێ بۆ هەرێما كوردستانێ كر ل سالا 2021 و گۆت» قەداسەتا پاپای، ب سەرەدانەكێ بۆ هەرێما كوردستانێ ل سالا 2021، ئەم شەرەفمەند كرین. ئەو سەرەدانە وەكو روودانەكا دیرۆكی د بیرەوەرییا هەموو پێكهاتەیێن گەلێ كوردستانێدا دێ مینیت و دێ هەردەم جهێ شانازییا مە بیت. میراتی وی، وەكو چرایەك بۆ ئاشتیێ و لێبۆرینێ بەردەوام دناڤ مە و هەموو جیهانێدا، دێ بەرهەڤ بیت».

مەسرور بارزانی، سەرۆكێ حوكمەتا هەرێما كوردستانێ، ل رۆژا لاڤایا نیشتمانی ل كوردستانێ، ل باژێرێ هەولێرێ پەیڤەك پێشكێش كر.
سەرۆكێ حوكمەتا هەرێمێ د پەیڤا خوە دا ب خێرهاتنا گەرم یا مێهڤانێن رێوڕەسمێن رۆژا لاڤایا نیشتمانی ل كوردستانێ كر و گۆت» ل دەستپێكا شارستانییەتێ، كوردستان هێڤێن و جهێ شارستانییەت و نەتەوەیێن جودا بوویە».
مەسرور بارزانی گۆت ژی» د دیرۆكا مە یا نوو دا خەلكێ مە بێی ل بەرچاڤ وەرگرتنا جوداهیێن نەژادی و نەتەوەیی، روو ب روویێ چەندین ئاستەنگان بووینە ژ دەستێ رژێما بەرێ یا سەدام حسێنی. وی جوداهی نەكر، د ناڤبەرا كورد، عەرەب، توركمان، ئاشووری و ئەرمەنییان. نە د ناڤبەرا موسلمان، مەسیحی و ئێزدییاندا ژی».
سەرۆكێ حوكمەتا هەرێما كوردستانێ دوپاتكر ژی» حوكمەتا هەرێما كوردستانێ یا پێگیرە بۆ پێشڤەبرنا وان ئەركێن پیرۆز و نووكرنا باژێر و باژێركێن وێرانكری و د هەمان دەمدا پێشڤەبرن ب ئازادییا ئایینی و پێشڤەبرن ب پێڤەییا ئایینی و زەمینەسازیێ بۆ ئاشتیێ ل هەر جهەكێ ڤی نیشتمانی».
مەسرور بارزانی ئاماژە بۆ وێ چەندێ ژی كر» حوكمەتا هەرێما كوردستانێ ب كاراییڤە كاری بۆ دروستكرنا مزگەفت، كەنیسە و پەرستگەهێن زێدەتر دكەت بۆ وێ چەندێ هەموو هەڤوەلاتی بشێن ب ئازادی ئایینێن خوە پەیڕەو بكەن. پەروەدرێ ب هەمان شێوە رۆلەكێ كاریگەر یێ هەی د دارێشتنا پاشەڕۆژا پێكڤەییێ».
سەرۆكێ حوكمەتا هەرێما كوردستانێ دیاركر ژی» ل پەرلەمانی، حوكمەتێ و هەموو دامودەزگەهێن حكومی یێن هەرێما كوردستانێ، هەموو پێكهاتە و ئایینان نوونەرێن خوە یێن هەین و ب شێوەی دێ بەردەوام بین».
مەسرور بارزانی دوپاتكر» فرەكەلتووری ئاستەنگ نینە، بەلكو هێزە. هێزێ د بەخشیت بۆ ئاڤەدانكرنا كوردستانەكا گەشتر و پێشكەفتی».

ل رێوڕەسمێ (رۆژا لاڤایا نیشتمانی) ل هەولێرا پایتەخت میر حازم تەحسین بەگ، میرێ ئێزدییان، پەیڤەك پێشكێشكر و تێدا راگەهاند: ئاشكرایە كو ئەزموونا دیموكراسی ل هەرێما كوردستانێ كاریگەرییەكا باش ل سەر هەڤوەلاتیێن هەرێما كوردستانێ هەبوو، كو ئەوژی بەرهەمێ شۆڕەشا مللەتەكی بوو.
میر حازم تەحسین بەگ، میرێ ئێزدییان گۆت ژی» ئەڤ ئەزموونا دیموكراسی یا رێكخوەشكەر بوو بەرامبەر هەموو پێكهاتەیان بۆ پشكداریكرنێ د حوكمەت و پەرلەمانیدا و بكارئینانا مافێن مافێن خوە یێن دستووری و بەرهەمێ ئەڤێ ئەزموونێ شیا وەبكەت ئێزدی بگەهنە دەستهەلاتا بجهئینانێ و قانووندانانێ» .
میرێ ئێزدییان گۆت ژی» ئێزدی شیان ئەزموونا ژیانا خوە بكەن ب شێوەیەكیچ باشتر كو ئەو ژی ل بن سیبەرا سەركردایەتییا حەكیمانەیا سەرۆك مەسعود بارزانی و كارێن وی د رێكخوەشكەر بوون بۆ پێشڤەبرنێ ب برایەتیێ و پێكڤەژیانێ و پەیداكرنا دەلیڤەیێن گشتی كو جهێ مە هەموویان تێدا هەبیت و هەرێما كوردستانێ جهێ هەموو ئایینایە».

دوهی چارشەمبی 23/4/2025، زانكۆیا ییل یا ئەمریكی كۆنگرەیەك ل دۆر دیرۆكا جینۆسایدێ وكۆمكوژیێ دژی كوردان ل سەر دەستێ رژێما بەعس سازكر، كو ڤەكرنا فەرمی یا كۆنگرەیێ ب پەیامەكا سەرۆك مەسعود بارزانی بوو كو ژ ئالیێ د. محەمەد ئحسان، مامۆستایێ قانوونا نێڤدەولەتی ل زانكۆیا ییل و سەرپەرشتێ ئەكادیمیێ كۆنگرەی، و پەیڤەكا تۆماركری یا مەسرور بارزانی، سەرۆكێ حوكمەتا هەرێما كوردستانێ دەستپێكر، كو تێدا سەرۆكێ حوكمەتا هەرێمێ باس ل كارەستا جینۆسایدێ كر ئەوا دژی گەلێ كورد ل بن ناڤێ (ئەنفال)ل سەر دەستێ رژێما بەعس هاتیە ئەنجامدان.
كۆنگرەیێ ناڤبری ب بەرهەڤبوونا هەژمارەكا كەسایەتیێن بەرچاڤ ژ ئەكادیمی و چالاكڤان و نوونەرێن پارتی دیموكراتی كوردستان ژوان ژی عەباس غەزالی، شیرەتكارێ هونەری یێ پارتی و ئەندامێ بەرێ یێ پەرلەمانێ كوردستانێ ل زانكۆیا ییل ل باژێرێ نیوهیفین ل ویلایەتا كونیتیكت یا ئەمریكی هاتە سازكرن.

سەرۆكێ حوكمەتا هەرێما كوردستانێ ل گەل شاندەكێ ئەمریكی دوپاتی ل گرنگییا پێكئینانا كابینەیا نوو یا حوكمەتا هەرێما كوردستانێ و هنارتنا پەترۆلا هەرێمێ كر.
دوهی چارشەمبی 23/4/2025، نڤیسینگەها سەرۆكێ حوكمەتا هەرێما كوردستانێ د بەیاننامەیەكێدا راگەهاند» مەسرور بارزانی، سەرۆكێ حوكمەتا هەرێما كوردستانێ، پێشوازی ل شاندەكێ ئەمریكی كر ب سەرۆكایەتییا رایلی بارنس، بەرپرس ل نڤیسینگەها دیموكراسی و مافێن مرۆڤی ل وەزارەتا دەرڤەیا ئەمریكی».
د بەیاننامەیێدا هاتیە ژی» د دیدارێدا كو ستیڤ بیتنەر، قۆنسلێ گشتیێ ئەمریكا ل هەرێما كوردستانێ تێدا بەرهەڤ بووی، شاندێ ئەمریكی خوەشحالییا خوە ب پشكداریكرنێ د رۆژا لاڤایا نیشتمانیدا ل كوردستانێ دیاركر».
هەر د وێ دیدارێدا رەوشا پێكڤەژیانا ئاشتییانە و ئازادییا ئایینی ل هەرێما كوردستانێ هاتە گەنگەشەكرن.
د پشكەكا دی یا كۆمبوونێدا، دوپاتی ل گرنگییا پێكئینانا كابینەیا نوو یا حوكمەتا هەرێما كوردستانێ و هنارتنا پەترۆلا هەرێما كوردستانێ د زووترین دەمدا، هاتە كرن.