ئامێدیێ، مەحمود نهێلی:

ب هەلكەفتا دەستپێكرنا هەوا ئەنفالان و ل ژێر چاڤدێری و بەرهەڤبوونا سەربەست لەزگین، بەرپرسێ مەكتەبا رێكخستنا پاریزگەها دهۆكێ و ب بەرهەڤبوونا سەباح بەیتۆللا، هاریكارێ بەرپرسێ مەكتەبا رێكخستنێ‌ و بەرەڤان حەمدی، بەرپرسێ لقێ هەژدە یێ پارتی و د. نافسەر عەبدال، بریكارێ وەزارەتا شەهـید و ئەنفالكریان ل ژێر درووشمێ (شەهـید نامرن)، دوهی 14/4/2025 پەردە ل سەر پەیكەرێ شەهـیدان (موسا محەمەد ئەمین بامەرنی، حازم فەتاح بامەرنی) ل سەنتەرێ ناوچەداریا بامەرنێ هاتە لادان، هەروەسا پەردە ل سەر پەیكەرێ شەهید (محەمەد حەمدی) ل گوندێ وەرملێ هاتە لادان.
د رێورسمان دا چەندین پەیڤ هاتنە خواندن و تێدا ئاماژە ب رۆلێ ڤان شەهیدان هاتە كرن د پاراستنا خاك و نیشتیمانی خوە دا و هەتا دووماهیێ گیانێ خوە كریە قوربانی گەل و وەلاتێ خوە، هەروەسا ئاماژە كرە هەوێن ئەنفالێن رەش یێن دژی مللەتێ كورد هاتینە كرن ژ لایێ رژێما بەعسا ئیراقێ ڤە، كو تێدا پتر ژ 182 هزار كەس هاتنە شەهیدكرن و بێ سەروشوون كرن.
ئەڤ شەهیدێن ل بامەرنێ پەكەر بۆ هاتینە دروستكرن، ل سالا 1981 دەمێ هێرش بریە سەر لەشكرێ ئیراقێ ل دەڤەرا سپنەی، مەفرەزا وان ئاشكرا دبیت، د كەڤنە بۆسەیەكا لەشكرێ ئیراقێ‌ دا و پتر ژ شەش دەمژمێران شەڕی ل گەل هەژمارەكا زۆرا لەشكرێ ئیراقێ دكەن، پشتی خلاسبوونا چەكێ وان و داكو ب ساخی نەكەڤنە دەستێ حكومەتێ دا، هەر ئێك ژ وانا ب فیشەكەكێ داویێ ب ژیانا خوە دئینیت شەهید دبن و دگەهنە كاروانێ نەمران.
هەر دوهی و ب هەلکەفتا سالڤەگەرا ئەنفالان روفاتێن حەفت شەهیدێن ئەنفالان ژ خەلکێ مێرگەتیێ هاتنە ڤەگوهاستن بۆ گوندەکێ دەڤەرێ و دروستکرنا مینومێنتەکێ بۆ شەهیدێن ئەنفالان.

هەولێر، قائید میرۆ:

رێڤەبەرێ گشتیێ چاكسازیێن هەرێما كوردستانێ ئاشكراكر، پڕۆژەقانوونا لێبۆرینا گشتی یا بەرهەڤە و پشتی كارابوونا پەرلەمانێ كوردستانێ، دەنگ ل سەر دێ هێتەدان و دبێژیت: پشتی دەرئێخستنا قانوونا لێبۆرینا گشتی، دو هزار زیندانی دێ مفاداربن و هێنە ئازادكرن.
ئیحسان بابان، رێڤەبەرێ گشتیێ چاكسازیان ل هەرێما كوردستانێ بۆ رۆژناما ئەڤرۆ دیاركر، ل هەرێما كوردستانێ شەش چاكسازی هەنە، دو ژ وان ل سلێمانیێ و دو چاكسازی ل دهۆكێ و دو چاكسازی ل پارێزگەها هەولێرێ نە و گۆت: «پێنج هزار و 700 زیندانی پشتی سزایێ وان هاتیە دیاركرن، د ناڤا چاكسازیێن هەرێما كوردستانێ دا ژیانا خۆ دەرباز دكەن، پڕۆژەقانوونا لێبۆرینا گشتی هاتیە بەرهەڤكرن و نوكە ل سەرۆكایەتیا جڤاتا وەزیرانە، پشتی كاراكرنا پەرلەمانی بۆ پەرلەمانێ كوردستانێ دێ هێتە هنارتن ب مەرەما پەسەندكرنێ».
ئیحسان بابان گۆتژی: «پشتی پەسەندكرنا پڕۆژەقانوونا لێبۆرینا گشتی، دو هزار زیندانی دێ‌ ژێ‌ مفاداربن و هێنە ئازادكرن، لەوڕا نوكە حوكمەت چاڤەڕێی كاراكرنا پەرلەمانیە، هەتا ئەو پڕۆژە بچیتە پەرلەمانی و ببیتە قانوون و دەنگ ل سەر بهێتەدان، چونكی مەرجێن قانوونا لێبۆرینا گشتی دێ وان زیندانیان ڤەگرن».

دهۆك، لەزگین جوقی:

ئولدارەكێ ئێزدیان بۆ ئەڤرۆ دیاركر، سوبەهی 16/4/2025 جەژنا سەرێ‌ سالا ئێزدیانە و كەڤنترین جەژنا ئێزدیانە، كەڤناتیا وێ دزڤڕیتە دەستپێكا ئافراندنا كنیاتێ، ئەڤ جەژنە دەستپێكا سالا نوویە، د ڤێ جەژنێ دا چەندین رێورەسم دێ هێنە كرن، ل پەرستگەها لالشێ‌ فەتیل و چرا دێ‌ هێنە هەلكرن، هەمی مالێن ئێزدیان هێكان دكەلینن و رەنگاورەنگ دكەن و خێر و خێراتان ل سەر ئێك و دو بەلاڤ دكەن، ئێزدی بووكا ناڤەگوهێزن، چونكی نیسان بخۆ بووكا سالێیە، ب جوانترین رەنگ وخەمل یا خەملاندیە، لەو چو بووكا دسەر خۆ دا قەبوول ناكەت.
خەواجە خەتاری، ئولدارێ ئێزدیان ئاشكرا ژی كر، ژ بەر پووتە پێدانا ئێزدیان ب سروشتی ژ بۆ پاراستنا گژ و گیا و هەمی رووەكان، ئێزدی د مەها نیسانێ دا جۆتی ناكەن و ئەردی ناكۆلن و گۆت: «هەمی كابانیێن مالان قەفتەكا كۆلیلكێن نیسانێ و گیایێ بێنافێ‌ دگەل قالكێن هیكێن رەنگاورەنگ ب هەڤیری و هندەك ئاخێ‌ ب سەر دەریێ مالان و خانیان ڤەدكەن».
زێدەتر گۆت: «رەنگكرنا هێكێ رامانا خەملینا ئەردی ددەت و شكاندنا هێكێ نیشانا پژقینا دۆڕێیە و كەلاندنا هێكێ نیشانا مەیین و جەبرینا ئەردییە.
خەتاری ئەو ژی خویا كر، رۆژا پشتی جەژنێ شڤان بەری نیڤرۆ پەزی دهیننە دەهنی و بێریڤان ب پارزوونكێن خۆ و خەلاتێ شڤانی ڤە دچنە بێریێ، دەمێ گەهنە شڤانێ پێكڤە دچنە شڤانێ و گوپالێ وی قەد قەد دكەن، وان قەدا ل سەر ئێك و دو دا بەلاڤ دكەن، ئەڤە رامانا وێ بۆ خێر و بەرەكەتێ یە و پاشی شڤانی خەلات دكەن و دەمێ بێریڤان دزڤڕنە مال هەر ئێك ژ وان وێ قەدا گۆپالی ب مەشكا خۆ ڤە دكەن، دیسا هەر مالەكا ئێزدی 50 هەتا 200 هێكان دكەلینیت و رەنگاورەنگ دكەت.

زاخۆ، دلۆڤان هالۆ:

ل ناوچەداریا بێگۆڤا یا سەر ب دەڤەرداریا باتیفا ڤە تیمەكا بەرگرییا شارستانی هاتە ڤەكرن.
موقەدم جەمال هەسن، ڕێڤەبەرێ بەرگرییا شارستانی ل زاخۆ بۆ ڕۆژناما ئەڤرۆ دیار كر كو ب مەرەما پاراستنا سەر و سامانێ وەلاتیان ژ ڕوودانێن نەچاڤەڕێكری، دیسا ژ بەركو دووراتی د ناڤبەرا دەڤەرداریا باتیفا و ناوچەداریا بێگۆڤا دا هەیە، وان ب فەر زانی تیمەكا بەرگرییا شارستانی ل ناوچەداریا بێگۆڤا ڤەكەن.
ناڤهاتی گۆت: «ل وەرزێ هاڤینێ دێ تیمەكا نقوومڤانێن شارستانی ژی ل بێگۆڤا دانین، دیسا مە ل بەرە ل داهاتی بنگەهەكێ بەرگرییا شارستانی ژی ل ڤێ ناوچەداریێ‌ ڤەكەین».

زاخۆ، دلۆڤان هالۆ:

ڕێڤەبەرییا هاتنوچوونا ئیدارا سەربخۆ یا زاخۆ دیار كر كو ژ بۆ بەرژەوەندییا گشتی و پاراستنا گیانێ وەلاتیان ژ ڕوودانێن هاتنوچوونێ، ئەڤرۆ 15/4/2025 كامیرەیێن ڕادارێن پۆینت تۆ پۆینت ل جاددەیا سەرەكی یا دهۆك بۆ زاخۆ، ل جاددەیا سەرەكی یا قادییا ژ تۆنێلا گەلیێ زاخۆ بۆ فلكا سحێلا ئەوێن هاتینە دانان، ب شێوەیەكێ فەرمی دێ كەڤنە كاری.
هاتنوچوونا زاخۆ ئاماژە ب وێ چەندێ ژی كر، لەزاتیا جاددەیێ بۆ تڕۆمبێلێن تایبەت 100 كیلۆمەتر و بۆ تڕۆمبێلێن بارهەلگر ژی 80 كیلۆمەتر د دەمژمێرەكێ دا هاتییە دەستنیشان كرن، هیڤییە وەلاتی و شۆفێر پێگیر بن ب ڕێنمایێن هاتنوچوونێ ژ بۆ سلامەتییا گیانێ وان ژ ڕووودانێن هاتنوچوونێ.