ب هـەلكەفتا 64 سالیا بەرپابوونا شۆڕشا ئیلۆنێ، لقێ‌ ئێك یێ‌ پارتی خیڤەتگەها 11ی ئیلۆنێ‌ ل بابلۆ راێكخستیە و ب ڤێ‌ هەلكەفتێ‌ سەربەست لەزگین، ئەندامێ مەكتەبا سیاسی یا پارتی و بەرپرسێ مەكتەبا رێكخستنا پارێزگەها دهۆكێ ب ئامادەبوونا حەمید عەلی و د. ڤیان سلێمان و سەباح بەیتوللا، ئەندامێن كۆمیتا ناڤینا پارتی و هاریكارێن بەرپرسێ مەكتەبا رێكخستنێ و د. نەوزاد عەبدۆللا، بەرپرسێ لقێ ئێك یێ پارتی سمینارەك بۆ قوتابیێن خیڤەتگەهـا 11ی ئیلۆنێ‌ ل بابلۆ پێشكێشكر.
سەربەست لەزگین د سمینارا خۆ دا گۆت: «شۆڕشا 11ی ئیلۆنێ‌ ب رێبەریا بارزانیێ نەمر مەزنترین شۆڕشا نیشتیمانی و نەتەوەیی یە د دیرۆكا گەلێ كوردستانێ دا، شۆڕشا ئیلۆنێ‌ بناغەكێ موكمێ بزاڤا رزگاریخوازا كوردستانێ یە و فاكتەرێ خۆڕاگریێ و بەرخودانێ و ڤەژاندنا كوردایەتیێ و قوتابخانەیا كورد پەروەریێ و فیداكاریێ و دیموكراسیێ‌ یە».
گۆتژی: «شۆڕشا ئیلۆنێ بەرگریكرن بوو ژ دەستكەفتێن مللەتێ كورد، ئەڤێ شۆڕشێ ل هەمبەری بزاڤێن كوردی یێن بەری خۆ جوداهیەكا مەزن هەبوو، چونكی شۆڕشەكا سەرانسەری بوو و هەمی تەخ و چینێن مللەتێ كوردستانێ تێدا پشكداربوون، دیسا دەما بیرهاتنا شۆڕشا ئیلۆنێ‌ دكەینەڤە، بیرهاتنەڤا دەستكەفت و سەروەریێن مەزن دكەینەڤە بۆ گەلێ كوردستانێ و بیرهاتنەڤا دادپەروەریا رێبازا پیرۆزا بارزانی و دەستكەفتێن وێ دكەین».
دیسا هەر ب هەلكەفتا 64 سالیا دەستپێكرنا شۆڕشا ئیلۆنێ‌ شاندەكێ مەكتەبا رێكخستنا پارێزگەها دهۆكێ سەرەدانا دەزگەهێ ئەیلۆل و گولانێ و هێزا خەبات و كۆمەلەیا شەهـیدێن زیندی كر.

ئامێدیێ، مەحمود نهێلی:

بەهرام عریف یاسین، بەیرسێ لقێ 18 یێ پارتی ل ئامێدیێ‌ ب هەلكەفتا 64 سالیا دەستپێكرنا شۆڕەشا مەزنا ئیلۆنێ و د رێورەسمێن بەخشینا شەرەفا ئەندامەتیێ ب 140 پالێوراوان ل سەنتەرێ دەڤەردارییا ئامێدیێ، د پەیڤەكێ‌ دا بەحسێ ئەگەر و گرنگیا شۆڕەشا مەزنا ئیلۆنێ ب رێبەریا بابێ روحی یێ نەتەوا كورد بارزانیێ نەمر كر، وەكو ئێكەم شۆڕەشا سەرانسەری و نیشتیمانی، كو هەموو ئول و نەتەوە و پێكهات ل هەر چار پارچەیێن كوردستانێ تێدا پشكداربوون.
ناڤهاتی خویا ژی كر، فیدرالیەتا هەرێمێ بەرهەمێ شۆڕەشا ئیلۆنێ و خەباتا پارتی و پێشمەرگە و خوینا شەهیدێن كوردستانێ یە ب رێبەریا جەنابێ سەرۆك بارزانی و گۆت: «پاراستنا ڤی كیانێ دەستووری ئەركێ مە هەموویانە، دیسا بەحسێ‌ گرنگیا هەلبژارتنێن پەرلەمانێ ئیراقێ و رۆلێ ئەندامێن نوو و بەرهەڤبوویان بۆ پشتەڤانیكرنا پارتی كر».
گۆتژی: «پارتی مالا هەموویانە و باشترین و مسوگەرترین ڕێیە بۆ خزمەتا گەل و وەلاتی».

زنار تۆڤی:

رێڤەبەرێ بەرهەمئینانا كارەبا هەرێما كوردستانێ دیار كر، هەتا نوكە پتر ژ سێ‌ هزار موەلیدەیان هاتینە ڤەمراندن و سەنتەرێ هەموو پارێزگەهێن هەرێمێ بووینە خودان كارەبا 24 دەمژمێری.
فارس میرخان، رێڤەبەرێ بەرهەمئینانا كارەبا هەرێما كوردستانێ گۆت: «پشتی بجهئینانا پڕۆژەیێ رۆناهی ل هەرێما كوردستانێ، هەتا نوكە سێ هزار و 222 موەلیدە ل هەرێما كوردستانێ هاتینە ڤەمراندن، دێ د بەردەوام ژی بین و هەر جهێ كارەبا رۆناهی بگەهیتێ دێ موەلیدە هێنە ڤەمراندن و هەتا دووماهیا ئەڤ سالە دێ حەفت هزار موەلیدە هێنە ڤەمراندن».
گۆتژی: «ڤەمراندنا ئەوان موەلیدەیان دێ‌ كاریگەرییەكا زۆر باش ل سەر پاقژبوونا ژینگەها هەرێما كوردستانێ هەبیت».
رێڤەبەرێ بەرهەمئینانا كارەبێ‌ زێدەتر گۆت: «نوكە ل پارێزگەها هەلەبجە ب گشتی و سەنتەرێ پارێزگەهێن سلێمانیێ و هەولێرێ و دهۆكێ بووینە كارەبا 24 دەمژمێری و ل قەزا و ناحیان ژی دەست ب بجهئینانا وی پڕۆژەیی دهێتە كرن، بڕیارە هەتا دووماهییا هەیڤا 10 یا ئەڤ سالە 80% یا پڕۆژەیێ رۆناهی بهێتە بجهئینان و هەتا دووماهییا سالا بهێت، ل هەموو هەرێما كوردستانێ دێ هێتە بجهئینان».

رەمەزان زەكەریا:

باژێرڤانیا بەردەڕەشێ دەست ب چاندنا دار و كەسكاتیان‌ د ناڤ سەنتەرێ باژێڕی كریە و ئەڤ پڕۆژە دێ بەردەوم بیت هەتا هەموو جهێن پێدڤی ب دار و كەسكاتیان هەی لێ‌ بهێنە چاندن.
ئەندازیار سیروان حەسەن قادر، سەرۆكێ باژێرڤانیا بەردەرەشێ‌ بۆ ئەڤرۆ گۆت: «ب مەرەما پاراستنا ژینگەهێ و جوانكرنا باژێری، مە دەست ب چاندنا دار و كەسكاتیێ د ناڤ شوستە و رێكین ناڤخۆیی یێن بەردەڕەشێ دا كریە و ئەڤ پڕۆژە دێ بەردەوام بیت هەتا هەموو رێكێن ناڤخۆیی بهێنە كەسككرن».
ناڤبری گۆتژی: «ئەڤ پڕۆژە ل سەر پێشینەیا هەیڤانە یا سەرۆكاتیا باژێرڤانیا بەردەڕەشێ دێ هێتە بجهئینان، نوكە رێژەیا كەسكاتیێ د ناڤ سەنتەرێ بەردەڕەشێ دا وەك پێدڤی نینە و پشتی چاندنێ ژی تۆرێن ئاڤێ بۆ وان دار و كەسكاتیان دێ هێنە راكێشان».

زاخۆ، دلۆڤان هالۆ:

ئەندازیار سیزار شاكر، سەرپەرشتێ پڕۆژەیێ دەڤەرا پیشەسازی ل زاخۆ بۆ ڕۆژناما ئەڤرۆ دیاركر كو ل سەر ڕووبەرێ زێدەتری 800 دۆنەمێن ئەردی بۆ ئێكەم جار ل سەر ئاستێ كوردستانێ، دەڤەرەكا پیشەسازی یا مەزن ب ماستەرپلانەكا تایبەت ل گوندێ هێتیانێ ل سنۆرێ ناحیا ڕزگاری ل ئیدارا سەربخوە یا زاخۆ دهێتە دروستكرن.
سەرپەرشتێ پڕۆژەی، ئاماژە ب وێ چەندێ ژی كر كو ئەڤ دەڤەرا پیشەسازی ژ سەدەهان كارگەهێن جودا و عمبارێن سادە و ساركەر و پێشانگەهێن تڕۆمبێلان پێك دهێت، زێدەباری دروستكرنا مزگەفت و خوارنگەهـ و كافێ‌ و بنگەهێن ئاگرڤەمراندنێ.
ئەندازیار سیزار گۆت: «وەبەرهێنەرێن كوردستانێ و ژ دەرڤەی كوردستانێ دێ ژ ڤی پڕۆژەی مفادار بن و دێ وەبەرهێنانێ تێدا كەن، چونكی پڕۆژەیەكێ ستراتیژییە».