ب فەرمی شاندێ‌ فدراسیۆنا فوتبۆلا كەنداڤی پیکهاتیە ژ حەمەد بن خەلیفە سەرۆکێ فدراسیۆنێ و جاسم ئەلرومێحی ئەمیندارێ‌ گشتی و دو ئەندامێن فدراسیۆنێ‌ گەهشتنە باژێرێ‌ دهۆكێ‌ ژبۆ پشكداریێ‌ د ڕێورەسمێن یارییا دووماهییا كۆپا كەنداڤی و بڕیارە چەندین بەرپرسێن حكومی و وەرزشی یێن كوردستانێ‌ و ئیراقێ‌ و شاندێن چەند یانەیێن پشكدار د كۆپایێ‌ دا ل یاریگەهێ‌ بەرهەڤبن,
ژلایەكێ‌ دووڤە ستێرێ‌ هەلبژارتیێ‌ كوێتێ‌ و تیما فوتبۆلا یانەیا ئەلقادسیە دیار كر ئەوی پێزانین كێم ل سەر كوردستانێ‌ و باژێرێ‌ دهۆكێ‌ هەبوون، لێ‌ پشتی هاتییە دهۆكێ‌ سەرسۆرمان بوو و كەیفخوەشیا خوە دیار كر.
د دیدارەكا رۆژنامەڤانی دا بۆ دەزگەهێن ڕاگەهاندنێ‌ بەدر ئەلمتەوەع گۆت: كەیفخوەشم سەرەدانا كوردستانێ‌ كری و ڕاستی ژی ئێك ژ جوانترین باژێرێن رۆژهەلاتا ناڤین، هەروەسان ئەو پێشوازییا ل مە هاتییە كرن نە تشتەكێ‌ سەیرە بۆ مە ژبەركو مە پێزانین هەبوون كو كوردستانی خودان رێزگرتن و رەوشەنبیرن، ئەو سروشتێ‌ دهۆكێ‌ سەرسۆرمان كرم، ب ئانەهییا خودێ‌ بۆ جارێن بهێت دێ‌ سەرەدانێن خێزانی ژی هەبن.
ژلایەكێ‌ دووڤە ناڤهاتی ئەو چەندە دیار كر یارییا بەرانبەر دهۆكێ‌ ب زەحمەتە، تیما دهۆكێ‌ ئاستەكێ‌ نموونە و ژ هەژی ب گشتی د قارەمانیێ‌ دا نیشان دایە و یارییەكا پێشكەفتی و سەردەمانە دكەن، یارییا مە یا ئێكێ‌ ل كوێتی ئاستەكێ‌ مەزن نیشان دا، یارییا سێ شەمبییا بهێت دێ‌ بزەحمەتر بیت بۆ مە ژبەركو دێ‌ دناڤ ئەرد و جەماوەرێ‌ دهۆكێ‌ دابیت، ب هیڤی مە یارییەكا جوان بهێتە كرن، ئەم هەردو یانە حەز دكەین ناسناڤی دبەین لێ‌ ئەوا ب سەركەڤیت دێ‌ ناسناڤی بەت و هەر یانەك ژی ببەت پیرۆزبیت، هەردو یانە ژ هەژی نە ببەن ژبەركو خودان شیانن و ئاستەكێ‌ مەزن نیشان داینە لەوما ژی فینالەكا ئاگرینە.
بۆ زانین د یارییا ئێكێ‌ یا فینالا كۆپایێ‌ دا تیما یانەیا دهۆك ب ئەنجامەكێ‌ باش ژ یاریگەها محەمەد حەمەد ل وەلاتێ‌ كوێتێ‌ ڤەگەڕیا بوو كوردستانێ‌، پشتی بێ‌ گۆل دگەل خودانێن ئەردی یانەیا ئەلقادسییە وەكهەڤ بووی، بڕیارە سێ شەمبییا بهێت یاریگەها دهۆكێ‌ یارییا ئێكلاكەر بۆ ناسناڤی ئەلقادسیە مێڤان بكەت.
تیما فوتبۆلا یانەیا دهۆك وەكو نوونەرا ئێكانە یا ئیراقێ‌ و كوردستانێ‌ دەربازبوو یارییا دووماهییا كۆپا كەنداڤی بڤی شێوەیی، دەستپێكێ‌ د كۆما ئێكێ‌ دا ل رێزا دویێ‌ هاتبوو ب كۆمكرنا نەهـ خالان ژ دو سەركەفتن، سێ‌ وەكهەڤی و خوسارەتیەكێ‌، یانەیا ئیتفاق وەكو خودانا رێزا ئێكێ‌ یا كۆما دویێ‌ دەربازبوو قۆناغا چارگۆشەیا زێرین ب كۆمكرنا 13 خالان ژ چار سەركەفتن، وەكهەڤییەك و خوسارەتیەكێ‌، د قۆناغا چارگۆشەیێ‌ دا د یارییا هاتنۆچوونێ‌ دا سەركەفتن ل سعۆدیی ب گۆلەكێ‌ ل سەر یانەیا ئیتفاق ئینا و یارییا دویێ‌ ل یاریگەها خوە سەركەفتن ب هەمان ئەنجام ل سەر ئیتفاق دوبارەكر، ژلایێ‌ خوەڤە یانەیا ئەلقادسیە وەكو قارەمانا كۆما دویێ‌ دەربازبوو چارگۆشەیا زێرین و ل سەركیستێ‌ یانەیا نەسر یا ئیماراتی هاتە یارییا دووماهیێ‌.
خەلاتێن قارەمانیێ‌
ژلایەكێ‌ دووڤە بۆ هەر یانەكا پشكدار سێ‌ هزار دۆلار بۆ دهێنە مەزاختن وەكو پشتەڤانیەك، هەروەسان ئەو یانەیا دەربازبیتە قۆناغا پێش دووماهیێ‌- چارگۆشەیا زێرین- 100 هزار دۆلار بۆ هاتبوونە بەرهەڤكرن، دیسان ئەو یانەیا گەشتەكێ‌ بەر ب وەلاتەكی بكەت بۆ ئەنجامدانا یارییا خوە ژ دەرڤەیی یاریگەها خوە دێ‌ 30 هزار دۆلار بۆ هێنە تەرخانكرن، دیسان دهەر یارییەكا د كۆمێ‌ دا هاتییە كرن و هەر یانەیەكا سەركەفتنێ‌ بینت سیهـ هزار دۆلار وەردگریت.
خودانا ناسناڤێ‌ قارەمانییا كۆپا كەنداڤی دێ‌ سێ‌ ملیۆن دۆلاران وەرگریت وەكو خەلاتكرن، خودانا رێزا دویێ‌ دێ‌ ئێك ملیۆن دۆلاران وەرگریت، باشترین یاریزانێ‌ قارەمانیێ‌ دێ‌ 50 هزار دۆلاران وەرگریت، باشترین گۆلپارێز دێ‌ خەلاتێ‌ 50 هزار دۆلاران وەرگریت، گۆلكەرێ‌ قارەمانیێ‌ ژی دێ‌ 50 هزار دۆلاران وەرگریت.

تیما باسكێت بۆلا یانەیا دهۆك دەست ڤالان ژ قۆناغا دووماهیێ‌ یا خولا پلا ئێك دەربازبوون بۆ پلا نایابا ئیراقێ‌ ژ هەولێرا پایتەخت ڤەگەریا، پشتی نەشیایی ئێك ژ پلێتێن دەربازبوونێ‌ وەربگریت، د هەڤركیێن واندا ئەوا شەش یانەیان پشكدار كری و تێدا هەرسێ‌ یانەیێن نەفت ئەلشیمال، ئەلیەقزە و نەفت ئەلمیسان دەربازبوونە خولا پیشەكارێن ئیراقێ‌ بۆ وەرزێ‌ بهێت 2025-2026ێ‌.
ئەنجامێن تیما دهۆكێ‌ بڤی شێوەیی بوون.
دهۆك 67- 68 سابیس، دهۆك 69- 73 ئالیات ئەلشورتە، دهۆك 38- 59 نەفت ئەلشیمال، دهۆك 48- 49 ئەلیەقزە، تیما دهۆكێ‌ ل رێزا شەشێ‌ ل سەرجەمێ‌ گشتی هات.
ل دۆر ڤێ‌ یەكی میقداد رەعدی ڕاهێنەرێ‌ تیما دهۆكێ‌ بۆ رۆژنامەیا ئەڤرۆ دیار كر ڤەگەڕاندنا تیمێ‌ بۆ دناڤ چالاكیێن خولا باسكێت بۆلا ئیراقێ‌ پشتی ڤەقەتیانا زێدەتری هەشت سالان باشترین پێنگاڤ بوو هاتییە هاڤێژتن، ژبەركو نەچاربووین وەكو تیمێن نوو هەر ژ خولا پلا دو دەست ب هەڤڕكییان بكەین، ب سۆپاسی ڤە كارگێرییا یانەیا دهۆك ژی هاریكاربوون و مە پلانەك دانا كو بۆ هەر وەرزەكی تیما مە ڤەگەڕیتە خولەكا باشتر، ئانكو ژ پلا دو بۆ پلا ئێك و وەرزێ‌ دووڤدا پلا ئێك بۆ پلا نایاب پیشەكارێن ئیراقێ‌،
هەروەسان ناڤهاتی گۆت: ب كوڕێن باژێرێ‌ خوە مە دەست ب هەڤڕكییان كر و پێنگاڤا ئێكێ‌ ژ پلا دو دەستپێكر كو ژ قۆناغا كۆمان ئەم شیاین دەربازبیتە پلا ئێك، دووڤدا فدراسیۆنا باسكێت بۆلا ئیراقێ‌ بڕیاردا ئێكسەر هەڤڕكیێن پلا ئێك دەستپێبكەن و ئەم بەردەوامبوون ب گەنجێن باژێرێ‌ خوە بۆ بەرهەڤییان و پشتی هەڤڕكییەكا دژوار شیان ژ سەرجەمێ‌ 20 یانەیان شەشێن یانەیێن ئێكێ‌ بۆ قۆناغا دووماهیێ‌ و دەربازبوونێ‌ بین.
ل دووماهیێ‌ میقداد رەعدی دیاركر بۆ وەرزێ‌ بهێت دێ‌ ب پشتەڤانییا كارگێرییا یانەیێ‌ باشترین شێوە خوە بەرهەڤكەین و گۆت: بۆ مە گرنگ ڤەگەڕاندنا باسكێت بۆلا دهۆكێ‌ د ناڤ چالاكیێن ئیراقێ‌ دا بوویە و دوبارە گەشبنییەك بۆ گەنجێن مە پەیدا كر، یا دشیان دابیت دێ‌ كار كەین بۆ پێشئێخستنا باسكێت بۆلا یانەیا دهۆكێ‌.

بۆ جارا ئێكێ‌ یە پارێزگەها دهۆكێ‌ قارەمانییا ئیراقێ‌ یا فرۆكەڤانی یا پەرەشۆتان بەرەگلایدەر ل سەر ئاستێ‌ یانەیان مێڤاندارییا وێ‌ كرییە ئەوا هەر ژ رۆژا ئەینییا بۆری دەستپێكری و بڕیاری سوبەهی ب دووماهی بهێت، پێخەمەت ژێگرتنا پێنج یاریزانێن ئێكێ‌ ل سەر ئاستێ‌ قارەمانیێ‌ بۆ هەلبژارتیێ‌ ئیراقێ‌.
د داخویانیەكێ‌ دا جەمال سلێمان ڕێڤەبەرێ‌ وەرزشی ل پارێزگەها دهۆكێ‌ بۆ رۆژنامەیا ئەڤرۆ گۆت: ئەڤرۆ دێ‌ بیتە رۆژا سێیێ‌ ژ ئەنجامدانا قارەمانییا فرۆكەڤانی ل سەر ئاستێ‌ یانەیێن كوردستانێ‌ و ئیراقێ‌ كو پارێزگەها دهۆكێ‌ بۆ جارا ئێكێ‌ یە مێڤاندارییا وێ‌ بڤی شێوەیێ‌ بەرفرەهـ كری، دیاربوویە شێواز و ڕێكخستنەكا سەركەفتی بڕێڤە دچیت و هەڤڕكییەكا بهێز یا دهێتە كرن، سەقایێ‌ باژێرێ‌ دهۆكێ‌ و هەبوونا چیایێ‌ زاوا ئێك ژ خالێن سەركەفتیێ‌ ڤێ‌ قارەمانیێ‌ یە.
هەروەسان ناڤهاتی گۆت: وەكو ڕێڤەبەرییا وەرزشی ل پارێزگەها دهۆكێ‌ ب هەڤكاری دگەل ڕێڤەبەریێن هاتنۆچوون، پۆلیس، باژێرڤانی و ساخلەمی پێكڤە هەڤكارین ژبۆ سەركەفتنا ڤێ‌ قارەمانیێ‌ بۆ مە گرنگ پێشئێخستنا وەرزشا پارێزگەهێ‌ و پشتەڤانییا یاریزانێن مەنە و زێدەتر رۆلێ‌ خوە ببینن.
ژلایێ‌ خوەڤە محەمەد حەمید یاریزانێ‌ یانەیا دهۆك یا فرۆكەڤانی دیار كر پشكدارییا 82 یاریزانان ژ 18 یانەیان بوویە ئەگەر هەڤڕكییەكا بهێز دناڤبەرا پشكداران بهێتە كرن ژبۆ ژێگرتنا پێنج یاریزانان بۆ هەلبژارتیێ‌ ئیراقێ‌، وەكو یاریزانێن یانەیا دهۆكێ‌ ڕژدین باشترین ئاست و ئەنجام ب دەستڤە بینن و سۆپاسییا پارێزگارێ‌ دهۆكێ‌ و ڕێڤەبەریێن پشكدار د پشتەڤانییا ڤێ‌ قارەمانیێ‌ دا دكەن، ئەڤە ژی دەرگەهە ئاستێ‌ ڤێ‌ وەرزشێ‌ ل دهۆكێ‌ و كوردستانێ‌ بەر باشتر بچیت.