شاهۆ فەرید:

بڕیارە سوبەهی سێ‌ شەمبی تیما یانەیا دهۆك یارییا خوە یا دویێ‌ ژ فینالا كۆپا كەنداڤی بكەت كو دبیتە یا ڤەبر بۆ دەستڤە ئینانا كۆپایێ‌ دەمێ‌ ل دەمژمێر حەفتی شەڤ مێڤاندارییا یانەیا ئەلقادسیە یا كوێتی بكەت، د یارییا ئێكێ‌ دا ئەلهۆیێن چیا شیابوون ل كوێتێ‌ یاریێ‌ بێ گۆل ب دووماهی بینن، بۆ یارییا سوبەهی هەموو پشتەڤانێن دهۆكێ‌ گەشبینن بەر ب دەستڤە ئینانا ئێكەم ناسناڤێ‌ دەرڤە، لدۆر ڤێ‌ یەكێ‌ رۆژنامەیا ئەڤرۆ بۆچوونێن جودا ل سەر ڤێ‌ یاریێ‌ وەرگرتینە و بڤی ڕەنگی بووینە.
ل دەستپێكێ‌ سلێمان رەمەزان ڕاهێنەرێ‌ بەرنیاس ل سەر ئاستێ‌ كوردستانێ‌ و ئیراقێ‌ گۆت: یارییا فینالا كۆپا كەنداڤی ل دهۆكێ‌ دبیتە یارییەكا دیرۆكی ژبەركو بۆ جارا ئێكێ یە تیمەك ژ خولا ئیراقێ و كوردستانێ‌ پشكداریێ‌ بكەت و بگەهینە یارییا دووماهییا كۆپا یانەیێن كەنداڤی قارەمانێن خولا، دیسان مێڤانداریكرنا پارێزگەها دهۆكێ‌ بۆ ڤێ‌ یاریێ‌ ژی تایبەتمەندییا خوە هەیە بۆ مە و گرنگییا خوە یا پەیوەندیێن ل سەر ئاستێ‌ یانە و وەلاتان دا هەیە، هەروەسان ڕێكخوەشكەرە كو خەلكەكێ‌ دی ژ كەنداڤی و وەلاتێن عەرەبی وەكو كوردستانێ‌ ب نیاسیت جهەكێ‌ ئارام و خوەش و كەسێن وەرزش دوست.
ژلایەكێ‌ دووڤە ناڤهاتی گۆت: پێنەڤێت ئەڤ یارییە گرنگییەكا تایبەت بۆ یانەیا دهۆكێ‌ ژی هەیە وەكو دەستكەفت و دیرۆك، یا دلخوەش یارییا دویێ‌ و چارەنڤیسە بۆ دەستڤە ئینانا ناسناڤی، تیما دهۆكێ‌ ئەڤ یاریە دناڤ ئەرد و جەماوەرێ‌ خوە كەت و دەلیڤیێن هوسا كێم دوبارە دبن، یانەیا دهوكێ بوویە یانەكا جەماوەری و هەموو قەزا و ناحیێن دەورووبەر خوەڤە گرتینە بووینە هاندەرێن وێ و ترێندە هەموو ئیراقێ، هەمی خال بەرژەوەندیا دهۆكێ دانە بتنێ خالا باوەریەكا زێدە گەلەك مەزن نەكەین چونكو نۆت خولەكێن مایین هەر تشتەكێ نەچاڤەرێكری دبیت بهێتە روویدان و یاریا چوونێ ژی ئەنجام نە یێ پشت راستیێ یە، یانەیا قادسیە ژی هەلگرا دو ناسناڤێن ئەڤێ قارەمانیێ یە دیرۆكەكا كەڤنار دناڤ خول و قارەمانیێن كەنداڤی و ئاسیایی دا هەیە، لێ ئەڤ كاودان و رەوشا نە ئاسایا تەپاپێی یا كوێتی تێدا دبورییت دەلیڤەكا زێرینە یانەیا دهۆك ناسناڤی دەستڤەبینیت.
سلێمانی ئەو چەندە ژی گۆت: دڤێت هەر ژ دەستپێكێ ئەم رژدبین و لسەر خوە بین خالێن هێزێ مە هەنە كو چەندین یاریزانێن باش مە هەنە بۆ توماركرنا گۆلێ، هەروەسا یانەیا دهۆكێ نوكە خودانا هێزترین هێلا بەرگیریێ یە دناڤا قارەمانیێ دا ئەڤە سێ یاریە چ گۆل سەر تومارنەبووینە دناڤا قارەمانیێ دا، نوكە باشترین ئاست دایە ژ لایێ هەردو هێلێن بەرگیریێ و هێرشبەریێ، یانەیا قادسیە وێ نینە تنێ یاریا خوە لسەر سیستەمێ بەرگیریی و هێرشا هەڤدژ دكەتن تنێ شاشیێن تیما بەرامبەر دشێت گۆلێ توماربكەتن، یاریزانێن وان ویی ئاستێ بلند نەبوون تنێ تشتەكێ نەچاڤەرێكریی یاریزانەكێ دهۆكی كەڤیتە شاشیەكێ یان كارتەكا سور وەرگریت گۆلەكا نەچاڤەرێكری توماربكەن پلانێن راهێنەری تێك بدەت، بەلێ وەكۆ دی هەموو تشت بەرژەوەندیا دهۆكێ دانە.
ژلایێ‌ خوڤە سلێمان دۆسكی ئێك ژ یاریزانێن دێرین گۆت: تیما مە یا دەرازینكا تۆماركرنا دیرۆكەكا نوو یا جوان ژبۆ ب دەستڤە ئینانا ناسناڤەكێ‌ دی پشتی یێ‌ خولا ئیراقێ‌ ل 2010ێ‌، مە باوەرییەكا باش ب یاریزانێن تیما خوە هەیە و دێ‌ شێن دلێ‌ جەماوەری خوەشكەن، ئەم چاڤەڕێ‌ نە د یارییا سوبەهی دا فەستیڤال و ئاهنگا سەركەفتنێ‌ و ناسناڤی بكەین، بۆ گرنگە ئەم یانەیا خوە بڤی شێوەیی بینن، ب ئانەهییا خودێ‌ پشتەڤان دێ‌ بیتە هژمارە 12 دناڤ یاریگەهێ‌ دا و هەتا فیركا دادڤانی دێ‌ بەردەوامبن، هیڤییا من ئەوە هەموو یاریزان ئاگەهی ژ خوە هەبن و بشێن ل دووڤ پلانێن ڕاهێنەری سەرەدەریێ دگەل یاریێ‌ بكەن.
بۆ زانین تیما فوتبۆلا یانەیا دهۆك وەكو نوونەرا ئێكانە یا ئیراقێ‌ و كوردستانێ‌ دەربازبوو یارییا دووماهییا كۆپا كەنداڤی بڤی شێوەیی، دەستپێكێ‌ د كۆما ئێكێ‌ دا ل رێزا دویێ‌ هاتبوو ب كۆمكرنا نەهـ خالان ژ دو سەركەفتن، سێ‌ وەكهەڤی و خوسارەتیەكێ‌، یانەیا ئیتفاق وەكو خودانا رێزا ئێكێ‌ یا كۆما دویێ‌ دەربازبوو قۆناغا چارگۆشەیا زێرین ب كۆمكرنا 13 خالان ژ چار سەركەفتن، وەكهەڤییەك و خوسارەتیەكێ‌، د قۆناغا چارگۆشەیێ‌ دا د یارییا هاتنۆچوونێ‌ دا سەركەفتن ل سعۆدیی ب گۆلەكێ‌ ل سەر یانەیا ئیتفاق ئینا و یارییا دویێ‌ ل یاریگەها خوە سەركەفتن ب هەمان ئەنجام ل سەر ئیتفاق دوبارەكر.

عەلی حاجی:

دوهی كارگێرییا یانەیا زاخۆ یا وەرزشی كۆمبوونەكا تایبەت ئەنجامدا ژبۆ گەنگەشە ل سەر دووماهی پێشهاتیەیێن تیما وان یا فوتبۆلێ‌ ئەوا پشكدار د خولا ستێرێن ئیراقێ‌ دا، بابەتێ‌ سەرەكی یێ‌ هاتییە بەحسكرن ل سەر ڕاهێنەرێ‌ تیمێ‌ یێ‌ قەتەری تەلال ئەلبلۆشی بوو و گەنگەشە ل سەر چاوانییا باشترین بەرهەڤی بۆ یاریێن مایی ژ خولێ‌.
ل دۆر ڤێ‌ كۆمبوونێ‌ عەمار فەرهاد سەرۆكێ‌ یانەیا زاخۆ بۆ رۆژنامەیا ئەڤرۆ گۆت: پشتی مە كۆمبوون دگەل ڕاهێنەرێ‌ خوە یێ‌ قەتەری تەلال ئەلبۆلشی ئەنجامدایی و چەندین بابەت هاتنە بەحسكرن، مە بڕیار دا ڕاهێنەر بەردەوامبیت دگەل تیما مە بۆ یاریێن مایی ژ خولا ستێرێن ئیراقێ‌ یا فوتبۆلێ‌، ژبەركو مە نەڤێت ژ هەڤڕكیێ دووربكەیڤن و هێشتا مە هیڤیێن ماین و ڕژدین بۆ هەڤڕكیێ‌ بۆ رێزێن پێشیێ‌ كو ژ ئێكێ‌ هەتا سێیێ‌ بیت، هەتا نوكە ژی ئەم یێ‌ د هەڤڕكیێ‌ دا بۆ سەرێ‌ لیستێ‌ و مە ژ دەست نەدایە.
هەروەسان ناڤهاتی گۆت: ژبەركو ئارمانجا مە و ڕاهێنەری ئێكە لەوما ژی ئەم ڕژدین و هەموو بزاڤان بكەین بۆ یاریێن داهاتی بەردەوامیێ‌ بدەینە سەركەفتنان و نە هێلێن چو خالێن دی ژ دەست بدەین و هەموو یارییان ب چاڤێ‌ یارییا دووماهیێ‌ سەحكەینێ‌.
ژلایەكێ‌ دووڤە سەرۆكێ‌ یانەیا زاخۆ ئەوچەندە ژی دیار كر ژبۆ زێدەتر وەرگرتنا شارەزاهیێ‌ بۆ تیمێ‌ و بلندكرنا ئاستێ‌ یاریزانان دێ‌ هەتا دو هاریكارێن ڕاهێنەرێ تیمێ‌ دەستنیشان كەین و د نوكە دا ئەم یێن د قۆناغا دانۆستاندنێ‌ دا كو ددەمێ‌ نێزیك دێ‌ هێنە ڕأگەهاندن، وەكو كارگێریا یانەیێ‌ ژی دێ‌ بەردەوام پشتەڤانییا تیما خوە كەین و ژلایێ‌ دەرۆنی و مەعنەوی و ماددی ڤە پێخەمەت تیما مە بۆ هەر یارییەكێ‌ یا بەرهەڤبیت.
هەر ل سەر ڤی بابەتی ژێدەرێن تایبەت بۆ رۆژنامەیا ئەڤرۆ دیار كر دلشاد ئەحمەد بەربژارێ سەرەكی یە وەكو هاریكارێ ڕاهێنەری بۆ تیما یانەیا زاخۆ بهێتە دەستنیشانكرن.
بۆ زانین پشتی بۆرینا 27 یارییان ژ خولا ستێرێن ئیراقێ‌ تیما یانەیا زاخۆ پاشڤە چوویە رێزا سێیێ‌ ب 52 خالان ژ 15 سەركەفتن، حەفت وەكهەڤی و پێنج خوسارەتییان، ئەوا یانەیا شورتە سەرێ‌ لیستێ‌ دهێت ب56 خالان، زەورا ب55 خالان رێزا دویێ‌ دهێت.

قەیس وەیس:

د داخویانیه‌كێ دا جێگرێ سه‌رۆك فدراسیۆنا ئیراقێ بۆ یارییا كیك بۆكسینگێ كه‌یفخوه‌شیا خوه‌ دیار كر ب ئه‌نجامێن مه‌زن یێن هه‌رسێ یاریزانێن پارێزگه‌هێ و یانه‌یا ئامێدیێ دگه‌ل هه‌لبژارتیێ ئیراقێ د مۆندیالا جیهانی دا ئه‌وا ل ئه‌ینییا بۆری هه‌ڤڕكیێن وێ ل وه‌لاتێ تایله‌ند ب پشكدارییا 51 هه‌لبژارتیێن جیهانێ كرین.
ئه‌نجامێن هه‌رسێ یاریزانێن پارێزگه‌هێ بڤی شێوه‌یی بوون
1-عه‌بدولره‌زاق سه‌عید شێخو بۆ ئاستێ ماستەرێ بۆ کێشا +91کگم سیستەمێ لایک کیک، میدالیا زێری بدەستخوەڤە ئینا پشتی ل رێزا ئێکێ هاتی.
2- ئەلند عه‌بدولرحمان بۆ سیستەمێ لۆکیک کێشا +91کم میدالیا زێری ب دەستخوڤە ئینا پشتی ل رێزا ئێکێ هاتی.
3- به‌هزاد سالح بۆ سیستەمێ لۆکیک کێشا 71کگم رێزا دویێ و میدالیا زیڤی بدەستخوەڤە ئینا.
مه‌حفۆز ئیبراهیم زێده‌تر بۆ رۆژنامه‌یا ئه‌ڤرۆ گۆت: ئه‌نجامه‌كێ ب سانه‌هی نینه‌ هه‌رسێ یاریزانێن كوردستانی ب ده‌ستڤه‌ ئیناین، ژبه‌ركو بۆ هه‌ر سیسته‌مه‌كی 12 كێش هه‌نه‌ و هه‌ر كێشه‌كێ زێده‌تری 10 یاریزان هه‌ڤڕكیێ بۆ ناسناڤی دكه‌ن، پرانییا یاریزانێن پشكدار ل سه‌ر ئاستێ جیهانی خودان سه‌ربۆرن و شیان و پیشه‌كارن، له‌وما ژی ده‌ستڤه‌ئینانا ئه‌ڤان ڕێزان جهێ ده‌ستخوه‌شیێ یه‌، پیرۆزباهیێ ل هه‌رسێ یاریزانان دكه‌ین و ئه‌ڤه‌ ده‌ستكه‌فته‌كێ مه‌زنه‌ بۆ دیرۆكێ.
ژلایێ خوه‌ڤه‌ عه‌بدولره‌زاق سه‌عید شێخۆ گۆت: گه‌له‌ك كه‌یفخوه‌شم دگه‌ل هه‌ڤالێن خوه‌ بشێن ده‌ستكه‌فته‌كێ مه‌زن وه‌كو سێ یاریزانێن كوردستانی ب ده‌ستڤه‌ بینن ئه‌ڤه‌ ژی ڕامانا وێ دده‌ت ل كوردستانێ ئه‌ڤ یارییه‌ به‌ر ب پێشڤه‌ دچیت تایبه‌ت ل پارێزگه‌ها دهۆكێ گه‌نجێن خودان شیان هه‌نه‌، هیڤییا مه‌ ئه‌وه‌ پشته‌ڤانی بۆ بهێته‌ كرن.
سالح كه‌كۆ ڕاهێنه‌رێ هه‌لبژارتیێ ئیراقێ و كوڕێ باژێرێ دهۆكێ دیاركر ب ده‌ستڤه‌ ئینانا ئه‌ڤان ده‌ستكه‌فتان به‌لگه‌یه‌ كو یاریزانێن پارێزگه‌هێ ب زاخه‌كا بلند كار بۆ سه‌ركه‌فتنان دكه‌ن، ئه‌م ده‌ستخوه‌شیێ و پیرۆزباهییا یاریزانێن یانه‌یا ئامێدیێ دكه‌ین و ژ هه‌ژی بوون، نه‌ بتنێ ئه‌ڤ سێ یاریزانه‌ به‌لكو ل سه‌ر ئاستێ كچان ژی مه‌ شه‌ش یاریزانێن خودان شیان هه‌نه‌ و دگه‌ل هه‌لبژارتیێ ئیراقێ نه‌ و هه‌موو ژی كچێن باژێرێ دهۆكێ نه‌ و شیانێن هه‌ین باشترین ئاست و ئه‌نجام بینن، ئه‌ڤه‌ ژی به‌لكه‌یه‌ كو پلانێن مه‌ بۆ پێشئێخستنا ئاستێ یاریێ به‌ر باشیێ دچیت، هه‌كه‌ پشته‌ڤانی ژلایێ یانه‌یێن وان ڤه‌ هه‌بن د باوه‌رێ دامه‌ دێ یارییا كێك بۆكسینگێ ب یاریزانێن كوردستانی و پارێزگه‌ها دهۆكێ هه‌ڤڕكیێ ل سه‌ر ئاستێ ئاسیا و نێڤده‌وله‌تی كه‌ن.

د داخویانیەكێ‌ دا ڕاهێنەرێ‌ تیما باسكێت بۆلا یانەیا دهۆك دیار كر ئەو شیان پلانا خوە ب سەركەفتیانە بجهئبینن ئەو ژی پشتی ڤەقەتیانەكا درێژ ڤەگەڕینە دناڤ چالاكیێن ئیراقێ‌ دا و ببیتە ئەگەر گەشبینی بۆ گەنجێن مە پەیدا بیت.
زێدەتر د. میقداد رەعدی گۆت: ڤەگەڕاندنا تیمێ‌ بۆ ناڤ چالاكیێن خولا باسكێت بۆلا ئیراقێ‌ پێنگاڤەكا گەلەك باش بوو ئەو ژی پشتی ڤەقەتیانەكا درێژ زێدەتری هەشت سالان، ل دووڤ پلانا مە دڤیابا مە خولا پلا دو ب دووماهی ئینابا پێخەمەت زێدەكرنا شارەزایێ‌ بۆ یاریزانێن مە كو هەموو كوڕێن باژێرێ‌ مەنە و گەنجن و وەرزێ‌ دووڤدا كار بۆ پلا ئێك هەتا دگەینە پلا نایاب یا پیشەكارێن ئیراقێ‌، لێ‌ داخوازی ژ مە هاتە كرن پشتی خولا پلا دو ئێكسەر پشكدارن بۆ دەربازبوون بەر ب پلا ئێك، ئەڤچەندە ئەم شیاین ژ سەرجەمێ‌ 20 یانەیێن پشكدار بەر ب پلا ئێك بچین و دووڤدا بەر ب قۆناغا دووماهیێ‌ دەربازبن ئەوا بتنێ‌ شەش یانە ماین و مە دەست ژێ‌ نە بەردا.
هەروەسان ناڤهاتی بۆ رۆژنامەیا ئەڤرۆ گۆت: ب خوون گەرمێن كوڕێن باژێرێ‌ دهۆكێ‌ مە دەست ب هەڤڕكییان كر و پێنگاڤا ئێكێ‌ ژ پلا دو دەستپێكر كو ژ قۆناغا كۆمان ئەم شیاین دەربازبیتە پلا ئێك، دووڤدا ئێكسەر هەڤڕكیێن پلا ئێك دەستپێكرن و ئەم بەردەوامبووین ب گەنجێن باژێرێ‌ خوە بۆ بەرهەڤییان د هەڤڕكیێن قۆناغا دووماهیێ‌ یا پلا ئێك دەربازبوون بۆ نایاب د سێ‌ یارییان دا جوداهی دناڤبەرا خالەك و دو خالان هەتا چار خالان بوو، د ڤان یارییان دا دادڤانێن یاریێ‌ خەلەتیێن كۆژەك دژی تیما مە هەبوون، هەرچەندە مە نەڕازیبوون پێشكێشكربوو لێ‌ بەرۆڤاژی سێ‌ یاریزانێن مە سزادان و یارییا پێنجێ‌ مە نە كر.
میقداد رەعدی ئەوچەندە ژی دیاركر د قۆناغا دووماهیێ‌ دا ئەو یانەیێن پشكدار هەتا نەهـ یاریزان نە خەلكێ‌ وان بوون بەلكو ژ دەرڤەیی پارێزگەهێن خوە ئینابوون و پیشەكاربوون و خودان مووچە ژی بوون كو سەربۆر و شارەزاهی هەبوون، لێ‌ گەشبینم بۆ وەرزێ‌ بهێت ب پشتەڤانییا كارگێرییا یانەیێ‌ باشترین شێوە دێ‌ ڤەگەڕین و شەڕی بۆ پلا نایاب یا پیشەكارێن ئیراقێ‌ كەین.
بۆ زانین تیما باسكێت بۆلا دهۆكێ‌ گەشت بوو قۆناغا دووماهیێ‌ یا خولا پلا ئێكا ئیراقێ‌ ئەوا شەش یانەیان پشكداری تیدا كری و یاریێن وێ‌ ل هەولێرا پایتەخت هاتییە كرن، هەر سێ‌ یانەیێن نەفت ئەلشیمال، ئەلیەقزە و نەفت ئەلمیسان دەربازبوونە خولا پیشەكارێن ئیراقێ‌ بۆ وەرزێ‌ بهێت 2025-2026ێ‌.