د. عەلی تەتەر، پارێزگارێ دهۆكێ ب هەلكەفتا 8ی ئادارێ‌، ڕۆژا جیهانی یا ئافرەتان دوهی 9/3/2025 پێشوازی ل هژمارەكا ئافرەتان كر و د كۆمبونەكێ دا بەحسێ ڕۆلێ ئافرەتا كورد د بیاڤێن جودایێن جڤاكی دا، ب تایبەت د قووناغێن شۆڕەشێن ئێك ل دووڤ ئێك و سەركەفتنێن ئافرەتێن كورد د بیاڤێن جودا جودا دا و پاراستنا مافێن ئافرەتێ و نەهێلانا توندوتیژیێ و رێزگرتنێ ل ئافرەتێ كر .
پارێزگارێ دهۆكێ د كۆنگرەكێ ڕۆژنامەڤانی دا پیرۆزباهی ل هەمی ئافرەتێن كوردستانێ كر و ل دووماهیێ هەشت ئافرەتێن خودان بەهرە و كار د بیاڤێن جودا دا ژ شەش دەڤەرداریێن پارێزگەها دهۆكێ و دەڤەرداریا شنگالێ و ڕوژئاڤایێ‌ كوردستانێ‌ د چارچوڤێ بەرنامێ سالانە یێ پارێزگەها دهۆكێ دا خەلاتكرن و پیرۆزباهی ل هەمیان كر و خواست ببنە نموونەیێن ئافرەتێن سەركەفتی و د كارێن خۆ دا بەردەوام بن.

دهۆك، پەروین سەلاح:

سەرۆكێ‌ ژوورا بازرگانی و پیشەسازی ل دهۆكێ بۆ رۆژناما ئەڤرۆ دیار كر، ژوورا بازرگانی و پیشەسازی ل دهۆكێ رابوویە دەست پێشخەریەكێ بۆ ڤەكرنا بازاڕەكێ‌ ئەرزان د مەها رەمەزانێ‌ دا و دبێژیت: بڕیارە ل 15ی مەها رەمەزانێ‌ ژ هەر سالەكێ‌ ئەو بازاڕە بهێتە ڤەكرن و ئەو رۆژە ب بانگێ ئەرزانیێ بهێتە بناڤكرن.
شكری جەمیل، سەرۆكێ‌ ژوورا بازرگانی و پیشەسازی گۆت: «مە داخواز ژ هەمی بازرگان و مۆل و ماركێتان و كۆمپانی و نەخۆشخانە و خودان كاران كریە ل گەل مە د ڤێ هەوێ دا پشكدار بن، ژ بەركو رەمەزان مەها خێر و بەرەكەتێ یە، لەو مە ئەڤ بازارە دێ هەبیت و خواستا خەلكێ ل مەها رەمەزانێ ل سەر كەلوپەلان پتر لێ دهێت».
گۆتژی: «مە داخواز ژ بازرگانێن خوە كریە، هندی رێژا داشكاندنان پتربیت، بۆ بازرگانی و بكڕی ژی دێ‌ ب مفاتربیت، دیسا دڤێت ئەو داشكاندن د راستەقینە و باوەرپێكری بن، چاڤدێریا بازرگانی ل گەلمەیە و لیژنەیێن خۆ یێن گەرۆك هەنە بۆ ناڤا بازاری و دێ‌ دووڤچوونێ كەن، دیسا مە ژی وەكو ژوورا بازرگانی دێ‌ هەلسەنگاندن بۆ بازاری هەبیت، كا چەند سەركەفتن ئینا و چەند خەلكی باوەر ژێ كر و ژێ‌ مفادار بوون».

دلڤین رەشید:

مەكتەبا سكرتاریەتا ئافرەتان، ب هەلكەفتا 8ی ئادارێ‌ رۆژا جیهانیا ئافرەتان، چالاكیەك ئەنجام دا و 150 ئافرەتێن پێشمەرگە ل سنوورێ‌ بارێزگەها دهۆكێ‌ و ئیدارەیا سەربخۆ یا زاخۆ خەلاتكرن.
زەری نەوزاد، ئەنداما مەكتەبا سكرتاریەتا ئێكەتیا ئەفرەتان بۆ رۆژناما ئەڤرۆ گۆت: «ئەم وەكو مەكتەبا سكرتاریەتا ئێكەتیا ئەفرەتان، ب هەلكەفتا 8ی ئادارێ‌ رۆژا جیهانیا ئافرەتان، رابووین ب ئەنجامدانا چالاكیەكێ‌، كو ژ چەندین بڕگان پیك دهات، ژ وانا برگا موسیقێ‌ دانا فتارێ‌ و خەلاتكرنا 150 ئافرەتێن پێشمەرگە ل سنوورێ‌ پارێزگەها دهۆكێ‌ و ئیدارەیا سەربخۆ یا زاخۆ، چونكی گرنگیا هەبوونا ئافرەتێ‌ وەكو پێشمەرگە و ئەنداما هێزێن ناڤخۆیی، وێ‌ چەندێ‌ دگەهینیت، ئافرەتا كوردستانێ‌ د هەموو قووناغان دا هەڤپشكا خەباتا نەتەوی یا گەلێ‌ كوردستانێ‌ بوویە».
ناڤهاتیێ‌ گۆتژی: «مە وەكو سكرتاریەتا ئێكەتیا ئافرەتان گول هەلبژارتن، كو پێشكێشی ئەڤان شێرە ژنان بكەین، چونكی ئێك ژ بەرنامێ‌ مە ئەوە، بەری چەندین رۆژان مە هەوەكا پاراستنا ژینگەهێ‌ راگەهاندبوو، مەرەم ژ ئەڤێ‌ چەندێ‌ ئەوە، ئەم هشیاریێ‌ د ناڤ جفاكێ‌ خۆ دا بەلاڤ بكەین، داكو هەر تاكەك و ب تایبەت ژی ئافرەت بشێن ژینگەها خۆ ب پارێزن».

شێخان، بارزان مزووری:

نیزال عادل، بەرپرسا ئەنجوومەنێ ئافرەتێن شێخان بۆ رۆژناما ئەڤرۆ دیار كر، ب هاریكاریا لقێ 20 یێ پارتی و نڤیسینگەها رێكخراوێن جەماوەری و پیشەیی، ب هەلكەفتنا 8ی مارسێ‌ 60 ئافرەتێن خودان دەستێن زێرین و چەندین سالە خزمەتێ دكەن و رۆلێ وان یێ پێش چاڤە هاتنە خەلاتكرن.
سالح حەیدەر، بەرپرسێ لێ 20 یێ پارتی بۆ رۆژناما ئەڤرۆ گۆت: «ئەم بناڤێ لقێ پیرۆزباهیێ ل گشت ئافرەتان دكەین، ب تایبەت ئافرەتێن دەڤەرا شێخان، ژ بەركو ئافرەتا شێخان رۆلەكێ مەزن هەیە، ب تایبەت د سالا 2014 دا دەمێ هاتنا داعشێ‌ بۆ سەر سنوورێن پارێزگەها نەینەوا و شێخان، وی دەمی ئافرەتا شێخان رۆژانە خوارن بۆ برایێن پێشمەرگە بەرهەڤ دكر، لەو مە ب فەر زانی وان ئافرەتان خەلات بكەین».

ئامێدیێ، مەحمود نهێلی:

ب هەلكەفتا رۆژا جیهانیا ئافرەتان ل سنوورێ دەڤەرداریا ئامێدیێ ئەڤ رۆژە ب چەندین چالاكیان هاتە ساخكرن.
بارین حەسەن، بەرپرسا ئەنجوومەنێ ئامێدیێ یێ ئێكەتیا ئافرەتێن كوردستانێ بۆ رۆژناما ئەڤرۆ دیار كر، ب هەلكەفتا رۆژا جیهانی یا ئافرەتان چەندین چالاكی ل دڤەرا ئامێدیێ هاتنە كرن و گۆت: «ب ڤێ هەلكەفتێ دیاری ل سەر مامۆستایێن هەر پێنج باخچەیێن ساڤایان ل سنوورێ دەڤەردارییا ئامێدیێ هاتنە بەلاڤكرن و گولێن سرۆشتی پێكێشی مامۆستایێن ئافرەت یێن وان باخچەیان هاتنە كرن».
گۆتژی: «هەر ب ڤێ هەلكەفتێ هەژمارەكا دی یا چالاكییان ل دەڤەرێن جودا هاتنە ئەنجامدان».