رەمەزان زەكەریا:

بەرهەڤیێن كەرنەڤالا نەورۆزا ئەڤ سالە یا ئاكرێ دەستپێكرینە، ئەڤ سالە بەرنامەیەكێ تایبەت هاتیە دانان و بڕیارە پشتی فتارێ ئاگرێ نەورۆزێ ل جهێن هاتینە دیاركرن بهێتە هەلكرن.
د. دلاوەر بۆزۆ، دەڤەردارێ ئاكرێ بۆ ئەڤرۆ گۆت: «بەرهەڤیێن نەورۆزێ دەستپێكرینە و باژێر و جهێ ئاهەنگێ هاتیە دیاركرن و پشكنین بۆ هاتیە كرن».
ناڤبری گۆتژی: «نەورۆزا ئەڤ سالە د مەها رەمەزانێ دایە، لەو ئەڤ سالە ئاهەنگا نەورۆزا ئاكرێ دێ یا جودا و تایبەت بیت، چالاكیێن هەلكرنا ئاگری دێ پشتی فتارێ دەستپێكەن و بۆ دەمێ دو دەمژمێران دێ بەردەوام بن، چەندین سرودێن ئایینی د ناڤ ئاهەنگێ دا دێ هەبن، كۆمەكا یاریێن ئاگری یێن نوو دێ هێنە ب كارئینان، كو د سالێن بۆری دا نەبوون».

د. سالار عوسمان، ئەندامێ‌ كۆمیتەیا ناڤەندی و بەرپرسێ پشكا ڕەوشەنبیری و ڕاگەهاندنا پارتی دیموكراتی كوردستان، ب ئامادەبوونا پشكەك ژ هەڤالێن پشكێ‌ ل رۆژا 2/3/2025 پێشوازی ل شاندەكێ بلند یێ‌ پارتیا سۆسیالیستا كوردستانێ‌ ل باكوورێ كوردستانێ‌ ب سەرۆكاتیا بەیرەم بۆزیال، سەرۆكێ پارتیا سۆسیالیستا كوردستانێ‌ PSK و شاندێ‌ د گەل دا و ئەندامێن ڕێڤەبەریا پارتێ كر.
د دیدارەكێ‌ دا، رەوشا هەرێما كوردستانێ‌ و دەڤەرێ‌ و ڕۆژهەلاتا ناڤین ب شێوەیەكێ گشتی هاتە گەنگەشەكرن، هەروەسا پێنگاڤ و قۆناغێن پرۆسێسا ئاشتیێ ل توركیا گۆتوبێژكرن.

ئامێدیێ‌، مەحمود نهێلی:

پشتی بڕیارا سەرۆكێ‌ حكومەتا هەرێما كوردستانێ‌ ل دۆر بەلاڤكرنا پارچەیێن ئەردی ل سەر فەرمانبەران، ل پڕانیا باژێرڤانیێن سنوورێ‌ دەڤەرداریا ئامێدیێ‌ كارێ‌ پێدڤی هاتیە ئەنجامدان ژ بۆ بەرهەڤكرنا وان پارچەیێن ئەردی یێن رازیبوون ل سەر هاتیە كرن، داكو ل سەر فەرمانبەران بهێنە بەلاڤكرن.
وارشین سەلمان، دەڤەردارێ‌ ئامێدیێ‌ دیار كر، ل سنوورێ‌ دەڤەرداریا ئامێدیێ‌ هەموو باژێرڤانیان كارێ‌ پێدڤی ئەنجامدایە و نوكە ژی كار دهێتە كرن ژ بۆ بەرهەڤكرنا وان پارچەیێن ئەردی یێن پێدڤی، كو بهێنە بەلاڤكرن و گۆت: «ئەڤ پرۆسێسە ل هەموو باژێرڤانیێن سەر ب دەڤەرا ئامێدیێ‌ ڤە هاتیە ئەنجامدان، پارچەیێن ئەردی ل سنوورێ‌ هەموو باژێرڤانیان ل دووڤ وان رێنمایێن ژ لایێ‌ وەزارەتا باژێرڤانییان ڤە دێ‌ هێنە بەرهەڤكرن».
گۆتژی: «كار ل سەر كوژاندنا ئەردی دهێتە كرن و ل هندەك جهان ژی كار ب دووماهی هاتیە و د دەمەكێ‌ نێزیك دا پارچەیێن ئەردی ل سەر فەرمانبەران دێ‌ هێنە بەلاڤكرن، یێن بەری نوكە رازیبوون».

زاخۆ، دلۆڤان هالۆ:

ئیدارەیا سەربخوە یا زاخۆ دیار كر كو ل دووڤ وی بەڕنامەیێ ژ لایێ ئیدارەیا سەربخوە یا زاخۆ ڤە هاتیە داڕشتن، ب درێژاهیا هەر 30 ڕۆژێن مەها ڕەمەزانا پیرۆز، پتر ژ 30 خانی و شوقە بۆ كەسێن كێم دەرامەت و هەژار دێ‌ هێنەدان.
ئیدارەیا سەربخوە یا زاخۆ، ئاماژە ب وێ چەندێ ژی كر كو د ئێكەم ڕۆژا ڕەمەزانا پیرۆز دا ب سەرپەرشتیا جۆتیار خدر، سەرپەرشتێ لژنا بەلاڤكرنا خانی و شوقەیێن كێم دەرامەت و هەژاران، ئێكەم خانی پێشكێشی كەسەكێ نابینا هاتە كرن.
وەكو دیار سالانە ئەڤ بەڕنامە ژ لایێ ئیدارەیا سەربخوە یا زاخۆ ڤە ب هاریكاریا سەرمایەدارێن زاخۆ دهێتە ئەنجامدان، خانی و شوقە بۆ كەسێن كێم دەرامەت و هەژار دهێنە دان.

لژنا بلندا سەرپەرشتیا موەلیدان ل پارێزگەها دهۆكێ‌ ئاشكرا كر، ژ بەر پێگری نەكرنا وان یا بەردەوام ب رێنومایێن لژنێ‌، سێ‌ جهێن موەلیدان ژ خودانێن وان دێ‌ هێنە ڤەكێشان و ل شوونا وان هندەك كەسێن دی كاركەن.
ل دووڤ نڤیسارەكا دەڤەرداریا دهۆكێ‌، هەرسێ‌ جهێن موەلیدان ل تاخێن خەبات و سێ‌ گركا و كۆمەلگەها دهۆك ستی یا ئاكنجیبوونێ‌ ل ئێتیتێ‌، ژ خوادانێن وان دێ‌ هێنە وەرگرتن و ل شوونا وان، هەر كەسێ‌ بشێت ل دووڤ رێنومایێن لژنا بلند یا سەرپەرشتیا موەلیدان كارێ‌ خۆ بكەت، دشێت داخوازیا خۆ ئاراستەی لژنێ‌ بكەت، ل دەڤەرداریا دهۆكێ‌ و ژڤانێ‌ دووماهیێ‌ بۆ پێشكێشكرنێ‌، هەتا 15 رۆژێن دییە.
د نڤیسارا لژنا بلندا سەرپەرشتیا موەلیدان دا هاتیە: «هەتا كەسەكێ‌ دی ل جهێ‌ وان موەلیدان كار بكەت، نابیت نوكە خودانێن وان، خەمساریێ‌ د كارێ‌ خۆ دا بكەن و موەلیدە كار نەكەن، هەكە دێ‌ پێرابوونێن یاسایی بەرانبەر هێنە وەرگرتن».

دهۆك، لەزگین جوقی:

حسین قائیدی، بەرپرسێ‌ نڤیسینگەها رزگاركرنا رەڤاندیێن ئێزدی ژ دەستێن تیرۆرستێن داعشێ، نووترین ئامارا رزگاركرنا رەڤاندیان راگەهاند و دبێژیت: هەتا نوكە سێ هزار و 585 كەس ژ هەردو رەگەزان هاتینە رزگاركرن.
حسین قائیدی، بەرپرسێ‌ نڤیسینگەها رزگاركرنا رەڤاندیێن ئێزدی ئاشكرا كر، هەتا نوكە هێشتا پتر ژ دو هزار رەڤاندیێن ئێزدی ماینە و نەهاتینە رزگاركرن و گۆت: «پتر ژ پینج هزار ئێزدیان ژی شەهید بووینە و ئەڤە هەمی هاتینە پشتراستكرن».
ل سالا 2014ێ ل شنگالێ شەش هزار و 417 كەسێن ئێزدی ژ لایێ تیرۆرستێن داعشێ‌ ڤە هاتبوونە رەڤاندن، هەتا نوكە سێ هزار و 585 كەس ژ هەردو رەگەزان هاتینە رزگاركرن.