د. عەلی تەتەر، پارێزگارێ دهۆكێ دوهی 16/2/2025 ب گوژمێ دو ملیار و 839 ملیۆن دیناران چەندین پڕۆژەیێن خزمەتگوزاری یێن سەخبێركرن و خوشكرنا رێكان و ئاڤێ و كارەبێ و ئاڤ و ئاڤەڕۆیا و كاروبارێن ئایینی بو هژمارەكا دەڤەر و گوند و ناوچەداریێن هەردو دەڤەرداریێن شێخان و ئامێدیێ ڕەوانەی قووناغا بجهـئینانێ كرن .
هەر د چارچوڤێ بەرنامێ بەردەوام یێ ب پێشكێشكرنا پڕۆژەیێن خزمەتگوزاری دا ل هەمی دەڤەرداری و ناوچەداریێن سنوورێ پارێزگەها دهۆكێ، د هەفتیێن بۆری دا، پارێزگارێ دهۆكێ هژمارەیەكا زۆرا پڕۆژەیێن خزمەتگوزاری د سێكتەرێن جودا جودا دا ڕەوانەی قووناغێن بجهـئینانێ كرینە و كار ل سەر بجهئینانا چەندین پڕۆژەیان ژی دهێتە كرن.

هەولێر، قائید میرۆ:

پەرلەمانتارەكێ فراكسیۆنا پارتی ل پەرلەمانێ ئیراقێ ئاشكرا كر، دهێتە چاڤەڕێكرن ل دووماهیا ڤێ مەهێ‌ مووچەیێ مەها شواتێ بهێتە بەلاڤكرن و لیستا مووچەی چو ئاریشە تێدا نینە و مووچێ هەر 12 مەهان هاتیە مسۆگەركرن.
سیپان شێروانی، ئەندامێ فراكسیۆنا پارتی ل پەرلەمانێ ئیراقێ بۆ رۆژناما ئەڤرۆ دیار كر، رێككەفتنا د ناڤبەرا هەرێما كوردستانێ و بەغدا دا هاتیە ئەنجامدان، دێ هێتە بجهئینان، بەلێ پێدڤی ب هندەك رێكاران هەیە و گۆت: «لیستا مووچەی چو ئاریشە تێدا نینن و بابەتێ هنارتنا مووچەیێ فەرمانبەران ل گورەی رێككەفتنا هاتیە كرن بۆ ئەڤ سالە هاتیە مسۆگەركرن، كو ئەم باوەرین دێ رێككەفتن سەرگریت و ئەڤ سالە مە ئاریشا گیرۆبوونا مووچەی نابیت».
سیپان شێروانی گۆتژی: «ل گەل هنارتنا لیستا مووچەیێ فەرمانبەران و پێداچوونێ، دهێتە چاڤەڕێكرن ل دووماهیا ڤێ مەهێ‌ بەغدا مووچەیێ مەها شواتێ یێ فەرمانبەرێن هەرێما كوردستان ب مەزێخیت، چونكی لیستا مەها ئێك دێ بیتە بنەما بۆ هەموو مەهێن ئەڤ سالە و ل سەر بنەمایێ لیستا مەها ئێك مووچەیێ هەر 12 مەهان دێ هێتە هنارتن».

دهۆك، لەزگین جوقی:

ب ئامادبوونا د. ئەفراسیاب موسا، رێڤەبەرێ گشتی یێ ساخلەمیا پارێزگەها دهۆكێ و رێكخراوا SIAیا ئیتالی و رێكخراوا هیڤی یاداشتنامەكا تێكگەهەشتنێ ئیمزاكر.
رێڤەبەریا گشتیێ ساخلەمیا پارێزگەها دهۆكێ بۆ رۆژناما ئەڤرۆ دیار كر، ل گورەی یاداشتنامێ رێكخراوا ناڤبری ب هەڤكاریا رێڤەبەریا گشتی یا ساخلەمیا پارێزگەها دهۆكێ و رێكخراوا هیڤی، د چەندین بابەتان دا دێ هاریكاریا پێشكێشی ساخلەمیا دهۆكێ كەت، وەكو: چارەسەركرنا نەخوشیێن دلی، نەخوشیێن زكماكی و یێن دۆمدرێژ و نەخوشیێن خوینێ یێن زارۆكان، دیسا گەشەپێدانا شیانێن نۆشدار و كارمەندێن ساخلەمیێ، نووژەنكرنا نەخۆشخانە و سەنتەرێن ساخلەمیێ.
هەژی گۆتنێ یە د نوكە دا رێكخراوا ناڤبری ب هەڤكاریا رێكخراوا هیڤی دو زارۆك ژ بۆ چاندنا مەژی بەر ب ئیتالیا برینە ژ بۆ وەرگرتنا چارەسەریێ، زێدەباری چەندین تیمێن نۆشداری یێن نەخۆشخانەیێن ب ناڤودەنگ یێن تایبەتمەندێن نەخوشیێن دلی یێن زارۆكان ژ بۆ ئەنجامدانا نشتەرگەریان ب هەڤكاریا رێكخراوا ناڤبری سەرەدانا پارێزگەها دهۆكێ كرینە و بۆ دەمێ‌ حەفتیەكێ دێ ل سەنتەرێ ئازادی یێ نەخوشیێن دلی چارەسەریا زارۆكان كەن.

زاخۆ، دلۆڤان هالۆ:

سەرۆكاتیا باژێرڤانیا زاخۆ دیار كر كو قووناغا دویێ یا بەلاڤكرنا پارچەیێن ئەردی ل سنوورێ ئیدارەیا سەربخوە یا زاخۆ دێ دەستپێكەت.
سەرۆكاتیا باژێرڤانیا زاخۆ، ئاماژە ب وێ چەندێ ژی كر كو د قووناغا دویێ یا بەلاڤكرنا پارچەیێن ئەردی دا، ناڤێن حەفت هزار و 77 فەرمانبەران گەهشتییە سەرۆكاتیا باژێڕڤانیا زاخۆ.
ئاشكرا ژی كر كو ل دەمەكێ نێزیك دەست ب بەلاڤكرنا وان پارچەیێن ئەردی دێ هێتە كرن.

ئامێدیێ، مەحمود نهێلی:

هەژمارەكا وەلاتیێن تاخێ شەهیدان ل سەنتەرێ ناوچەدرییا دێرەلۆكێ‌ خرڤەبوونەك ئەنجام دا و رێكا سەرەكی یا دێرەلۆكێ‌ بۆ ئامێدیێ دائێخستن و داخوازا راكرنا بۆرجەكێ تەلەفۆنان دكەن، كو ل ڤێ داویێ ل ناڤ مالان هاتیە دانان.
ئێك ژ رێكخەرێن وێ خرڤەبوونێ بۆ رۆژناما ئەڤرۆ دیار كر، هەر ل دەستپێكا دانانا ڤی بۆرجی وان نەرازیبوونا خوە دیار كریە و هەموو لایەنێن پەیوەندیدار ئاگەهداركرینە و گۆت: «پێدڤی بوو ئەڤ بۆرجە ل دووڤ رێنامایان هاتبا دانان، لێ‌ ب مخابنی ڤە ئەڤ بۆرجەیێ تەلەفۆن و ئنترنێتێ ل دووڤ رێنمایان نینە و دێ بیتە ئەگەرێ بەلاڤبوونا نەخۆشیان ب تایبەت ژی یا پەنجەشێرێ».
ناڤهاتی گۆتژی: «بەری نوكە مە نێزیكی 200 ئیمزا كۆمرینە و داینە لایەنێن پەیوەندیدار، لێ هەر بێ ئەنجام بوویە، لەو ئەم دخوازین ئەڤ بۆرجە بهێتە راكرن، داكو ئەم و زارۆ و كەسوكارێن مە تووشی نەخۆشیان نەبین، ب تایبەتی ژی نەخۆشیا پەنجەشێرێ».