ل ڕۆژا چارشەمبی 26 تەباخا 2026ێ، ل پیرمام سەرۆك بارزانی پێشوازی ل د. محەمەد عەلی ئەللامی، سەرۆكێ دەستەیا دەستپاكیێ یا ئیراقێ و شاندەكێ دگەل دا كر.
بارەگەهێ بارزانی ئاماژە ب وێ چەندێ كریە، د دیدارێ دا كو د. ئەحمەد ئەنوەر، سەرۆكێ دەستەیا دەستپاكیێ یا هەرێمێ ژی بەرهەڤ بوو، سەرۆكێ دەستەیا دەستپاكیێ یا ئیراقێ كورتییەك دەربارەی بڕیارا نەهێلانا دیاردەیا دزێ وگەندەلیێ و ب هەدەردانا سامانی گشتی و بڕێڤەچوونا پرۆسەیا ڕووبڕووبوونا گەندەلیێ ل ئیراقێ و بزاڤێن سەرۆكوەزیرێن ئیراقا فیدرال بۆ سەرئێخستنا پرۆسەیێ و هەروەسا بەربەست و ئاستەنگێن ل هەمبەر وێ پرۆسەیێ بۆ سەرۆك بارزانی دیار كرن.
بارەگەهێ بارزانی ڕاگەهاند كو ل گەل ئاماژەدان ب ڕۆلێ دیرۆكی یێ سەرۆك بارزانی د ئاڤاكرنا ئیراقا نوو دا، داخوازا پشتەڤانیێ ژ سەرۆك بارزانی كر بۆ هاریكاریكرنا ئیراقێ د بنبڕكرنا گەندەلیێ دا ل سەرانسەری وەلاتی. هەروەسا هەماهەنگی و هاریكارییێن دامودەزگەهێن فەرمی یێن هەرێما كوردستانێ بلند هەلسەنگاندن و سوپاس و پێزانینێن خوە و دەستەیا دەستپاكیێ یا ئیراقێ ئاراستەی سەرۆك بارزانی كرن.
هەروەسا د دیدارێ دا سەرۆك بارزانی ب گەرمی بخێرهاتنا شاندێ مێڤان كر و پشتەڤانییا خوە یا تەمام بۆ بزاڤێن حوكمەتا فیدرال بۆ بڕیارا بنبڕكرنا گەندەلیێ و سزادانا گەندەلكاران ڕاگەهاند و وەك ئەركەكێ پیرۆز وەسف كر.
سەرۆك بارزانی ئەو چەندە ژی دوپات كر كو ب چو ڕەنگەكی ڕێ ناهێتە دان هەرێما كوردستانێ ببیتە پەناگەهەك بۆ گەندەلكاران و د وێ پرۆسەیێ دا هێلا سۆر ل سەر چو كەس و ئالییان نینە.
سەرۆك بارزانی باسێ وێ چەندێ ژی كر كو سەرگرتنا پرۆسەیا ڕووبڕووبوونا گەندەلیێ پێدڤی ب بەردەوامیێ هەیە و نابیت ڕاوەستییان تێ بكەڤیت و دڤێت ژ پێخەمەت ب دەستڤەئینانا دادیێ بیت.

سەرۆكێ هەرێما كوردستانێ پێشوازی ل سەرۆكێ دەستەیا دەستپاكیێ یا ئیراقێ كر و ڕاگەهاند، هەرێما كوردستانێ بەرهەڤی هەموو هاریكاری و هەماهەنگیەكێیە ل گەل دەستەیێ بۆ پاراستنا یاسایێ و سەربەخوەیا دەستهەلاتا دادوەری.
ڕۆژا چارشەمبی، 26ێ تەباخا 2026، نێچیرڤان بارزانی، سەرۆكێ هەرێما كوردستانێ، پێشوازی ل محەممەد عەلی مفتن، سەرۆكێ دەستەیا دەستپاكیێ یا ئیراقێ و شاندەكێ دگەل دا كر.
ل دووڤ بەیاننامەیەكا سەرۆكایەتییا هەرێما كوردستانێ، د دیدارێ دا كو ئەحمەد ئەنوەر، سەرۆكێ دەستەیا دەستپاكیێ یا هەرێما كوردستانێ بەرهەڤ بوو، «ب هێزكرنا هاریكاری و هەماهەنگییا د ناڤبەرا دەستەیا دەستپاكیێ یا فیدرالی و ئالیێن پەیوەندیدارێن هەرێما كوردستانێ دا هاتە گەنگەشەكرن و هەردوو ئالییان دوپاتی ل سەر گرنگییا سەربەخوەیا دەزگەهێن دەستپاكیێ و ڕۆلێ وان د چەسپاندنا سەروەرییا یاسایێ دا كر».
ل دووڤ بەیاننامەیێ، نێچیرڤان بارزانی دوپات كر كو هەرێما كوردستانێ بەرهەڤی هەمووهاریكاری و هەماهەنگیەكێیە ل گەل دەستەیا دەستپاكیێ یا فیدرالی و هەموو ئالیێن دادوەری، ئەو ژی «ژ پێخەمەت پاراستنا یاسایێ و سەربەخوەیا دەزگەه و دەستهەلاتا دادوەریێ».
د بەیاننامەیێ دا هاتییە، محەممەد عەلی مفتن، سوپاس و پێزانینێن خوە ئاراستەی ئالیێن پەیوەندیدارێن هەرێما كوردستانێ كرن بۆ وێ هاریكارییا بەردەوام و ب بەرهەم یا ل گەل دەستەیا وان وئالیێن پەیوەندیدارێن فیدرالی دا هەی.

سەرۆكێ هەرێما كوردستانێ، پێشوازیێ ل بڕیارا ئەمریكا دكەت بۆ دەرخستنا ناڤێ سووریێ ژ لیستا وان وەلاتێن پشتەڤانیێ ل تیرۆرێ دكەن، هەڤدەم دوپاتیێ ل سەر وێ چەندێ دكەت كو ئەڤ پێنگاڤە دەلیڤەیەكا نوویە بۆ ب هێزكرنا پەیوەندیێن سووریێ ل گەل ئیراقێ و هەرێما كوردستانێ.
نێچیرڤان بارزانی، سەرۆكێ هەرێما كوردستانێ، د پەیامەكێ دا، پێشوازی ل بڕیارا ئیدارەیا ئەمریكا كر ب دەرخستنا ناڤێ سووریێ ژ لیستا وەلاتێن پشتەڤانێن تیرۆرێ و ئاماژە ب وێ چەندێ كریە «ئەڤ بڕیارە پێنگاڤەكا گرنگە بۆ پشتەڤانیكرنێ ل ڤەژاندن، ئارامی و خۆشگوزەرانییا سووریێ، هەروەسا ڕێكێ خوەش دكەت بۆ ب هێزكرنا ڤەگەڕینا وی وەلاتی بۆ گێڕانا ڕۆلێ وی یێ سروشتی د دەڤەرێ و جیهانێ دا».
د پشكەكا دی یا پەیامێ دا هاتییە «هیڤیدارین ئەڤ پێنگاڤا پۆزەتیڤ ببیتە ئەگەرێ ئاڤاكرنا پاشەڕۆژەكا ئارام كو تێدا مافێن هەموو پێكهاتەیێن جودا یێن سووریێ بهێنە پاراستن.»
سەرۆكێ هەرێمێ دوپاتی ل سەر وێ چەندێ كریە، ئەڤ بڕیارا ئەمریكا ئاسۆیەكێ بەرفرهەتر ڤەدكەت بۆ گەشەپێدانا پەیوەندیێن سووریێ ل گەل ئیراقێ و هەرێما كوردستانێ، ب مەرەما بەرفرهەكرنا ئاستێ هەماهەنگییان د بوارێن جودا دا، ب ڕەنگەكێ كو خزمەتا بەرژەوەندیێن هەڤپشك یێن دەڤەرێ بكەت.

ئەندامەكێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان دیار كر: وەزیرێ نەفتا ئیراقێ پشكا نەفتا خاڤ یا هەرێما كوردستانێ زێدە ناكەت. هەروەسا ئاشكرا كر كو ئەڤرۆ پێنجشەمبی، دێ مێڤاندارییا وەزیرێ سامانێن سروشتی هێتە كرن بۆ دانوستاندنێ ل سەر دۆسییا نەفت و سوتەمەنیێ. گۆت ژی: حوكمەتا هەرێما كوردستانێ داخواز كربوو ڕۆژانە 115 هزار بەرمیلێن نەفتێ بۆ بهێنە دابینكرن.
سیپان شێروانی، ئەندامێ جڤاتا نوونەرێن ئیراقێ ژ فراكسیۆنا پارتی ئاشكرا كر «د كۆمبوونا لژنەیت نەفت و غازێ دا مە گۆتە وەزیرێ نەفتا ئیراقێ، تۆ دبێژی 50 هزار بەرمیلێن خوە بۆ مە بهنێرن دا كو ئەم حەفت ملیۆن لترێن پەنزینێ بۆ هەرێمێ ڕەوانە بكەین، بەلێ وی گۆت: ئەم ب خوە سوتەمەنیێ ژ دەرڤە دئینین، لەوما نەشێین سوتەمەنیێ بۆ هەرێما كوردستانێ دابین بكەین».
سیپان شێروانی ڕاگەهاند ژی: مە 169 ئیمزا ل جڤاتا نوونەران كۆمكرینە و مە داخواز ژ وەزیرێ نەفتێ و سەرۆكوەزیران كریە یان بەرهەمێ نەفتا خاڤ زێدە بكەن، یان ژی ب هەر ڕێیەكێ بیت ڤێ ئاریشەیێ چارەسەر بكەن. هەروەسا حوكمەتا هەرێما كوردستانێ داخوازا زێدەكرنا بەرهەمێ نەفتێ كریە، ژ بەر ڤێ چەندێ دڤێت وەزیرێ نەفتێ پێگیر بیت ب ڤان داخوازیان و بەرپرسیارەتیا خوە ب جهبینیت.

د ڕێوڕەسمەكێ فەرمی دا ل «كەمپا ستیڤان» ل فرۆكەخانەیا نێڤدەولەتی یا هەولێرێ، ب دووماهی هاتنا ئەركێ سەربازی یێ شیرەتكارێن هێزێن ئەلمانیایێ د چارچۆڤەیێ هەڤپەیمانییا نێڤدەولەتی یا دژی داعشێ دا هاتە ڕاگەهاندن.
مەراسیم ب بەرهەڤبوونا شۆڕش ئیسماعیل، وەزیرێ پێشمەرگەی و ل سەر داخوازا كۆلۆنێل ئۆستن پیچا، فەرماندەیێ هێزێن ئەلمانیایێ ل هەرێمێ و ب بەرهەڤبوونا جەنەڕال گەنتەر شنایدەر، ڕێڤەبەرێ گشتی یێ هێزێن چەكدارێن ئەلمانیایێ ل وەزارەتا بەرەڤانییا وی وەلاتی هاتبوو ڕێكخستن.
شۆڕش ئیسماعیل، وەزیرێ پێشمەرگەی د پەیڤەكێ دا دوپاتی ل سەر ستراتیژیبوونا پەیوەندیێن د ناڤبەرا هەرێما كوردستانێ و ئەلمانیایێ دا كر و ڕاگەهاند: لەشكەرێ ئەلمانیایێ د ڕۆژێن دژوار دا و د شەڕێ دژی تیرۆرستێن داعشێ دا هەڤپشكەكێ ڕاستەقینە یێ مە بوویە. وەزیرێ پێشمەرگەی ئاماژە ب هاریكاریێن هەمەلایەن یێن ئەلمانیایێ كر، ژ وان ژی: پشكداریكردن د پرۆسەیا ڕیفۆرمێ دا، ئاڤاكرنا نەخۆشخانەیا پێشمەرگەی، دابینكرنا پێدڤیێن ساخلەمیێ وهنارتنا ئەفسەران بۆ خولێن ئەركان ل ئەلمانیایێ.
وەزیرێ پێشمەرگەی ئاماژە ب وێ چەندێ ژی كر كو ل دووماهیا مەها ئیلۆنێ یا ئەڤسالە ئەركێ هەڤپەیمانییا نێڤدەولەتی ب دووماهی دهێت، لێ داخواز ژ حوكمەت و جڤاتا نوونەرێن ئەلمانیایێ كر كو د قووناغا داهاتی دا پەیوەندی و هاریكاریێن خوە بۆ هێزا پێشمەرگەی ب هێزتر بكەن.
ل دووماهیا مەراسیمێ، ب فەرمی باس ل ڕۆلێ دیرۆیی و كارتێكرنا تیما سەربازی یا ئەلمانیایێ د پشتەڤانیكرنا پێشمەرگەی و پێشئێخستنا ژێرخانەیا سەربازی یا هەرێما كوردستانێ. حوكمەتا هەرێما كوردستانێ و وەزارەتا پێشمەرگەی بلندترین ئاستێ پێزانینێن خوە ئاراستەی گەل و حوكمەتا ئەلمانیایێ كرن بۆ وێ پشتەڤانییا لۆجستی و شیرەتكاری یا د سالێن بۆری دا پێشكێش كری.