هەولێر، قائید میرۆ

سەرۆكێ لیژنا بلندا فەتوایێ ئاشكراكر، كەسێن شوقە ب قست كڕین و ل دووڤ دا بەری شوقە بهێتە ئاڤاكرن بفرۆشیت حەرامە و پێدڤیە شوقە بهێتە ئاڤاكرن یان ژی ببیتە هەیكەل، ل دووڤدا كڕین و فرۆتن ل سەر بهێتەكرن و گۆت ژی: ئەگەر وەلاتیەك بكڕیت ل كۆمپانیێ چو ئاریشە تێدا نینە، بەلێ نابیت دەستێ دویێ بكەت و كڕین و فرۆتن لسەر بهێتەكرن.

دكتۆر حەسەن موفتی، سەرۆكێ لیژنا فەتوایێ ل هەرێما كوردستانێ بۆ رۆژناما ئەڤرۆ دیار كر «لیژنا بلندا فەتوایێ پشتی پێداچوونێ فەتویەك لدۆر وان یەكەیێن ئاكنجیبوونێ یێن كڕین و فرۆتن ل سەر دهێتەكرن ب شێوەیێ قست دەركریە، ئەگەر كۆمپانیا پڕۆژەكی ئاڤا كەت و وەلاتی قستەكی بدەن و شوقەكی بكڕن چو ئاریشە تێدا نینە، بەلێ ئەگەر بهێت و دەستێ دویێ بكەت واتە كەسێ شوقە ب قست كڕی جارەكا دی ئەڤێ شوقێ بفرۆشیت و هێشتا نەهاتیە ئاڤاكرن یان ژی نەبوویە هەیكەل‌ ئەڤە نابیت، چونكە نابیت ئاڤاهیەك هێشتا نەبوویە و كڕین و فرۆتن لسەر بهێتەكرن، تنێ بۆ دەستێ ئێكێ دروستە و ئاریشە نینە، هەتا ئەگەر شوقە نەهاتبیتە ئاڤاكرن ژی.
زێدەتر دبێژیت: واتە بەری پڕۆژە بهێتە دەستپیكرن یان ژی تەمام نەبیت كەسەك بكڕیت ب قست چو ئاریشە ل سەر نینە، بەلێ نابیت كڕین و فرۆتن ل سەر بهێتەكرن هەتا دووماهی دهێت و تەمام دبیت، وەلاتیێن شوقە ب قست كڕی پشتی تەمام بوونێ یان بووینە هەیكەل دشێت كڕین و فرۆتنا لسەر بكەت، مخابن شوقە هەیە چەند جاران هاتیە فرۆتن هێشتا ژی دەست ب پڕۆژەی نەهاتیەكرن یان ژی نەهاتیە ئاڤاكرن، ئەڤە ژی بووینە ئەگەرێ پەیداكرنا ئاریشەیان، یا پێدڤیە شوقە بهێتە ئاڤاكرن یان ژی ببیتە هەیكەل، ڤێجا كڕین و فرۆتن لسەر بهێتەكرن.
ل دۆر كڕینا ناما ماستەر و دكتۆرایێ ژی دكتۆر حەسەن موفتی گۆت» ناما ماستەر و دكتۆرایێ ئەمانەتە و دڤێت ب شیانێن خۆ یێن كەسی نامێ بەرهەڤ بكەن، نابیت كەسەك ناما ماستەرێ یان دكتۆرایێ جهێ كەسەكێ دی بەرهەڤ بكەت، بەلێ ئەگەر هاریكاری بهێتەكرن بۆ بەرهەڤكرنا نامێ وەكی كۆمكرنا ژێدەران و تایبكرن و هەر بابەكێ ب ڤی شێوەی چو ئاریشە تێدا نینە، بەلێ نامە بهێتە نڤیسین و ب پارە كڕین و فرۆتن ل سەر بهێتەكرن ژلایێ شەریعەتی حەرامە. بۆ نموونە كەسەك ب پارە نامەكا ماستەرێ بەرهەڤ بكەت و د هەمبەردا گوژمەكێ پارەی وەربگریت حەرامە، كرێ گرتنا باوەرناما ژی حەرامە و دروست نینە، پێدڤیە خودانێ باوەرنامێ پشكداری هەبیت، بەرۆڤاژی ب كرێدانا باوەرناما و ڤەكرنا پشكێن زانكۆیێ بیێ كو خودانێ باوەرنامێ پشكداری هەبیت بەرۆڤاژی شەریعەتیە، وەرگرتنا باوەرنامێ بۆ ڤێ چەندێ مفا هەبیت بۆ قوتابی، ئەگەر بهێت و كەسێ زانستی وانەیان نەبێژیت حەرامە ب ناڤێ باوەرنامێ پارەی وەربگریت.

هه‌رهین محه‌مه‌د:

جێگرێ‌ رێڤەبەرێ‌ گشتی یێ‌ رێڤەبەریا چاندنێ‌ دهۆكێ‌ ئاشكەراكر حكومەتا هەرێمێ‌ گرێبەست ل گەل دوو كومپانیان هەیە ژ بۆ وەرگرتنا گەنمێ‌ جوتیان كو دێ‌ ب دوو پلەیان هێتە وەرگرتن و هەتا نوكە سایلویان 90 هزار تەن وەرگرتینە و ئەڤە ژی بەلگەیە كو گەنم یێ‌ هەی.

موسلح حەسەن جێگرێ‌ رێڤەبەرێ‌ گشتی یێ‌ رێڤەبەریا چاندنێ‌ ل پارێزگەها دهۆكێ‌ گۆت: ل دەستپێكا هەیڤا بوری دەرگەهێن سایلویان هاتبوونە ڤەكرن ژ بۆ وەرگرتنا گەنمێ جوتیاران و بەهرا هەرێما كوردستانێ‌ 400 هزاربوون و بەهرا پارێزگەها دهۆكێ‌ و ئیدارەیا سەربەخۆیا زاخۆ 117 هزارن و ئەڤ رێژە گەلەك یا كێمە و بەراوردی ل گەل رێژەیا هەی و حكومەتا عیراقێ‌ وەسا بریار دابوو ب تنێ‌ دا گەنمێ‌ ئاڤی وەرگرن و د سەر هندێ‌ را مە گەنمێ‌ دێم هەیە و گەلەك ژ یێ‌ ئاڤی باشترە و ئەڤ چەندە بوویە ئاریشە بۆ گەلەك جوتیاران و هەتا نوكە سایلویان 90 هزار تەن وەرگرتینە و ئەڤە ژی بەلگەیە كو گەنم یێ‌ هەی.
زێدەتر گۆت: ئەڤە چەند سالە حكومەتا هەرێمێ‌ ل گەل دوو كومپانیێن بازاركرنا گەنمی گرێبەست هەیە و كێشەیا ئەو گەنمێ‌ دمینت بهێتە چارەسەركرن و لژنەكا بلند هەیە ل ئەنجومەنێ‌ وەزیران ئەوان بریار دایە و ئەو گەنمێ‌ جوتیاران دمینیت ب دوو پلەیا بهێتە وەرگرتن، پلە ئێك ب 550 هزار دیناران و پلە دوو ب 525 هزاران دێ‌ دێ‌ هێتە وەرگرتن و ب تنێ‌ ل دووڤ رێژا مایی یا جوتیاران، ئانكو كا جوتیاران چەند گەنم رادەستی سایلویێ‌ كریە و ئەو رێژا دمینیت ل دووڤ هەمان ساخلەت دێ‌ هێتە وەرگرتن ژلایێ‌ ئەڤان هەردوو كومپانیان ڤە.

رەمەزان زەكەریا:

ئاكرێ باژێرەكێ گەشتیارییە، بەلێ چو پروژەیێن گەشتیاری لێ نینن، گەشتیار دخوازن پرۆژەیێن گەشتوگوزاری ل ئاكرێ بهێنە دروستكرن، بڕیار بوو ئێك ژ مەزنترین پرۆژەیێن گەشتوگوزاری ل ئاكرێ بهێتە دروستكرن، لێ‌ هەتا نكە دەست ب ئەنجامانا پرۆژەی نەهاتیە كرن.

ئەركان ئەبدولیلا گەشتیارەكێ بیانیە ل ئاكرێ‌ بۆ ئەڤرۆ گۆت: سروشتێ ئاكرێ یێ‌ جوان ل ئەوروپا ژی نینە، گەلەك بۆ مە خوشە ئەم هاتینە سیپەیێ ئاكرێ، ئێكەم جارە هەڤژینا من دهێتە كوردستانێ و دبێژیت من نەڤێت ژ كوردستانێ بچم هندی ڤێرە جوانە و خوشە.
سانا ستینگ گەشتیارا سویدییە بۆ ئەڤرۆ گۆت: ئێكەم جارە دهێمە كوردستانێ، ڤێرە گەلەكا جوانە و سەقایێ ڤێرە وەك ئەوروپایە گەرم و سارە، ئەزا ل ڤێرە دگەل هەڤژینێ خۆ و كورێ خۆ یێ دو سالی.
هاجەر محەمەد گەشتیارە ل بەغدا هاتیە بۆ ئەڤرۆ گۆت: ئەز ل بەغدا هاتیمە، هاڤینگەهێن ڤێرە زۆر دخۆشن و سروشتەكێ جوان هەیە و بهایێن وان د گونجایی نە، من گەلەك كەیڤ ب دهۆكێ‌ دهێت، ژبەركو ژینگەهەكا جوان هەیە، بەلێ دخوازین پرۆژەیێن خزمەتگوزاری لڤێرە بهێنە دروستكرن، ژبەركو سروشتێ وێ ئەم مەندەهوش كرینە و وەكریە گەشتیار بەردەوام قەست بكەنێ.
سیروان تەوفیق رێڤەبەرێ بازاركرنێ‌ ل گەشتوگوزارا كوردستانێ بۆ ئەڤرۆ گۆت: پرۆژەیەكێ ستراتیژی یێ مەزن ل سەر رووبەرێ زێدەتر ژ ٤٠٠ دۆنەمێن ئەردی كو پێك دهێت ژ چەندین خوارنگە و ئۆتێلێن چار ستێر و پێنج ستێر دێ‌ل ئاكرێ‌ هێتە دروستكرن، ژبەر كو ئێك ژ كێشەیێن ل ئاكرێ هەین تایبەت ل نەورۆزا نەبوونا جهێن ڤەخواندنێ بوو و ئەڤێ كێشە بۆ گەشتیاران دروست دكر، لەورا دەستپێكرن و دووماهی هاتنا وی پرۆژەی دێ ڤێ كێشەیێ ل ئاكرێ و سنوورێ پارێزگەها دهۆكێ نامینیت.