زنار تۆڤی:
سەرۆكێ دەستەیا وەبەرهێنانێ ل حكومەتا هەرێما كوردستانێ دیار كر، ئەڤ سالە بەغدا دێ رێژەكا كێم یا گەنمێ جۆتیارێن هەرێما كوردستانێ وەرگریت، لەوما حكومەتا هەرێمێ بڕیار دایە، ئەو گەنمێ زێدە دبیت، هەموو ژ جۆتیاران بهێتە وەرگرتن.
د. محەمەد شوكری، زێدەتر بۆ رۆژناما ئەڤرۆ گۆت: «حكومەتا ئیراقێ سالانە رێژەكا كێم یا گەنمێ جۆتیارێن هەرێما كوردستانێ وەردگریت، لێ بەرهەمێ گەنمێ هەرێما كوردستانێ گەلەك زێدە بوویە، حكومەتا هەرێمێ بەردەوام بزاڤێ دكەت، بازاری بۆ بەرهەمێ گەنمێ جۆتیاران پەیدا بكەت، ئەڤ سالە ژی حكومەتێ بڕیار دایە، ئەو گەنمێ جۆتیاران هەی و بەغدا وەرنەگریت، هەردو كۆمپانیێن قەیوان و خۆشناو ب بهایەكێ گونجای وی گەنمی ژ جۆتیاران وەربگرن».
ناڤهاتی گۆتژی: «ل دووڤ هندەك مەرج و رێنمایان ئەو هەردو كۆمپانیانیە دێ گەنمی ژ جۆتیاران وەرگرن، بۆ هندێ گەنمەكێ باش بهێتە وەرگرتن، ئارمانجا حكومەتا هەرێما كوردستانێ ڤەدیتنا بازارییە بۆ بەرهەمێ جۆتیاران، لەوما هەردو كۆمپانیێن خۆشناو قەیوان هاتینە ڕاسپاردن، گەنمێ جۆتیاران وەربگرن».
ئەڤ سالە ژی حكومەتا ئیراقێ بڕیار دایە ب تنێ 400 هزار تەنێن گەنمێ جۆتیارێن هەرێما كوردستانێ وەربگریت، هەر چەندە بەرهەمێ جوتیارێن هەرێما كوردستانێ گەلەك ژ وێ رێژێ پترە.
نيشاندان