قەیس وەیس:
بۆ حەفتییا سێیێ ل دووڤ ئێك مێركاتۆییا خولا ستێرێن ئیراقێ هێدی بەر ب گەرمتر دچیت و بازارێ یاریزانان ب ڕێژەیەكا بەرچاڤ بلند بوویە، حەفتییا بۆری زێدەتری هەشت یاریزانێن ئوردنی پەیوەندی ب یانەیێن كوردستانی و ئیراقێ كرینە، خوە بەرهەڤكرن بۆ وەرزێ نوو یا خولا ستێرێن ئیراقێ یا فوتبۆلێ ئەوا شبڕیارە هەڤڕكیێن وێ ل ناڤەڕاستا مەها بهێت دەستپێبكەت، هەر بۆ زانین ئەڤ ڕاپۆرتە دگەل دووماهی نێڤسینا مە دووماهی پێشهاتە بوون، ژبەركو بازارێ ڕاهێنەر و یاریزانان ل سەردەمییە و بەردەوامە دبیت گوهۆڕین و گرێبەستێن نووتر هەبن.
دهۆكێ سێ گرێبەستێن نوو ئیمزاكرن
ل دووڤ دەنگۆباسێن نێزیك ژ یانەیا دهۆك كو كارگێرییا یانەیێ هەموو بزاڤا دكەت گرێبەستا ڕاهێنەرەكێ بیانێ ئیمزابكەت، هەتا دووماهی پێزانین هێشتا چو گرێبەستێن فەرمی نەبوویە، لێ دهێتە گۆتن یانەیا دهۆك دەستان ژ ڕاهێنەرێ خوە هەلگرێ كۆپا ئیراقێ دگەل یانەیێ و كوڕێ باژێرێ دهۆكێ سلێمان رەمەزانی بەر نادەت و دخوازیت ئەو بەردەوام بیت، چو وەكو ڕاهێنەرێ تیما ئێكێ هەكە چو ڕاهێنەرێن بیانی دەستنەكەڤت یان ژی وەكو سەرپەرشتێ هونەری بۆ تیمێن خوە یێن ژیێن جودا، ئەڤ بابەتە دبیت د ڤێ حەفتیێ دا ئێكلا بیت.
هەر ژ دەنگۆباسێن یانەیا دهۆكێ، گرێبەستا پیشەكارەكێ دی ژی ئیمزاكر ئەو ژی یێ سێنیگالی كادیم رەسۆل بوو ئەوێ ژ خولا توركیا هاتی، گرێبەست دگەل سەدیق جەال یایزانێ هێلا بەرەڤانییا پێشتر یێ یانەیا دیالا ئیمزاكر، دیسان یاریزانێ یانەیا جەوییە و هەلبژارتیێ ئیراقێ سەفا هادی ژی هاتە دناڤ ڕێزێن ئەلهۆیێن چیا دا، دیسان ب نفێسارەكا فەرمی یانەیا دهۆك داخوازا گرێبەستێ دگەل هێرشبەرێ كوێتی و هەلبژارتیێ كوێتێ یوسف ناسر ب 250 هزار دولااران كرییە، ژلایێ خوەڤە ستێرێ هێلا بەرەڤانییا یانەیا دهۆكێ و پیشەكارێ بەرازیلی لۆكاس توورێس گرێبەستا یانەیەكا سعۆدیێ ئیمزاكەت.
زاخۆ یا ڕێزێن خوە ب هێز دئێخیت
پشتی یانەیا زاخۆ دگەل یێ قەتەری ویسان رزق بۆ ئەركێ ڕاهێنەراتییا تیما خوە گەهشتینە ڕێكەفتنێ دەنگۆباس هاتینە بەلاڤكرن كو یێ جامایكی میسێل كوولی دێ بیتە هاریكارێ وی، هەروەسان زاخۆ گرێبەستا كوڕێ باژێرێ خوە شڤان جەمیلی و یێ ئوردنی یوسف ئەلئالۆسی گرێبەستا خوە نووكرن، پیششەكارێ سوری عەلا ئەلدالی ب فەرمی هاتە دناڤ ڕێزێن كوڕێن خابووری دا، ژلایێ خوە ستێرێ هەلبژارتیێ ئیراقێ عەلی جاسم حەز دكەت یاریێ بۆ یانەیا زاخۆ بكەت لێ هندەك ڕێكار هەنە هەتا بجهـ بهێت، دەنگۆباس هاتینە بەلاڤكرن كو یاریزان داخواز 700 ملیۆن دیناران دكەت، دیسان یاریزانەكێ ئوردنی ل هێلا بەرەڤانیێ لبن چاڤدێرییا یانەیێ یە و دبیت گرێبەستا وی ژی بهێتە ئیمزاكرن.
هەولێر یا لڤینێن باش دكەت
ژلایێ خوەڤە نەیا هەولێرێ دەست ب لڤینێن باش دكەت بۆ ئینانا یاریزانان پشتی گرێبەستا ڕاهێنەر باسم قاسم ڕاگەهاندی، ل پێنچ شەمبییا بۆری گرێبەست دگەل گۆلپارێزێ هەلبژارتیێ ئیراقێ سەعەد كەمیل ئیمزاكر، هەروەسان بزاڤان دكەت ستێرێ هەلبژارتیێ ئیراقێ عەلی جاسم ڕازیبكەت و هەڤڕكی دناڤبەرا وێ و زاخۆ دایە، ژلایێ خوەڤە یانەیا نەورۆزێ گرێبەستا گۆلپارێزێ یانەیا ئەلقاسم عەلی جاسم ئیمزاكر، دیسان گرێبەست دگەل پیشەكارێ سربی ئۆگنیێن مێرشێچ ئیمزاكر ئەوێ ل هێلا بەرەڤانیێ یاریێ دكەت، دوورنینە گرێبەستێ دگەل هەر ئێك ژ پیشەكارێ دهۆكێ لۆكاس توورێسی و یێ جەوییە سەفا هادی ئیمزابكەت.
یاریزانێن ئوردنی خولا ئیراقێ یێ داگیر دكەن
یانەیا زەورا د ئێك پێنگاڤ دا یانەیا زەورا یا بەغدایی گرێبەستا سێ پیشەكارێن ئوردنی و هەلبژارتیێ ئوردن ڕاگەهاند كو پێكهاتینە ژ، نزار ئەلراشدان، رزق بەنی هانی و عەبدوللا نەسیب هاتە دناڤ ڕێزێن وێ دا، هەروەسان گرێبەستا حسێن حەسەن گۆلپارێزێ هەلبژارتیێ ئۆلمپیی ئیراقێ و یانەیا كەرخێ ئیمزاكر، هەروەسا یانەیا جەوییە یێ ئوردنی عارف ئەلحاج
ئەلگەرمە یا گەرمە
یانەیا ئەلگەرمە یا ئەنباری د ڤەگۆهاستنێن هاڤینێ دا یا گەرمە، پشتی دەستنیشانكرنا ئەحمەد خەلەف بۆ ئەركێ راهێنەراتییا تیما خوە یا فوتبۆلێ، ب فەرمی كادرێ خوە ڕاگەهاند كو پێكهاتینە ژ یێ ئسپانی خیسۆس بێنێدۆ ڕاهێنەرێ لەش سڤكیێ و فێرناندۆ بێرێز ئەلڤارا یێ یونانستانی وەكو ڕاهێنەرێ گۆلپارێزان هاتە دیار كرن، هەروەسان دلۆڤان مەهدی كوڕێ باژێرێ دهۆكێ بەر ئەنبار چوو و گرێبەستا یانەیا ئەلگەرمە ئیمزاكر، دیسان حسێن شحیت یاریزانێ ڕەڤەندا ئیراقی ل رۆمانیا و عەباس قاسمی ژی گرێبەستا هەمان یانە ئیمزاكرن، دیسان سێ یاریزانێن ئوردنی ئیناینە دناڤ رێزێن تیما خوە دا ئەو ژی عەلی ئەلعلوان، ئیبراهیم سەعادە و محەمەد ئەبو حەشیش ژ یانەیا زاخۆ.
بو جارا ئێكێ د دیرۆكا فوتبۆلا ئیراقێ دا یاریزانەكێ وەلاتێ ترینیدادوتۆگباگۆ هێرشبەر ماركۆ جوزێف هاتە دناڤ رێزێن یانەیا كەرخێ دا، هەروەسان یاریزانێ ئوردنی موهەنەد ئەبو تەها ئینا، هەروەسان مینایێ یێ ئوردنی محەمەد عەبدولموتەلب، ژلایێ خوەڤە مووسلێ یێ كۆلمۆپی مێدرانا و محەمەد مەعەن یاریزانێ پێشتر یێ یانەیا دهۆكێ و حسام كازم ئیناینە د ناڤ ڕێزێن تیما خۆ دا، یانەیا شورتە گرێبەست دگەل مستەفا سەعد ئەوێ ژ جەوییە هاتی.
دبیت سۆپەرا ئیراقێ نە هێتە كرن
ل دووڤ ژێدەرێن رۆژنامەڤانی هاتینە بەلاڤكرن كو فدراسیۆنا فوتبۆلا ئیراقێ بەر ب پاشئێخستن یان نە ئەنجامدانا كۆپا سۆپەرا ئیراقێ دكەت، ئەوا بڕیارە ب پشكدارییا شەش یانەیان ل 19ێ ڤێ مەهێ هاتبا كرن، لێ داخوازیێن پشكەك ژ یانەیان ئەوە ژبەر نە بەرهەڤبوونا یاریزانان ئەڤ قارەمانییە بهێتە پاشئێخستن و دیسان مژویلبوونا هندەك یانەیان ب گرێبەستێن یاریزانان و هەروەسان هاتیە ڕاگەهاندن ژبەر خوە ڤەكێشانا هەر ئێك ژ یانەیا شورتە و زەورا و داخوازییا یانەیا زاخۆ ژبۆ پاشئێخستنا ژڤانێ هەڤڕكییان، دبیت ئەڤ قارەمانییە نە هێتە كرن، ژلایەكێ دووڤە بووچوونەك هەیە كو كۆپا سۆپەرێ دناڤبەرا قارەمانا خولا ستێرێن ئیراقێ و قارەمانا كۆپا ئیراقێ بهێتە كرن.
بۆ زانین هەر ئێك ژ یانەیێن، دهۆك قارەمانا كۆپا ئیراقێ، شورتە قارەمانا خولا ستێرێن ئیراقێ، زەورا، زاخۆ، جەوییە و تەلەبە خودانێن ڕێزێن دویێ هەتا چارێ پشكدارن د كۆپا سۆپەرا ئیراقێ دا و پێشبینی دهاتە كرن ل ئێك ژ یاریگەهێن دهۆك یان شەعب یا بەغدایی هاتبا كرن.
نيشاندان