پەیڤدارێ فراكسیۆنا پارتی ل جڤاتا نوونەرێن ئیراقێ راگەهاند: رێژەیا 50 هزار بەرمیلێن پەتڕۆلێ یێن رۆژانە كو ل دووڤ رێككەفتنا د ناڤبەرا هەولێرێ و بەغدایێ دا بۆ پێدڤیێن ناڤخۆ هاتییە دیاركرن كێمە، ب فەرمی داخواز ژ حوكمەتا فیدرال كرییە كو ئەو رێژەیە بهێتە زێدەكرن.
دانەر عەبدولغەفار، پەیڤدارێ فراكسیۆنا پارتی دیموكراتی كوردستان ل جڤاتا نوونەرێن ئیراقێ، گۆت: رێژەیا پەتڕۆلا هاتییە تەرخانكرن ژ ئالیێ بەغدایێ ڤە بۆ پێدڤیێن ناڤخۆ یێن هەرێما كوردستانێ كێمە و پێدڤییا بازاڕی پڕ ناكەت.
پەیڤدارێ فراكسیۆنا پارتی دیار كر، ل دووڤ رێككەفتنا فەرمی یا د ناڤبەرا هەولێرێ و بەغدایێ دا، رێژەیا 50 هزار بەرمیلێن پەتڕۆلێ یێن رۆژانە بۆ پێدڤیێن ناڤخۆ یێن هەرێما كوردستانێ هاتییە دیاركرن؛ لێ دوپاتی ل سەر وێ چەندێ كر كو ئەڤ رێژەیە بەس نینە و پێدڤییە بهێتە زێدەكرن.
دانەر عەبدولغەفار ئاماژە ب وێ چەندێ ژی كر، كو وان داخواز ژ حوكمەتا فیدرالی یا ئیراقێ كریە، رێژەیا پەتڕۆلا دهێتە دابینكرن زێدە بكەت، چونكی پێدڤییا رۆژانە یا ناڤخۆیا هەرێما كوردستانێ بۆ پەنزینێ دگەهیتە نێزیكی حەفت ملیۆن لتران، و ئەڤ رێژەیا نوكە هاتییە تەرخانكرن گەلەك كێمترە ژ ئاستێ داخوازییا راستەقینە یا شوفێر و پارزینگەهێن ناڤخۆیی.

دهۆك، دلۆڤان ئاكرەیی:

پەیڤدارێ حوكمەتا هەرێما كوردستانێ دیاركر، رێ ناهێتەدان بهایێ پانزینێ ب ڤی شێوەی ب گران بمینیت و سەرۆكوەزیرێن هەرێمێ ژی دووپاتیێ ل سەر چارەسەركرنا ڤێ كێشەیێ دكەت.
پێشەوا هەورامانی، پەیڤدارێ حوكمەتا هەرێما كوردستانێ بۆ رۆژنامەیا ئەڤرۆ گۆت: «ئەم پشتڕاستیێ ددەینە وەلاتیان، مەسرور بارزانی، سەرۆكوەزیرێن هەرێما كوردستانێ لسەر ڤێ كێشەیێ یێ رژدە و پشتڕاستیێ ل چارەسەركرنا وێ ددت و دێ‌ چارەسەریەكا باش بۆ بینین، مە گوهداریا خودانێن پانزینخانەیان كریە و مە نەڤێت ئەم غەدرێ ل چو كەسەكی بكەین، چونكی بۆ مە بەرژەوەندیا وەلاتیان ل بەراهیا هەموو تشتانە و پێدڤی یە بازڕگان و خودانێن پانزینخانەیان ژی ل پێناڤی بەرژەوەندیا گشتی، هەتا رادەیەكی مفایێ‌ خۆ كێم بكەن و حكومەت ژی ل بەرامبەر دێ هەمی ئاسانكاریان بۆ وان كەت».

هەولێر، قائید میرۆ:

سەرۆكێ ژوورا بازرگانی و پیشەسازیا هەرێما كوردستانێ ئاشكرا كر، بەرهەڤی بۆ رێكخستنا كارێ كڕین و فرۆتنا ئەرد و خانیان ل هەرێما كوردستانێ دهێنە كرن و دبێژیت: بڕیارە گریبەستێن كڕین و فرۆتنا ئەرد و خانیان ببنە ئەلكترۆنی.
گەیلان حاجی سەعید، سەرۆكێ ژوورا بازرگانیا هەرێما كوردستانێ بۆ رۆژناما ئەڤرۆ دیاركر، ل گورەی قانوونا هەژمارە 58 یا سالا 1987ێ یا تایبەت ب دەلالیێ ڤە و گۆت: «هەموو رێكارێن كڕین و فرۆتنێ گریدایی ئێكەتیا ژوورێن بازرگانی یە، لەوڕا ژی ئێكەتیا ژوورێن بازرگانی دێ بزاڤان بۆ رێكخستنا كارێن كڕین و فرۆتنا ئەرد و خانیان كەت، دێ هەموو بزاڤەكێ بۆ ڤێ پرسێ كەین، ب رێیا گرێبەستێن ئەلكترۆنی یان ژی هەر شێوازەكێ دی بیت، نوكە كار لسەر دهێتە كرن».
گەیلان حاجی سەعید گۆت ژی: «حوكمەتا ئیراقێ دەست ب رێكخستنا كارێ ئاڤاهیان كریە و ئەم ژی دێ ئەڤێ پرۆسێ بۆ بەرژەوەندیا وەلاتیان و ئاسانكاری بۆ نڤیسینگەهێن كڕین و فرۆتنا ئەرد و خانیان ئەنجام دەین، ئارمانج ژ ئەڤێ پلانێ ئەوە بابەتێ كڕین و فرۆتنێ زێدەتر ببیتە شێوازەكێ سەردەمیانە، چونكی شێوازێ ئەلكترۆنی یێ گڕیبەستان دێ‌ بیتە ئەگەرێ كێم بوونا ئاڕێشەیان و كۆنتڕۆلكرنێ‌، ئەم دزانین شێوازێ نوكە یێ‌ گرێبەستا زۆر جاران دبیتە ئەگەرێ پەیدابوونا ئاڕێشەیان د ناڤبەرا بكڕ و فرۆشیاری دا، بەلێ ئەگەر ببیتە ئەلكترۆنی ئەو ئاڕێشە نامینن».

دهۆك، لەزگین جۆقی:

سەرۆكێ ژوورا بازرگانی ل دهۆكێ دیاركر كو ژوورێن بازرگانی ل هەموو پارێزگەهێن ئیراقێ هاتینە دهۆكێ، داكو هەماهەنگی و هەڤكاریەكا زێدەتر د ناڤبەرا بازگانان دا دروست بیت.
شوكری، سەرۆكێ ژوورا بازرگانی ل دهۆكێ بۆ ئەڤرۆ دیاركر كو چەندین بابەتێن گرنگ د ناڤبەرا جڤاتا ئێكەتییا ژوورێن بازرگانی یێن ئیراقێ و دهۆكێ دا هاتنە بەحسكرن بۆ كاركرنێ و نەهێلانا ئاستەنگان ل هەموو پارێزگەهێن ئیراقێ و گۆت: «ئەم ل دهۆكێ كار دكەین كێشەیێن بازرگانی هەموو بهێنە چارەسەركرن، جڤاتا ئێكەتییا ژوورێن بازرگانی یێن ئیراقێ رۆلەكێ گرنگ ل گەل حكومەتا هەرێما كوردستانێ و ئیراقێ هەیە، بۆ باشتركرنا كارێ بارزگانی و نەهێلانا ئاستەنگان».
گۆت ژی: «جڤاتا ئابووری یا ئیراقێ ل هەر وەلاتەكی كار بكەت، دێ نوونەرێن مە ژی د گەل دابن، ئەڤە ژی پێنگاڤەكا گرنگە بۆ مە».

رەمەزان زەكەریا:

ب مەرەما پێشكێشكرنا خزمەتگوزارییان و بلەزكرنا پرۆسێسا ئاڤادانكرنێ، سەرۆكاتیا باژێرڤانیا ئاكرێ دەست ب پڕۆسێسا كێشانا هێلان و ڤەكرنا ڕێكان بۆ وان پارچەیێن ئەردی كریە، یێن بەری نوكە هاتینە بەلاڤكرن.
زێرەڤان تەمۆ، پەیڤدارێ سەرۆكاتیا باژێرڤانیا ئاكرێ بۆ ئەڤرۆ گۆت: «ب ئارمانجا ژ نێزیك ئاگەهداربوون ل سەر چاوانیا بڕێڤەچوونا كارێن خزمەتگوزاری و ئەندازیاری ب وان پارچەیێن ئەردی یێن ل سەر فەرمانبەران هاتینە بەلاڤكرن، بلند ڕەزا زوبێر، سەرۆكێ باژێرڤانیا ئاكرێ، ژ نێزیك ئەگەهداری قووناغێن گەهاندنا خزمەتگوزاریان بوو، بۆ وان پارچەیێن ئەردی، دیسا ڕێنومایێن پێدڤی دانە تیمێن ئەندازیاری و تەكنیكی، دا كو كار ل دووڤ بنەمایێن باژێڕڤانیێ بهێتە ئەنجامدان».
ناڤبری گۆت ژی: «د كارنامەیا باژێرڤانیا ئاكرێ دایە، خزمەتگوزاریان بگەهینیتە وان پارچەیێن ئەردی، دا كو وەلاتی بشێن بێ ئاڕێشە دەست ب ئاڤاكرنا خانی و جهێن خۆ بكەن».

زاخۆ، دلۆڤان هالۆ:

سەرۆكاتیا باژێڕڤانیا زاخۆ دیاركر كو نێزیكی 13 هزار فەرمانبەران ل سنۆرێ ئیدارەیا سەربخوە یا زاخۆ، مافێ‌ وەرگرتنا پارچەیێن ئەردی هەیە و پرۆسێسا هووربینیێ بۆ بەهرا پتریا ناڤێن فەرمانبەران هاتیە كرن.
سەرۆكاتیا باژێڕڤانیا زاخۆ، ئاماژە ب وێ چەندێ ژی كر كو لیژنەیەكا تایبەت بۆ پرۆسێسا بەلاڤكرنا پارچەیێن ئەردی هاتیە پێكئینان، هووربینی بۆ ناڤێن بەهرا پتر یا ناڤێن وان فەرمانبەران هاتیە كرن، یێن مەرجێن وەرگرتنا پارچەیێن ئەردی ژێ دگرن و گۆت: «حەفتیا بهێت دێ قووناغەكا دی یا بەلاڤكرنا پارچەیێن ئەردی ب شێوێ پشككێشان هێتە ڕاگەهاندن».
سەرۆكاتیا باژێڕڤانیێ ئاشكرا ژی كر كو ئەو پارچەیێن ئەردی یێن ل سەر فەرمانبەران دهێنە بەلاڤكرن، دكەڤنە جهێن گران بها و گۆنجایی یێن باژێڕی، هەموو خزمەتگوزاریێن وەكو: ئاڤ و كارەب و ڕێكێن هاتنوچوونێ بۆ جهێ وان پارچەیێن ئەردی دێ هێنە دابینكرن.