ب، سه‌رجان مەحمود:

بسپۆرەکێ پەیوەندیێن نێڤدەولەتی دیار دکەت، فشارێن گەلەک زێدە ل سەر کوردان ل سووریێ هەنە دا ئەو چو هەرێمەکێ بۆ خوە ئاڤا نەکەن، ئەو یەک بەروەختە چونکی بێی کوردان چو پرسێن ل رۆژهەلاتا ناڤین ناهێنە چارەسەرکرن.

د. ئیقبال دووڕە بسپۆرێ پەیوەندیێن نێڤدەولەتی دیار کر، تورکیا و هندەک وەلاتێن عەرەبی فشارێن گەلەک زێدە ل کوردێن سووریێ کرن دا کو ئەو چو هەرێمەکێ ل سووریێ ئاڤا نەکەن، هەروەسا ژ بەر بەرژەوەندیێن خوە یێن ئابووری ژی هەم ئەمریکا و هەم ژی وەلاتێن رۆژئاڤایی کوردێن سووریێ ب تنێ هێلان و ژ بەر ڤێ یەکێ ژی وەکو چارەسەری ئەو نەچار مان ببنە پشکەک ژ دەولەتا سووریێ و گۆت: (داخویانیا ڤێ دووماهیێ یا مەزلوم عەبدی فەرماندارێ گشتی یێ هێزێن سووریا دیموکرات ژی نیشا ددەت کو فشارێن گەلەک زێدە ل سەر کوردان هەبوون و دیارە کوردان چو رێیێن دی یێن چارەسەریێ نەبوون، بریارا کو هاتیە دان ژی مرۆڤ دشێت بێژیت ژ نەچاریێ بوو، لێ ژ بو کو کورد بهێنە پاراستن ژی بریارەک خراب نەبوو).
ناڤهاتی ئەو یەک ژی دیار کر، تورکیا و هندەک ژ وەلاتێن عەرەبی هەست ب گوهۆڕینێن مەزن ل دەڤەرێ کرن، وان هەر زوو بزاڤ کرن کو کورد ل سووریێ نەبنە هێزەکا کاریگەر و تورکیا شیا ئەمریکا ژی رازی بکەت ب جهێ پشتەڤانیا کوردان پشتەڤانیێ ل دەستهەلاتا شەرعی بکەت و وەسا کورد ب تنێ مان و رێککەفتنا ڤێ دووماهیێ یا هەسەدێ و شامێ ژی د رەوشەکا وەسا دا هاتە ئیمزا کرن.
د. ئیقبالی ئەو یەک ژی دیار کر، دبیت نها تورکیا وەسا هزر بکەت کو شیایە ل سووریێ سەرکەڤیت، لێ بابەت وەسا نینە، رۆژهەلاتا ناڤین کەفتیە بەر پێلەکا مەزن یا گوهۆڕینان، کاریگەریا شەڕێ ئیرانێ و ئەمریکا هەتا نها بەردەوامە و دێ گوهۆڕین ل ئیرانێ ژی روو دەن و گۆت: (هەروەسا ئالۆزیێن ڤێ دووماهیێ یێن د ناڤبەرا ئسرائیلێ و تورکیا دا ژی نیشا ددەن کو رەوشا دەڤەرێ وەکو خوە نامینیت، نها سووریێ بوویە مەیدانا ناکۆکیێن د ناڤبەرا تورکیا و سووریێ دا و هەکە شەڕەک ژی د ناڤبەرا تورکیا و ئسرائیلێ دا روو بدەت دێ ل سووریێ بیت، ئەو یەک دێ کاریگەریا خوە ل سەر پاشەرۆژا کوردان ژی ل سووریێ هەبیت، ژ بەر ڤێ یەکێ ژی دڤێت ئەم چاڤەرێ بین کا دێ رەوشا سووریێ بەر ب کیڤە چیت، چونکی هەر گوهۆڕینەک ل سووریێ روو بدەت دێ کاریگەریا خوە ل سەر رەوشا کوردان ژی ل وی وەلاتی هەبیت).
بسپۆرێ پەیوەندیێن نێڤدەولەتی د پشکەکا دی یا ئاخڤتنا خوە دا بەحسێ ڤێ یەکێ ژی کر، کورد ئێدی هێزن ل دەڤەرێ، راستە کوردان دەولەتا خوە نینە، لێ کورد هێزەک کاریگەرن و ئێدی ل رۆژهەلاتا ناڤین بێی بەرچاڤ وەرگرتنا رۆل و پێگەهێ کوردان چو پرسەک ناهێتە چارەسەرکرن، ئەمریکا و وەلاتێن دی نها ژ بەر بەرژەوەندیێن خوە یێن ئابووری پشتەڤانیێ ل دەولەتێن ناڤەندی ل دەڤەرێ دکەن، لێ بابەت وەسا ژی ئێکلا نابیت، چونکی پرسێن ل رۆژهەلاتا ناڤین ب رێیا دەولەتێن ناڤەندی ناهێنە چارەسەرکرن، دڤێت رۆلێ کوردان و نەتەوەیێن دی ژی بەرچاڤ بهێتە وەرگرتن.
ناڤهاتی ئەو یەک ژی دیار کر، بابەتێ شەڕێ ئیرانێ و ئەمریکا هەتا بهێتە ئێکلاکرن دێ گەلەک گوهۆڕین روو دەن، چ ب شەڕی بیت یان ژی ب رێککەفتنەکا سیاسی بیت دێ گوهۆڕینێن مەزن روو دەن، هەر گوهۆڕینەک ل ئیرانێ روو بدەت دێ کاریگەریا خوە ل سەر پاشەرۆژا کوردان کەت، دیارە ل ئیرانێ ژی کورد یێ خوە بۆ گوهۆڕینان بەرهەڤ دکەن و گۆت: (رۆژهەلاتا ناڤین نها د رەوشەکا گەلەک هەستیار دایە، ئالۆزیێن گەلەک مەزن هەنە، دبیت شەڕەکێ دی یێ مەزن ژی روو بدەت، هەکە شەڕ د ناڤبەرا تورکیا و ئسرائیلێ دا روو نەدەت ژی ئالۆزیێن د ناڤبەرا هەر دو وەلاتان دا دێ ب سالان بەردەوام بیت، چونکی نها هەڤڕکیێن هەر دو وەلاتان گەلەک زێدە نە و ئەو یەک ژی ل سووریێ و ب گشتی ل رۆژهەلاتا ناڤین دێ رێ بۆ پێشهاتەیێن نوو ڤەکەت).
بسپۆرێ پەیوەندیێن نێڤدەولەتی د دووماهیا ئاخڤتنا خوە دا ئەو یەک ژی نەڤەشارت کو، نها بابەت ئەوە نینە کا دێ کورد چ بدەستڤە ئینن، بەلکو نها تورکیا و هندەک ئالی یێ کار دکەن دا کوردان ب دانا کێمترین مافان رازی بکەن و نەهێلن کورد ببنە هێزەکا کاریگەر ل دەڤەرێ، داخویانیا بەری چەند رۆژان یا ئەردۆغانی ژی نیشا ددەت کو سەردەمێ بێ ماف هێلانا کوردان ل دەڤەرێ ب دووماهی هاتیە، ڤیجا گرنگە هەموو هێز و ئالیێن سیاسی یێن کوردی ژی ل گۆر راستیێن نها ل دەڤەرێ سیاسەتێ بکەن، کورد دشێن ژ لاوازیا نەیارێن خوە مفایێن باش وەربگرن و بگەهنە گەلەک مافێن خوە، گرنگە کورد نەبنە پشکەک ژ ئالۆزیێن نها و خواندنەکا راست بۆ روودانێن ل رۆژهەلاتا ناڤین بکەن.