دوهی د رێورەسمەكێ‌ ڕێكخستی دا ل هۆتێلا رێكسۆس باشترین وەرزشڤانێن سالا 2024ێ‌ یێن پارێزگەها دهۆكێ‌ و ئیدارا سەربەخوەیا زاخۆ هاتنە خەلاتكرن، پشتی ل دووڤ ستاندەرێن جیهانی پۆلیكرن بۆ هاتیە دانان ئەوا 37 وەرزشڤان، ژ یاریزانان و ڕاهێنەران ئەوێن ژلایێ‌ فدراسیۆنێن وەرزشی یێن پارێزگەهێ‌ هاتبوو نەدەستنیشانكرن ل دووڤ ئامارێن وێ‌ سالێن یێن یاریزانان ئەوێن پشكدار و دەستكەفتێن نافخوە و دەرڤە هەیین.
ئەڤ ڕێورەسمە ب چاڤدێرییا د. عەلی تەتەر پارێزگارێ‌ دهۆكێ‌ ژلایێ‌ لژنەیا ئۆلمپی تایێ‌ دهۆك ڤە هاتییە ڕێكخستن ب بەرهەڤبوونا د. نەوزاد عەبدوللا بەرپرسێ‌ لقێ‌ ئێك و نوونەرا مەكتەبا ڕێكخستنا پارتی ل پارێزگەها دهۆكێ‌ و كۆمەكا وەرزشڤان و سەرۆك یانەیێن وەرزشی ل پارێزگەهێ‌ و ئیدارا سەربەخوەیا زاخۆ هاتبوو كرن.
ل دووڤ لژنەیا هەلسەنگاندنێ‌ سێ‌ باشترین وەرزشڤان بڤی شێوەیی هاتنە خەلاتكرن.
عەبدولرەزاق شێخو یاریزانێ‌ كوڕ – یاریزانێ‌ یارییا كیك بۆكسینگێ‌.
ئەڤین سەعید یاریزانا كچ – یاریزانا یاریێن گۆرەپانێ‌.
جوتیار عەلی – ڕاهێنەر – راهێنەرێ‌ یارییا باسكێت بۆلێ‌.
تیما دهۆك یا فوتبۆلێ‌ – باشترین تیم هاتە خەلاتكرن.
ل دۆر ڤێ‌ یەكێ‌ د. ئەحمەد قاسم سەرۆكێ‌ لژنەیا ئۆلمپی تایێ‌ دهۆك سۆپاسییا پارێزگارێ‌ دهۆكێ‌ كر ژبەر پشتەڤانییا وی یا بەردەوام بۆ وەرزشێ‌ و دەستخوەشییا لژنەیا سەرپەرشت كر و پیرۆزباهییا هەموو سەركەفتیان كر و گۆت: ئەڤە نە جارا ئێكێ‌ یە و یا دووماهیێ‌ ژی نابیت، ئەڤ یاریزانێن مە هەیین ل سەر ئاسێن، كوردستانێ‌ و ئیراقێ‌ و دەرڤە شیاین ئەنجام و دەستكەفتان بینن ڕامانا وێ ئەوە كو ئاستێ‌ وەرزشێ‌ پارێزگەهێ‌ هێدی بەر ب پێشڤە دچیت، ب هیڤیینە ل سالا 2025 ئەم دەستكەفتێن باشتر و مەزنتر ژی ببین.
ژلایێ‌ خوەڤە د. عەلی تەتەر پارێزگارێ‌ دهۆكێ‌ دەستخوەشیا هەموو لایەكی كر ژبۆ ئەنجامدانا ڤێ‌ چالاكیێ‌ و گۆت: پارێزگەها دهۆكێ‌ كۆمەكا باش و خودان شیان ژ یاریزانان یێن هەیین و رۆلێ‌ وان یێ‌ بەرچاڤە، پێخوەشین دەمێ‌ مە چار یانەیێن كوردستانی هەبن ل سەر ئاستێ‌ ئیراقێ‌ رێزێن پێشیێ‌ بهێن تایبەت زاخۆ، دهۆك و هەولێر، حوكمەتا هەرێما كوردستان ب سەرۆكاتییا رێزدار مەسرۆر بارزانی بەردەوامە ل سەر پشتەڤانییا وەرزشێ‌ سەرباری حوكمەتا ئیراقێ‌ ئەو یانەیێن مە یێن دخولا ستێرێن ئیراقێ‌ دا پشتگوهـ هاڤێتە و ئەو مینحەیا دارایی یا مافێ‌ وان نە دایێ‌.

بڕیارە ئەڤرۆ چار یاریێن مایی هەڤڕكیێن گەڕا 17 یا قۆناغا ئێكێ‌ ژ خولا ستێرێن ئیراقێ‌ یا فوتبۆلێ‌ ب دووماهی بینت، یانەیا زاخۆ دێ‌ د گرنگترین یاریێن خوە دا نەجەف مێڤان كەت.
جەماوەرێ‌ تیما فوتبۆلا یانەیا زاخۆ ب ژڤانن ئەڤرۆ ل دەمژمێر پێنجێ‌ ئیڤاری ل یاریگەها زاخۆ یا نێڤدەولەتی پشتەڤانییا تیما خوە بكەن ژبۆ هاندنا وان بەر ب سەركەفتنا نەهێ‌ دخولێ‌ دا و ئەڤجارە ژی ل سەر مێڤانا خوە یانەیا نەجەف بینن، كوڕێن خابووری د رێزبەندیەكا باش دانە ب كۆمكرنا 29 خالان ل رێزا چارێ‌ دهێت ژ هەشت سەركەفتن، چار وەكهەڤی و چار خوسارەتی هەنە، یانەیا بەرانبەر خودانا 24 خالانە ل رێزا هەشتێ‌ دهێت و شیابوو ل حەفتییا بۆری سەركەفتنەكا مەزن ل سەر جەوییە بینت ب چار گۆلان، یارییا ئەڤرۆ بۆ زاخۆیا هەڤڕكییەكا دییە ژبۆ پێشڤەچوون بۆ رێزێن باشتر، ئنیەتا زاخۆییا یا دیارە ئەوژی ل رێزێن پێشیێ‌ نە هێنە خارێ‌ و بەلگەژی د ڤەگۆهاستنێن زڤستانێ‌ دا كۆمەكا گرێبەستان ئیمزاكر و گرنگترین ئەوان گرێبەستا ئینانا دو یاریزانێن ڕەڤەندا كور ل ئۆرۆپا و یانەیێن بەرنیاس ئەوژی ئەحمەد یاسین و ژێلۆان حەمەد، لێ‌ پشكدارییا وان د یارییا ئەڤرۆ دا چو دیار نینە.
ژ یاریێن دی یێن ئەڤرۆ
ل دەمژمێر 7:30 شەڤ یاریگەها شەعب ل باژێرێ‌ بەغدا مێڤاندارییا ئێك ژ یاریێن دی یێن بهێز دناڤبەرا هەردو یانەیێن جەوییە و شورتە بكەت، ل یاریگەها زەورا یانەیا كارەبا دێ‌ مینا یا بەسرایی ل دەمژمێر 2:30 پشتی نیڤرۆ مێڤان كەت، د هەمان دەم دا یانەیا حدود دێ‌ بیتە مێڤانا یانەیا كەرخ ل یاریگەها ئەحمەد رازی ل پایتەختێ‌ ئیراقێ‌ بەغدا.

قەیس وەیس:

چاڤەڕێ‌ دهێتە كرن سوبەهی ئەینی وەرزێ‌ نوو 2024-2025 یا خولا فوتسالا كوردستانێ‌ ل سەر كچان ب پشكدارییا هەشت یانەیان بهێتە كرن ئەوێن هاتینە بەلاڤكرن ل سەر دو كۆمان یاریێن وان ب شێوەیێ‌ خول دو قۆناغ دێ‌ هێنە بڕێڤەبرن، سەركەفتیێن ئێكێ‌ و دویێ‌ دێ‌ دەربازبنە قۆناغا چارگۆشەیا زێرین، ل وەرزێ‌ پێشتر یانەیا ئافرەتێن دهۆكێ‌ ناسناڤێ‌ خولێ‌ ب دەستڤە ئینابوو، كچێن یانەیا زاخۆ رێزا دویێ‌ هاتبوون.
یاریێن گەڕا ئێكێ‌ دێ‌ ل دەمژمێر 2:30 پشتی نیڤرۆ بڤی ڕەنگی هێنە كرن.
كۆما ئێكێ‌: چەمچەمال – ئافرەتێن دهۆك، یارییا دویێ‌ ڕەواندۆز – كۆیە.
كۆما دویێ‌: ئافرەتێن هەولێر – زاخۆ، یارییا دویێ‌، ئافرەتێن سۆران- سیروانی هەلەبچە.
ل دۆر دووماهی بەرهەڤیێن تیما ئافرەتێن دهۆكێ‌ ئاراز سالح ڕاهێنەرێ‌ تیمێ‌ بۆ رۆژنامەیا ئەڤرۆ گۆت: بۆ ماوەیێ‌ نێزیكی مەهەكە مە بەرهەڤیێن خوە كرینە، ل وەرزێ‌ بۆری تیما مە ناسناڤێ‌ قارەمانیێ‌ ب دەستڤە ئینابوو، لەوما ژی بۆ وەرزێ‌ ئەڤ سالە ئەركێ‌ مە ب سانەهی نابیت، لێ‌ ئەوا د شیان دابیت وەكو ئارمانج مە هیڤیێن مەزن هەنە كو دوبارە ناسناڤێ‌ خوە پارێزین، یانەیێن خودان شیان و یاریزانێن گەلەك باش هەنە و دێ‌ ئەڤ سالەكە هەڤڕكییەكا بهێزتر بیت، پرانییا یانەیان حەزا ب دەستڤە ئینانا ناسناڤی یا هەی.
ژلایەكێ‌ دووڤە ژێدەرێن باوەرپێكری نێزیكی یانەیا زاخۆ كو تیما وان بەردەوام ل سەر بەرهەڤیێن خوە بۆ ڕاهێنانێ‌ ب سەرپەرشتییا زێنە جەمیل ڕاهێنەرا تیمێ‌ و كۆمەما باش یا یاریزانان دگەل دانە و هیڤیێن وان ژی د مەزنن ژبۆ دەستڤە ئینانا دەستكەفتەكی بۆ یانەیا زاخۆ.

چاڤەڕێ‌ دهێتە كرن ئەڤرۆ و سوبەهی 15 یاری ژ هەڤڕكیێن گەڕا ئێكێ‌ یا قۆناغا كۆمان ل سەر ئاستێ‌ یانەیێن پلا نایاب، ئێك یا كۆپا كوردستانێ‌ ل یاریگەهێن جودا یێن پارێزگەهێن هەرێمێ‌ بهێنە كرن ئەوا هەموو یاری دێ‌ ل دەمژمێر 2:30 پشتی نیڤرۆ هێنە كرن.
یاریێن ئەڤرۆ دێ‌ هێنە كرن بڤی رەنگی نە.
دهۆك – تەناهی، یاریگەها سێیێ‌ یا یانەیا دهۆك.
زاخۆ – سێمێل، یاریگەها دەلال ل باژێرێ‌ زاخۆ.
ئاكرێ‌ – ڕواندز، یاریگەها ئاكرێ‌.
پیشەسازی – هندرین، یاریگەها پیشەسازی.
زانكۆیا جیهان – شەقلاوە، یاریگەها فرانسۆ هەریری دو.
بابان – بازیان، یاریگەها زانكۆ.
چوارقوڕنە – سیروانی نوو، یاریگەها چوارقوڕنە.
ڕزگاری – شێروانە ، یاریگەها ڕزگاری.
خاك – شۆرجە، یاریگەها خاك.
یاریێن سوبەهی ئەینی بڤی شێوەیی نە.
پێشمەرگەیا هەولێر – هەولێر.
كۆیە – برایەتی، یاریگەها كۆیە.
سەیدسادق – چەمچەمال -نا هێتە كرن.
قەدزێ‌ – ڕانیە، یاریگەها قەلادز.
سۆران – هەلۆ، یاریگەها سۆران.
كفری- دەربەندیخان، یاریگەها كفری.