‎ سەربەست لەزگین، ئەندامێ مەكتەبا سیاسی و بەرپرسێ مەكتەبا رێكخستنا پارتی ل پارێزگەها دهۆكێ دوهی 29/1/2025 ل بارەگایێ مەكتەبێ ب ئامادەبوونا هەردو هاریكاران ل گەل بەرپرس و سازیێن سەر ب ناڤەندا خانی یا رەوشەنبیری و راگەهاندنێ ڤە كۆمبوو.
بەرپرسێ مەكتەبا رێكخستنا پارێزگەها دهۆكێ د كۆمبوونێ دا رۆناهی ئێخستە سەر رەوشا سیاسی ل كوردستانێ و دەڤەرێ، دیسا بەحسێ گرنگیا رۆلێ راگەهاندنێ كر د پرسێن نەتەوەیی و نیشتیمانی دا، هەروەسا پەسنا رۆلێ ناڤەندا خانی كر و گۆت: «ناڤەندا خانی یا رەوشەنبیری و راگەهاندنێ شیایە بزاڤا رەوشەنبیری و میدیایی ل دەڤەرێ خۆرتتر لێ بكەت».
‎ سەربەست لەزگین د كۆمبوونا خۆ دا تەكەز ل سەر وێ چەندێ كر، كو سازیێن ناڤەندا خانی وەكو ئالاڤەكێ رەوشەنبیری و راگەهاندنێ، تەمامكەرێن كارێن مەكتەبا رێكخستنا پارتە نە ل پارێزگەها دهۆكێ.

د سالڤەگەرا 38 یا وەغەركرنا ئدریس بارزانی یێ هەردەم ساخ دا، فازل میرانی، بەرپرسێ دەستەیا كارگێرییا مەكتەبا سیاسییا پارتی دیموكراتی كوردستان راگەهاند، ئدریس بارزانی گەلەك خەبات كر و د سەركەفتنێ دا كێم دیت.
فازل میرانی دیاركر ژی، من گەلەك د خواست بارزانیێ نەمر و ئدریسێ جانەمەرگ و شەهیدێن مە، هەڤپشكێن مە بان و ئەڤرۆ د ڤێ سەركەفتنێ دا كو ب كێمی مللەتێ مە د حالەتەكێ رێژەییێ سەقامگیریێ و ئاڤەدانیێ دایە، نابێژم ب رەهایی ژ بەركو رەهاییا مە زێدەترە ژ ئەوا نوكە ئەم تێدا، بەلێ ئەڤرۆ ئەم ل ڤێرێ نە و دڤێت بزاڤێ بۆ سوباهییەكا باشتر بكەین.
هەروەسا دیاركر، كاك نێچیرڤان بارزانی دشێت بەردەوامیێ بدەتە رێبازا بابێ‌ خۆ، وەكو كوڕ و باب، ئەگەر نە، ئەم هەموو كوڕێن ڤێ پارتیێ نە و كوڕێن مەلا مستەفا بارزانی نە.

زاخۆ، دلۆڤان هالۆ:

شڤان عەبدی، بەرپڕسێ ڕاگەهاندنا ئیدارەیا سەربخوە یا زاخۆ بۆ ڕۆژناما ئەڤرۆ دیار كر، دوهی 29/1/2025 ب چاڤدێرییا گوهدار شێخۆ، سەرپەرشتێ ئیدارەیا سەربخوە یا زاخۆ، سەنتەرێ جڤاكی یێ پاراستنا خێزان و زاڕۆكان ب نوونەراتیا كۆمسیارا بلندا نەتەوێن ئێكگرتی خانم پاولینا هاتە ڤەكرن.
بەرپڕسێ ڕاگەهاندنا ئیدارەیا سەربخوە یا زاخۆ خویا ژی كر، هەر د ڕێوڕەسمان دا گوهدار شێخۆی پێشوازی ل خانم زەكیا سەید سالح، بریكارا وەزارەتا كاروبارێن جڤاكی و شاندێ د گەل دا كر و د هەڤدیتنەكێ‌ دا بەحس ل گرنگی و پیتەپێدانا خێزانێ و پاراستنا زارۆكان هاتە كرن.
شڤانی گۆت: «هەبوونا سەنتەرێن ب ڤی شێوەی ب پێدڤی د زانین ژ بۆ پتر خزمەتكرنا خێزانێ و زاڕۆكان و پاراستنا وان ژ هەر ڕوودانەكا چاڤەرێ نەكری».

رەمەزان زەكەریا:

پشكەكا پڕۆژەیێ عەلوەیا هەڤچەرخا ئاكرێ تەمام بوویە و هاتیە ڤەكرن، نوكە كڕین و فرۆتن تێدا دهێتە كرن و كاركرن ل پشكێن دی ژی یا بەردەوامە.
حەتەم هەنارەیی، خودانێ پڕۆژەی بۆ ئەڤرۆ دیار كر، مەسرور بارزانی بەرێ بنیاتی بۆ ڤی پڕۆژەی دانایە و گۆت: «نوكە نێزیكێ 65% تەمام بوویە، د قووناغا ئێكێ دا 76 دوكانێن عەلوە و عەلاف و گوهۆڕینێن دراڤی ڕادەستی خودانێن وان هاتنە كرن، كار تێدا دكەن، نوكە كار د قووناغا دویێ یا عەلوەیێ و عەلافان و ساركەران دا دهێتە كرن».
گۆتژی: «پێشانگەهێن مەزن ژی دێ هێنە چێكرن، ب گشتی 112 دوكانن، كو ژ 48 عەلوەیان پێكهاتیە، 19 ساركەر و 55 هۆلێن مەزنن، هندەك بۆ بازرگانی و ماركەیێن جیهانینە، 20 عمبارێن مەزن یێن عەلافان تێدانە، كو هەر ئێك ژ وان 450 مەترە».
‎ناڤبری خویاژی كر، نوكە كار ل سەر سێ قووناغان یێ‌ بەردەوامە و گۆت: «پشتی تەمامبوونا قووناغا سێیێ، عەلوەیا ئاكرێ دێ بیتە مەزنترین عەلوە ل سەر ئاستێ ئیراقێ، كو ڕووبەرێ وێ 300 دۆنەمێن ئەردی نە».

زنار تۆڤی:

ب بەرهەڤبوونا د. عەلی تەتەر، پارێزگارێ دهۆكێ و د. هێمن میرانی، سەرۆكێ دیوانا وەزارەتا ناڤخۆ و رێڤەبەرێ دیوانا هاتنوچوونێ عەمید ئیبراهیم عەگید، رێڤەبەرێ هاتنوچوونێ ل پارێزگەها دهۆكێ دوهی 29/1/2025 ل رێڤەبەریا هاتنوچوونا سیستەمێ دیجیتالیكرنا دەرئێخستنا سالنامەیێن ترۆمبێلان، كو جارا ئێكێ یە ل سەر ئاستێ هەرێمێ و ئیراقێ ئەڤ سیستەمە دهێتە ب كارئینان؛ هاتە ڤەكرن.
پارێزگارێ دهۆكێ دەستخۆشی ل تیمێن كاری كر یێن ئەڤ سیستەمە بەرهەڤكری و گۆت: «ب رێیا ڤی سیستەمی گەلەك ئاسانكاری بۆ وەلاتییان دێ هێنە كرن، وەلاتی دشێن ل مالێن خۆ ب رێیا ڤی سیستەمی مامەلێن خۆ ب رێڤەببەن و ببنە خودان سالنامێن دیجیتالی».
گۆتژی: «ئەڤ سیستەمە ژ لایێ كوالێتیێ ڤە یێ پێشكەفتییە و یا ب زەحمەتە سەختەكاری تێدا بهێتە كرن».
پاشی د. هێمن میرانی، سەرۆكێ دیوانا وەزارەتا ناڤخۆ دیار كر، كابینەیا نەهێ یا حكومەتا هەرێمێ دێ بەردەوامیێ دەتە ئەلكترۆنیكرنا هەموو دەزگەهێن میری، بۆ وێ یەكێ وەلاتی بشێن هەموو مامەلێن خۆ ب ساناهی برێڤەببەن.

دهۆك، لەزگین جوقی:

رێكخراوا ماین یا نەرویجی و دەزگەهێ خێرخوازی یێ بارزانی پێدڤیێن نۆشداری رادەستی ساخلەمیا دهۆكێ كرن.
د. ئەفراسیاب موسا، رێڤەبەرێ گشتی یێ ساخلەمیا پارێزگەها دهۆكێ راگەهاند، رێكخراوا ناڤبری د دەمێن بوری دا ب بهایێ زێدەتر ژ دو ملیۆن و 500 هزار دۆلاران هاریكاری پێشكێشی ساخلەمیێ كرینە و هیڤیخوازین ئەڤ هاریكاریە دبەردەوام بن و گۆت: «پێدڤیێن ئەڤرۆ تایبەت بوون ژ بۆ نەخوشێن ئاریشەیێن گوهلێبونێ هەین، ب تایبەت زارۆكان».