كەسایەتیێ دیارێ جڤاكی و سیاسی یێ‌ دەڤەرا ئامێدیێ و پێشمەرگەیێ هەردو شۆڕەشێن ئیلۆن و گولانێ (محسن سالح ئامێدی) دوهی 2/7/2025 ژ ئەگەرێ نەخۆشیێ ل نەخۆشخانەیەكا دهۆكێ مالئاڤایی كر.
محسن سالح ئامێدی ئێك بوویە ژ كەساتیێن جڤاكی و سیاسی یێن دەڤەرا ئامێدیێ، خودێ‌ ژێ‌ رازی ل سالا 1931 ژ دایكبوویە و پێشمەرگەیێ هەردو شۆڕەشێن ئیلۆن و گولانێ بوویە.
خودێ‌ ژێ‌ رازی ل سالا 1970 هەتا 1974 و ل سەر دەمێ حكمێ زاتی سەرۆكێ باژێرڤانیا ئامێدیێ بوو، وی و مالباتا وی پشكداریەكا كارا د سەرهەلدانا بهارا سالا 1991ێ‌ دا كربوو، هەروەسا ئەندامێ خۆلێن دەستپێكی یێن پەرلەمانێ كوردستانێ بوو.
خودێ‌ ژێ‌ رازی د ژیانا خۆ دا شییایە حزمەتەكا بەرچاڤ یا دەڤەرێ بكەت، لێ‌ دوهی ژ ئەگەرێ نەخۆشیێ ل نەخۆشخانەیەكا باژێرێ دهۆكێ مالئاڤایی كر و هەر دوهی ل گۆڕستانا كانیا سنجێ د رێورەسمەكێ دا و ب بەرهەڤبوونا هەژمارەكا زۆرا خەلكێ دەڤەرێ و بەرپرسێن حزبی و حكومی و كەسوكارێن وی، هاتە ڤەشارتن.
دیسا هەر ب هەلكەفتا مالئاڤاییا كەسایەتیێ دیارێ جڤاكی و سیاسی یێ‌ دەڤەرا ئامێدیێ و پێشمەرگەیێ هەردو شۆڕەشێن ئیلۆن و گولانێ (محسن سالح ئامێدی)، مەكتەبا رێكخستنا پارتی ل پارێزگەها دهـۆكێ برۆسكەیا بەهـیداریێ بەلاڤكر و تێدا هاتیە: «غەمبار و دلگرانبووین ب خەبەرێ مالئاڤاییا پێشمەرگە و خەباتكارێ دێرین و كەسایەتیێ بەرنیاسێ ئامێدیێ و دەڤەڕا بەهـدینان خودێ ژێ رازێ «محسن سالح عەبدولعەزیز ئامێدی» و ب ناڤێ مەكتەبا ڕێكخستنا پارتی ل پارێزگەها دهـۆكێ بەهـیداری و سەرساخیێ ئاراستەی مالباتا خودێ ژێ رازی دكەین، محسن ئامێدی ژ مالباتەكا كوردپەروەر و نیشتیمان پەروەر و پارتی پەروەر بوو، هەمی ژییێ‌ خۆ بۆ خزمەتا گەل و وەلاتێ خۆ و رێبازا پیرۆزا پارتی و بارزانی تەرخانكربوو، ژ خودێ مەزن هیڤیخوازین جهـێ خودێ ژێ رازی بكەتە بهـەشتا بەرفرەهـ و سەبر و هەدارێ بدەتە مالباتا وی».

ب ئامادەبوونا د. سالار عوسمان، بەرپرسێ پشکا ڕەوشەنبیری و ڕاگەهاندنا پارتی دیموکراتی کوردستان، بازنێ گفتوگۆ، گۆتوبێژا خۆ یا سیهێ ب ناڤ و نیشانێن «پێشئێخستنا پڕۆژەیێن ڕێک و بانان و چارەسەرکرنا ئاریشەیێن هاتنوچوونێ» ب ڕێڤە بر.
د ڤێ گۆتوبێژێ دا کو بەرێزان: د. سالار عوسمان، د. ئاگرین عەبدوڵڵا، هێژا محەمەد، حەکیم تێلی، خەدیجە محەمەد، د. فارس نەجاڕ، دیلان عەبدوڵڵا، کانیوار جوبرائیل، د. گەنجینە مەدحەت، هەروەسا ئەندامێن بازنێ گفتوگۆ : شڤان حەمدی، د. جەلال ئەحمەد و فەرهاد محەمەد ئامادە ببوون، ل دەستپێکێ ئەو ڕاپۆرتا مەیدانی بۆ ئامادەبوویان هاتە نیشادان یا بازنێ گۆتوبێژان ل سەرانسەری پارێزگەهـ و ئیدارێن سەربخۆیێن هەرێما کوردستانێ ئامادە کربوو و تێدا ڕا و بۆچوونێن ئەندازیار و شۆفێران هاتبوونە وەرگرتن.
ل دەستپێکا ڤێ گۆتوبێژێ، بەرپرسێ پشکا ڕەوشەنبیری و ڕاگەهاندنێ گەلەک ب گەرمی بخێرهاتنا ئامادەبوویان کر و دوپاتی ل سەر وێ چەندێ کر کو ئارمانجا بازنێ گۆتوبێژان ئەوە کو شیان و بیر و بۆچوونێن جودا پێکڤە کۆم بکەت، بۆ هندێ پێشنیار و ڕاسپاردەیێن گونجای بۆ چارەسەرکرنا ئاریشان بێخیتە بەردەستێ لایەنێن پەیوەندیدار.
د ڤێ گۆتوبێژێ دا ئامادەبوویان گەلەک ب هووری تەئکید ل سەر ئاریشێن ڕێک و بانێن هەرێما کوردستانێ کر و ئاماژە ب وێ چەندێ دا کو حکومەتا هەرێما کوردستانێ گرنگیەکا زۆر ب پرۆژێن ڕێک و بانان دایە، بەلێ هێشتا ڕێک و بانێن مە د ئاستێ پێدڤی دا نینن و وەک پێدڤی گرنگی ب نەخشە و هێلکاریێن جادەیێن سەرەکی و دانانا هێمایێن هاتنوچوونێ نەهاتیە دان.
دەربارەی سستی و پاشکەفتنا پشکەک ژ پرۆژێن ڕێک و بانان، ب تایبەتی جادەیێن سەرەکی یێن دناڤبەرا باژێر و ئیدارێن سەربخۆیێن هەرێما کوردستانێ، ئامادەبوویان ئەگەرێ سەرەکیێ پاشکەفتنا تمامبوونا پرۆژەیان ڤەگەراند بۆ وێ گەمارۆیا ئابووری یا حکومەتا بەغدا ب ڕێکا بڕینا پشکا هەرێما کوردستانێ ژ بودجا فیدرالی، ڤێ چەندێ ژی قەیرانەکا مەزنا ئابووری ل سەر هەرێما کوردستانێ دروست کریە.

شێخان، بارزان مزووری:

كەریم سلێمان، بریكارێ وەزارەتا چاندنێ ل حكومەتا هەرێما كوردستانێ بۆ رۆژناما ئەڤرۆ دیار كر، ژ بەر هشكەسالیێ حكومەتا هەرێما كوردستانێ مەزنترین پلان دانایە، كو ئاڤا ژێر ئەرد بهێتە پاراستن و پوندێن مەزن ل سەرانسەری كوردستانێ بهێنە دروستكرن.
ناڤبری گۆت: «مەزنترین بەنداڤ ل سەر ئاستێ ئیراقێ و كوردستانێ ل گوندێ‌ باكرمان ل سنۆرێ‌ دەڤەرداریا ئاكرێ دهێتە دروستكرن، دیسا ئەو بەنداڤا هەتا نوكە هشكەسالیێ كارتێكرن لێ نەكربیت و ئاڤەكا باش تێدا مابیت، بەنداڤا خەنسە».

رەمەزان زەكەریا:

د رێورەسمەكێ دا ل دیوانا رێڤەبەریا ناوچەداریا بجیلێ‌ و ب بەرهەڤبوونا دكتۆر دلاوەر بۆزۆ میكائیل، دەڤەردارێ ئاكرێ دوهی 2/7/2025 رێورەسمێن دەست ب كاربوونا رێڤەبەرێ نوو یێ ناوچەداریا بجیلێ‌ ب رێڤەچوون.
بشار محەمەد عەبدوللا، وەكو رێڤەبەرێ نوو یێ ناوچەداریا بجیلێ‌ ل جهێ بروا فارۆق هاتە دانان و دەڤەردارێ ئاكرێ پیرۆزباهی ل رێڤەبەرێ نوو كر و پشتەڤانیا خوە بۆ نیشادا، هەروەسا دەستخۆشی ل رێڤەبەرێ بەرێ بروا فارۆق كر بۆ وێ‌ خزمەتا پێشكێشی وەلاتیان و دەڤەرێ‌ كری.

دهۆك، لەزگین جۆقی:

بەرپرسێ نڤیسینگەها رزگاركرنا رەڤاندیێن ئێزدی بۆ ئەڤرۆ ئاشكرا كر، كار ل سەر چەند كەیسان بۆ رزگاركرنا رەڤاندیێن ئێزدی دهێتە كرن ل دەمێن بهێن ئەو كەیس دێ هێنە راگەهاندن.
حسین قائیدی، بەرپرسێ نڤیسینگەها رزگاركرنا رەڤاندیێن ئێزدی گۆت: «پشتی نەمانا تیرۆرستێن داعشێ‌، چەندین دوسیەیێن لێگەڕیان و رزگاركرنێ هاتنە ڤەكرن، ئێك ژ وان دوسیەیا ل سووریێ‌ بوو، كو هەژمارەكا مەزن یا رەڤاندیێن ئێزدی د ناڤ ئاخا سووریا دا ماینە».
گۆتژی: «ژ شەش هزار و 417 رەڤاندیێن ئێزدی، هەتا نوكە سێ هزار و 589 كەس رزگار بووینە و چارەنڤیسێ‌ پتر ژ دو هزار و 500 رەڤاندیێن ئێزدی ژی دیار نینە».