هەڤپەیمانییا مەسیحی داخوازییەك ئاراستەی سەرۆك بارزانی و سەركردەیێن ئیراقێ و نەتەوەیێن ئێكگرتی و جڤاكا نێڤدەولەتی كر و تێدا داخوازا ڤەكێشانا ب لەز یا میلیشیێن چەكدار كر.
هەڤپەیمانییا مەسیحی د بەیاننامەیەكێدا، داخوازییەك ئاراستەی سەرۆك بارزانی و سەركردەیێن ئیراقێ و نەتەوەیێن ئێكگرتی و جڤاكا نێڤدەولەتی كر و د وێ بەیاننامەیا خوە دا هەڤپەیمانییا مەسیحی داخوازكر بنپێكرنێن میلیشیا بهێنە راگرتن و نوونەرایەتییا راستەقینە بۆ مەسیحیێن ئیراقێ بهێتە پاراستن، هەروەسا داخوازییەك ئاراستەی سەرۆك بارزانی و هەموو سەرۆكایەتیێن ئیراقێ و جڤاكا نێڤدەولەتی و نەتەوەیێن ئێكگرتی و ئەندامێن بەردەوام یێن جڤاتا ئاسایشا نێڤدەولەتی و ئێكەتییا ئورۆپا كر، بۆ وێ چەندێ ئێكسەر دەستێوەردانێ بكەن و دادپەروەریێ بۆ مەسیحیێن كلدانی و ئاشووری و سریانی و ئەرمەنی دابین بكەن.
هەڤپەیمانییا مەسیحی د بەیاننامەیا خوە دا دیاركر، هەموو ئەو یاداشت و داخوازیێن ل دەمێ بۆری پێشكێشی ئۆرگانێن فەرمی یێن ئیراقێ كرین، ژوان ژی هەرسێ سەرۆكایەتییان و سەرۆكایەتییا دادگەها فیدرالی و كۆمسیۆنا بلند یا هەلبژارتنان و كۆمسیۆنا بلند یا مافێن مرۆڤی، هیچ ئەنجامەكێ ئەرێنی نەبوو، ب ڤێ چەندێ ژی بێزاری د ناڤ جڤاكێ مەسیحی دا مەزنتر بوو.
د بەیاننامەیێدا دوپاتی ل وێ چەندێ هاتیە كرن كو بەردەوامی بوونا میلیشیێن چەكدار ل باژێركێن دەشتا نەینەوا گەفەكا ئاشكرایە ل سەر ئاسایش و ژیانا هەژی بۆ مەسیحییان و پێكهاتەیێن رەسەن یێن دەڤەرێ، داخوازا ڤەكێشانا ب لەز یا ڤان میلیشیا و تەرخانكرنا ئاسایشا تایبەت ب دەزگەهێن سەربازی و ئەمنی یێن دستووری كر، هەروەسا پشتڕاستبوون ژ پاراستنا دەڤەرێن مەسیحی ژ دەستێوەردانێن ئاشكرا یێن میلیشیان.
سەبارەت ب نوونەرایەتییا هەلبژارتنان ژی هەڤپەیمانییا مەسیحی دوپاتی ل پێدڤییا راستڤەكرنا قانوونا هەلبژارتنێن جڤاتا نوونەران كر بۆ مسۆگەركرنا نوونەرایەتییا راستەقینە و ئازاد ب رێكا دامەزراندنا تۆمارا هەلبژارتنێن جودا بۆ دەنگدەرێن مەسیحی ب تۆماركرنا ئازادانەیا رۆلێن پێكهاتەیێ مەسیحی و تەرخانكرنا سندووقێن دەنگدانێ یێن جودا و كاغەز و كارتێن دەنگدانێ یێن جودا بۆ پشتڕاستبوون ژ رێگریكرنێ ل دەستێوەردانێن دەرەكی، ئانكو تنێ بۆ مەسیحییان هەیە دەنگ ب مەسیحییان بدەن، هەروەسا ل بەرچاڤ وەرگرتنا هەر پارێزگەهەكێ كو كۆتایا مەسیحییان ڤەدگریت وەك بازنەیا هەلبژارتنێن جودا بهێتە هەژمارتن.
هەڤپەیمانییا مەسیحی هۆشداری ژی دا هەكە بەری هەلبژارتنێن نوڤەمبەرا 2025 ئەڤ چاكسازییە نەهێنە بجهئینان، پێدڤییە هەلبژارتن بۆ وان پێنج كورسیێن كو بۆ كۆتایا مەسیحییان هاتینە تەرخانكرن بهێتە پاشئێخستن، هەتا ئەو گرەنتیێن ل سەری ئاماژە پێ هاتیە كرن بۆ مسۆگەركرنا نوونەرایەتییا راستەقینە دوور ژ هەژموونا میلیشیان، دڤێت بهێنە گرەنتیكرن بۆ ب دەستڤەئینانا نوونەرایەتییا راستەقینەیا پێكهاتەیێ مەسیحی ل جڤاتا نوونەرێن ئیراقێ.
هەروەسا بەیاننامەیێ ب راشكاوانە هندەك ژ میلیشیان و گرۆپێن چەكداری تۆمەتباركرن ب بكارئینانا پارەیێ گەندەلیێ كو ب قاچاخییا دراڤی و بازرگانییا نە قانوونی ب زێری و مادەیێن بێهۆشكەر هاتینە كۆمكرن. هەڤشێوەیێ بكارئینانا مووچەیێ زەبەلاحێ میلیشیا ب سەختە، بۆ كڕینا ویژدان و دەنگان و ترساندنا سەركردەیێن كەنیسێ و سەركردەیێن رەسەن یێن سیاسی یێن مەسیحی.
ل دووماهییا بەیاننامەیا خوە دا، هەڤپەیمانییا مەسیحی پەیامەك ئاراستەی ویژدانێ مرۆڤایەتیێ كر و داخواز ژێ كر ب ناڤێ مرۆڤایەتیێ، گوهدارییا داخوازییا گەلەكی بكەن كو هەلگرێ شارستانیەتەكا مەزنە، هەروەسا بەرپرسیارەتییا دیرۆكی و ئەخلاقی یا خوە بۆ پاراستنا هەبوون و مافێن وان هەلگرن.

بەهرام عریف یاسین، ئەندامێ كۆمیتا ناڤەندی و بەرپرسێ لقێ 18 یێ‌ پارتی ل ئامێدیێ‌، سمینارەك بۆ خەلكێ دەڤەرا بەرواری ژێریا ل ناوچەدارییا چەمانكێ پێشكێشكر و تێدا دیار كر، بزاڤێن پارتی ژ بۆ پێكئینانا حكومەتەكا ئێكگرتی و بهێز و خزمەتكار دبەردەوامن و دبێژیت: مە باوەریا رەها ب سیاسەتا حەكیمانە یا مەرجەع و سەرۆك بارزانی هەیە و بزاڤێن بەردەوامێن حكومەتا هەرێمێ ژ بۆ نەهێلانا ڤێ رەوشێ و دابینكرنا مووچەی و مسوگەركرنا خوشگوزەرانیێ بۆ هەموو كوردستانییان دبەردەوامن.
ناڤهاتی تەكەزی ل سەر گرنگییا هەبوونا ئێكرێزی و ئێكهەلوەستیێ كر و گۆت: «پرۆسەیا ئاشتیێ د ناڤبەرا توركیا و پەكەكێ دا و گرنگیا سەركەفتنا وێ و كارڤەدانێن وێ یێن ئەرێنی ل سەر هەرێمێ ب گشتی و دەڤەرا ئامێدیێ ب تایبەتی هەنە، دیسا ئەم د گەشبینین كێشەیێن د ناڤبەرا ئیراقێ و هەرێمێ دا ب دانوستاندنان دێ‌ هێنە چارەسەركرن و ئەڤ رەوشە دێ دەرباز بیت».

د. سالار عوسمان، بەرپرسێ بەشێ ڕەوشەنبیری و ڕاگەهاندنا پ. د. ك، ب ئامادەبوونا هەژمارەیەكا ئەندامێن بەشی و هەڤالێن بەشی، دوهی 1/7/2025 پێشوازیی ل هیوا گەیلانی، بەرپرسێ لقێ 24 یێ‌ سەفین یێ‌ پارتی دیموكراتی كوردستان و هەڤالێن د گەل دا ل دەستەیا كارگێڕی یا لقێ‌ 24 یێ‌ پارتی كر.
د دیدارەكێ‌ دا، هەردو لایان رەوشا هەرێما كوردستانێ‌ و دەڤەرێ‌ ب گشتی گەنگەشە كر، هەروەسا كاركرنا زێدەتر ب ئاراستەیا پێشڤەچوونا زێدەتر یا بیاڤێن ڕەوشەنبیری و ڕاگەهاندنێ‌ ل سنووری شەقلاوە ب گشتی دانوستاندن ل سەر هاتە كرن، دوپاتكرن ل هەماهەنگیا بەردەوام و كارێ‌ هەڤپشك پشكەكا دی یا دیدارێ‌ بوو.

رەمەزان زەكەریا:

حكومەتا هەرێما كوردستانێ بڕیار دایە بەنداڤەكا مەزن ل ناوچەداریا مەزنێ ل دەڤەرا بارزان دروست بكەت، بۆ وێ چەندێ جۆتیار و خودانێن تەرش و كەوالی ل دەمێ كیمئاڤیێ مفای ژێ ببینن.
بەنداڤ دێ كەڤیتە گوندێ دێرانە ل سنوورێ ناوچەداریا مەزنێ ل دەڤەرداریا مێرگەسۆر ل دەڤەرا بارزان و ژ لایێ حكومەتا هەرێما كوردستانێ ڤە دێ‌ هێتە دروستكرن.
بەنداڤ یا مەزنە و دێ‌ شیانێن كۆمكرنا دو بۆ سێ ملیار مەترێن سێجار یێن ئاڤێ هەبن، پشتی تەمامبوونا بەنداڤێ جۆتیار و خودانێن تەرش و كەوالی یێن دەڤەرێ دێ مفای ژێ بینن.

دهۆك، لەزگین جۆقی:

بەرپرسێ راگەهاندنا رێڤەبەریا رێكخستنا پلێتێن ئاهێن خوارنێ ل پارێزگەها دهۆكێ بۆ ئەڤرۆ دیار كر، هەتا نوكە ب رێژەیا 60% خەلكێ دهۆكێ فۆرمێن ئەلیكترۆنی یێن ئاهێن خوارنێ پڕكرینە و بەردەوام خەلك فۆرمێن خۆ پڕ دكەن.
قەیس وەیس، بەرپرسێ راگەهاندنا رێڤەبەریا رێكخستنا پلێتێن ئاهێن خوارنێ ل پارێزگەها دهۆكێ خویا كر، پڕكرنا فۆرمێن ئەلیكترۆنی یێن ئاهێن خوارنێ ل دهۆكێ یا بەردەوامە و گۆت: «هەتا نوكە ب فەرمی تشتەك نەگەهشتیە مە بۆ درێژكرنا دەمێ پڕكرنا فۆرمێن ئەلیكترۆنی یێن ئاهێن خوارنێ».
گۆتژی: «هەتا نوكە ب رێژەیا 60% ژ خێزانێن پارێزگەها دهۆكێ فۆرما خۆ پڕكرینە و چو ئاریشە بۆ خەلكی پەیدا نەبووینە، ب تنێ ئەو كەسێن ژ دەرڤەی وەلاتی بن، دەمێ فۆرما خۆ پڕ دكەن، وەكو گەشتیار دێ هێنە هژمارتن».

زاخۆ، دلۆڤان هالۆ:

جەهوەر محەمەد، ڕێڤەبەرێ ناوچەداریا دەركارێ بۆ ڕۆژناما ئەڤرۆ دیار كر كو شەڤا دی ل دەمژمێر 12:30 درۆنەك ب باخچەیێ قوتابخانەیا كەمپا دەركارێ كەفت و د ئەنجام دا ئاگر بەربوو بەشەكێ قوتابخانەیێ و دو پۆل هاتنە سۆتن، لێ ب زووترین دەم ئەو ئاگرە هاتە كۆنتڕۆلكرن.
ڕێڤەبەرێ ناوچەداریا دەركارێ، ئاماژە ب وێ چەندێ ژی كر كو د ڤێ ڕوودانێ دا چو زیانێن گیانی نەبوون، ب تنێ هندەك ساجمە ب تەنشتا سنێلەكی كەفتبوون، لێ ڕەوشا وی یا باش و جێگیرە و گۆت: «ژ لایێ هێزێن ئێمناهیێ ڤە ڤەكۆلین ل سەر ڕوودانێ هاتینە كرن، لێ هەتا نوكە چو دیار نەبوویە».

هەولێر، قائید میرۆ:

پەیڤدارێ وەزارەتا ئەوقاف و كاروبارێن ئایینی دیاركر، پێدڤیە گرێبەستا هەڤژینیێ ژ لایێ دادگەهێ ڤە بهێتە تۆماركرن و دبێژیت: نابیت مامۆستایێن ئایینی بەری دادگەهێ پرۆسەیا مەهركرنێ بڕێڤەببەن.
نەبەز ئیسماعیل، پەیڤدارێ وەزارەتا ئەوقافێ‌ بۆ رۆژناما ئەڤرۆ دیاركر، ل گورەی رێنمایێن وەزارەتا ئەوقاف و كاروبارێن ئاینی پرۆسەیا مەهركرنێ و گرێبەستا هەڤژینیێ پێدڤیە ب رێیا دادگەهێ بیت، ئانكو لیژنا ساخلەمی و ئەو پكشنینێن بەری پرۆسەیا هەڤژینیێ بهێنە تەمامكرن و د دووڤ دا ژ لایێ مامۆستایێ ئاینی ڤە بهێتە مەهركرن و گۆت: «هەر مامۆستایەكێ ئاینی پێگیریێ‌ ب رێنما و بڕیارا ئەوقافێ‌ نەكەت، لێپرسین د گەل دا دێ هێتە كرن».
نەبەز ئیسماعیل گوتژی: «ب مەرەما نەهێلانا ئاریشەیان و ئەنجامدانا پرۆسەكا قانوونی و شەرعی یا هەڤژینیێ، پێدڤیە گرێبەستا هەڤژینیێ ل دادگەهێ بهێتە تۆماركرن و د دووڤ دا وەلاتی دشێن ل دەف مامۆستایێ ئاینی ژی پرۆسەیا مەهركرنێ بڕێڤەببەن، بڕیار و رێنمایێن وەزارەتێ بۆ بەرژەوەندیا وەلاتیانن، داكو چو ئاریشە پەیدا نەبن و كەس ژ دەرڤەی قانوونێ گرێبەستا هەڤژینیێ ئەنجام نەدەت».