قەیس وەیس:

د داخویانیەكێ‌ دا زنار زوبیر عەلی پارێزگەهێ‌ تایبەتمەند ل یانەیا دهۆك یا وەرزشی بۆ رۆژنامەیا ئەڤرۆ دیار كر هەر دوهی ب نڤیًسارەكا نە ڕأزیبوونێ‌ پێشكێشكی فدراسیۆنا فوتبۆلا ئیراقێ‌ كرییە ل سەر ئەوا بڕیارێن نە بەرعاقل و نە ل دووڤ ڕوودانێن یارییا تیما مە بەرانبەر یانەیا هەولێرێ‌ دەركرین و دێ‌ دۆبارە داخوازا دووڤچوون و پێداچوونێ‌ ل سەر بڕیارا لژنەیا دیسپلینێ‌ ئەوا دژی یانەیا دهۆكێ‌ دەركرین وهیچ ڕەنگەكی ڕازی نابین.
زێدەتر ناڤهاتی گۆت: پشتی دەركرنا بڕیارێن فدراسیۆنا فوتبۆلا ئیراقێ‌ دەرئەنجامێن نە چاڤەڕێكری یێن روودانێن یارییا مە بەرانبەر یانەیا هەولێر ژ خولا ستێرێن ئیراقێ‌، ئەو بڕیار گەلەك توند بوون و ل دووڤ روودانان نەبووینە بەلكو نە بەرعاقلبووینە دژی تیما مە و ڕێڤەبەر و یاریزان و جەماوەری، لەوما ژی هەرزوو مە نڤێسارا نە ڕازیبوونێ‌ و دوبارە پێداچوونێ‌ ل سەر بڕیارێ‌ بهێتە كرن، دیسان نە بەرعاقلە هێزەكا كەسێن مەدەنی دناڤا یاریگەهێ‌ دا بن و لێدانێن توند دژی یاریزانێن مە بدەن و بڕیار بتنێ‌ دژی لایەنەكی بن و لایەنێ‌ دی چو سزا نەبن، هەروەسان ئەو هێزا ئەمنی د بنەرت دا یا پێگیر نینە و مافێ‌ وێ‌ نینە پاراستنا ناڤا یاریگەهێ‌ بكەن، ژبەركو پۆلیسێن هەیین پاراستنا ئەمنیەتا یاریگەهێ‌ بكەن، دیسان چو توندوتیژی ژلایێ‌ یاریزانێن مە نە هاتیە بەلكو نەڕأزیبوون هەبوویە ل سەر بڕیارا دادڤانی.
ژلایەكێ‌ دووڤە زنار زوبیری ئەوچەندە ژی دیار كر وەكو پارێزەرێ‌ یانەیا دهۆك ب پشتەڤانییا كارگێرییا یانەیێ‌ دێ‌ هەموو بزاڤان كەن ئەڤ سزایێن هاتینە دەركرن سڤك بكەن و مافێ‌ یانەیێ‌ ڤەگەرینن، هەكەر نەڕازیبوون پەیدابوویە لێ‌ ئەو بڕیارێن هاتینە دەركرن نە دادپەروەرن و لدووڤ روودانان بەرعاقل نینن.
چاڤدێر و شرۆڤەكارێ‌ وەرزشی بووچوونا خوە هەبوو
ژلایێ‌ خوەڤە سلێمان زەكی شرۆڤەكار و چاڤدێرێ‌ وەرزشی ل پارێزگەها دهۆكێ‌ سزایێن فدراسیۆنا فوتبۆلا ئیراقێ‌ ب دژوار و نە دادی قەلەم دا و گۆت: ئەو روودانێن هاتینە پێش د یارییا بەرانبەر یانەیا هەولێر دا جهێ‌ نە ڕازیبوونێ‌ بوو و هیچ ڕەنگەكی نا هێتە قەبوولكرن، هەمان روودان د خولێ‌ دا هاتینە دیتن لێ‌ سزا بڤی شێوەیی نەبووینە، لەوما ژی دبین بڕیار د شاشن، هەرچەندە ب هیچ ڕەنگەكی دگەل هندێ‌ نینن شكاندنا كورسیكان و تێكدانێ‌ و دبیت خەلەتی ژی هەبن لێ‌ نە ل دووڤ سەنگا وان بوویە، دیار بوو ژی یاریزانێن مە و كارگێریێ‌ نەرازیبوون بەرانبەر خەلەتیێن دادڤانی هەبوون و ئەڤە مافێ‌ وانە، مایتكرنا كەسێن نە بەرپرس ژ پاراستنا یاریگەهێ‌ بوو ئەگەر نەرازیبوون بەر ب توند وتیژیەكێ‌ ببەت و یاریزانێن دهۆكێ‌ ئەم چەندە نەكربوو، بەلكو ژلایێ‌ ئەوا كەسێن دناڤ یاریگەهێ‌ دابوون، لەوما ژی ئەو بڕیارێن هاتینە دەركرن نە ل دووڤ قەبار و روودانێن یاریگەهێ‌ دابوون و زولمەكا مەزن ل یاریزان، یانەیا دهۆكێ‌ و پشتەڤانان كر، هەرچەندە ب هیچ شێوەیەكی دگەل توندوتیژیێ‌ نینن.
بۆ زانین لژنەیا دیسپلینێ‌ ل فدراسیۆنا فوتبۆلا ئیراقێ‌ كۆمەكا بڕیاران دژی یانەیا دهۆكێ‌ دەركرن پشتی روودانێن یارییا تیما وان بەرانبەر یانەیا هەولێرێ‌ ئەوا ب سەركەڤتنا خودانێن ئەردی هەولێر ب دو گۆلان بەرانبەر گۆلەكێ‌ ب دووماهی هاتی و ئەو بڕیار ئەڤە بووینە.
1- سزادانا جەماوەرێ‌ ینەیا دهۆكێ‌ ب نە حازربوونا وان بۆ ناڤا یاریگەهێ‌ كو دوهی ئەو بڕیار بجه هاتبوو.
2- ب كۆژمەیێ‌ 25 ملیۆن دیناران یانەیا دهۆكێ‌ هاتە سزادان
3- سزادانا ڕێڤەبەرێ‌ تیمێ‌ جاسم محەمەد حاجی ب كۆژمەیێ‌ 30 ملیۆن دیناران دگەل دوورئێخستنا وی بۆ دو یارییان، یارییا دوهی بەرانبەر نەورۆز بڕیار كەڤتبوو د بوارێ‌ جهئینانێ‌ دا.
4- هێلانا كارتا سۆر بۆ یاریزان هارۆن ئەحمەد بێ‌ زێدەكرنا چو بڕیارێن دی.
5- دوورئێخستنا پیشەكارێ‌ دهۆكێ‌ لوكاس هێنریك تۆریس بۆ دو یارییان و سزادانا وی ب كۆژمەیێ‌ پێنچ ملیۆن دیناران.
6- دیسان دوورئێخستنا پیشەكارێ‌ دهۆكێ‌ موسیس لۆكاس بۆ دو یارییان دگەل سزادانا داریی ب كۆژمەیێ‌ پێنچ ملیۆن دیناران.
7- دوورئێخستنا پیشەكارێ‌ دهۆكێ‌ مارلۆن دۆس سانتۆس بۆ دو یارییان دگەل سزادانا دارایی ب كۆژمەیێ‌ پێنچ ملیۆن دیناران.
8- پێكئینانا لژنەیەكا هەڤپشك ژ یانەیێن دهۆك و هەولێرێ‌ ژبۆ زانین و كۆمڤەكرن و هەلسەنگاندنا ئەوا زیانیێن دناڤا یاریگەها شەهید فرانسۆ حەریری هاتینە پێش، دووڤدا یانەیا دهۆك دێ‌ بەرپرسیار بیت و هەموو زیانان چارەسەركەت، ئەنجامێن لژنەیێ‌ دڤێت د ماوەیێ‌ 15 رۆژان دا بۆ لژنەیا دیسپلینێ‌ یا فدراسیۆنا فوتبۆلا ئیراقێ‌ بهێتە هنارتن.
ل دووڤ ڕێنما و یاسایا فدراسیۆنا فتبۆلا ئیراقێ‌ یانەیا دهۆكێ‌ مافێ‌ هەیی داخوازا پێداچوونێ‌ د بڕیاریێن دژی وێ‌ دا هاتینە كرن بكەت، ئەڤچەندە ژی وەكو مافەكێ‌ یە، ژبەركو ئەڤە نە جارا ئێكێ‌ یە سزا ل سەر یانەیا دهۆكێ‌ دهێنە سەپاندن، پێشتر ل سەر ڕاهێنەرێ‌ وێ‌ یێ‌ بەرێ‌ مەسعۆد میرال و چەند یاریزانا هەبوون.

د داخویانیەكێ‌ دا سەرۆكێ‌ یانەیا سەنجاریب دیار كر ب فەرمی ئەوان بڕیار دایە پشكداریێ‌ د كۆپا ئیراقێ‌ یا یارییا باسكێت بۆلێ‌ دا بكەت، ئەوا دێ‌ ل سەر ئاستێ‌ تازەپێگەهشتییان ل حەفتییا بهێت باژێرێ‌ كەركووكێ‌ مێڤاندارییا وێ‌ كەت.
زێدەتر داود رەبەن بۆ رۆژنامەیا ئەڤرۆ گۆت: وەكو تاكە یانەیا پارێزگەهێ‌ ل سەر ئاستێ‌ تازەپێگەهشتیێن كچ دێ‌ پشكداریێ‌ د كۆپا ئیراقێ‌ دا كەین ئەڤچەندە هات زێدەتر پشتەڤانی بۆ ئەوێ‌ بنیاتێ‌ مە دانایی ژ كچێن باژێرێ‌ خوە و بلندكرنا شارەزاهی و ئاستێ‌ وان یێ‌ تەكتیكی و هونەری، لەوما ژی دێ‌ ل پێنچ شەمبییا بهێت دناڤا كۆمبوونا هونەری یا فدراسیۆنا باسكێت بۆلا ئیراقێ‌ بەرهەڤبین ژبۆ گەنگەشە ل سەر رێنما و چاوانییا بڕێڤەچوونا قارەمانیێ‌.
ژلایەكێ‌ دووڤە ناڤهاتی ئەوچەندە ژی نە ڤەشارت كو پارێزگەها دهۆكێ‌ بۆ ڤان جورە قارەمانییان یا بێ‌ بەهرە و گۆت: هەرچەندە باژێرێ‌ دهۆكێ‌ خودان ژێرخانەیا وەرزشی ژ هۆل و یاریگەهان و ئۆتێلان و هەر پێدڤییەكا بۆ سەركەڤتنا قارەمانیێ‌ لێ‌ ئەڤە چەندین سالە قارەمانیێن باسكێت بۆل و ڤۆلی بۆلێ‌ ل دهۆكێ‌ نە هاتینە ڕێكخستن و ئەڤچەندە ژی كارتیكرن ل سەر ئاستێ‌ ڤان یارییان دكەت، ژبەركو پرانییا یاریزانێن كچ تازەپێگەهشتی نە و ئەو دەلیڤە نابیت بشێت بچیتە پارێزگەهەگا دی یا ئیراقێ‌ ژبەر ئاستەنگێن دارایی.
سەرۆكێ‌ یانەیا سەنحاریب گەشبینییا خوە دیاركر ب هەبوونا كۆمەكا باش یا یاریزانێن كچ ل سەر ئاستێن ژیێن جودا و گۆت: وەكو یانەیا مە ل دووڤ بەرنامەیەكێ‌ ڕێكخستی یاریزانێن كچ و بەهرەمەند دهێنە وەرگرتن و دووڤدا ڕاهێنان پێ‌ دهێنە كرن، ئەڤەژی ل دووڤ پلانا مەیە كو پێشئێخستنا ئاستێ‌ یاریێن دیاركری ل سەر ئاستێ‌ كچانە.

ستێرێ‌ ئیسپانی كارلۆس ئەلكاراز بەرهەڤییا خوە بۆ قارەمانییا ویملبدۆن یا تێنسا ئەردی دیاركر ئێك ژ چار مەزنە قارەمانیێن جیهانی و دۆپاتكر حەزا وی دەستڤە ئینانا ناسناڤی یە و گرنگ نینە ڕیكۆردا چو یاریزانەكی.
ئالكاراز بۆ رۆژنامەیا ماركا یا ئسپانی گۆت: بەرهەڤیێن من بۆ ناسناڤی نە و هیچ گرنگ نینە ڕیكۆردێن ستێرێن جیهانی نموونە دیكۆڤێچ، ڤێدرێر و سامبراس و بۆرگ، هەموو خودان شیانن و جهێ ڕێزێ‌ نە، بۆ هەڤڕكییا ناسناڤەكی ئەم هەموو ئێك ئاستین و ئێك ئارمانجین، یا گرنگ ئەوە ئەز بۆ هەر یارییەكێ‌ بەرهەڤیێن سەركەڤتنان بكەم و من باوەری ب شیانێن خوە هەیە، هەر یاریزانەكێ‌ بەرانبەری وی ژی یاریێ‌ بكەم بۆ من یا دووماهیێ‌ یە.
هەروەسان گۆت: هەر یاریزانەك دێ‌ بزاڤێن دەستڤەئینانا خالان كەت، ئەڤە مافێ‌ وانە، بۆ من گرنگە ئەو پلانا هاتییە دانان ئەز كارەكێ‌ ڕژدی بۆ بكە مدا بگەهمە ئارمانجا خوە.

دو یانەیێن مەزن یێن ئنگلتەرایێ‌ بزاڤێن مەزن دكەن ژبۆ ب دەستڤە ئینانا ئیمیلیانۆ مارتینێزی گۆلپارێزێ‌ هەلبژارتیێ‌ ئەرجەنتین و یانەیا ئەستۆن ڤێلا یا ئنگلتەرایێ‌ و هەردو یانەیان ئۆفەرێن وەكو ئێك پێشكێش كرینە بوویە ئەگەر مارتینێز دناڤبەرا واندا بمینتە هەلاویستی.
ل دووڤ رۆژنامەیا میرۆر یا بریتانی پشتی یانەیا مانچستەر یۆنایتد ئۆفەرەك پێشكێشی ئیمیلیانۆ مارتینێزی كری ژلایێ‌ خوەڤە یانەیا چێلسی ژی هاتیە دناڤ بەریكانەیا ب دەستڤە ئینانا گۆلپارێزێ‌ ئەرجەنتینی و هەمان ئۆفەر پێشكێشی وی كرییە، ئەڤچەندە بوویە ئەگەر هەلبژارتنا ئێك ژ هەردو یانەیان بوو وی ب سانەهی نابیت و مایە هەلاویستی، لەوما ژی بڕیار دایە دەمی بۆ زێدەكەن دا بشێن بڕیارا خوە یا دووماهیێ‌ بدەت.