ئارمانجا سەنتەرێ گەشەپێدانا كاری ل زانكۆیا دهۆكێ ئەوە هاریكاریا قوتابی و دەرچوویێن زانكۆیا دهۆك بكەت، دەرچوویەكێ زانكۆیێ ژی گۆت: بەری نۆكە ژی من پشكداری دناڤ پێشانگەهان داكریە، لێ چ دەلیڤەیێن كاری ب من نەهاتینە دان و ب تنێ‌ ریكلامێن كۆمپانیاینە و قوتابیەكێ‌ دی دبێژیت: ب دیتنا من ب كێمی دڤێت هەر سێ هەیڤان جارەكێ ئەڤ پێشانگەهە بهێنە ڤەكرن.

هونەر فازڵ سەرپەرشتێ سەنتەرێ CDC یێ پەرەپێدانا كاری بۆ ڕۆژناما ئەڤرۆ دیار كر، ئارمانجا مە ژ ڤی سەنتەری ئەوە ب پڕوگرام و خزمەتێن جۆراو جۆر هاریكاریا قوتابی و دەرچوویێن زانكۆیێ بكەین، دا بگەهنە ئارمانجێن خۆ و گۆت: نە ب تنێ بۆ دەرچویان، بەلكۆ مە دەلیڤێن كاری بۆ گەنجان ژی هەنە و دەرچویێن هەموو زانكۆ و پەیمانگەهان ژی ماف هەیە داخوازا كاری بكەن.
هونەری د بەردەوامیا ئاخفتنا خۆدا گۆتژی: ل پارساڵ ژی مە هەمان پێشانگەها دەلیڤێن كاری ڤەكریە، لێ وەكۆ سەنتەر ئەڤە ساڵەكە ئەم پتر كار ل سەر ڤی بابەتی دكەین و تا راددەیەكێ باش ژی گەنج ژ هەردوو ڕەگەزان هاتینە وەرگرتن بێی جیاوازی، چونكو مافێ هەر دوو ڕەگەزایە گرنگیێ ب باوەرناما خۆ بدەن و كاربكەن.
راگر تەحلاڤای ڕێڤەبەرێ پەیوەندیایە ل كۆمپانیەكا گەشت و گۆزارێ سەبارەت بابەتی دیاركر، بۆ كارێ خۆ مە شەش دەلیڤێن كاری بەرهەڤكرینە، لێ ئەم دشێین هەتاكۆ 10 كەسان ژی وەربگرین و گۆت: مە دڤێت وان كەسان وەربگرین یێن هزرێن باش ل دور گەشت و گۆزارێ هەبن و هەر كەسێ بشێت پتر گەشت و گوزارا ناڤخۆی پێش بێخیت وی پتر مافێ وەرگرتنێ هەیە.
نورمان عەلی، بەرپرسا پەیوەندیایە ل تۆرا هەماهەنگیا ڕێكخراوان cno دیار كر، ئارمانجا مە ژ ڤێ توڕێ بۆ پێشڤەبرنا شیانێن گەنجانە د وارێن گەشەپێدانا مرۆڤی دا و گۆت: ئەم تۆڕەكا خۆبەخشین و بزاڤێ دكەین ب ڕێیا ڤێ تۆرێ گەنجان زێدەتر بكەینە ئەندام دگەل خۆ دا كۆ پشكداری خولێن جۆراو جۆر ببن و بشێن ب ڕێیا ڤان خۆلان ببنە خودان كار یان ژی ببنە ڕاهێنەرێن خودان شیان ل دووڤ تایبەتمەندیا وان هەی.
ئەحمەد عەبدولكەریم، دەرچۆیێ زانكۆیێ یە بەشێ دەرونناسیێ كۆ سیڤیێ خۆ بۆ كاری ئینایە گۆت: بەری نۆكە ژی من پشكداری د ناڤ پێشانگەهێن كاری دا كریە بۆ بدەستڤەئینانا كاری، لێ ب مخابنی ڤە چ كار ب من نەهاتینە دان، هەتا ڕاددەیەكی من باوەڕی ب ڤەكرنا ڤان پێشانگەهێن دەلیڤێن كاری هەیە، لێ ب دیتنا من ب كێمی دڤێت هەر سێ هەیڤان جارەكێ ئەڤ پێشانگەهە بهێنە ڤەكرن، چۆنكو بەردەوام كارێن نوو و دەلیڤێن نوی پەیدا دبن.

رێڤەبەرێ بازرگانیا دەخلودانێ ل پارێزگەها دهۆكێ دیار كر، ل دووڤ راسپاردەیێن سەرۆكێ حوكمەتا هەرێما كوردستانێ و پارێزگارێ دهۆكێ، وەزارەتا بازرگانی یا هەرێما كوردستانێ ئاریشەیا وەرگرتنا گەنمێ جۆتیارێن دەڤەرێن كوردستانی یێن ب سەر نەینەوا ڤە هاتە چارەسەركر.

نازم مەحمەد عەلی، ریڤەبەرێ بازرگانیا دەخلودانێ ل پارێزگەها دهۆكێ و رێڤەبەرێ سایلۆیا فەیدیێ راگەهاند، پلان هاتیە دانان ئەڤ سالە ب شێوەیەكێ گەلەك رێكخستن دەست ب وەرگرتنا گەنمێ جۆتیارێن پارێزگەها دهۆكێ و ئیدارا سەربەخۆیا زاخۆ بهێتە كرن و چاڤەرێیە ل رۆژا 10/6/2025 دەست ب وەرگرتنا گەنمێ جۆتیارێن پارێزگەها دهۆكێ و زاخۆ بهێتە كرن، ئەڤ سالە پتر ژ 117 هزار تەنێن گەنمی ل هەر چوار سایلۆیێن دهۆكێ دێ هێنە وەرگرتن و دەرگەهێن سایلۆیا شێخان و فەیدیێ و زاخۆ و رۆڤیا بۆ وەرگرتنا گەنمێ جۆتیاران دێ هێتە ڤەكرن.
زێدەتر گۆت: ئەڤ سالە چەندین رێنما بۆ وەرگرتنا بەرهەمێ گەنمێ جۆتیاران هاتنە دەرئێخستن كۆ گەنمێ هاوەردە و كەڤن و بۆیاغكری و دەرمان كریبت ب چ شێوەیەكی نەهێتە وەرگرتن، هەر جۆتیارەكێ پێگیریێ پێ نەكەت، ناڤێ وی ژ پلانا وەرگرتنا گەنمی دێ هێتە دەرئێخستن و بۆ دادگەهێ دێ هێتە رەوانەكرن، ئەم هیڤدارین جۆتیار پێگێر بن و بهایێ گەنمی ژی هاتیە دەست نیشانكرن.
ئاشكرا ژی كر، هێشتا 73 هزار تەنێن گەنمێ ساڵا بۆری د ناڤ سایلۆیێن پارێزگەها دهۆكێ دا ماینە و حوكمەتا ئیراقێ ئەگەر بوویە ئەڤ رێژا گەنمی دناڤ سایلۆیاندا بمینت و گۆت: لیژنەك هاتیە دروستكرن بۆ وەرگرتنا گەنمێ جۆتیاران، هەروەسا لیژنا سكالایان ل هەمی سایلۆیێن دهۆكێ هاتیە دانان، هەر جۆتیارەكێ گۆمان ژ پشكنینا گەنمێ خۆ هەبیت، دێ‌ دوبارە پشكنینا گەنمێ وی هێتە كرن.

ئیبراهیم عەبدوللا ئاژەلدارەكێ دەڤەرێیە بۆ ئەڤرۆ گۆت: 15 چێلێن مە د نەخۆشن و دو چێلێن مە ژی یێن مرار بووین، جاتر و سماقێ‌ ژی ئەم ل دەڤی دەین و پەمپە ژی دهاڤێژینە سمێن وان و رۆژێ سێ جاران دەرزیێ لێدەین، هیڤیدكەین حكومەت د هەوارا مە بهێت و چارەیەكێ ل ڤان چێلان بكەت.
محەمەد مستەفا ئاژەلدارەكێ دی یێ دەڤەرێیە بۆ ئەڤرۆ گۆت: نەخۆشیەكا ڤایرۆسییە یا بەلاڤ بووی ل ڤێ دەڤەرێ بۆ چێلێن مەزن سەدێ سێ ژێ مراردبن، بەلێ بۆ پەزی سەدێ ٣٠ ژێ مرار دبن، ئەگەر ڤاكسین بۆ نەدانابن نەخۆشی یا ڤەگرە و بلەزە، ئەگەر بۆ مرۆڤان ژی بهێتە ڤەگوهاستن چەند نیشانێن كێم ژێ دیار دكەن وەك سەر ئێشان، بەلێ وەك تایا خوینبەربوونێ یا ب مەترسی نینە.
قادر پیرۆ موختارێ گوندێ دۆدیێ بۆ ئەڤرۆ گۆت: چێل تووشی ئێشەكێ بووینە پێن وان كول دبن دەڤ و هناڤێن وان كول دبن و تا دهێنێ، بەلێ چ چارەسەری نە هاتینە دیتن و هەر مرار دبن، نۆشدار ژی دبێژن نا چێبیت گوشتێ وان بخۆن یان بفرۆشن، 203 چێل ل گوندی هەنە، نوكە ئێك ب تنێ ژی یا دروست نینە و هەموو د نەخۆشن و ١٠ هەتا ١٥ ژێ مرار بووینە و هەر ئێك ژ وان ب دو هەتا سێ ملیۆن دینارانە، ئەڤێن دو سێ مرار بووین گەلەك زیان ڤێكەفتینە.