دوهی سێشەمبی 22/4/2025، سەرۆكێ هەرێما كوردستانێ ب هەلكەفتا سالڤەگەڕا 127 یا رۆژا رۆژنامەڤانییا كوردی، پەیامەك بەلاڤكر و تێدا دبێژیت» دوپاتیێ ل سەر پێگیرییا خوە ب ئازادییا رۆژنامەڤانیێ و رادەربڕینێ و گرنگی وپێدڤییا پاراستنا پەیڤا ئازاد وەكو ئێك ژ بنەمایێن سەرەكی یێن دیموكراسیێ و پێشكەفتنێ».
دەقێ پەیاما سەرۆكێ هەرێما كوردستانێ:
سالڤەگەڕا 127 یا دەرچوونا رۆژنامەیا (كوردستان) ژ ئالیێ میر میقداد مدحەت بەدرخانی ڤە، هەروەسا هەلكەفتا سالڤەگەڕا 27 یا دامەزراندنا سەندیكا رۆژنامەڤانێ كوردستانێ، ب گەرمی و ژ دل ل هەموو رۆژنامەڤان و میدیاكارێن كوردستانێ پیرۆز دكەم، هیڤییا پێشكەفتنا زێدەتر و سەركەفتنا بەردەوام بۆ دخوازم.
د ڤێ هەلكەفتێدا، دوپاتیێ ل پێگیرییا خوە ب ئازادییا رۆژنامەڤانی و رادەربڕینێ و گرنگی و پێدڤییا پاراستنا پەیڤا ئازاد وەكو ئێك ژ بنەمایێن سەرەكی یێن دیموكراسیێ و پێشكەفتنێ و جڤاكەكێ ساخلەم و بەختەوەر، دكەین. دێ بەردەوام بین د كاركرنێدا بۆ پەیداكرنا ژینگەهەكا گونجای بۆ كارێ رۆژنامەڤانان كو تێدا دەستگەهشتن ب پێزانینان مسۆگەر بكەت و ژ هەر بەربەرستەكێ دوور بیت، هەروەسا هەر پێشێلكاریەك د چارچۆڤەیێ قانوونا رۆژنامەڤانیێدا، بهێتە چارەسەركرن.
باوەرییا مە ئەوە رۆژنامەڤانییا ئازاد، وێرك، بەرپرسیار و رەخنەگر، هەڤپشكەكا سەرەكییە د ئاڤەدانكرنا كوردستانەكا دادپەروەرتر و پێشكەفتیتر دا، لەوما ب ڤێ هەلكەفتێ وەكو هەردەم رۆژنامەڤانان هانددەین كو پێگیری پیشەییبوون و بێلایەنی و راستگۆییێ بن و دوور بكەڤن ژ زێدەگاڤییان، بەرژەوەندییا گشتی وەلاتی و ئاشتییا جڤاكی ل سەر هەموو تشتەكی بدانن و رۆلێ خوە یێ كارا د هێزكرنا كەلتوورێ فرەرەنگیێ و پێكڤەژیانێ و هەڤدوقەبوولكرنێ و لێبۆرینێ، بگێرن.
د ڤێ رۆژێدا، ب رێزڤە بیرئینانا شەهیدێن رۆژنامەڤانییا كوردستانی و هەموو وان دكەین كو ژ پێخەمەت گەهاندنا راستیێ و خزمەتا جڤاكی، قوربانی دایە. رۆلێ رێكخراوێن ناڤخوەیی و نێڤدەولەتی د چاڤدێریكرنا ئازادییا رادەربڕینێ دا ل كوردستانێ بلند د هەلسەنگینین و پشتڕاست دكەین كو دێ مفای ژ راپۆرتێن وان وەرگرین بۆ پێشڤەبرنا ژینگەها میدیایی و رۆژنامەڤانی ل وەلاتێ مە.

دوهی سێشەمبی 22/4/2025، ب هەلكەفتا سالڤەگەڕا 127 یا رۆژا رۆژنامەڤانییا كوردی، مەسرور بارزانی، سەرۆكێ حوكمەتا هەرێما كوردستانێ پەیامەك بەلاڤكر و تێدا گۆت» پێگیرییا حوكمەتا هەرێما كوردستانێ ب ئازادییا رادەربڕینێ و ئازادییا كارێ راگەهاندنێ ورۆژنامەڤانی و ساناهیكرنا بۆ راگەهاندنكاران دوپات دكەین».
دەقێ پەیاما سەرۆكێ حوكمەتا هەرێما كوردستانێ:
ب هەلكەفتا رۆژا رۆژنامەڤانییا كوردی و دەرچوونا ئێكەم هەژمارا رۆژنامەیا (كوردستان) ژ ئالیێ میر میقداد مدحەت بەدرخان ڤە و سالڤەگەڕا دامەزراندنا سەندیكا رۆژنامەڤانێن كوردستانێ، پیرۆزباهیێ ل هەموو رۆژنامەڤانێن كوردستانێ دكەم و هیڤییا سەركەفتنێ بۆ دخوازم.
د ڤێ هەلكەفتێدا، پێگیریبوونا حوكمەتا هەرێما كوردستانێ ب ئازادییا رادەربڕینێ و ئازادییا كارێ راگەهاندنێ و رۆژنامەڤانیێ و ساناهیكرنا كاری بۆ راگەهاندنكاران دوپات دكەین، بۆ وێ چەندێ بشێن ب شێوەیەكێ پیشەییانە و بەرپرسیارانە و ل بەرچاڤوەرگرتنا قانوون و پێڤەرێن نێڤدەولەتی یێن رۆژنامەڤانیێ و دوور ژ ناڤزراندنێ و ب كارئینانا زمانێ زڤر، پەیام و كارێ خوە یێ راگەهاندنێ ئەنجام بدەن.
هیڤیدارم رۆژنامەڤانێن كوردستانێ، د ئاستێ مەزنی و گرنگییا پیشەیا خوە دا بن و رۆلێ خوە یێ كارا د هشیاركرنا جڤاكی دا و گەهاندنا پێزانینێن راست و دروست بگێرن و هاریكارێن دەستهەلاتێ بن بۆ پشتەڤانییا چاكسازیێ و نەهێلانا شاشی و كێماسییان.
رۆژا رۆژنامەڤانییا كوردی پیرۆز بیت وهیڤییا پێشكەفتنا زێدەتر بۆ رۆژنامەڤانێن كوردستانێ دخوازم.

دوهی سێشەمبی 22/4/2025، مەسرور بارزانی، سەرۆكێ حوكمەتا هەرێما كوردستانێ، پێشوازی ل محەمەد ئەلیەماحی، سەرۆكێ پەرلەمانێ عەرەبی كر.
حوكمەتا هەرێما كوردستانێ د بەیاننامەیەكێدا دیاركر» سەرۆكێ پەرلەمانێ عەرەبی خوەشحالییا خوە ب سەرەدانا هەرێما كوردستانێ دیاركر و پێشكەفتن و ئاڤەدانییا هەولێرێ و هەرێما كوردستانێ بلند هەلسەنگاند».
د پشكەكا دی یا دیدارێدا، كو شاخەوان عەبدوللا، جێگرێ شەرۆكێ جڤاتا نوونەرێن ئیراقێ تێدا بەرهەڤبووی، سەرۆكێ پەرلەمانێ عەرەبی كورتییەك ل دۆر كار و چالاكی و ئارمانجێن سەرەدانا خوە بۆ ئیراقێ و هەرێما كوردستانێ بەرچاڤكر و خواستا پێشڤەبرنا هاریكاریێ و هەماهەنگیێ ل گەل هەرێما كوردستانێ نیشاندا.
د بەیاننامەیا حوكمەتا هەرێما كوردستانێ هاتیە ژی» سەرۆكێ حوكمەتا هەرێمێ دوپاتی ل گرنگییا پێشڤەبرنا هاریكاری و كارێ هەڤپشك ل گەل پەرلەمانێ عەرەبی كر و داخواز ژێ كر، رۆلێ خوە د رۆهنكرنا راستییان و پشتەڤانیكرنا سیستەمێ فیدرالییا ئیراقێ و هەرێما كوردستانێ بگێرن».
حوكمەتا هەرێما كوردستانێ ئاماژە ب وێ چەندێ ژی كر» بەرهەڤیێن گرێدانا گۆپیتكا وەلاتێن عەرەبی ل بەغدایێ، پشكەكا دی یا دانوستاندنێن د ناڤبەرا سەرۆكێ حوكمەتا هەرێما كوردستانێ و سەرۆكێ پەرلەمانێ عەرەبی بوو».

بەرپەرسێ دەستەیا كارگێرییا مەكتەبا سیاسییا پارتی دیموكراتی كوردستان ب هەلكەفتا سالڤەگەڕا 127 یا رۆژنامەڤانییا كوردی و هەلكەفتا دامەزراندنا سەندیكا رۆژنامەڤانێن كوردستانێ پەیامەكا پیرۆزباهیێ ئاراستەی رۆژنامەڤانێن كوردستانێ كر.
فازل میرانی، بەرپەرسێ دەستەیا كارگێرییا مەكتەبا سیاسییا پارتی دیموكراتی كوردستان د پەیاما خوە دا گۆت» 127 سالییا رۆژا رۆژنامەڤانییا كوردی ب دەلیڤە دزانین كو پیرۆزباهییەكا گەرم ل هەموو رۆژنامەڤانێن كوردستانێ بكەین، ئەو هەردەم ل سەنگەرێ داكۆكیكرنێ دانە ژ پرسێن خوە یێن نەتەوەیی و نیشتمانی و فاكتەرەكێ مەدەنی و شارستانی بوون، ب نوكە ژی ڤە، بۆ پاراستنا بهایێن گەل و وەلاتێ مە».
دیاركر ژی» سالڤەگەڕا 27 یا دامەزراندنا سەندیكا رۆژنامەڤانێن كوردستانێ ژی ب دەلیڤە دزانین، كو پیرۆزباهیێ ل دامەزرێنەرێن وێ رێكخراوا پیشەیی و هەموو ئەندامێن وێ بكەین، دیتنا مە ژی ئەوە ئەڤرۆ سەندیكا یا بوویە چەترێ كۆمكرنا رۆژنامەڤانێن كوردستانێ و نوونەرایەتیكرنا وان و داكۆكیكرن ژ ماف و ئەركێن ئەندامێن خوە، ب بزاڤێن هەموو ئالییەكی ژی ئەڤرۆ رۆژنامەڤان و میدیاكارێن كوردستانێ یێن بووینە تەخەكا ئێكجار كاریگەر د داكۆكیكرنێدا ژ مافێن مۆڤی و مافێن مە یێن نەتەوەیی و نیشتمانی».

فەرماندارێ گشتی یێ هێزێن سووریا دیموکرات دوهی ژڤانێ سازکرنا کۆنفرانسێ نەتەوەیی ل رۆژئاڤایێ کوردستانێ دیار کر و ئەنجوومەنێ نشتیمانی یێ کوردی ل سووریێ ژی پێشوازی ل سازکرنا کۆنفرانسی کر و ب پێنگاڤەکا دیرۆکی ل قەلەم دا.

مەزلەم عەبدی فەرماندارێ گشتی یێ هێزێن سووریا دیموکرات دوهی راگەهاند رۆژا ٢٦ نیسانێ کۆنفرانسێ نەتەوەیی بۆ ئێکرێزیا هەلوەستێ کوردی ل رۆژئاڤایێ کوردستانێ دێ هێتە سازکرن، بێگومان ئەو یەک پێنگاڤەکا گرنگ و دیرۆکی یە و دێ بیتە ئەگەرێ بهێزبوونا کوردان ل سووریێ، سازکرنا کۆنفرانسێ نەتەوەیی دێ بیتە پشتەڤانیەکا گەلەک مەزن بۆ چارەسەرکرنا پرسا کوردی ل سووریێ و گۆت: (دڤێت هەموو هێز و ئالیێن سیاسی یێن کوردی ل رۆژئاڤایێ کوردستانێ هەست ب بەرپرسیاریا خوە یا دیرۆکی بکەن و یا پێدڤی بۆ بەرژەوەندیێن گەلێ کورد بکەن، هەروەسا ئەز گەلەک سوپاسیا وان هێز و ئالیان ژی دکەم کو هەڤکار بوون دا ئەم بگەهنە قۆناغەکا وەسا گرنگ و کۆنفرانسێ نەتەوەیی ساز بکەین).
ل ئالیێ دی هەر دوهی ئەنجوومەنێ نشتیمانی یێ کوردی ل سووریێ ژی د داخویانیەکێ دا پێشوازی ل سازکرنا کۆنفرانسێ نەتەوەیی ل رۆژئاڤایێ کوردستانێ کر و د داخویانیێ دا هاتیە دیار کرن، ئەم رێککەفتینە کو رۆژا ٢٦ ڤێ مەهێ کۆنفرانسێ نەتەوەیی ل رۆژئاڤایێ کوردستانێ بهێتە ساز کرن، ئەو یەک پێنگاڤەکا گەلەک گرنگ و دیرۆکی یە و د هەمان دەمی دا داخوازا هەموو کوردێن سووریێ یە.
ئەنجوومەنێ نشتیمانی یێ کوردی ل سووریێ هەروەسا ئەو یەک ژی دیار کریە، دیارکرنا رۆژا سازکرنا کۆنفرانسی ب سەرێ خوە پێنگاڤەک گەلەک گرنگە، ئەو یەک بەرهەمێ خەبات و ماندیبوونا گەلێ کوردستانێ یە و ب پشتەڤانیا سەرۆک بارزانی و جەنەرال مەزلوم عەبدی دێ کۆنفرانس هێتە ساز کرن و بێگومان ئەو یەک دێ بیتە ئەگەرێ دەستپێکەکا نوو بۆ بدەستڤەئینانا مافێن گەلێ کورد ل سووریێ.
چاڤدێرێن سیاسی ل رۆژئاڤایێ کوردستانێ ژی دیار دکەن، سازکرنا کۆنفرانسێ نەتەوەیی ل رۆژئاڤایێ کوردستانێ بەرهەمێ خەبات و ماندیبوونا هەموو هێزێن سیاسی یێن کوردی یە، ب تایبەتی ژی دڤێت سوپاسیا جەنابێ سەرۆک بارزانی بکەین، کو دستپێشخەر و پشتەڤان بوویە، کو کۆنفرانسێ نەتەوەیی ل رۆژئاڤایێ کوردستانێ بهێتە ساز کرن، بێگومان دەمێ کورد کارەکێ وەسا بکەن دێ رەوشەکا نوو هێتە پێش، ئەو پارچەبوونا بەرێ د ناڤبەرا هێز و ئالیێن سیاسی ل رۆژئاڤایێ کوردستانێ هەبوو، ئێدی نامینیت و بێگومان کورد دشێن ل سووریا نوو پتر پێگەهێ خوە بهێز بکەن، هەموو کورد کەیفخوەشن کو ئەڤرۆکە ل رۆژئاڤایێ کوردستانێ کورد بەر ب قۆناغەکا نوو دچن و دشێن بگەهنە مافێن خوە، بێگومان ئەو یەک دێ کاریگەریا خوە ل سەر پێگەهێ کوردان ل سووریێ و هەموو رۆژهەلاتا ناڤین هەبیت.