عەلی تەتەر، پارێزگارێ دهۆكێ د سەرەدانەكێ دا سەحكرە قووناغێن كاری یێن پڕۆژەیێ مەزن یێ چێكرنا جۆتسایدێ د ناڤبەرا دهۆك – باعەدرێ دا و د كۆنگرەكێ ڕوژنامەڤانی دا دیاركر، هەتا نوكە پتری 32% كار ل سەر پڕۆژەی هاتیە كرن.
پارێزگارێ دهۆكێ داخواز ژ وەلاتیان كر د هاریكاربن و ئەوێ رێكێ بۆ هاتنوچوونێ بكار نەئینن و دەلیڤێ بدەنە تیمێن كاری و نەبنە ئەگەرێ گیرۆبوون یان ڕاوەستیانا كاری، داكو ئەو جاددەیا پێشكەفتی ل دەمەكێ نێزك بكەڤیتە د خزمەتا گشتی دا، هەروەسا دەستخۆشی ل كۆمپانیا بجهئینەر و ڕێڤەبەریێن پەیوەندیدار یێن چاڤدێریێ ل سەر پڕۆژەی دكەن كر.

مەكتەبا رێكخستنا پارتی ل پارێزگەها دهۆكێ‌ ب هەلكەفتا 34 سالیا سەرهلدانا پیرۆز یا گەلێ‌ كوردستانێ‌ پەیامەك بەلاڤكر و تێدا هاتیە: ل رۆژا 5ی ئادارا 1991ێ بانگێ ئازادی و سەربەستیێ ل ئەرد و ئەسمانێ باشوورێ كوردستانێ دەنگ ڤەدا، گازییا جەماوەری و هانا پێشمەرگەیێن شۆڕەشگێڕ و قارەمان تێكەلی ئێك بوون و سرودا ڕزگاربوونێ ل ژێر ناڤێ بەسە بندەستی و بمریت زۆرداری هاتەدانان.
مەكتەبا رێكخستنێ‌ ئاشكرا ژی كریە كو تڤەنگا پێشمەرگەی و هەوارا دایكە شەهید و ئەنفالكریان و ڕابوونا جەماوەرێ خۆڕاگر، مینا پێلێن دەریای كۆچك و دیوانێن زۆلمێ هەڕفاندن و رژێما بەعسا ژنافچووی ژ كوردستانێ ڕامالی، خوین و خەباتا سەد سالا باب و باپیران بەر گرت و سەرهەلدان سەركەفت؛ قووناغەكا دی ب وزە و هەناسەیەكا دی دەست پێكر، خواست و ئیرادەیا گەلی و ئێكگرتن، هێز و گەرەنتیا دەستكەفتایە و ژ هەمی پیلانەكێ بهێزترە.
دیسا د پەیاما مەكتەبا رێكخستنێ‌ دا هاتیە: «ئەزموونا حوكمرانییا كوردستانی دەستپێكر و دوزا رەوایا مە سنوورێ ناوچەیێ دەربازكر و كەفتە د ناڤ گۆڕەپانا نێڤدەولەتی دا، بانگا پێكڤەژیان و ئاشتیخوازی، سەركەفتنا ئەزموونا دەولەتداریا مە، ئارامی و ئاڤەدانیا كوردستانێ بوونە نموونەیەكا بلند ل ڕۆژهەلاتا ناڤەڕاست و بۆ جیهانێ سەلماند، كو گەلێ كوردستانێ ئازادیخواز و دیموكراتخوازە و دێ بەردەوام بیت ل خەباتا خۆ یا سیاسی و مەدەنی بۆ ب دەستڤەئینانا هەمی مافێن خۆ یێن دەستووری».
د پەیامێ‌ دا هاتیە: «د ڤێ هەلكەفتێ‌ دا جارەكا دی تەكەزیێ ل سەر ئێكڕێزی و ئێكهەلوەستیا گشت هێز و ئالیێن سیاسی دكەین، ژ بۆ پاراستنا دەستكەفت و بەردەوامیا سەركەفتنا ئەزموونا هەرێما كوردستانێ، ل دووماهیێ‌ سلاڤ ل گیانێ شەهیدێن سەرهەلدان و بزاڤا ڕزگاریخوازا كوردستانێ و سەروەرێ وان بارزانیێ نەمر و ئدریسێ جوانە مەرگ».

دهوك، لەزگین جوقی:

سەرۆكێ جڤاتا پارێزگەها نەینەوا ژ پۆستێ وی هاتە لادان و هێشتا دیار نینە كی دێ پۆستێ سەرۆكێ جڤاتا پارێزگەها نەینەوا وەرگریت.
جڤاتا پارێزگەها نەینەوا دوهی 5/3/2025 پشتی لێپرسین ل گەل سەرۆكێ جڤاتا پارێزگەها نەینەوا كری، دەنگ ل سەر لادانا ئەحمەد ئەلحەسعوود، سەرۆكێ جڤاتا پارێزگەها نەینەوا دا و ژ پۆستێ وی هاتە لادان.
ئەحمەد كەنعان، سەرۆكێ فراكسیۆنا پارتی ل جڤاتا پارێزگەها نەینەوا بۆ ئەڤرۆ گۆت: «ژ بەر سەرپێچیێن قانوونی و باوەرنامەیا سەختە سەرۆكێ جڤاتا پارێزگەها نەینەوا هاتە لادان».

رەمەزان زەكەریا:

ل دۆر داوی قووناغێن رێكەفتنێ ل سەر نووژەنكرنا شەش جهێن شوونواری ل سنوورێ دەڤەردارییا ئامێدیێ، كومبوونەك ل هەولێرێ ل بارەگایێ دەزگەهێ «ئێكسپرێنتیز فرانس» ب بەرهەڤبووونا وارشین سەلمان، دەڤـەردارێ ئامێـدیێ و یان برایم، قونسلێ گشتی یێ فرەنسا ل هەرێمێ ب رێڤە چوو.
د كۆمبوونێ دا، كو نوونەرێ پارێزگارێ دهۆكێ، رێڤەبـەرێ گشتی یێ شوونوارێن هەرێما كوردستانێ و رێڤەبەرێ شوونوارێن دهۆكێ و نوونەرێن هــــەرسێ سازیێن (ئێكسپرێنتیز فرانس و ئیفپۆ و ئەلیف) پشكدار بوون، بەحسێ داوی پلان ل سەر چاوانیا نووژەنكرنا شەش جهێن شوونواری ل ئامێدیێ هاتە كرن.
وارشین سەلمان، دەڤەردارێ ئامێدیێ بۆ ئەڤرۆ دیاركر، ئەو ل سەر نووژنەنكرنا شەش جهێن شوونواری ل ئامێدیێ رێككەفتینە و گۆت: «ئەڤ جهێن شوونواری پێك دهێن ژ قوتابخانەیا قوبەهان یا شوونواری، مزگەفتا مــــــەزن، كەنیسا كەڤن، قەبــرێ جوهیان، كۆرا سێریجێ و گورێ سۆلتانان.

زاخۆ، دلۆڤان هالۆ:

قەیس عوبەید، بەرپرسێ سەندیكا نۆشداران لقێ زاخۆ بۆ ڕۆژناما ئەڤرۆ دیار كر كو بڕیار هاتیەدان بۆ مەها ڕەمەزانێ داشكاندن ل سەر هەمی خزمەتگوزاریێن ساخلەمیێ بهێتە دانان.
بەرپرسێ سەندیكا نۆشداران لقێ زاخۆ، ئاماژە ب وێ چەندێ ژی كر كو پلێتێن نۆشداران بووینە 10 هزار، پلێتێن نۆشدارێن ددانان بووینە بێ بەرامبەر، دیسا كارێن دی ب ڕێژەیا 20% هاتینە كێمكرن.
قەیس گۆت: «سۆنەر و تیشك ب ڕێژەیا 20% هاتینە كێمكرن، هەمی تاقیگەهـان ب ڕێژەیا 20% داشكاندن كرینە، دیسا نشتەگەری ل نەخوەشخانەیان ب ڕێژەیا 20% هەتا 50% هاتینە كێمكرن».