دهۆك، دلۆڤان ئاكرەیی:

ڕێڤەبەرێ گشتیێ كار و دەستەبەریا جڤاكی ل هەرێمێ دیاركر، كێمترین مووچەیێ خانەنشینیا كرێكارێن كەرتێ تایبەت بۆ 500 هزار دیناران هاتیە بلندكرن، كو بەری نوكە، مووچەیێ وان د ناڤبەرا 150 بۆ 400 هزار دیناران دابوو و دبێژیت: مەها بهێت و پێڤە مووچەیێ‌ وان دێ بیتە 500 هزار دینار.
مەریوان بەكۆك، ڕێڤەبەرێ گشتیێ كار و دەستەبەریا جڤاكی بۆ رۆژنامەیا ئەڤرۆ گۆت: «د ڕۆژێن بهێن دا، نڤیسارەكا فەرمی سەبارەت ڤی بابەتی ئاراستەی وەزارەتا دارایی دێ هێتە كرن، د نوكە دا نێزیكی 320 هزار كرێكار ل هەرێما كوردستانێ د دەستەبەركری نە و هەتا نوكە، ب تنێ هزار و هەشت كرێكار خانەنشین بووینە».
گۆت ژی: «بۆ هەبوونا مافێ‌ خانەنشینبوونێ، دڤێت زەلام ژییێ‌ وی گەهشتبیتە 60 سالییێ و ئافرەتێ‌ ژییێ‌ وێ گەهشتبیتە 55 سالییێ و 20 سالێن خزمەتێ د كەرتێ تایبەت دا هەبن».

زاخۆ، دلۆڤان هالۆ:

جگەرخوین تاهر، ڕێڤەبەرێ گشتی یێ وەبەرهێنانێ ل ئیدارەیا سەربخوە یا زاخۆ بۆ ڕۆژناما ئەڤرۆ دیاركر كو ل ژێر چاڤدێریا گوهدار شێخۆ، سەرپەرشتێ ئیدارەیا سەربخوە یا زاخۆ، و ب ئامادەبوونا ڕێڤەبەر و وەبەرهێنەر و كەسایەتیێن دەڤەرێ، پڕۆژەیێ دەلال سپۆرت یێ وەبەرهێنانێ ل زاخۆ هاتە ڤەكرن.
ڕێڤەبەرێ گشتی یێ وەبەرهێنانا زاخۆ خویا ژی كر، ئەڤ پڕۆژە ئێكە ژ پڕۆژەیێن ستراتیژی و گرنگ یێن وەبەرهێنانێ د بیاڤێ وەرزشی دا، ل سەر ڕووبەرێ دو هزار مەترێن دوجا و ب گۆژمێ پتر ژ سێ‌ ملیۆن دۆلاران ل دووڤ ستاندەردێن جیهانی هاتیە ئاڤاكرن و گۆت: «ئارمانج ژ ڤی پڕۆژەی پێشكێشكرنا باشترین خزمەتگۆزاریانە بۆ خەلكێ دەڤەرێ و دابینكرنا دەلیڤەیێن كاری یە بۆ گەنجان».

هەولێر، قائید میرۆ:

رێڤەبەرێ گشتیێ بازرگانی ل وەزارەتا بازرگانی و پیشەسازی ئاشكراكر، كەلوپەلێن دچنە بازارێن دەرڤە زێدەبووینە و دبێژیت: ل سنۆرێ پارێزگەها دهۆكێ هەتا نوكە زێدەتری 95 هزارو 71 تەنێن گەنمی هاتینە وەرگرتن.
نەوزاد شێخ كامل، ڕێڤەبەرێ گشتیێ بازرگانی بۆ رۆژناما ئەڤرۆ دیاركر، ئەڤ سالە هەڤبەركرن ل گەل سالا بۆری مۆهلەتێن هنارتنێ زێدەبووینە، چونكی ل گورەی ئامارێن بەردەست ئەڤ سالە زێدەتر مۆهلەت ب وان بەرهەمان هاتینەدان یێن چووینە دەرڤەی هەرێما كوردستانێ و گۆت: «بەرهەمێن ل هەرێما كوردستانێ دچنە دەرڤە زێدەتر بەرهەمێن ناڤخۆنە، بەلێ ئەڤ سالە ترۆمبێل ژی ب رێیا هەرێما كوردستانێ چووینە دەرڤە، ب تایبەتی ترۆمبێل ل بازاڕێن كوردستانێ دچنە كۆمارا ئیسلامیا ئیرانێ».
ل دۆر پرۆسێسا وەرگرتنا گەنمێ جۆتیاران ژی نەوزاد گۆت: «پرۆسێسا وەرگرتنا گەنمێ جۆتیاران ژ لایێ سایلۆیێن هەرێما كوردستانێ ڤە یا بەردەوامە، هەتا دوهی 95 هزار و 71 تەنێن گەنمی ل سنۆرێ پارێزگەها دهۆكێ هاتینە وەرگرتن، ل سەرانسەری هەرێما كوردستانێ ژی هزار تەنێن گەنمی هاتینە وەرگرتن، ل رۆژێن داهاتی ژی دێ پرۆسێسا وەرگرتنا گەنمی یا بەردەوام بیت».

رەمەزان زەكەریا:

د چارچۆڤێ بزاڤێن بەردەوام یێن پاراستنا ژینگەهـێ‌ و سامانێ سروشتی دا، مەفرەزێن پۆلیسێن دارستان و ژینگەها ئاكرێ شیان هەژمارەكا سەرپێچیكارێن ژینگەهێ دەستەسەر بكەن، كو زیان ب سامانێ ماسیان گەهاندیە.
ڕاگەهاندنا ڕێڤەبەریا پۆلیسێن دارستان و ژینگەها ئاكرێ خویا كریە كو مەفرەزێن سەر ب پشكا پۆلیسێن دارستان و ژینگەها ئازادی خالا باكرمان شیان 10 وەلاتیان دەستەسەر بكەن، كو ب شێوەیەكێ نەیاسایی سەرپێچی ل سەر ژینگەهێ كربوو، ب رێیا ب كارهێنانا ژەهرێ ماسی ڕاڤ دكرن.
ئاشكرا ژی كریە كو دۆسیەكا ڤەكۆلینێ ل دادگەها ئاكرێ بۆ هاتە ڤەكرن، پاشی ب بڕیارا دادوەرێ ڤەكۆلینا ئاكرێ هەر 10 تۆمەتبار هاتنە بەندكرن.
رێڤەبەریا پۆلیسێن دارستان و ژینگەها ئاكرێ دووپات دكەت كو دێ بەردەوام بن د چاڤدێریكرنا دەڤەرێ دا و ڕێ نادەن چو كەس زیانێ ب سروشت و سامانێ ماسیان بگەهینیت.

ئامێدیێ، مەحمود نهێلی:
د بەردوامیا گەهاندنا پڕۆژەیێن خزمەتگوزاری دا بۆ دەڤەرێ و خزمەتكرنا وەلاتیان، پڕۆژەیێ چێكرنا هەژمارەكا جادەیێن ناڤخۆیی ل سنۆرێ باژێرڤانیا دێرەلۆكێ‌، ب گوژمێ پتر ژ ئێك ملیار دیناران دهێتە بجهئینان.
رێبەر سادق، رێڤەبەرێ ناوچەدارییا دێرەلۆكێ‌ بۆ رۆژناما ئەڤرۆ دیار كر، ل سەر دەمێ كابینەیا نەهێ یا حكومەتا هەرێما كوردستانێ رازیبوون ل سەر چێكرنا هەژمارەكا زۆرا پڕۆژەیان ل سنۆرێ ناوچەداریا دێرەلۆكێ‌ هاتیە كرن و گۆت: «ژ وان پڕۆژەیان: چێكرنا جادەیێن ناڤخۆیی نە، هەتا نوكە هەژمارەكا زۆرا جادەیان هاتینە چێكرن و پرۆژە یێ‌ بەردەوامە».
ناڤهاتی دیار ژی كر، گوژمێ ئێك ملیار و 150 ملیۆن دینار بۆ ئەنجامدانا ڤی پڕۆژەی هاتینە تەرخانكرن و نوكە ب رێژەیا 60% پڕۆژە هاتیە بجهئینان و گۆت: «دۆرێن 90% ژ جادەیێن ناڤخوەیی یێن سەنتەرێ ناوچەداریێ هاتینە چێكرن، ب تنێ كێمەك ماینە ئەو ژی دێ‌ هێنە چێكرن».
گۆت ژی: «د پلان دایە تەڤایا جادە و كۆلانێن ناڤخۆ بهێنە چێكرن و قێركرن».

سندس سالح سلێڤانەیی:

پتریا ئەو كەسێن ئەڤ سالە سەرەدانا پاركا سەرهلدان ل دهۆكێ دكەن، گازندەیان ژ وێ چەندێ دكەت كو پارك یا بێ چاڤدانە و گەلەك كێماسی یێن لێ هەین، ب تایبەت ژ رۆیێ پاقژیێ ڤە و پەیڤدارێ سەرۆكاتیا باژێرڤانیێ ژی دبێژیت: مە ئاگەهـ ژوێ چەندێ هەیە، لێ هەتا نوكە ئەو پارك ژلایێ چو وەبەرهێنەران ڤە نەهاتیە گرتن، ئەو كۆمپانیا پارك چێكری، پاركێ ب رێڤە دبەت.

مەسعود یاسین، ئێك ژ وان كەسانە یێن كو مالا وی دكەڤیتە نێزیكی پاركێ دبێژیت: ل سالا بۆری دەمێ پارك هاتیە گەلەك پاقژ و ب سەرو بەر بوو، لێ مخابن ئەڤ سالە ئەم وێ چەندێ نابینین، چونكو ئەڤ سالە یا بێسەرو بەر بوو، گلێش یێ مشەیە، جهێن دەستئاڤێ دباش نینن، هەتا ئەو جهێ خەلكەك پیاسا لێ دكەن ل گەل جها (مەتاتێ عەردی) پرتێن مەزن یێن ژێڤە بووین، یا ئێكێ ئەز دبێژم ئەڤە بناسێن خەلكەكی نە كو هەتا نوكە پاقژیا پاركێ ناڕاگرن و دەمێ دچن بەرمایكێن خوارنێن خۆ ب دروستی نا ڕاكەن، یا دویێ ژی بناسێن باژێرڤانیێ كو وەكو پێدڤی باغچەڤان و زێرەڤان بۆ نە داناینە و هەكە بڤی ڕەنگی بچیت هەر د ئەڤ سالە دا دێ پارك گەلەك خراپتر لێ هێت.
ناڤدار حەسەن، گەنجەكێ دی یە، دبێژیت: ئەز دبینم (پاركا سەرهلدان) د ئەڤ سالەدا هەر ئەو وارە، بەلێ مخابن نە ئەو بهارە، چنكو ل سالا بۆری پتریا شەڤان ئەم ل ڤێرە بووین، لێ ئەڤ سالە كێم دهێین.
شێروان حەسەن بەرپرسێ راگەهاندنا سەرۆكایەتیا باژێرڤانیا دهۆكێ دەربارەی گازندەیێن وی خەلكی گۆت: مە ئاگەه ژ وی بابەتی هەیە، لێ هێشتا ئەو پارك ژلایێ چو وەبەرهێنەران ڤە نەهاتیە گرتن دا كو ئەو ب رێڤەببەن و هەر دەمێ هاتە گرتن ل وی دەمی ئەو ئاریشە دێ چارەبن، بۆ زانین ل پاركێن (بارزانی و ئازادی) مە ئەو كێشە نینن، چونكو وەبەرهێنەر ب رێڤە دبەن و ئەو ئەركێ وانە، لێ سەبارەت پاركا سەهلدان ئەو كۆمپانیا پارك چێكری هەتا نوكە هەر ئەو ب خۆ ئەو ب رێڤە دبەن و هەر دەمێ سەرئێككێمرن هاتە راگەهاندن و ئەو پارك ژلایێ وەبەرهێنەرەكی هاتە ڤەكرن، ل وی دەمی ئەو كێماسی دێ هێنە چارەكرن.

دلۆڤان ئاكرەیی:

سەرۆكێ‌ باژێرڤانیا سێمێلێ دیاركر، پێخەمەت پێشكێشكرنا باشترین خزمەتگوزاریان بۆ وەلاتیێن دەڤەرێ و كێمكرنا جەنجالی و قەرەبالغیا هاتن و چوونێ، پرۆژەیەكێ مەزن یێ چێكرن و فرەهكرنا جاددێن سەرەكی ل قەزا سێمێلێ و دەوروبەرێن وێ دەست پێكریە و ئەڤ پرۆژەیە ب ئێك ژ پرۆژێن ستراتیژی یێن گرنگ دهێتە هەژمارتن كو دێ گۆهرینەكا بەرچاڤ ل سەر سیمایێ باژێڕی و سیستەمێ هاتنوچوونێ كەت.

ئەندازیار محسن عەبدولكەریم، سەرۆكێ‌ باژێرڤانیا سێمێلێ بۆ رۆژنامەیا (ئەڤرۆ) گۆت: ئەڤ پرۆژەیە ژ كۆمەكا كارێن گرنگ پێكدهێت كو جاددێن سەرەكی یێن سێمێلێ و دۆسایدێ مسێریكێ ب خۆڤە دگریت و دگەل ئاڤاكرنا سولینێن نوی یێن پێشكەفتی ب پیڤانێ 90سم بۆ ڕێڕەوا ئاڤێ و زێدەباری وێ چاندنا داروباری ل ناڤەندێن جاددان، دگەل دابینكرنا 10 تانكێن مەزن یێن ئاڤێ تایبەت بۆ ڕشاندن و ئاڤدانا ڤان جهێن كەسكاتیێ و دانانا ستوون و سیستەمێ نوی یێ ڕوناهیێ بۆ هەمی جاددێن د پرۆژەی دا هەیی.
سەرۆكێ‌ باژێرڤانیا سێمێلێ گۆت ژی: بودجە یا گشتی یا ڤی پرۆژەی پتر ژ 20 ملیار و 300 ملیۆن دیناران و ماوێ بجهئینانێ پرۆژەی 900 ڕۆژان و ل هەیڤا دو (شوباتا) ئەڤ سالە (2026) ب فەرمی دەست ب كارێن مەیدانی هاتیە كرن.
ل دووماهیێ، گەشبینیا خۆ دیاركر كو ب دووماهی هاتنا ڤی پرۆژەی، دێ بارگرانیەكا مەزن ل سەر كۆلان و جاددێن ناڤخۆیی هێتە لادان و دێ بیتە ئەگەرێ كێمبوونا جەنجالیێ و چێبوونا ئاسانكاریەكا گەلەك مەزن بۆ هاتنوچوونا وەلاتیان و گەشتیاران د ناڤبەرا سێمێل و دهۆك و مسێریكێ دا.