دهۆك، لەزگین جۆقی:

وەكیلێ میرێ ئێزدییان بۆ كاروبارێن پەیوەندییان ڕاگەهاند، 12 سال ب سەر جینۆسایدا ئێزدییان دا ل شنگالێ‌ بۆرین، هێژ ئاوارە د ناڤ كەمپان دا دژین، هەموو گۆڕێن بكۆم نەهاتینە ڤەكرن و چارەنڤیسێ ڕەڤاندییان ژی یێ‌ دیار نینە.
جەهوەر عەلی بەگ، وەكیلێ میرێ ئێزدییان بۆ كاروبارێن پەیوەندییان بۆ رۆژنامەیا ئەڤرۆ گۆت: «جینۆسایدا ئێزدییان یا بەردەوامە، لەورا داخوازێ ژ حكومەتا ئیراقێ و هەرێما كوردستانێ دكەین، ڕەوشا شنگالێ ئارام ببیت و خەلك بهێتە قەرەبووكرن و دوبارە بزڤڕنە دەڤەرێن خۆ و دەست ب ژیانا خۆ یا ئاسایی بكەن».
وەكو دیار 12 سالن خەلكێ شنگالێ‌ د ناڤ كەمپان دا و حكومەتا هەرێما كوردستانێ پشتەڤانی و هەڤكاریا وان دكەت، دیسا هەتا نوكە پتر ژ 270 هزار ئاوارە ل دهۆكێ‌ و زاخۆ ماینە و نەشیانیە ڤەگەڕنە شنگالێ‌.

دهۆك، دلۆڤان ئاكرەیی:

ڕێڤەبەرێ گشتی یێ كارەبا پارێزگەها دهۆكێ دیاركر، بكارئینانا سیستەمێ تێهنا رۆژێ بۆ پەیداكرنا كارەبێ ل پارێزگەها دهۆكێ د زێدەبوونێ‌ دایە، ئەڤ چەندە ژی بوویە ئەگەرێ‌ كێمكرنا گڤاشتنێ‌ ل سەر كارەبا نیشتمانی و پاراستنا ژینگەهێ و دبێژیت: هەتا نوكە ل سنۆرێ پارێزگەها دهۆكێ پتر ژ هزار و 760 پشكدارێن كارەبێ ئەڤ سیستەمە دانایە و بڕا كارەبا هاتییە بەرهەمئینان دگەهیتە 22.4 مێگاواتان.
حازم مەحەمەد، رێڤەبەرێ گشتی یێ كارەبا دهۆكێ دوپاتی ل سەر وێ چەندێ كر كو دانانا ڤی سیستەمی كاریگەرییەكا باش و ڕاستەوخۆ ل سەر پاقژ ڕاگرتنا ژینگەهێ هەیە و ئەڤ گاڤە نە ب تنێ گڤاشتنێ‌ ل سەر تۆڕا كارەبا نیشتمانی كێم دكەت، بەلكو بارسڤكیەكا دارایی یە ژی بۆ وەلاتیان، ژ بەركو پارێ كارەبێ بۆ دزڤڕیت.

رەمەزان زەكەریا:

ل گۆر بڕیارەكا وەزیرێ ناڤخۆ یێ حكومەتا هەرێما كوردستانێ، شوفێر دشێن مۆلەتا شوفێریێ هەلنەگرن و ب تنێ د بەرنامەیێ KRDpass دا تۆمار بكەن و ب ڕێكا مۆبایلێن خۆ نیشا كارمەندێن هاتنوچوونێ‌ بدەن.
ل گۆر وێ بڕیارا ژ لایێ ڕێبەر ئەحمەد، وەزیرێ ناڤخۆ دەركەفتی تێدا هاتییە: ب پشتەڤانیا وێ دەسهەلاتا پێ هاتیەدان، د یاسایا وەزارەتا ناڤخۆ دا یا سالا 2009 ئەڤ بڕیارە هاتینەدان.
هەلگرتن نیشادانا مۆلەتا شوفێریێ، كو ل ئێك ژ ڕێڤەبەریێن هاتنوچوونێ ب فەرمی دەركەفتییە، ژ لایێ شوفێری ڤە د دەمێ داخوازكرنێ ژ لایێ ئەفسەر یان كارمەندێ هاتنوچوونێ ڤە دێ ب ئێك ژ ڤان دو شێوازان بیت: مۆلەتا شوفێریێ ب شێوازێ كارت، یان مۆلەتا شوفێریێ ب شێوازێ دیجیتالی، كو ل سەر KRDpass بەردەستە ل سەر ئامیرێن زیرەك یێن پەیوەندیكرنێ.
ئاماژە ب وێ چەندێ ژی هاتییە كرن، هەلگرتنا مۆلەتا شوفێرییا دیجیتالی هەمان هێزا مۆلەتا شوفێرییا كارتی هەیە، ئەڤە ژی ب هەموو خەسلەتێن ئۆتۆماتیكی و نیشانێن تەكنیكی ڤە ژ لایێ فەرمانگەها تەكنۆلۆژیایا زانیاریان ڤە دیار كرینە.

ئامێدیێ، مەحمود نهێلی:

د بەردەوامیا كارێ تیمێن راكرنا مین و تەقەمەنیان دا یێن سەر ب رێڤەبەرییا گشتی یا كاروبارێن مینان ل پارێزگەها دهوكێ، د ڤان رۆژان دا چەندین پارچەیێن مین و تەقەمەنیان ل دەڤەرا ئامێدیێ راكرن و ژناڤبرن. ژ وانا ژی شەش بۆمبێن هێشوویێی یێن مەترسیدار بووینە.
رێگر بێسفكی، بەرپرسێ ڕاگەهاندنا ڕێڤەبەریا گشتی یا كاروبارێن مینان ل پارێزگەها دهۆكێ بۆ رۆژنامەیا ئەڤرۆ دیاركر، تیما ژناڤبرنا تەقەمەنیان د بەردەوامیا كارێن خوە ل سنۆرێ ناوچەداریا بامەڕنێ یا سەر ب دەڤەرداریا ئامێدیێ ڤە، شیان د سێ هەوێن پەقاندنێ دا، شەش بۆمبێن هێشۆیی ژ جۆرێ (BLU63) ب شێوەیەكێ سەركەفتییانە ژناڤ ببەن.
ناڤهاتی گۆت: «بەری چەند رۆژان ژی تیمێن مە ل گوندێ قۆمریێ، یێ‌ سەر ب ناوچەدارییا كانی ماسێ ڤە ل دەڤەرداریا ئامێدیێ شیان 12 مینێن ژ جۆرێ V69 كو د دەمێ كێلانا زەڤیەكێ دا بۆ مەرەما چاندنێ هاتبوونە دیتن و 11 پارچە تەقەمەنیێن نەپەقی ژناڤ ببەن».

زاخۆ، دلۆڤان هالۆ:

یونس محەمەد، سەرۆكێ باژێڕڤانیا زاخۆ بۆ ڕۆژناما ئەڤرۆ دیاركر كو ژ بۆ پێشئێخستنا ژێرخانا باژێڕی و پێشكێشكرنا خزمەتگوزاریێن باشتر بۆ وەلاتیان، وان دەست بجهئینانا پڕۆژەیەكێ نوو یێ خزمەتگوزاری ل تاخێ تلكەبەرێ ل زاخۆ كریە.
سەرۆكێ باژێڕڤانیا زاخۆ گۆت: «ئەڤ پڕۆژە ژ چێكرن و قێركرنا جاددەیێن تاخێ تلكەبەرێ ب درێژاهیا هەشت كیلۆمەتران و چێكرنا سۆلینێن ئاڤڕێژ ب درێژاهیا 450 مەتران پێك دهێت، مەرەم ژێ‌ ئەوە، مەترسیا كۆمبوونا ئاڤا بارانێ و دروستبوونا لەهیان ل سەر تاخی نەمینیت، دیسا نووژەنكرنا هێلێن ئاڤێ و كارەبێ، داكو ل گەل گەشەكرنا ئاكنجیبوونا تاخی بگونجن».
گۆت ژی: «ئارمانجا سەرەكی ژ ڤی پڕۆژەی باشتركرنا خزمەتگوزاریێن بنەڕەتی یێن ڤی تاخی یە، كو دێ بیتە ئاسانكاریەكا مەزن د هاتنوچوونا ڕۆژانە یا وەلاتیێن تاخێ تلكەبەرێ دا و سیمایەكێ شارستانی ژی دێ‌ دەتە باژێڕێ زاخۆ».