هەڤسەرۆکێ دەم پارتی دیار کر، نها ل ئیمرالیێ بەرهەڤی بۆ پەیامەکا دیرۆکی ژ ئالیێ ئۆجەلانی ڤە دهێتە کرن و ل هەمبەر دا دڤێت دەولەتا تورکیا ژی ب کریاری هندەک تشتان بکەت، لێ مخابن هەلوەستێ هەتا نها یێ دەولەتا تورکیا ب دلێ کوردان نینە و ئەو یەک جهێ داخێ یە.
تونجەر باکرخان هەڤسەرۆکێ دەم پارتی بۆ دەزگەهێن راگەهاندنا تورکیا دیار کر، نها ئۆجەلان ل ئیمرالیێ بەرهەڤیان بۆ پەیامەکا دیرۆکی دکەت و دبیت ب پەیاما ئۆجەلانی قۆناغەکا نوو و دیرۆکی ل تورکیا دەستپێ بکەت، لێ ژ بۆ کو شەڕێ چەندین سالان ل تورکیا ب دووماهی بهێت، دڤێت ژ ئالیێ تورکیا ڤە ژی ب کریاری هندەک پێنگاڤ بهێنە ئاڤێن و گۆت: (لێ مخابن هەلوەستێ هەتا نها یێن بەرپرسێن دەولەتێ ب دلێ کوردان نینە، ئەردۆغان و بەرپرسێن دی یێن تورکیا ژ ئالیەکێ بەحسێ ئاشتیێ دکەن و ل ئالیێ دی گەفا ژناڤبرنا کوردان دکەن، ئەو یەک ب چو رەنگەکێ ژ ئالیێ کوردان ڤە ناهێتە قەبوول کرن، دڤێت تورکیا خوە ئێکلا بکەت و بریارا خوە یا بۆ ئاشتیێ و چارەسەرکرنا پرسا کوردی راگەهینیت).
ناڤهاتی ئەو یەک ژی دیار کر وەکو دەم پارتی ئەو هیڤیدارن پشتی پەیاما ئۆجەلانی دەولەتا تورکیا ژی ب کریاری هندەک تشتان بکەت، چونکی ئاشتی و راگرتنا شەڕێ تنێ ب ئالیەکێ ناهێتە کرن و دڤێت هەر دو ئالی یا پێدڤی بکەن، وەکو دەم پارتی ئەم هیڤیدارین پشتی پەیاما ئۆجەلانی ل تورکیا قۆناغەکا نوو دەستپێ بکەت و هەر کەس ئەرکێن ل سەر ملێن خوە بجه بینیت و گۆت: (وەکو دەم پارتی ژ بۆ ئاشتیێ و چارەسەرکرنا پرسا کوردی مە دەست ب چالاکیێن جەماوەری ل پرانیا باژێرێن تورکیا و باکورێ کوردستانێ کرینە و خەلک ب گەرمی پێشوازیێ ل ئاشتیێ و راگرتنا شەڕی دکەن، بێگومان مە دڤێت ئێدی شەڕ د رۆژەڤا تورکیا دا نەمینیت و ب جهێ وێ ئەم پێکڤە بەحسێ ئاشتیێ و چارەسەرکرنا پرسا کوردی بکەین).
هەڤسەرۆکێ دەم پارتی ئەو یەک ژی دیار کر، ژ بۆ چارەسەرکرنا پرسا کوردی ل تورکیا دڤێت گەلەک کارێن مەزن و گرنگ بهێنە کرن، یا هەری گرنگ ژی دڤێت دستوورێ نها یێ تورکیا بهێتە گوهۆڕین و د دستوورێ نوو دا ب فەرمی هەبوونا گەلێ کورد بهێتە قەبوول کرن، دڤێت ئاستەنگیێن ل هەمبەر پەروەردا ب زمانێ کوردی ل تورکیا نەمینن و گۆت: (دڤێت زۆرداریا ل سەر گەلێ کورد ل تورکیا ب دووماهی بهێت و کورد ژی بگەهنە هەموو مافێن خوە، بێگومان دەمێ ئەو یەک بهێتە کرن دێ زەمینەکا گەلەک گونجای دروست بیت و د دەمەکێ وەسا دا پڕانیا پرسێن نها یێن ل تورکیا دێ هێنە چارەسەرکرن، مە بەری نها ژی گەلەک جاران دیار کریە هەتا پرسا کوردی ل تورکیا نەهێتە چارەسەرکرن دێ قەیرانێن نها ل تورکیا ب تایبەتی ژی قەیرانا ئابووری دێ یا بەردەوام بیت).
نيشاندان