پیرۆز عەزیز میكائیل
ل ڤان دووماهیان، ئاخفتن ل سەر ژیرییا چێکری بوویە بابەتەكێ ڕوژانە و ل زوربەیا جهان بەحس لێ دهێتە كرن، ل هەر جهەکی ئەم گوهـ ل ناڤێن پرۆگرامێن نوی دبین کو ب لەزاتیەكا سەیر كار دکەن، گەلەک کەس ب دو دلی بەرێ خۆ ددەنە ڤی بابەتی ئەرێ باشە یان خرابە؛ هندەک وەک ئامرازەکێ مەترسیدار بۆ سەر کار و پاشەڕۆژێ دبینن و هندەک ژی وەک دەرفەتەکا زێڕین بۆ پێشڤەچوونێ تەماشە دکەن. بەلێ پرسیارا سەرەکی ئەڤەیە: گەنجێن مە گەهشتینە چ ئاست د ڤی بابەتی دا؟
ئەم نەشێین ئەڤێ ڕاستییێ ڤەشێرین کو جیهان ب شێوەیەکێ بێ وێنە لژێر کاریگەرییا تەکنولوجیایێ دایە، بەلێ مفا وەرگرتن ژ ڤێ تەكنولوجیایێ، پێدڤی ب گۆهوڕینا تێگەهشتنا مە هەیە. هەتا نوکە پتریا گەنجێن مە تەکنولۆجیایێ وەک ئامرازەک بو دەمبوراندن و یارییان بکاردئینن یان وەك بكارهێنەرەكێ سادە سەحدكەنە تێلەفون و ئنترنێتێ بو نمونە دەمژمێرێن درێژ لسەر تیكتوك و ئینستگڕامی دبورینن بێی كو هزر د وێ چەندێ دا بكەن كو ئەڤ تەكنولوجیایە دشێت مە بگەهینیتە ئاستەكێ زور بەرزتر ل سەر ئاستێ كار و خواندنێ، ل شوینا کو بکاربینن بۆ پێشخستنا شیانێن خۆ یێن کەسایەتی و ئابووری، پتریا وان بتنێ بو دەم بوراندنێ بكاردئینن.
ئەگەر ئەم ب چاڤێ هاریكارەكی تەماشە بكەین دێ بینین كو ژیرییا چێکری نەهاتیە دا کو جیهانێ خراب بکەت یان مێشکێ مرۆڤی تێكبدەت.بەلكی هاتیە دا کو ببیتە خزمەتکارەکێ زیرەک بۆ مە، هاتیە دا ببیتە هاریکارەک بۆ بلەزکرن و ئاسانكرنا کاران دیسان وەدكەت تو د دەمێن كێمتر دا ب ئەنجامدانا پتر كاران ڕاببی و دەم پتر تێرا تە بكەت، بۆ نمونە، ل شوینا کو قوتابییەک هەفتیەکێ ب مەزێخیت بۆ گەریانێ ل سەر بابەتەکێ خواندنێ، ژیرییا چێکری دشێت ب چەند خولەكەكان زانیاریێن گرنگ ب شێوەیەکێ کورت و زەلال بدەتێ دشێت هاریكار بیت بو گەڕیان لسەر ژێدەرێن باشتر. هەروەسان گەنج دشێن ئەڤان پرۆگرامان بکاربینن بۆ فێربوونا زمانێن بیانی، دروستکرنا وێنە و ڤیدیۆیان، فێربونا ئاخفتنا گشتی، هەتا بۆ دروستکرنا کارێن دیجیتالی کو دێ بنە ئەگەرێ پەیداکرنا داهاتەکێ سەربەخۆ.
ل دوماهیێ، پاشەڕۆژ نە یا وێ تەکنەلۆجیایێ یە کو دهێتە دروستکرن، بەلکی یا وان گەنجانە یێن خۆ ب ڕێیا وێ ئامادە دکەن. ژیرییا چێکری دێ مەترسی بیت بتنێ بۆ وان کەسان یێن کو نەڤێن خۆ دگەل گوهوڕینان بگونجینن و بتنێ د جهێ خودا دمینن و بتنێ ب چاڤێ پڕ ژ تڕس سەحدكەنە تەكنولوجیایێ و بتنێ خڕابیێن وێ دبینن، دەم یێ هاتی کو ئەم ژ بکارهێنەرەکێ سادە ببینە ئافرێنەر و مفاوەرگرەکێ زیرەک ژ ئامرازێن سەردەم، دیسان دەم یێ هاتی كو ئەم ڤان گوهوڕین و پشكەفتنان وەك چەكەكێ زانستی بو سەركەفتنێن خو بكاربینین و بێخینە د خزمەتا هزر و ئارمانجێن خودا نە بتنێ دەمێ خو پێ بسوژین.
* ڕاوێژكارا دەروونی و پەروەردەیی