د.پـەرویـن عـەبدولعەزیـز

دەمـێ دەنــگێ تـە ….
تـە دزڤـرینیتە نـاخـێ تـە
بەری چەند رۆژان ئەز پێدڤی ب هژمارا تەلەفوونا رێڤەبەرەكا دەزگەهەكێ حكومی ل دهۆكێ بووم، من گەلەك پرسیار كر كو كەسەك بنیاسیت؛ داكو شۆلا من بقەتینیت لێ من كەس نەدیت، لەوما نەچار بووم ئەز ب خۆ ب خۆ تەلەفوونێ بۆ بكەم و خۆ بۆ بدەمە نیاسین.
دەمێ تەلەفوون هەلگرتی؛ من ب مجامەلەكا رەسمی دەستپێكر و خۆ بۆ دانیاسین، بەلێ بەرسڤا وێ ب خۆشی و عەجێبگرتی ڤە بوو… ئەڤە تو ب خۆ ب خۆی بۆ من تەلەفوونێ دكەی تو نزانی تو خەونا من بووی.
پیچەكێ راوەستام … دەركەت ئەو رێڤەبەرا من دەرگەهێ وێ قوتای، د وەختەكی دا كچەكا بچویك بوو ل بەر شاشا تەلەڤزیۆنا دهۆك …. ب هەمی خۆشی و ب هەدارەكا مەزن ل هیڤیا بەرنامەیێ من بوو… ئەز ژی ئەو پێشكێشكەرە بووم كو د زارۆكینییا وێ دا خەونا وێ بووم.
ل ڤێرێ بۆ من دیاربوو یا ئەم د زارۆكینیێ دا د دلێ زارۆكان دا دچینین ل گەل بۆرینا دەمی نە دبەهیت و نەژی ئاڤا و بەرزە دبیت.
ل دەستپێكا نوتا نە سەتەلایت هەبوون ئەسمانا ببەزینیت و نە دنیایا دیجیتەلی و ئەنترنێت و سوشیال میدیا چاڤێ خەلكی ڤەكەت. هەی و نەیی تەلەڤزیونەكا نافخو ب ناڤێ كوردستان تی ڤی (دهۆك تیڤی بوو) كو شاشەیا ئێكانە بوو بێی دەرگەه قوتان دچوو د هەمی مالان ڤە.
ل وی دەمی ئەز ژی ئێك ژ وان كەسان (زارۆكا) بووم كو دچوومە د هەمی مالان دا، دئاخفتم و دگرنژیم و لڤین و سوحبەتێن من ل سەر زارێ هەمی زارۆیان بوو، گەلەك جاران ل سەر جادە و كۆلانان ب دەنگێ بلند گازی من دكر …. ئاخفتنێن من دوبارە دكرن كو گەلەك جاران دبوو جهێ شەرمێ ل نك من كو ئەز ل وی دەمی زارۆیەك بووم د ناڤ دو جیهانان دا… جیهانا كامیرێ كو ئەز كریمە ستێرەك و جیهانەكا دی كو زارۆكم.
نوكە د چاڤێ مامۆستایەكا زانكۆی دا ڤی بابەتی شرۆڤە دكەم… بۆچی مرۆڤ ب كەسایەتیێن د شاشی دا دهێتەگرێدان… دبێژینە ڤێ دیاردێ دیاردەیا (نیمچە جڤاكی) كو ئەو ژی گرێدانەكا وژدانییە د ناڤبەرا (بینەر و پێشكێشكار) كو ئەو زارۆكێن وی وەختی سەحدكرە من، نە بتنێ وەك پێشكێشكار ئەز د دیتم بەلكی سەروسیمایەكێ بەردەوام دچیتە د ناڤ مالا وان دا و پشكداری جیهانا وا یا تایبەت دكەت، ئەڤ گرێدانا مرۆڤی یا وژدانی دبیتە بیرەوەریەكا ب هێز د بیردانكا زارۆكینیێ دا.
زارۆیەك بووم ب دلەكێ پڕی هیڤی و ب ڤیانەكا راستەقینە هەمی رۆژان چاڤێن خۆ ڤە دكرن و د دەستەكی دا پەرتووك و د دەستەكی دا هیڤی و ئۆمێد و بەر ب رۆژەكا گەش دچووم، د بەرانبەر دا بینەرێن مە، ب دلەكێ پڕ خەریبی و ڤیان پێشوازییا مە دكر و رۆژ ب رۆژ پتر باوەری و ڤیان دا مە كو ب چەند مالێ دنیایێ ناهێتە كرین… نوكە پشتی دەمەكێ درێژ دبێژمە وە سوپاس بۆ هەر كەسەكێ بۆ مە دەست قوتاین و ئەوێن ئەم فێركرین، سوپاس بۆ تەلەڤزیۆنا دایك یاكو نەویەك مەزنكری و باوەری بۆ مە چێكری كو ب پێنگاڤێن بچویك پاشەرۆژا گەش ئاڤا دبیت.
لەوما ب فەردبینم د سالڤەگەیا تەلەڤزیۆنا دهۆك دا سلاڤ و رێزێن خۆ بگەهینمە هەر كەسەكی كو پشكەكین ژ بیردانكا وان.

* زانكۆیا سەلاحەدین