شێرزاد نایف
من دڤێت ئه‌ڤى زاراڤێ به‌ربه‌لاڤ ل ئیراقا جاران بگه‌هینمه‌ ئه‌ڤى نفشێ مه‌ یێ نازك و نازدار ل به‌ر دلێ مه‌، كو مه‌ بۆ خوه‌ نازاندیه‌ وه‌كو كاردانه‌ڤه‌یا نفشێن مه‌ و باب و باپیرێن مه‌ یێن نه‌هاتینه‌ نه‌نازاندن و نه‌ خۆشیه‌ك بربیت، وه‌كو ئه‌و ب خوه‌ ژى نها ستریكا و ڤیدیۆیان ل سه‌ر مه‌ دورست دكه‌ن؛ دبێژن ده‌مێ باب و باپیرێن مه‌ دچوونه‌ قوتابخانێ ب رێسك و قاره‌مانى دچوون ب رێڤه‌ هرچا و شێر و گورگان هێرش دكرنێ.. ئه‌ڤجا ئه‌ڤه‌ زاراڤه‌ د كۆكا خوه‌ دا ژ زمان و دیارده‌یێن فره‌نسى ده‌ركه‌فتیه‌، به‌لێ ل ئیراقێ جهێ خوه‌ دیتیه‌، چه‌ندى هه‌وێن حوكمداركرنا خه‌لكێ مه‌ یێ كوردپه‌روه‌رد ب گوله‌بارانكرنێ دكرن، سه‌ده‌م ژى كوردینى و هه‌لوه‌ستێن نه‌ته‌وه‌یى بوون، كو ل داویێ پشتى (ره‌میكرنێ) وه‌ختێ گه‌نجێن مه‌ دكه‌فتنه‌ ئه‌ردى سه‌ربازێن وان یێن كو دگۆتنێ (ئینزیبات) دا هێنه‌ هنداڤ سه‌رێن وان ته‌رمان یێن كه‌فتین و فیشه‌كه‌كێ به‌رده‌نه‌ سه‌رێ وان یێ نه‌رم و نیان؛ داكو پشتراست ببن كو ژیان ب جه هێلان و بوونه‌ شه‌هید.. ڤێجا من دڤێت بێژم كو ئه‌وان نه‌ك ژ به‌ر دلۆڤانیێ بوو به‌لێ دڤیان مه‌ ته‌مام بكه‌ن دلێ وان ب مه‌ڤه‌ بوو.. به‌لێ ژ به‌ر هندێ بوو كو زویكا ئه‌ركێ خوه‌ بجهبینن و بالا مه‌ ژ خوه‌ ڤه‌كه‌ن.. ببینه‌ وانه‌ بۆ كه‌س و كارێن خوه‌ كو كوردینێ نه‌كه‌ن و خوه‌ ده‌ستبه‌ردایى نه‌ته‌وه‌بوونا خوه‌ بكه‌ن. به‌لێ باش بزانن كو ئه‌ڤا مه‌ كری و ئه‌م دكه‌ین بۆ سه‌ربه‌خوه‌یا وه‌لاتێ خوه‌یه‌، ژبه‌ر وان هه‌لوه‌ست و تاوانان. كو گه‌له‌ك و گه‌له‌ك ب سه‌رێ مه‌ كوردان هاتیه‌ ژبه‌ر نه‌بوونا ده‌ستهه‌لاته‌كا كوردى و كیانه‌كێ سه‌ربه‌خوه‌.. ب سه‌دان د زیندانان دا بێ چو فیشه‌كێن ره‌حمێ هاتینه‌ كوشتن. له‌ورا ژى مه‌ ریفراندۆم كربوو و ئه‌م نه‌ دپه‌شێمانین حه‌تا ئه‌ڤێ چركه‌یێ ژى، مه‌ یا دروست بۆ هه‌وه‌كر و بلا ل بیرا هه‌وه‌ ژى بیت كو تنێ ب سه‌ربه‌خوه‌یێ ئه‌م دێ گه‌هینمه‌ مافێن خوه‌ كو وه‌ك مرۆڤ بژین.. ئه‌ڤا دهێته‌كرن ژى ل دژى مله‌تێ مه‌ ژ بڕینا قووت و مووچه‌یێ مه‌ ژى هه‌ر ئه‌گه‌ر ئه‌ون و ئه‌م بۆ هندێ ئاراسته‌كرینه‌ كو كراسه‌كێ قرێژى بكه‌نه‌ به‌ر مه‌ و سه‌رانێن مه‌ و دلێ مه‌ ژ كوردینیێ ره‌ش بكه‌ن و شیان ژى بكه‌ن ژى هه‌تا راده‌كى ب گرۆڤه‌یا هندێ گه‌له‌ك كۆمێنتێن ره‌خنه‌یى دێ بۆ ڤێ گۆتارا من هێن.. دبێژم ژى راسته‌ جۆره‌كێ گه‌نده‌لیێ هه‌یه‌.. به‌لێ یێ خرابیێ بكه‌ت هه‌ر دێ سه‌رێ خوه‌ تێ به‌ت، به‌لێ كه‌س نابیت فیشه‌كه‌كا ره‌حمێ لێبده‌ت و دێ د عه‌زابا خوه‌ دا گه‌ڤزیت و دێ هه‌ر بێژین هه‌ر كوردین و هه‌ر دێ كورد بین.

ب نێرینــەكا بێالیەنــی هەروەكــو ئــەڤ شەڕێ ل غەززەیێ هاتیەكرن، ب رەهەندەكێ خــوە چ راســتەوخوە یــان نــە راســتەوخوە، جۆرەكــێ شــەڕی یــە د بیاڤــێ ســەربازی دا دبێژنـێ (توجـس)، گەلەك كارتێـن تێكهەلی ئێك ژێكڤاڤارتن و گەلەك تشـتێن ڤەشـارتی ئاشــكرا كــرن و مینــا ب زارێ مللــی دبێــژن (هەمـی ژ كۆنجێ دەرئێخسـتن)!. ئەڤ گوتارا عەرەبـی و ئیسـامی (نەك ئیسـاما راسـت) كـو سـالەها سـالە ئـەم دبهیسـین كـو ئـەو پرسا فەلەسـتینێ بۆ وان هێال سۆرە و چوویە د ناخـێ وان دا و ئـەو ژ دایكوبابێـن خـوە پتر گرنگیـێ ددەنـە فەلسـتینێ و جهـێ پیـرۆزێ ئیسرائا پێغەمبەرێ خودێنە و ئەون وەكیلێن وی ل سـەر ئەردی و.. ئیسـام و فلسـتین بۆ خـوە كربوونـە درووشـم و مەرەمـا دلـێ خوە، حەتـا وی رادەی هـەر كەسـێ هەڤالینـی ژی ل گەل ئیسـرائیلێ هەیـی ئـەوان دابڕینا وان كریـە ـ هـەر چەندە ئەو هەمی دۆسـتێن وانە و پسـمامێن وانـە ژی ب نـەژادا خـوە ـ خـوە ئـەم كـورد ژی تاوانباركرینە كو ئـەم هەڤالێن واینـە، هـەر چەنـدە هەرێمێ و سـەرانێن وێ چــو بایەخــەك ب ڤــان تۆمەتــان نەداینــە و مینـا جەنابـێ سـەرۆك بارزانـی گۆتـی هەكە مـە پەیوەنـدی هەبـن ژی ئەم نە دترسـین و نـە شـەرم دكەیـن ژ كەسـەكێ. دیسـا ئەڤێن هەنـێ هەردەم رۆندك بۆ فلسـتینیان دئینانە خـار و گەلـەك موزایـەدە دكـرن كـو ئـەو دێ دونیایــێ خــراب كــەن هەكــە ئیســرائیل نێزیكــی فلســتینێ ببیــت، ڤێجــا ژ وان 22 وەالتێـن عەرەبـی بگـرە و حەتـا 57 وەالتێـن موسـلمانان، یـا مـە هـزر ژ بانگێـن وان دكـر كـو دێ بـەری ل سـەر بـەری ناهێلـن، بەلـێ راسـتی دیاربـوو كـو كـەس نەشـیا خـوە نـە بلڤینیت و نـە داخۆیانیەكێ بدەت ل هەمبەر دەولەتـەكا بچویك یـا وەكو ئیسـرائیلێ، هەر جـار گۆپیتكێـن عەرەبی یێـن مـەزن دهاتنە دانـان و سـروودێن ب كـۆم دگۆتـن و وژدانـا عەرەبــی دهێنــە زمــان و ئێــك رۆندكێــن دەســتكرد ژی ببارینــن، هــەژی گۆتنــێ یــە كـو ئـەڤ دەسـتەواژەیا رۆندكێن تیمسـاحان شـێوازەكە تیمسـاح بكاردئینـن خـوە مەلیل دكـەن ب تنـێ داكو نێچیـرا خوە پێ دسـەردا ببـەت، ب ڤـی رەنگـی هاتیـە بەالڤكـرن. ل دوماهیــێ دبێژیــن هــەر كــەس یــێ ئــازادە الیەنگیــرێ كــێ بیــت و كــێ نەبیــت، بەلــێ كوشــتنا ســڤیالن و شــەڕ تونــدرەوی ژی ب دلـێ چـو مرۆڤـان نینـە و ئـەم ژی ژ وان!

شێرزاد نایف

حه‌تا ڤێ كێله‌كا نڤیسنا ڤێ گوتارێ دیرۆكا مه‌ كوردان و نفشێ مه‌ یا تووشى ڤه‌شارتنێ و بنپێكرنێ دبیت، ژ لایه‌كێ دی ژی ڤه‌ كاودانێن گه‌له‌ك دژوار ب سه‌ر مه‌ دا هاتینه‌ و هه‌رده‌م كه‌فتیه‌ به‌ر به‌رزه‌بوونێ و گه‌فێن دوژمنان، ده‌رفه‌ت نه‌كه‌فتیێ ئه‌و په‌ڕێن شانازیێ بۆ خوه‌ ژ بنێن به‌حران دا بینینه‌ ده‌ر، رۆژ بۆ رۆژێ ژی چیرۆك و سه‌رهاتیێن جوداتر بۆ مه‌ دیاردبن، د بیاڤێ خه‌بات و تێكۆشانا خه‌لكێ شه‌ڕفمه‌ندێ مه‌ دا چیرۆكێن فیداكاریێ و دلسۆزیێ ب جۆراتیا خوه‌ ڤه‌ ناهێنه‌ هه‌ژمارتن چه‌ندى دزۆرن. ل ڤان رۆژان دو چیرۆكێن گه‌له‌ك شاناز و ب تراژیدی مه‌ بهیسین و پشتی نێزیكی یۆبیله‌كا زێرین ل سه‌ر شانازیا شهاده‌تێ پێخه‌مه‌ت به‌رگریكرنا وه‌لاتی ژ دوژمن و زوحاكان دیاربوون، ئێك ژ وان یا شه‌هید (حه‌سه‌ن سه‌برى كێسته‌ی) یه‌، كو د به‌رنامه‌كێ تلفزیۆنی دا هاته‌ ئازراندن و هه‌روه‌سا ژ ره‌نج و ئه‌ركێ پیرۆز سه‌نته‌رێ كۆماته‌ یێ دیاركرنا راستیان و پاراستنا دیرۆكا پێشمه‌رگه‌ى و رۆلێ پێشمه‌رگێ قاره‌مان (رزگار كێسته‌ى)، چیرۆكا قاره‌مانانه‌ و خه‌مگینانه‌ یا ڤى شه‌هیدى دیاربوو، لێ ئه‌ز هند ناچمه‌ د ناڤ هووركاتیێن ڤى بابه‌تی دا، به‌لكو بلا بۆ راپۆرته‌كا به‌فره‌هتر بیت د ڤێ رۆژنامێ دا، به‌لێ چونكو گرێدای چیرۆكا دیتره‌ یا ڤێ گوتارێ كو دبیته‌ شه‌هیده‌كا سه‌ربه‌رز.. شه‌هید (به‌یان خان)، ئه‌و كچا كورد ئاكنجیا ده‌ڤه‌را ئاكرێ یه‌، چیرۆكا وێ د به‌رنامه‌یێ (تاڤه‌هه‌یڤ ـ یێ كاك ـ سه‌بری سلێڤانه‌ی) دا دهێته‌ دیاركرن ل سه‌ر زارێ پێشمه‌رگێ دێرین (حاجی خدر)، كو ئه‌ڤێ چیرۆكێ و چیرۆكا شه‌هید حه‌سه‌ن سه‌برى ئه‌م ڤه‌جنقاندین، رۆلێ وێ خیشكا شه‌هید دیاردكه‌ت.. رۆلێ شێره‌ژنا كورد وه‌ختێ پێشمه‌رگه‌ی ره‌وانه‌ دكه‌ت ب چه‌كی و خوارنێ و پشكداریكرن د بزاڤێن پراكتیكی دا، ئاماژه‌ دكه‌ت ده‌مێ دچیته‌ مالا وان و به‌یان خانم وه‌كو سه‌ركرده‌یه‌كا خه‌مخۆر و دلسۆز بۆ وه‌لاتێ خوه‌، زكێ وى یێ برسى ب برنجا ب شیر تێردكه‌ت و ته‌قه‌مه‌نیه‌كێ 1000 فیشه‌كان دبه‌خشیت و دبێژیتێ ئه‌و هه‌ردو پێشمه‌رگه‌یێن به‌رییا ته‌ ژى هاتینه‌ مه‌ ره‌وانه‌كرینه‌، و پاشى ئه‌و ب خوه‌ ژی دچیت و پشكداریێ د خاكسپاردنا شه‌هید حه‌سه‌ن دا دكه‌ت. كو ئه‌و ب خوه‌ رێكخستنا ناڤخوه‌ی و نهێنی بوو، پشتی هینگى ب مخابنی ڤه‌ ل سه‌ر ده‌ستێن رژێما داگیركه‌ر و سته‌مكارا به‌عس دهێته‌ سێداره‌دان و لاپه‌ڕه‌كێ شانازێ دیرۆكا تێكۆشانێ تۆمار دكه‌ت، ب مخابنی ڤه‌ حه‌تا ئه‌ڤرۆ كو دبینه‌ نێزیكى 45 سالان ژنیكا ئه‌ڤ چیرۆكه‌ هاته‌ ئاشكراكرن، ژ ڤێ گۆتارێ ده‌سپێدكه‌م و چریسكه‌كه‌ كو ئه‌ڤ چیرۆكه‌ و چیرۆكا حه‌سه‌ن سه‌برى ب ئاشكرای ب بلنداهیا چیایێ پیرسى و زنارا كێسته‌ دیرۆكا وه‌لاتێ مه‌ بخه‌ملینن. هه‌ر چه‌نده‌ من گه‌له‌ك ب سه‌رڤه‌سه‌رڤه‌ پێزانین دیاركرن به‌لێ ده‌لیڤه‌كه‌ بۆ مه‌زنكرنا هه‌ردو بابه‌تان ب ئاسۆیه‌كێ گه‌شتر.. به‌لێ بۆچى جه‌ختیا من كه‌فته‌ سه‌ر رۆلێ ژنا كورد و پشكداریكرنا وێ د بزاڤا رزگاریخوازى دا، چونكو بیرا مه‌ دهێت وه‌ختێ ژیێ ده‌ه سالیێ چاوا دایكێن مه‌ ئه‌م ل سه‌ر ڤێ رێبازا پیرۆز په‌روه‌رده‌كرین و نان و خوارن و مۆرالا پێشمه‌رگه‌ى دكرن، بیرا من دهێت وه‌ختێ كه‌سوكارێن مه‌ یێن پێشمه‌رگه‌ خوه‌ ژ چیاى دخشاندنه‌ ناڤ باژارى وب به‌رزه‌ی ڤه‌ دهاتنه‌ مالێن مه‌ و چه‌ند ب كه‌یف و خوشی چانتكا وان پڕى نانی و هه‌ر تشته‌كێ خۆش بۆ دابین دكر، هه‌روه‌كو فریشته‌ك بۆ مه‌ ژ ئه‌سمانى هاتیه‌ خار و پشتی دچوون ژی دلێ مه‌ ل دویڤ را دچوو، ل ده‌مه‌كى كو به‌عسیان ب زۆری جلكێن زه‌یتوونی دكرنه‌ به‌ر خه‌لكێ مه‌، دكرنه‌ جه‌یش شه‌عبی. پشتى ژ نه‌فیكرنێ و راگوهاستنێ هاتین، به‌لێ دایكێن مه‌ ئه‌و په‌روه‌ده‌یا فیداكاریێ یا د ناڤ ناخێ مه‌ دا چاندی و حه‌تا ئه‌ڤرۆ مایه‌، كێم ملله‌تان ئه‌ڤ جۆره‌ شێره‌ژنه‌ هه‌نه‌، گیانێ شه‌هید به‌یانێ شاد بین و هزار سلاڤ ل سه‌ر گیانێ هه‌می شه‌هیدێن رێبازا كوردینیێ بت.

((به‌ر ب كۆنگره‌یێ پارتى))
فۆبیا كۆنگرێ پارتی!
شێرزاد نایف
ل دووڤ وێ په‌ندا كوردى یا دبێژیت، یێ مار دیتی ژ وه‌ریسى دترسیت!! ئه‌ز دوور نابینم گه‌له‌ك لایه‌نێن نێڤده‌ولى و هه‌رێماتیك تایبه‌ت یێن هه‌ڤسوى چاوا فۆبیایا ده‌ستوورێ ئیراقێ و هه‌روه‌سا یا پرۆسا ریفراندۆمێ هه‌یین و ترس ژ پارتى دیمۆكراتى كوردستان و ژ سه‌ركردێ وێ سه‌رۆك مسعود بارزانى، ره‌هه‌نده‌كێ خرابناك نه‌بیت، چونكو ب ڤێ ئێكێ بۆ مه‌ خۆیا دبیت كو ئه‌وان ستێركا سه‌هما خوه‌ یا ل به‌ستنا كۆنگره‌یێ چاردێ یێ ڤێ حزبێ ژى گرتى و هه‌مان فۆبیا دێ هه‌ڤیرێ وێ ئاڤێ وێ ڤه‌خۆت! چونكو پارتى ب په‌یره‌وێ خوه‌ڤه‌ كه‌ته‌لۆكا دینامۆیا ده‌ستوورێ ئیراقێ و كوردستانێ یه‌ و له‌ورا چاڤێ ده‌روبه‌ران دێ ل ڤى كۆنگره‌ی بیت و ئه‌نجامێن وى، دبیت پترى هندێ بیت كو ژ چاڤێ گه‌له‌ك ژ كادرێن پارتى ب خوه‌ ب خوه‌ پتر بیت كو هند ل به‌ر دراوه‌ستییانه‌، كا چاوا خوێیا خوه‌ كرینه‌ ده‌ستوورێ ئیراقا فیدرال و شێواندینه‌ ل به‌ر به‌رزه‌ بوویه‌ ب چ رێ هه‌ڤڕكیا ده‌ستورى بكه‌ن.. ئه‌نجامێن ڤێ مایتێكرنێ ژى ددیار و ئاشكرانه‌ كا ئیرۆ چ دقه‌ومیت و چه‌ند شه‌ڕێ ڤى ده‌ستوورى دهێته‌كرن، و به‌رى هینگى ژى مژارا ریفراندۆمێ و ئه‌نجامێن وى و ره‌هه‌نێن كارڤه‌دایى و چاڤپێنه‌رابوونا سیاسى هه‌ما هه‌ر به‌حس لێ نه‌كه‌ جارێ… چونكو ژبلى پرسا ریفراندۆمێ، شوون په‌نجێن پارتى باش د ده‌ستوورێ ئیراقێ دا ددیار و ئاشكرانه‌ و تایبه‌ت ژى رۆلێ هه‌رى كاریگه‌رێ سه‌رۆك مسعود بارزانى چونكو وى ده‌مى و هه‌تا نوكه‌ ژى پارتى بهێزترین هێزا سیاسى و له‌شكرى بوو ل ئیراقێ، هینگى وه‌كو نوكه‌ نه‌بوو كو ده‌ستێن ده‌ره‌كى هند هاتینه‌ دناڤ دا، هینگى برینا ئیراقێ یا گه‌رم بوو و ئه‌مریكا و هه‌ڤپه‌یمان د زال بوون، له‌ورا یا دیاره‌ ب ته‌كه‌هون و ب بیركرن كو ئه‌و ل به‌رن هه‌مان سه‌رده‌رى ل هه‌مبه‌رى ڤى كۆنگره‌یى بكه‌ن، ئه‌ڤجا تو هزر كه‌ى دێ ب چ رێك و شێواز بیت؟! كو به‌ربه‌رست و پێئالینكان دابننه‌ به‌ر پارتى.. زۆرا یا هه‌ستیاره‌ دڤێت پارتى هه‌مى ئۆپشنێن ڤێ پرسێ دابنیته‌ پێش چاڤێن خوه‌ ل به‌راهیا وان تشتێن دى دیتر یێن نێزیكى رۆتینێ!!. چونكو په‌سه‌ندكرنا هنده‌ك په‌یره‌وان بۆ دوژمنان گه‌له‌كا گرنكه‌. دڤێت پارتى بزانیت ره‌هه‌ند و ئیفرازاتێن بریارێن كۆنگره‌یى دێ چ بن و ماسته‌ر پلانه‌ك هه‌بیت بۆ رووب رووبوونا هه‌مى هه‌ڤركیان، و ئه‌و سپیرایزه‌رێن نێگه‌تیڤ گه‌ر بهێنه‌ روودان. دێ چ بن؟.. چ به‌رهه‌ڤیان بگرنه‌ به‌ر.. پارتى یا مه‌زنه‌ و دوژمن ژى یێ مه‌زنه‌، دڤێت پارتى شه‌عبیه‌تا خوه‌ بڤه‌گه‌رینته‌ ڤه‌ مینا شۆرشێن ئیلۆن و گولان و سه‌رهلدانێ ب رێكێن دارایى، و دوپاتیێ ب كریار و ب له‌زكرن ل ئێكرێزیا ناڤمالا كوردى بكه‌ت. كارێن دیتر دوور نابینم به‌رهه‌ڤیه‌كا نه‌باش بۆ هاتبیته‌كرن.

شێرزاد نایف
جاره‌كێ گۆتاره‌ك ب مانشێتێ (حه‌لاوه‌ ل به‌رامبه‌ر نعال) مه‌ نڤیسابوو، بیرا من لێ هات ده‌مێ من ده‌ست بنڤیسنا ڤێ گوتارێ كری، به‌لێ ئه‌ڤ بازارێ دوماهیێ نووتره‌ ژ یێ كه‌ڤن، دیارده‌كا جوان د وارێ مه‌ دا په‌یدابوویه‌ ل ڤان دوماهیان دوور ژ كریارێن رێكخستى یێن ڤاڤارتنا گلێش یێن كو لایه‌نێن فه‌رمى پێ رادبن و پرۆتۆكۆلێن وه‌سا هاتبه‌ راگه‌هاندن، لێ هنده‌ك كه‌س رادبن ب كۆمكرنا كارتۆنان (مقاوه‌) یێن به‌ر كه‌لوپه‌لێن بكارئیناندى ڤه‌ دمینن، خڕڤه‌دكه‌ن و دفرۆشن، ژ سه‌رێ باژارى هه‌تا بنى نیڤا شه‌ڤێ ڤێڕا دچن و مینا دبێژن (گێسكى دده‌نێ) و وى گلێشێ خڕڤه‌بووى ل به‌ر ده‌رگه‌هێن بازار و ماركێت و مۆلان، ڤه‌دشكێنن و دهاڤێژنه‌ د پشتا لۆریێن دو تۆنى دا، كو بۆدیێن وان به‌رهه‌ڤكرینه‌ بۆ ڤى كارى، تشته‌كێ ئه‌كیتیڤه‌ ژلایه‌كى ڤه‌ باژار پێ پاك دبیت و ژینگه‌ه دهێته‌ پاراستن هه‌تا راده‌یه‌كى، پرۆسا پاككرنا باژێرڤانیێ ل سه‌ر ملێن وان سست دكه‌ت، بیاڤێ ئابوورى بلۆكه‌كى ل سه‌ر زێده‌ دكه‌ت، چه‌ندین كرێكارێن بێكار پێ ب دكار دكه‌ڤن، كاره‌كێ ب ساناهى و پاكه‌ ژى، خه‌لكه‌كى فێرى كارى دكه‌ت، یا ژ هه‌میێ گرنگتر ئه‌وه‌ هاندان به‌ر ب پتر وان كریارێن دیتر یێن وه‌كو ئه‌ڤێ تایبه‌ت به‌لخشه‌یێن مه‌زن ژ ئامیره‌یێن كه‌هربایێ و ئه‌لكترۆنى، كو ل جیهانێ هه‌میى ئه‌ڤ سامانێ به‌رزه‌ دبیت ب دروستى ناهێته‌ مفاوه‌رگرتن، دبێژن بهایێ وان كانزایێن د ناڤ ڤى گلێشى دا دگه‌هیته‌ 57 ملیار دۆلاران، مینا كانزایێن زێر، زیڤ، سفر، پلاتین .. ڤه‌كۆلین دیار دكه‌ن سالا 2019 قه‌بارێ وان ئامیره‌یان گه‌هشتیه‌ 50 ملیۆن ته‌نان! كو زێده‌بوونا وێ دیار دكه‌ت ل ناڤا هه‌ر پێنچ سالێن پێشیا وێ ب رێژه‌یا 21%. ئه‌ڤ زێده‌بوونه‌ سێجارى ته‌مه‌تى زێده‌بوونا مرۆڤان دبیت ل سه‌ر ئه‌ردى!. ئاریشه‌ ژى د هندێ دایه‌ كو كێم وه‌لاتێن دونیایێ گلێشێ دزڤریننه‌ ڤه‌ و مه‌زاختنه‌كا زۆر ل پرۆسا هاڤێتنا گلێشى دچیت، ب تنێ 17% ژ گلێشێ جیهانێ دهێته‌ ڤه‌گه‌راندن. ژبلى مفانه‌وه‌رگرتن ژ ڤێ ڤه‌گه‌راندنێ كو شێوه‌كێ (چڵ) یاتى یان ژخوه‌نه‌گرتنێ ل جڤاكا مه‌ بخوه‌ دگریت، به‌لێ سۆتن و بنئاخكرنا ڤى قه‌بارێ زۆرێ گلشی گه‌له‌ك ژینگه‌هێ تێكدده‌ت و دبیته‌ ئه‌گه‌رێ به‌ندبوونا گه‌رمێ! ئه‌ڤ زیبه‌ق و رساسێ د ناڤ گلێشى دا دهێته‌ سۆتن زیانه‌كا راسته‌وخوه‌ دگه‌هیتنه‌ كۆئه‌ندامێ مێشكى و سیهێن مرۆڤى، د ئارا دایه‌ 120 ملیۆن تون ل 30 سالێن داهاتى دا زێده‌ ببیت هه‌كه‌ نه‌هێته‌ چاره‌سه‌ركرن.. له‌ورا جهێ خۆشخالیێ بوو ده‌مێ من دیتى كرێكاره‌كى ب خركرنا ڤى گلیشى ل ڤى باژاى رسته‌كه‌كا زێرى بۆ خێزانا خوه‌ كری..

شێرزاد نایف
گه‌له‌ك جاران كاره‌سات ب سه‌ر مه‌ دا دهێن چونكو به‌رى هینگى مه‌ هزر تێدا نه‌كریه‌ و مه‌ چ تشت ب كریار ئه‌نجام نه‌داینه‌، دبیت مه‌ هزر تێدا كربیت یان ل جڤینه‌كێ سوحبه‌ته‌ك پێ شاراندبیت، به‌لێ كه‌سێ خوه‌ لێ نه‌كریه‌ خودان، و پشتى قه‌ومى ژنیكا مه‌ ئاخینك ل دووڤدا راهێلاینه‌ و گۆتیه‌ خۆزى مه‌ هۆكربا!!. بابه‌تێ من ژى شیرهه‌یێن چیایانه‌ نه‌مازه‌ ل باژارێ مه‌ دهۆكێ یا كو ل به‌ر چیایان دكه‌ڤیت و هێدى هێدى یا خوه‌ ل ره‌خێن چیایی دده‌ت و ره‌خێن وێ دهڕییێن و گه‌له‌ك جاران كه‌ڤرێن مه‌زن دهێنه‌ خار و دكه‌ڤنه‌ سه‌ر جاده‌یان و رێیێن خه‌لكى و ب سه‌ر مالان دا دهێنه‌ خار، تایبه‌ت ژى ل جهێن گه‌لیان هه‌كه‌ میناكه‌كان دیار بكه‌ین، گه‌لیێ زاۆیته‌ پارسال هه‌ڕفت بوو، پارچه‌یێن مه‌زن ژ چیایى و كه‌ڤرێن مه‌زن كه‌فتبوونه‌ سه‌ر خوارنگه‌هێن براژتنا ماسیان، ب خۆش حالی ڤه‌ دره‌نگى شه‌ڤێ بوو و ئه‌و جهێ هنده‌ یێ پڕ ژ مرۆڤان ڤێجا خێزان و زارۆك و ژن و پیر ب كۆم قه‌ستا وێرێ دكه‌ن، هه‌كه‌ وه‌خته‌كێ دیتر با دا بیته‌ كاره‌سات، هه‌ر وه‌سا گه‌لیێ بێسرێَ ده‌رازینكا باژارێ دهۆكێ، یان گه‌لیێ ئه‌ڤیكێ ئه‌و چیایێ هندێ بلند شیرهه‌كا مه‌ترسیداره‌، گه‌لیێ دهۆكێ، گه‌لیێ دێركێ، ره‌شانكێ، بێدویل، سرتا چیاێى زاوا ب درێژیا دهۆكێ، رێیا ژ ئه‌ره‌دنا به‌ر ب گوندێن ده‌ڤه‌را مزیریان و حه‌تا دگه‌هیته‌ ده‌ڤه‌را گوندێن دۆسكیان، گه‌لیێ زه‌نته‌ ل ئاكرێ حه‌تا دگه‌هیته‌ دینارتێ و گه‌له‌ك جهێن دیتر … هتد. دبیت رێڤه‌به‌ریا رێكوپرا پێزانینێن باش هه‌بن و من بهیستیه‌ ژى كو ئه‌وان ب خوه‌ گه‌له‌ك كه‌ڤر شكاندینه‌ كو نه‌كه‌ڤنه‌ خارێ!! به‌لێ بۆ یه‌ده‌گ و لبه‌ر چاڤوه‌رگرتنا هه‌ر بۆیه‌ركا ب ڤى ره‌نگى دكارن وان جهێن ب گومان بنخێڤن ب تۆڕێن سیمى هه‌كه‌ هاتو كه‌ڤر بهه‌ڕفرن دێ مه‌ترسیێ راگریت، ئه‌ڤ پلانه‌ من دیت ل توركیا گه‌له‌ك چیا یێن ب ڤى ره‌نگى ب رووبه‌رێن درێژ گرێدابوون، تشته‌كێ سه‌ركه‌فتى بوو، چونكو هڕینا كه‌ڤران یا به‌رده‌وامه‌، و لایه‌نێ په‌یوه‌ندیدار گه‌له‌ك پلان هه‌نه‌ بۆ چاره‌كرنا ڤێ ئاریشه‌یێ، یا ژ هه‌میان گرنگتر شكاندن و په‌لخاندنا كه‌ڤرێن مه‌زنه‌ كو مه‌ترسیا كه‌فتنێ ل سه‌ر بیت، پاشى ئه‌ڤ پلانێن دیتر د دووڤدا دهێن، یا دى ژى كونترۆلكرنا هنده‌ك تاخێن سه‌رپێچى باژێرڤانیێ، هه‌ر جهێ بوو خانى لێ هاتنه‌ ئاڤكرن ب شێوه‌كێ نه‌قانوونى، ئه‌و مال یێن د مه‌ترسیێ دا، تایبه‌ت ل بنارا چیایێ زاوا گه‌له‌ك مال لێ هاتینه‌ ئاڤاكرن و حسێبا هه‌ڕفینا كه‌ڤران نه‌كریه‌، بارینا بارانێ و باهۆزێن ب هێز هه‌مى جۆرێن به‌ر و كه‌ڤران دئیننه‌ خارێ، ژ به‌ر ڤان ئه‌گه‌ران حوكمه‌تێ و ئۆفیسا پلانا باژێرى (عمرانى) ئه‌ڤ جهه‌ قه‌ده‌غه‌ كرینه‌ بۆ ئاڤاكرنێ، ڤێجا گه‌له‌ك جاران وه‌لاتى دێ خوه‌ عاجز كه‌ن گه‌ر نه‌هێلن ڤان جهان ئاڤ بكه‌ن، و ده‌مێ له‌هى و كاره‌ساتێن ب ڤى ره‌نگى ب سه‌ر وان دا دهێن دێ گازندان ژ حوكمه‌تێ كه‌ن، هه‌ر وه‌كو وان خانیێن ل سه‌ر لێڤا رویباران هاتینه‌ ئاڤاكرن چه‌ند خوه‌ خستینه‌ د مه‌ترسیێ دا.! ڤێجا دا بگه‌هینه‌ خوه‌ پاراستنێ باشتره‌ ژ هندێ بچین ل مه‌زاختنه‌كا بیست جاركى ل چاره‌سه‌ریێ بده‌ین و لێقه‌ومیان قه‌ره‌بۆ بكه‌ین پشتى كو بار دكه‌ڤیته‌ سه‌ر شاخێن گایی!!.

شێرزاد نایف
هه‌ر وه‌كو ملله‌تێ رۆژهه‌لاتا ناڤین ملله‌ته‌كێ ئاشۆپى یه‌ د خه‌یالێ دا دژیت، نزاحه‌زژ كه‌توارى ناكه‌ت، یانژى خوه‌ تێناگه‌هینیت؟! ئه‌و سه‌رێ پێنچ رۆژان بوو هه‌مى مژوولى ته‌ماشه‌كرنا لافا و لایفێن قورتالكرنا وى زارۆیێ پێنچ سالى یێ مه‌غربى بوون، یێ باژارێ شفشاونێ یێ كو كه‌فتیه‌ د بیرێ دا و ل نیڤا وێ مایه‌ هه‌لاویستى، و نێزیكى حه‌فت هزار كه‌سان ژى ل جهێ روودانێ به‌رهه‌ڤ بووى، هه‌مى ژى تنێ مژوولى لافاكرن و دوعایانه‌ ژ خودایێ مه‌زن، و زكرى و هاواركرنا ناڤێ رب العالمین! و ل هیڤیێ بوون كو ئه‌ڤ زارۆیه‌ ببیته‌ وه‌كو یووسفێ مسرێ! یانكو (یۆزارسیف) ـ بلا بیت ـ كو دێ بیته‌ ئه‌فسانه‌ و موعجیزه‌! هنده‌كا دگۆتن چنینه‌ مانێ پێغه‌مبه‌ر ژى مووسا و یووسف و یوونس ژى مابوونه‌ د هه‌مان زه‌یقه‌ت دا به‌لێ ب سلامه‌تى ده‌ركه‌فتن، یان ئیبراهیم پێغه‌مبه‌ر ژ ناڤ ئاگرى ده‌ركه‌فت (سالم غانم) لێ بوو سه‌رما و سلامه‌تى.. ئه‌ڤجا ئه‌ز دبێژم بلا ما چ قه‌یدى یه‌؟!، ده‌ستێن خوه‌ پێكڤه‌ نینن و بلند كه‌ینه‌ ئه‌سمانان بۆ دوعاكرن ژ خودێ، به‌لێ هه‌ر خودێ ته‌عالا د په‌رتووكا خوه‌ یا پیرۆز دا دبێژیت (ولله فی خلقه شۆون)، و هه‌ر دیسا دبێژیت (و قل اعملوا فسیرى الله عملكم و روسوله‌ و المۆمنون)، خه‌لكى و خوه‌ ئه‌و ده‌زگه‌هێ به‌رگریا شارستانى یێ مه‌غرب ژى وه‌سا ب مه‌ندى هزر دكرن ئه‌و زارۆیێ بچووك و نازك و نیان، یێ د وێ بلنداهیێ دا فرى 32 مه‌تران ب ئه‌ردى كه‌فتى و تووشى برینداكرنا دیوارێن ئاخێ و به‌ران بووى یێن بێ دلۆڤانى، و ئه‌وێ بێهنته‌نگیا كو ئۆكسجین نه‌گه‌هیتێ و وێ سه‌رمایا ئه‌م هه‌ست ب دژواریا وێ دكه‌ین، كو سه‌ر وى دا هاتى بۆ ماوه‌یێ پێنچ رۆژێن ره‌به‌ق، و به‌ندكرنا لڤینێ و ته‌شه‌نوجا له‌شى، بێخودان، ژبلى برسێ و ترسێ ب تنێ، و ئه‌و گه‌نجێ خوه‌به‌خش ژۆردا ته‌ڤلى كورتكێ بووى بۆ رزگاركرنێ كو ئه‌و كورتكا ته‌نگ یا 45 سه‌نتیمى و جارجار كێمتر ژى، ده‌رێ وى ل بۆرینا هه‌وایى و ئۆكسجینێ ته‌نگكرى و نێزیكى وى بووى ب تنێ چار مه‌تر مابوون ده‌ستێ وى بگه‌هیتێ یان یێ وى بگه‌هیتێ، چونكو نه‌دشیا خوه‌ بچه‌مینیت، ئه‌ڤ هه‌مى هۆكارێن هه‌نێ، خه‌له‌كێ ساده‌ هزر كر هه‌ما دێ بیته‌ فلمێ هندى و ساخ ده‌ركه‌ڤیت، به‌لێ بۆچى كه‌سێ چو پلانێن ژیر رانه‌گه‌هاندن، هه‌رچه‌نده‌ وه‌خت یێ كێم بوو، به‌لێ دشیان ئه‌و هه‌مى عه‌قل و بلا وه‌لاتێن پێشكه‌فتى و ژیر ژى مینا یابانێ و ئه‌میریكا و ئه‌لمانیا و گه‌له‌كێن دیتر ب ئونلاین پلانه‌كا ب له‌ز هنارتبان، یان ده‌وله‌تا مه‌غرب له‌زربا پتر، یان یا باشتر ئه‌وبوو ئه‌و كه‌سێ ته‌ڤلى كورتكرێ بووى پتر خوه‌ ماندى كربا دبیت گه‌هشتبایێ ب هه‌ر ره‌نگه‌كى ب چنگاله‌كى هه‌لكێشابا بلا پیچه‌كا دى ئه‌و زارۆ بریندار كربا باشتر بوو ژ هندێ ب ئه‌شكه‌نجا نه‌رم بمریت، ل ڤێره‌ دخوازم بێژم یا باش ئه‌وه‌ پتریا مرۆڤان ل ده‌مێ ڤان كاره‌ساتان پتر عه‌قلێ خوه‌ بده‌كه‌ كارى ل شوینا هندێ بمینیته‌ ب گریێ و لافا و ده‌ست داهێلانێ و ژێنه‌هاتنێ، هه‌ر چو نه‌بیت بۆ هه‌مان روودان هه‌كه‌ ل پاشه‌رۆژێ رووبده‌ن، واته‌ ببیته‌ قورتالكه‌ر نه‌ك ب ته‌كه‌هوناتان ڤه‌ بمنیت!. ل داویێ ژى رێز و نه‌وازشێن خوه‌ پێكشێشى مۆرال و دلپێڤه‌برنا وى خه‌لكى هه‌میێ دكه‌م. دلێ مه‌ ژى ب وى فریشته‌ى ڤه‌ دمینت، له‌ورا بلا مرۆڤ ل چاره‌سه‌ریان بگه‌ریێت چونكو خودێ مێشك پێشكێشى مرۆڤى كریه‌ بۆ ڤان بۆیه‌ران و سوپاس بۆ خودێ بۆ هه‌ر حاله‌كى.

شێرزاد نایف

ئه‌ڤ ناسناڤێ هندێ ژ هه‌ژى و مه‌زن یێ ژ پێشمه‌رگێ كوردستانێ را هاتیه‌ به‌خشین، دڤێت وه‌لاتێن جیهانێ و تایبه‌ت یێن قولپا ئه‌تلانتیك، سه‌روبه‌رێ وى ژى هه‌مان یێ له‌شكرێن خوه‌ لێكربا، ژ پڕچه‌ككرن و كه‌لوپه‌ل و لۆجستیێ، دا كو ئه‌و تیرۆرا مه‌ترسیدار ل سه‌ر جیهانێ سه‌رى هه‌لنه‌ده‌ته‌ڤه‌، دڤێت هه‌مى پێداویستێن پێشكه‌فتى ب پێشمه‌رگێ كوردستانێ ببه‌خشن، نه‌مازه‌ داخۆیانیێن مه‌زنه‌ په‌رپرسێن وه‌لاتێن جیهانى ژى ب خوه‌ دانپێدان دابوو كو داعش ب ئێكجار قڕنه‌بوویه‌. نه‌حوكمه‌تا ئیراقێ و نه‌ ئه‌و وه‌لاتێن پشته‌ڤان هاریكارا پێشمه‌رگێ كوردستانێ دكه‌ن، هه‌مى ژى دزانن كو ده‌مێ مه‌ترسیا تیرۆرێ كه‌فتیه‌ سه‌ر جیهانێ، هه‌ر ده‌ستپێكا وان كریارێن ب ناڤێ ئیسلامێ هاتینه‌ رویدان و تایبه‌ت ل 11 سپته‌مبه‌را سالا 2001، ئه‌ڤ جیهانا هنده‌ مه‌زن كه‌فته‌ بن ترسا تیرۆرێ و چه‌ندین كریار و گه‌فێن دیتر هاتنه‌ رویدان، ئه‌ڤ رێكخراوا دبێژنێ (ئه‌لقاعیده‌) و ل دویڤ دا هاته‌ گوهارتن بۆ چه‌ندین شێوه‌یان كه‌ڤلۆژانكێ خوه‌ نووكرڤه‌.. ئۆبدێت كر.. میناكا وێ هه‌مان یا ڤى ڤایرۆسێ كۆرۆنایێ یه‌ قۆناغ بۆ قۆناغ خرابتر لێدهێت و مه‌ترسیا وى مه‌زنتر لێدهێت، وه‌كو په‌نجه‌شێرێ یه‌ چه‌ندى بهێته‌ بڕین دێ ڤێراچیت و ژ هێڤێنه‌كى خوه‌ مه‌زنتر لێكه‌ت، ئه‌ڤجا هه‌تا گه‌هشتیه‌ توندترین راده‌یێ خوه‌ كو بوویه‌ داعش یا خویاوى و ل به‌ر ده‌رگه‌هێ مه‌ قویچ بووى، ل سه‌ر وێ هه‌ژاریێ و ته‌په‌سه‌ریا ل ڤى مله‌تێ دهێته‌ كرن، ئه‌ڤ شه‌نسێ خراب ژى ب سه‌رمه‌ دا هات و چه‌ندین شه‌هید و قوربانى مه‌ پێشكێشكرن، لێ پشتى وێ حنێرا پێشمه‌رگێ كوردستانێ ئه‌نجامدایى و ئه‌فسانه‌یا داعش یا مه‌زن شكاندى و سه‌رێ وێ هه‌ڕشاندى دوماهى ئۆپه‌راسیۆن ژى كو ل باهۆزێ ب دوماهى هاتى ل سه‌ر ده‌ستێ كوردان و میرێ داعشێ ئه‌بۆ به‌كر به‌غدادى ب ده‌ڤێ دانێپێدان ب شكه‌ستنا خوه‌ كری، بۆ هه‌مى جیهانێ دیاربوو كا دلسۆزى و خه‌مخۆرى و زیره‌كیا پێشمه‌رگێ كوردستانێ چه‌ندا ئه‌كتیڤه‌، بۆ دیرۆكێ هاته‌ خۆیاكرن كو پێشمه‌رگه‌ى ئه‌ڤ سه‌ركه‌فتنه‌ بده‌ستڤه‌ئینایه‌، كو د ئه‌نجامدا دبیته‌ ده‌ستكه‌فته‌كێ جیهانى و شه‌ره‌فا پاراستنا ڤێ جیهانێ ژ مه‌ترسیا ڤان تیرۆرستێن كوژه‌ك و خراب، هه‌ژى هندێ یه‌ كو ئه‌ڤێ ناسنامه‌یێ ل سه‌ر ملێن خوه‌ راكه‌ت، هه‌مى جیهانێ ژى ب گه‌ل و ده‌ستهه‌لات ڤه‌ دانپێدان ب وێ زیره‌كى و سه‌ربه‌رزیا پێشمه‌رگێ كوردستانێ كر، به‌لێ ب مخابنى ڤه‌ پشتى سه‌ركوتكرنا تیرۆرستێن داعش ده‌ملده‌ست ئه‌ڤ رۆلى هاته‌ ژبیركرن ژلایێ جیهانێ ڤه‌ كێمه‌ك تێنه‌بن، ل ده‌سپێكا هه‌میان ژى حوكمه‌تا ئیراقێ ب زارێ سه‌رۆكێ هینگى یێ حوكمه‌تێ حه‌یده‌ر ئه‌لعه‌بادى ل ده‌مێ كۆنگره‌یێ رۆژنامه‌ڤانى خوه‌ ناڤێ پێشمه‌رگه‌ى نه‌ئینا و ئه‌وێ كه‌ربا ڤه‌شارتى د دلى دا ئه‌و گیان نه‌دایێ گۆتنا راستیێ بێژیت!. و ئه‌وان ل پشتى ئه‌نجامدانا پرۆسا ریفراندۆمێ هاتیه‌كرن هه‌ما ئه‌و بهانه‌ك بوو كو هه‌رێما كوردستانێ سزا بده‌ن، و ئه‌و چه‌ند كر ژى ب لێبرینا بۆدجه‌ و مووچه‌یێن وه‌لاتیان و دانان دۆرپێچێان ل سه‌ر هه‌رێمێ، هه‌رچه‌ند سه‌ركردایه‌تیا هه‌رێمێ ژى ب حوكمێ شاره‌زایا خوه‌ و په‌یوه‌ندیێن خوه‌ یێن دوبلۆماسى و ب هێز شیا خوه‌ ل به‌ر رابگریت و ب هه‌دارا حوكمه‌تێ و مله‌تى زیان مه‌زنتر لێنه‌هاتن، به‌لێ دڤیابا قه‌ره‌بۆیا پێشمه‌رگێ كوردستانێ هاتبا كرن و پشته‌ڤانى لێ هاتباكرن د بزاڤێن سه‌رخوه‌بوونا خوه‌ دا ب ئه‌نجامدانا ئه‌نجامێن ریفراندۆمێ، ئه‌ڤجا ئه‌ڤه‌ ژیواره‌كه‌ و دڤێت بۆ خوه‌ وانه‌ و سه‌ربۆران ژێ بگرین بۆ جارێن بهێن.

شێرزاد نایف
دوور ژ مژارا نه‌ریت و میتیۆلجیێن ئایینى یێن بۆزیان ژلایێ ئاییندار و ره‌به‌نێن وان و هه‌ر وه‌سا یێن كریستیانان و ئه‌رتودوكس و كاتولیك بۆ ڤه‌كرنا ده‌رگه‌هێ دانپێدان ب گونه‌ه و شاشیێن خوه‌ ل به‌رامبه‌رى سندۆقێ و ل پشترا ژى ئه‌و زه‌لامێ ئایینى گوهداریا هه‌میان دكه‌ت، كو تۆبه‌ بۆ وان دهێته‌ رۆخسین بۆ هندێ مرۆڤ ل گه‌ل دلێ خوه‌ سپى ببیت، و سوبه‌هیا وى گه‌شتر ببیت. لێ نها ئه‌م وه‌كو جڤاك و تاكین ڤێ ژینگه‌هێ، وه‌ختێ ئه‌م شاشیێن خوه‌ دكه‌ین، دچنه‌ د ده‌رگه‌هێ رابردویى دا، و ل خوه‌زڤرین و په‌شێمانى ژى گه‌له‌ك ژ وان شاشیان نازڤرینن، به‌لێ هه‌كه‌ ئه‌و په‌شێمانى هه‌بیت ژى باشتره‌ ژ كو نه‌بیت، بلا راستڤه‌نه‌كه‌ت، به‌لێ ئه‌وێ مینا ب عه‌ره‌بى و ب ئیسلامى دبێژن، (أچعف الایمان) لاوازترین باوه‌ریى یه‌، و دبیت ژى قه‌نجیه‌ك بیت، به‌لێ ئه‌ڤ قۆناغا په‌شێمانیێ ئه‌رێ ئه‌م گه‌هشتینێ، پشتى كو مه‌ هه‌میان ته‌خسیرى د گه‌نده‌لیێ و كرنا شاشیان و گونه‌هان دا نه‌كری!, د ڤێ سه‌ربۆرا خوه‌ یا كوردستانیبوونێ دا، مه‌هه‌میان بێ ده‌ستنشانكرن، هه‌ر كه‌س و ل جهێ خوه‌، ئه‌ڤجا ژ دزیێ بگره‌، پیچاتیێ، دره‌وكرنێ، واسته‌یێ، دامه‌زراندنا یێ نه‌ژ هه‌ژى یان ب جوداهیكرن، خیانه‌تكرن، غه‌دركرن، رێزنه‌گرتن ل یێن ژێرخوه‌ دا، نیازخرابى و …هتد. ژ كریارێن نزم ـ ب رێز ڤه‌ ـ ئه‌ز نابینم ئه‌م هێشتا گه‌هشتبینه‌ قۆناغا ڤێ په‌شێمانیێ و گله‌یكرنا وژدانێ ژ مه‌، هه‌ر وه‌كو حه‌مه‌ربوون د فه‌رهه‌نگا مه‌ دا نینه‌، به‌رپرس دلێ خوه‌ ب ده‌ستهه‌لاتێ ناسۆژن، برا دلێ ب برای ناسۆژیت، كێم كه‌س خوه‌ ل هه‌ڤدو دكه‌نه‌ خودان، و ل هه‌ڤالێن خوه‌ ب سه‌میان ده‌رناكه‌ڤن، به‌لێ یا د دلێ مه‌ هه‌میان دا كو ئه‌وێ دانپێدانێ بكه‌ین، ئه‌وا دبێژنێ دانپێدانا قه‌نجێَ!! هه‌ر چه‌نده‌ ئه‌و دانپێدان وان گونه‌هان ب ئێكجارى راستڤه‌ ناكه‌ت، به‌لێ چریسكه‌كه‌ ژ هیڤیان بۆ پاشه‌رۆژا نفشێ پشتى مه‌ یانكو یێ نها گه‌شه‌ دكه‌ت، جخسیه‌كه‌ دێ شین بیته‌ڤه‌، بلا نیازپاكیێ بچینین دا زارۆیێن مه‌ژى وێ نیازێ بكه‌نه‌ كریار.. (انما الاعمال بالنیات). له‌ورا وه‌رن دا ئه‌م ژى ڤى ده‌گه‌هى ڤه‌كه‌ین هه‌كه‌ ب رێیا ئایینى مه‌ نه‌بیت، ژبلى رۆخسینا توبه‌ نصوحا، دبێژیت خودێ هه‌مى گونه‌هان دغه‌فرینیت، و ده‌رگه‌هێ تۆبێ یێ ڤه‌كریه‌، وه‌رن دێ باشتر بیت گه‌ر ئه‌م ل ده‌ستپێكێ ل گه‌ل خوه‌ ده‌سپێبكه‌ین لگه‌ل خوه‌ په‌شێمان ببین، و پاشى ل خوه‌ بزڤرین پێداچوونه‌كێ د كار و كریارێن خوه‌ دا بكه‌ین، پاشى توبێ راگه‌هینن بۆ یێ به‌رامبه‌رى ژى، تشته‌كێ هه‌یى بكه‌ینه‌ پیڤه‌ر ئه‌و ژى دبێژنێ (قیاس النفس) وه‌ختێ مرۆڤ نانه‌كى بخۆت، هه‌كه‌ نانه‌كى نه‌ده‌ته‌ هه‌ڤالێ خوه‌ یێ برسى بلا هه‌ما هه‌ر چو نه‌بیت، كه‌یفا مرۆڤى ب هه‌ژاریا وى نه‌ئێت. هه‌ر چه‌نده‌ مه‌ ماف یێ لسه‌ر ئێك هه‌یى ده‌ستێێ یێ دى بگریت، به‌لێ كى د خوینیت و كى دنڤیسیت، دڤێت یێ مه‌ شاشى ل هه‌مبه‌رى وى كری بۆ قه‌ره‌بۆ بكه‌ت یان داخوازا لێبۆرینێ ژێ بكه‌ت! و گیانێ لێبۆرینێ بكه‌ینه‌ ره‌وشتێ خوه‌ ئه‌م خساره‌ت نابین!! .

شێرزاد نایف
هه‌ڤسه‌نگیه‌كا سه‌یره‌ ئه‌ڤ كۆچبه‌ریا خه‌لكێ مه‌ یێ ئیراقێ و ب تایبه‌ت ژى یێ هه‌رێما كوردستانێ بۆ ده‌رڤه‌ى وه‌لاتى، ئه‌ڤ هه‌مى گل و گازنده‌یێن زۆر یێن دهێنه‌كرن، بۆچى و پتریا وى خه‌لكێ چۆچ دكه‌ن یێن هه‌رێمێ كو ره‌وشا وان یا دارایى یا باشه‌ و ب گۆره‌یى هاتیه‌ خۆیاكرن ژ لایێ هنده‌ك نڤیسینگه‌هێن گه‌شتوگوزاریێ ڤه‌ كو مه‌هه‌میان ژ وان بهیستیه‌ كو هه‌ر كه‌سێ بچیت وێ رێكێ نه‌فه‌رى و كێمى ده‌فته‌ره‌كا دۆلارى هه‌یه‌ و لسه‌ر دا، هه‌ر كه‌سێ ئه‌ڤ گۆمه‌ هه‌بیت هه‌ما بۆ خۆ فێقى بكریت و بفرۆشیت لسه‌ر كۆشكه‌كا لسه‌ر جادێ دێ شێت قازانج كه‌ت و ب شۆل بكه‌ڤیت، ئه‌م یێن دبینین رۆژ بۆ رۆژ خه‌لكێ ژده‌رڤه‌ یێن دهێنه‌ ئۆفیسا ئاكنجیبوونێ و نڤیسینگه‌هین هاورده‌كرنا كرێكارێن بیانى مه‌ زۆر هه‌نه‌، باشه‌ هه‌كه‌ شۆل نه‌بیت پا ئه‌ڤه‌ كینه‌ و دهێنه‌ چ؟! یان ئه‌و كارێن ئه‌و دكه‌ن گه‌نجێن مه‌ ژخۆ ناگرن بكه‌ن؟! ڤێجا ژ به‌ر باوه‌رنامه‌یێن خوه‌یه‌ یان ژبه‌ر نه‌رییته‌كا جڤاكى یه‌؟ ژ وه‌لاتێ توركیا دهێن ل ڤێره‌ خوارنگه‌هان ڤه‌دكه‌ن و جهێن بازارى و كرین و فرۆتنێ ڤه‌دكه‌ن، ژ سووریا دهێن ژ جۆرجیا دهێن، ژ مسرێ دهێن، ل ئوردن و لوبنان دهێنه‌ هه‌رێما كوردستانێ كاردكه‌ن و ژ ره‌خه‌كى ڤه‌ خه‌لكێ مه‌ یێ كۆچبه‌ر دبیت. كه‌س تێناگه‌هیت هه‌ڤسه‌نگیه‌كا ئالۆزه‌، وه‌كو دى ژى بارێ ئه‌منى یێ سه‌قامگیره‌ و دبیت ژى لسه‌رانسه‌رى جیهانى چ باژار نه‌بن ژ یێن هه‌رێمێ ئارامتر بن، تایبه‌ت ژى دهۆكێ.. گه‌له‌ك حاله‌ت هه‌نه‌ نابیت مرۆڤ 100% گونه‌هێ بێخیته‌ سه‌ر ملێن ده‌ستهه‌لاتێ، هه‌ره‌وه‌كو یا بوویه‌ نه‌ریته‌ك هه‌ر تشتێ بوو دێ تبلا خوه‌ كه‌نه‌ د چاڤێن ده‌ستهه‌لاتێ و حوكمه‌تێ دا، باشه‌ بۆچى ده‌مێ ره‌وشا هه‌رێمێ یا باش و بۆدجه‌ و مووچه‌ نه‌هاتینه‌ بڕین، حوكمه‌تێ ژى ته‌خسیرى نه‌دكر د دامه‌زراندنا خه‌لكى دا؟! و ئه‌م دزانین ژى ئه‌ڤا هاتیه‌ روودان هه‌مى هۆكار چنه‌ و كینه‌ ئه‌و دۆخ بۆ مه‌ رێسایى پیلانێن وان دوژمنانه‌ یێن هێرشێن سه‌ربازى كرینه‌ وه‌لاتێ مه‌!. نه‌شیان یێن ب ڤان رێیان دهێنه‌ مه‌، ده‌ستهه‌لاتا مه‌ یا ب هێزه‌ ب تنێ مینا دبێژن.. فه‌قیرى ژه‌نگا مێرانه‌، دوژمنى ژى ل وى وه‌ته‌رى دایه‌، كو به‌ڕكى ژ بن پیێن حوكمه‌تا بكێشیت، ئه‌ڤجا هۆكار دیار و ئاشكرانه‌، چونكو حوكمه‌تا ئیراقێ ژى د دۆخه‌كێ ب ڤى ره‌نگى دایه‌ به‌لێ چونكو پارێزگه‌ه گه‌له‌كن و قه‌ربارێ وێ مه‌زنه‌ دیارناكه‌ت، بلا هه‌لسه‌نگاندنا ب به‌لانس ب ڤى ره‌نگى بیت، و من نه‌گۆتیه‌ ده‌ستهه‌لاتێ چو شاشى ژى نینن، به‌لێ ب وژدان حاكم بیت. نه‌كو كێر زۆر بن ل سه‌ر له‌شه‌كى هه‌كه‌ بكه‌ڤیت، به‌لێ ئه‌م باش دزانین كو ده‌ستهه‌لاتا و تایبه‌ت پارتیا زۆرینه‌ د ناڤدا ره‌ه و ریشالێن وێ د درێژن و دچرن، ناكه‌ڤیت، دۆخه‌كێ جودایه‌ ئه‌گه‌ر ژى هه‌ر دوژمنێن مرۆڤێ كورد بۆ خاستینه‌، هه‌كه‌ نه‌ بۆچى گه‌نجێن بیانى قه‌ستا وه‌لاتێ مه‌ دكه‌ن؟!